43 YOSEFE
Alisungile Bwino Ulupwa Lwakwe
UMUFYASHI umwaume alingile ukulabombesha pa kuti alesakamana umwina mwakwe na bana, kabili afwile ukuba uwashipa pa kuti alebacingilila. Ifi fine e fyo Yosefe, kabasa umwina Nasarete alefwaya ukuba. Na lyo line, ilyo ashilaupa alikwete ubwafya ubukalamba kabili alingile ukuba uwashipa. Maria umukashana uo akobekele alimite, lelo umwana ali no kukwata taali wakwe. Maria alimulondolwelele ifyo cali pa kuti emite, lelo Yosefe alifililwe ukusumina no kushininkisha ifyo Maria amwebele. Finshi acitile?
Baibo ilanda ukuti Yosefe “ali uwalungama,” alekonka amafunde ya kwa Yehova, ali uwa cikuuku kabili uwa luse. Ilyo aishibe ukuti Maria alimite, alitontonkenye sana pa fyo ali no kucita. E ico pa kuti acingilile Maria na pa kuti emuseebanya, apangile ukumuleka mu bumfisolo. (Pali ilya nshita umwaume no mwanakashi nga bakobekelana, abantu balebamona fye kwati nabopana.) Nomba Yehova atumine malaika ukuyalanda na Yosefe mu ciloto. Malaika aebele Yosefe ati: “Witiina ukusenda umukashi obe Maria ku mobe.” Lyena amwebele no kuti ifyo Maria amwebele fyali fya cine. Umwana uo Maria aali no kukwata aali mwana wa kwa Lesa, kabili e wali no kuba Mesia!
Yosefe balimupeele umulimo uukalamba uwa kukusha Umwana wa kwa Lesa
Yosefe alishipile kabili “alicitile ifyo malaika wa kwa Yehova amwebele.” Alitendeke ukusunga bwino umwina mwakwe uwali no kukwata umwana wa kwa Lesa. Nomba kwali na fimbi ifyali no kucitika ifyalekabila ukuti abe uwashipa sana.
Tapakokwele, Kaisare Augusti afumishe ifunde lya kuti abantu bonse bafwile ukuya uko bafyalilwe mu kulembesha amashina. E ico Yosefe alingile ukuya ku Betelehemu. Maria nalimo ena talingile ukuya ku Betelehemu. Na lyo line, Yosefe alimusendele pantu nalimo aletontonkanya ukuti nga ali nankwe e lyo engamucingilila bwino. Kanshi nangu ca kuti pali iyi inshita Maria ali mupepi no kupaapa, balyendele intamfu iitali ukuya ku Betelehemu. Ilyo bafikile ku Betelehemu, inshita ya kuti Maria akwate umwana yalifikile, kabili Yesu alifyelwe. Afyaliilwe umwaleliila ifitekwa.
Nangu ca kuti bali bapiina, Yosefe alebombesha ukusakamana ulupwa lwakwe. Yosefe na Maria balitwele Yesu kwi tempele ku Yerusalemu pa kuti batuule ilambo nga fintu Amafunde ya kwa Lesa yalandile. Apo bali bapiina, batuulile utuni tubili utunono. Ilyo papitile inshita, ababukila ku ntanda, nalimo abafumine ku Babiloni, balimwene “ulutanda” kabili balitendeke ukulukonka. Ulu ulutanda lwabatungulwile ku ng’anda ukwali Yosefe na Maria mu Betelehemu. Ilyo bafikile ukwali Yosefe na Maria, balipeele umwana ifya bupe. Nomba ilyo baile fye, malaika wa kwa Yehova aebele Yosefe mu ciloto ukuti Imfumu Herode yalefwaya ukwipaya Yesu. E ico abebele ukuti bafulumukile ku Egupti.
Yosefe alishipile, kabili bwangu bwangu alimine ubushiku no kusenda umwana no mwina mwakwe, kabili baile ku calo ca kutali ku Egupti. Bushe Yosefe ali no kulasunga shani ulupwa lwakwe ku Egupti? Ifya bupe ifyo ababukila ku ntanda bamupeele fyalilengele alasunga bwino ulupwa lwakwe. Ilyo papitile inshita, Yehova aebele Yosefe ukuti abwelele no lupwa lwakwe ku calo cabo. Nomba kateka wa mu citungu ca Yudea umwali umusumba wa Betelehemu ali munkalwe. E ico Yosefe taile ku Betelehemu, lelo aile ku Nasarete nga fintu Yehova amwebele mu ciloto.
Mu Nasarete e mo Yosefe na Maria batendeke ukwikala, kabili Yosefe alitwalilile ukubomba umulimo wa bukabasa pa kuti alesakamana Yesu e lyo na bana bambi 6 nelyo ukucilapo abo bakwete. Lelo ico abikileko sana amano kubasambilisha pali Yehova e lyo no kupepa Yehova capamo no lupwa lwakwe. Lyonse baleya kwi sunagoge na ku mitebeto iyalebako ku Yerusalemu uko baleya mu kusambilila pali Yehova. Umuku wa kulekeleshako uo Baibo yalanda pali Yosefe ni lilya aile ku Yerusalemu no lupwa lwakwe ninshi Yesu ali ne myaka 12. Ilyo balefuma ku Yerusalemu, Yosefe na Maria balisakamikwe pantu tabaishibe ukwali Yesu. Nangu ca kuti Yosefe alisakamikwe sana, alitemenwe ilyo ena na Maria basangile Yesu mwi tempele. Ilyo babwelelemo ku mwabo, Baibo ilanda ukuti Yesu ‘alitwalilile ukunakila’ abafyashi bakwe.
Baibo tayalanda ilyo Yosefe afwile, lelo ilyo ashilafwa, alisambilishe Yesu umulimo wa bukabasa, pantu Yesu tabalemwita fye ukuti “umwana wa kwa kabasa,” lelo balemwita no kuti “kabasa.” Yosefe ali uwashipa, uwa cishinka kabili uwa cikuuku. Alicingilile umwina mwakwe na bana, alebasunga bwino kabili alebasambilisha pali Yehova. Ifyo Yosefe acitile, e fyo Yehova afwaya na bafyashi abaume balecita.
Belengeni ilyashi lya mu Baibo:
Lanshanyeni:
Bushe Yosefe alangile shani ukuti aali uwashipa?
Ishibilenipo na Fimbi
1. Apo Maria ali mwana wa kwa Heli, mulandu nshi Baibo pali Luka 3:23 ilandila ukuti Yosefe ali “mwana wa kwa Heli”? (w17.08 ibu. 32 para. 4)
2. Cinshi nalimo calengele Yosefe epanga icupo na Maria ilyo Yesu ashilafyalwa? (w03 12/15 ibu. 5 para. 5)
3. Finshi filanga ukuti Yosefe alebombesha? (ia amabu. 166-167 amapara. 15-18) A
Icikope A
4. Cinshi twingalandila ukuti Yosefe nalimo afwile ninshi Yesu talafisha ne myaka 20 nelyo ninshi e lyo acilileko fye panono pali iyi myaka? (w17.07 ibu. 13 para. 8, futunoti.)
Tontonkanyeni pa fyo Mwingasambililako
Yosefe aleumfwila Yehova na lintu balemweba ukucita ifintu fimo ifya-afya. Finshi abafyashi bengasambililako? (Mat. 1:20, 24; 2:13-15, 19-21)
Finshi tusambililako kuli Yosefe pa kubika Yehova pa ntanshi mu lupwa lwesu? (Luka 2:41) B
Icikope B
Ni muli finshi fimbi umo mulingile ukuba abashipa nga filya Yosefe aali?
Ifyo Mufwile Ukutontonkanyapo Sana
Finshi ili lyashi lilensambilisha pali Yehova?
Bushe ili lyashi lyaikatana shani ne fyo Yehova afwaya ukucita?
Finshi ningatemwa ukwisaipusha Yosefe ilyo bakesamubuusha?
Sambililenipo na Fimbi
Moneni muli iyi vidio ifyo Yosefe acitile ifyo Yehova alefwaya ukuti acite.
Kuti twapashanya shani Yosefe na Maria nga ca kuti ubuteko bwapanga ifunde ilyo tulemona ukuti lyalalenga ifintu fitubipile?