Ukusekelela mu Kulobolola mu India

Nga fintu cashimikwa na F. E. Skinner

KULI ine cali mupepi ne cacila pa cishingasuminwa—amabungano 21 mu ndimi ikumi, ukucila pali 15,000 ukusangwako ku kusambilila ubupilibulo bwa bulungi bwa bulesa, kabili 545 ukubatishiwa mu kulangilila ukutemwa kwabo kuli Lesa mukalamba uwa bulungi, Yehova! Kwena ku baba 9,000 Inte sha kwa Yehova mu India, ici cali capulamo ica 1989. Lelo kuli ine cali ukucilisha ica kulengo ukusekelela. Mulandu nshi? Pantu nshali nakwelenganya nakalya ica kucitika cikalamba ica musango yo lintu pa kubalilapo nanyantile pa mushili wa mu India mu July 1926. Lilya kwaliko bakasabankanya abanono nga nshi 70 aba bukombe bwa Bufumu mu calo conse. We kupeelwa kwa mulimo kuntu umunandi na ine twapokelele imyaka ukucila 63 iyapitapo!

Fintu Naishile ku India

Mu May 1926 nasangilwe kwi bungano likalamba mu London, England, kabili pa numa fye ilyo line nabwelele ku ŋanda yandi mu Sheffield. Inshiku shafulilako pa numa, ilyo nabwelele ukufuma mu mulimo wa mwi bala, nasangile telegramu ilendolela. Yabelengelwo kuti: “Judge Rutherford alefwaya ukukumona.”

Munyina Rutherford, presidenti wa cibili uwa Watch Tower Society, aishile kwi bungano lya nomba line ukufuma ku New York, kabili ali acili mu London. Ulucelo lwakonkelepo mwi shitima pa kubwelelamo ku London, naletontonkanya ukuti, ‘Cinshi cintu ici cilepibula?’ Pe ofesi lya musambo, natwelwe kuli Munyina Rutherford, kabili anjipwishe ukuti: “Bushe kuti wasakamana lubali nshi lwa calo luntu ulebombamo?”

“Iyo,” e fyo nayaswike.

“Bushe kuti watemwa ukuya ku India?”

“Ni lilali lintu mwingatemwa ine ukuya?” E fyo nayaswike ukwabulo kushingashinga. Muli ifyo, imilungu itatu pa numa, George Wright na ine twali mu bwato ukulola ku India. Nali ne myaka ya bukulu 31, kabili takwali ukutwishika mu muntontonkanya wandi no mutima pa lwa cintu nalefwaya ukucita mu bumi bwandi.

Ukupingulapo pa Nshila ya Bumi

Ukufika mu 1918 inkondo ya calo iya kubalilapo yalipwile, kabili e lintu fye napwile imyaka yandi ine mu bushilika bwa cina Britain. Nakwete ubuseko mu kukopa ifikope no kulanda kwa pa mulabasa, na mashuko ayengi ayasuma aya ncito yali ayaisuka kuli ine. Na kabili, nalelanguluka icupo. Nalyo line, pa nshita imo ine, naleisa ku kumfwikisha ulwa fintu ifyo ifyaleyalula ukutonta konse ukwa bumi bwandi.

Tata ali napokelela amabuku yonse aya Studies in the Scriptures, kabili kolopota, nga fintu bapainiya baleitwa ilyo, atendeke ukusambilila Baibolo no lupwa lwesu. Umwanakashi aali ni kafundisha wa pa sukulu. Mu nshita, ibumba lya balumendo aba mushinku wandi baleya ku ŋanda yakwe cila Cibelushi ku kunwako tii ne sambililo lya Baibolo. Mu kubwekeshabwekeshapo atwebele ukuilengo kubomfiwa kuli Yehova, ukusoso kuti: “Te kwesha ukukaana ukupeelwa kwa mulimo.” Na kabili ankoseleshe ukutwalililo mushimbe.

Pa nshita imo nalwishenye na cintu nali no kucita. Amashiwi aya kwa Yesu kuli kateka umukankala umulumendo pali Mateo 19:21 yalingafwile: “Nga wafwayo kubo wafikapo, kabiye, ifyo wakwata ushitemo indalama, kapeele na babusu, no kukwate fyuma mu mulu; e lyo wise unkonke.” Natwele kalata wa kuleke ncito ku kampani nalebombako, kabili mu kati ka myeshi itatu nabele kolopota. Ici, pamo pene no kupingulapo ukwa kutwalililo mushimbe, camfishishepo ku kupokelela kulya ukupeelwa kwa mulimo kwaumo mutengo ku India imyaka ine pa numa.

Ibala Lishaiwamina Ilipya

George Wright na ine twapeelwe umulimo ukwangalila ukushimikila kwa Bufumu te mu India mweka lelo na kabili mu Burma (nomba Myanmar) na Ceylon (nomba Sri Lanka). Pa numa, Persia (nomba Iran) na Afghanistan fyalisanshiweko. Incende ya India yalicepako mu nshila imo pali United States, lelo impendwa ya bwingi bwa bantu yali imiku yafulilako ubukulu. Yali ni mpanga mu kuba ne fya kulya fyapusanapusana, imyata, ne ndimi, mu kuba na bantu ba fisumino fyapusanapusana ifya butotelo—abaHindu, abaShilamu, abaParsis, abaJaini, abaSikh, na baBuddha, pamo pene na baKatolika na baProtestanti.

Umulimo wa kushimikila wali nautendeka mu India mu 1905, kabili wapokelele ukukoselesha lintu Charles T. Russell, presidenti wa kubalilapo uwa Watch Tower Society, atandele mu 1912. Ukulanshanya kwa kwa Russell na A. J. Joseph, umusambi wa Baibolo uwapimpa uwacaice, kwatungulwile ku mapekanyo yabelelela ku mibombele yatwalilila iya kushimikila. Joseph apilibwile ifitabo fya Baibolo mu lulimi lwakwe ulwa cikaya ulwa ciMalayalam kabili aendele no kupeela amalyashi apakalamba, ukucilisha mu India wa ku kapinda ka ku kulyo. Ilelo, mupepi na citika uwa mpendwa ya bakasabankanya aba India bekala muli iyi incende umo iciMalayalam cilandwa, nangula ni 3 peresenti fye uwa bwingi bwa bantu mu India e bekala kulya. Iyi ncende, iyali kale Travancore na Cochin, yabele Icalo ca Kerala mu 1956.

George Wright na ine twakomboshenye pa kati ka kusangwa kwi ofesi lya Bombay no kuya ku nyendo sha kushimikila ishalundwapo. Mu kukumanina twabomfeshe imisebo ya nyanji iya India, bakabalwe, ne fikocicala. Pa numa twabomfeshe motoka. Imifwaile lilya yali fye kusha ifitabo no kulaalika abantu ukwisa ku cifulo ca kulonganinapo ice sambililo lye bumba. Twapampamine pa Bena Kristu ba mwi shina abalande ciNgeleshi.

Mu kutendelako, napeelwe amashina na maadresi ya bonse bakalembesha aba Watchtower. Ubwingi ubwa aba bali bantu babomba mu nyanji nelyo ababomba ku posti. Natandalile uuli onse uwa bene ku kusapika ubuseko bwine bwine. Pa myake iingi naleya ku Punjab mu India wa ku kapinda ka kuso mu January no kwenda ukufuma ku Lahore ukufika ku Karachi. Apantu icinabwingi bali abeni kuli Baibolo, imishi uko kwali Abena Kristu ba mwi shina fye yali inono kabili iyatalukana.

Munyina aali no kwenda na ine nga kelula, kabili twaikele no kulya na bantu. Abekala mishi baikele mu mayanda ayakuulwa na matafwali ayabishi, mu kuba ne mitenge nalimo iyafimbwa ne cani nelyo imbao. Baleele pa macharpoy, amacila ayakwata imikonso ine iya cimpangilile ca fimuti mu kuba no kutansha kwa mwando. Ilingi ba shibulimi kuti baikala pa macharpoys, yabo mu kuba na Baibolo mu minwe, ukupeepa icinkuli mu kuba ne tete ilyalepa citika ukufika kuli mita umo, ukukupukula ukufuma kwi lembo ukuya kwi lembo lintu twalondolwele icine ca kwa Lesa kuli bene. Ukulongana kwa pa nse kwashininkishe ukwa kufumamo cimo, nga fintu ulubali lwa ciputulwa cikalamba ica mwaka cali icabule mfula. Ilintu abengi abena Europe bali abacilishapo icilumba ku kusangwa ku kulongana kwa musango yo, abena India kuti balongana ukuli konse.

Twaeseshe ukusabankanya ifitabo mu ndimi ishingi nga fintu cali no kucitikako. Akatabo World Distress mu lulimi lwa ciKanarese kakumene no kutunguluka kwaibela. Kaseseshe kalemba we lyashi uwa nyunshipepala ya ciKanarese iya butotelo ku kutulaalika ku kupayanya ifipande ku nyunshipepala yakwe, kabili pa nshita shimo, twaanenye icitabo ca Deliverance nge lyashi cila milungu ibili.

Imyaka ukufuma 1926 ukufika 1938 yamwene icipimo cikalamba ica kushimikila kuli bapainiya ba lupikwe. Twaendele amamailosi amakana, ne cipimo cikalamba ica fitabo calishalikwe, lelo ukwingilishiwako kwali ukunono. Ukufika mu 1938 kwali bapainiya 18 fye na bakasabankanya 273 mu filonganino 24 ifyasalangene India yonse.

Mu Kati ka Nkondo ya Calo iya Ii

Inkondo ya Calo iya II yatendeke mu 1939, nalyo line twatwalilile fye no mulimo wesu uwa kushimikila. Na kuba, mu kubangilila mu 1940 umulimo wa bunte bwa mu musebo walitendeke. Nangu fye ni bankashi yesu abena India balibuulilemo ulubali, icili icatashiwa mu mimwene ya myata ya mu mwabo. Imyaka pa numa umusambi wa Baibolo aebele Nte uwamwipwishe ku kwakana mu mulimo wa musango yo ukuti: “Ndi mwanakashi umwina India, te kuti monwe ndelanda ku mwaume pa musebo pantu kuti nabo walengwe nsoni mu bwina mupalamano monse. Te kuti nande ku mwaume pa musebo nangu fye ali muntu wandi.” Nangu ni fyo, bankashi aba Bwina Kristu mu India baliba abapimpa mu butumikishi bwa cintubwingi.

Muli iyo myaka ya mu kubangilila, amabungano na yo yene yalepekanishiwa. Ulucelo lonse lwalepeeleshiwa ku mulimo wa mwi bala, icasanshishemo apakalamba ukwendauka amamailosi ayengi ukweba abekashi na bapitanshila pa lwa kulongana kwa cintubwingi. Ukucila pali 300 balisangilwe kuli kumo ukwa uku, ukulongana ukucitilwa mwi samba lya cintelelwe ca nsengu ne cimpangilile ca mabula ya kakoma. Lelo tacalebomba ubusuma ubwingi ku kushininkisha inshita ya kutendekelako, apantu abantu abanono e bakwete inkoloko. Baishile fye pa nshita lintu batemenwe ukucita cene, kabili ukulongana kwaletendeka lintu ibumba lyalinga lyaleba nalilongana. Abashaipempenkanya batwalilile ukufika lintu ukulongana kwatwalilile.

Programu aletwalilila ilingi line ukufikila insa yalenga ikumi ubushiku, kabili lyene abengi bali no kwenda amamailosi pa kuya ku mwabo. Nga ca kuti kuli ulubuuto lwa mweshi, calewamisha; kwaleba ukwatalala kabili ukwa kuipakisha. Nga ca kuti takuli umweshi abantu babuulile imisambo ya tukoma no kutwalushisha muli toci. Lintu twasanikwa, ulubuuto lwayakile mu kukashikila. Lintu ulubuuto lwalundwapo lwafwaikwe, toci yalisunshiwe mu mwela ukufikila lwatimukila mu lubingu. Ici capeele ulubuuto lwalinga ku kufwaya inshila pa mushili wabipa.

Mupepi ne yi nshita ukubinda ukwa kamfulumende kwalibikilwe pa kulete ifitabo fya Sosaite ukufuma ku nse ya calo ukwingisha mu India na Ceylon. Ica kupulintilako cesu icinono mu Travancore calipokelwe, kabili kamfulumende mukalamba akambishe ukulesha ukupulinta kwa fitabo fyesu. Pa numa, mu 1944, umo uwa bamunyinefwe uwalebelesha ukucina kwa ku malaiti aleundapa Sir Srivastava, minisita wa mu Ŋanda ya Mafunde iya Nkombe ya Calo Cimbi, umulandu wa cibindo walitwelwe kuli wene.

“Cisuma, wisakamana,” e fyaebelwe munyinefwe. Sir Srivastava alondolwele kuli wene ukuti Mr. Jenkins (minisita uushalangulukileko ukulola ku mulimo wesu) aali no kulambuka mu kwangufyanya kabili cibusa musuma uwa kwa Sir Srivastava aali no kupyana wene. “Ukebe Mr. Skinner ukwisa,” e fyakoseleshe Sir Srivastava, “kabili nkamulondolola kuli Sir Francis Mudie,” impyani ya kwa Jenkins. Mu kupelako, nalitilwe; nalandile na Mr. Mudie, kabili lyene icibindo mu kubamo ubulashi califumishiwepo pa December 9, 1944.

Imilandu ya Kusekelelapo

Ica kulenga ukusekelela kukalamba caishile mu 1947 lintu bamishonari bakanshiwa ku Gileadi bafikile mu India. Ukufika kwabo kwacitikile pamo ne nshita yakakala mu lyashi lya kale ilya cina India, ukukuma kuli ulya wine mwaka, pa August 15, ukulubuka kwalipokelwe ukufuma ku kuteka kwa cina Britain. Lintu uluko lwayakanikene muli buHindu bwa ciIndia no buShilamu bwa ciPakistan, ukwipayaulula kwa mulopa kwalicitike. Te mulandu ne ci, abapwishishe sukulu babili aba ku Gileadi batuminwe ku Pakistan, iyo iyabele uluko lwalubuka pa August 14. Mu kwangufyanya bamishonari na bambi ikumi balebomba mu India iine, kabili na bambi abafulilako balifikile ku kwaafwa mu myaka yakonkelepo.

Caletele ukusekelela kwalundwapo ku mutima wandi nga fintu imibombele ya kuteyanya yalimikwe. Umulimo wa muputule watendeke mu 1955 lintu munyina Dick Cotterill, uwapwishishe sukulu ku Gileadi, asontelwe nga kangalila wa muputule uwa kubalilapo. Abombele mu citetekelo ukufikila imfwa yakwe mu 1988. Lyene, mu 1960, twakwete ukupekanya kwesu ukwa kubalilapo ukwa kwa kangalila wa citungu uwa lyonse, icabombele ifingi ku kwaafwa ukwingi imiputule. Pa numa ya 1966 takwali bamishonari balundwako abasuminishiwe ukwisa mu calo. Lelo mu kwangufyanya umulimo wa bapainiya baibela waliswike, kabili bapainiya bafikapo abena India balituminwe ku fifulo ifingi ifya India. Ilelo, kwabako mupepi na 300 muli uyu mulimo.

Tacali ukufikila 1958 e lintu mu kupelekeshako twafikile pali 1,000 bakasabankanya ba Bufumu. Lelo lyene umusenselo walininineko, kabili nomba twalikwata ukucila pali 9,000. Mu kulundapo, abasangilwe ku Cibukisho cesu ica mu 1989 24,144 balanga ukuti abantu abengi abalesekelela balefwaya ukwafwilishiwa. Sri Lanka nomba musambo wapaatukako. We buseko pa kumona ukuti balilunduluka ukufuma fye kuli bakasabankanya babili mu 1944 ukunina ukucila pali 1,000 ilelo, te mulandu no kulwa kwatwalilila mu calo cabo.

Ukukula muli bakasabankanya capilibula ukukula na mu musambo wesu na mo. Pa numa ya myaka 52 muli Bombay uukula ulubilo, icishinte cesu caselele mu 1978 kwi tauni lya mupepi ilya Lonavla. Nshabalile njelenganya ukuti kuti twakwata ifibombelo fyapikana pamo nga bakompyuta ba MEPS ne ca kupulintilako icikalamba ica misango ibili ku kupulinta ifitabo mu ndimi ishingi isha ciIndia. Ilelo, tuletako Ulupungu lwa kwa Kalinda mu ndimi 9 ne fitabo fimbi mu ndimi ishapusanapusana 20.

Te ca kusosa, inshiku sha musambo wa bantu babili shaliya kale. Nomba twakwata ulupwa lwa Bethel ulwacila pa filundwa 60! Pa bukulu bwa myaka 95, ncili uwa nsansa na nomba ukuba mu mulimo wa nshita shonse pe ofesi lya musambo no kubomba nge cilundwa ca Komiti ya Musambo uwa India. Kabili ukucilisha ndi uwacincimuka ukumona umulimo wa kulobolola muli ishi nshiku sha kulekelesha. Mu cine cine, caba mulandu wa kusekelelapo.