Bakabilisha ba Bufumu Bacita Lipoti

Uwa Myaka Isano iya Bukulu Abimbula Ubuseko

PA KATI ka Nte sha kwa Yehova 40,000 mu Venezuela pali kalume wa myaka isano iya bukulu uwakwete icakukumanya cawamisha. Alikutike mu kusakamanishisha ku malyashi ya cintubwingi ayashimpilwe mu citabo ca Life—How Did It Get Here?—By Evolution or by Creation? na pa kulanguluka kwa pa numa ukwa lupwa ukwa ici citabo. Uyu uwa myaka isano iya bukulu, uwafumine mu lupwa lwa teokratiki, muli fyo alyumfwikishe ukuti ukutunga kwa kusanguka ukwa kuti umuntu aishileko ukufuma mu “muto.” Ulubali lumo mu citabo lulanda pa cisambilisho ca kusanguka ukuti ubumi bwasangwike ukufuma ku muto wa twa mweo.

Pa myaka 14, ulupwa mu bwina mupalamano (umulume, umukashi, na bana baume babili aba myaka yacile kumi, no mwana mwanakashi uwa myaka cinelubali iya bukulu) bali aba kukanayangwako ku kwipusha kwa lupwa lwa Nte ku kufwailisha muli Baibolo na ku kulaalika kwabo ukuya ku Ŋanda ya Bufumu.

Kasuba kamo lintu umukashi wa kwa Nte alesamfye mbale, aumfwile ukulanshanya kusuma pa kati ka mwana wakwe umwaume no mukashana mwaice umwina mupalamano, mupepi no lupango lwa mupaka. Kalume munono atile: “Nawishiba! Abantu ba ku calo basoso kuti umuntu afumine mu muto!” Umukashana munono alyaswike, nga fintu lyonse alecita: “Walipena?” Kalume munono ayaswike ukuti: “Iyo, nshapena. Abantu ba ku calo basoso kuti umuntu afumine mu muto; lelo Yehova apangile umuntu.” Kalume apumishe imfundo, ukutontonkanyo kuti muto wa fye uwa kulya, ico ashatemenwe. Lyene atwalilile ukweba umukashana munono ukuti: “Tata alingile ukupeela icitabo ca Creation kuli wiso pa kuti engamona ukuti Lesa e wabumbile umuntu.” Umukashana munono, nangu cibe fyo, asosele kuti ni baKatolika, kabili apo e papelele ukulanshanya.

Lintu umulume wa kwa nkashi, uuli ni eluda, aishile ku ŋanda ukufuma ku ncito, ashimike ukulanshanya uko aumfwile. Nangu cingati ica kucitika pa kati ka bana calengele bene ukuseka, munyina atontonkenye ukuti nakalimo Yehova alefwaya ukuti ashimikile na kabili kuli uyu mwaume umwina mupalamano. E co inshiku shinono pa numa, atununwike umwina mupalamano wakwe no kushimika ukulanshanya kwa bana. Asosele ukuti mu kwimininako umwana wakwe umwaume, alefwaya ukumupeela kope wa citabo ca Creation. Nte atashishe ukuti umwina mupalamano acibelenge ukwabula impatila, apo cali no kulangisha intulo ya bumi.

Ku kupapushiwa kwa kwa munyina, inshiku shimo pa numa aba abaupana, abo pa nshita ntali bali abashayangwako ku cine, bailetele abene beka ku ŋanda ya kwa munyina ukulumbulula ukubipilwa pa mibele bakwete pa myaka iingi. Basosele ukuti balisungwike imibele ya kupapusha iya citabo ca Creation.

Ica kufumamo cali ca kuti isambililo lya Baibolo lyalitendekwe no lu lupwa. Batendeke ukusangwa ku kulongana lyonse kabili mu kwangufyanya babele bakasabankanya ba mbila nsuma. Umwaume, umukashi wakwe, na bana baume babili aba myaka yacile kumi balibatishiwe pe bungano lya citungu, kabili umukashana na o ni kasabankanya wa Bufumu. Umukashi atendeke umulimo wa bupainiya bwa kwafwilisha ubwa libili libili mu kwangufyanya fye pa numa ya lubatisho lwakwe.

Yesu Kristu alishiba abo imitima yabo yabe iisuma, kabili kuti kabili abomfya fye na bacaice ukufika pa mitima ya musango yo iisuma.—Yohane 10:14.