“Mwinenuka mu Kucite Cisuma”

Ifishinka Fikalamba Ukufuma mu Abena Tesalonika wa Cibili

UKWANGWAKO kwa mutumwa Paulo ku Bena Kristu mu musumba wa Makedonia uwa Tesalonika kwamuseseshe ukulemba kalata wa cibili kuli bene, mupepi no mwaka wa 51 C.E. Bamo mu cilonganino mu kuluba balesosa ukuti ukubapo kwa kwa Yesu Kristu kwalipaleme. Nakalimo nangu fye ni kalata iyo mu cilubo yalungatikwe kuli Paulo yapilibwilwe nge ilelangilila ukuti “Ubushiku bwa kwa [Yehova, NW]” bwalifikile.—2 Abena Tesalonika 2:1, 2.

Ukutontonkanya kwa bena Tesalonika bamo kanshi kwalekabila ukuteuluka. Muli kalata wakwe uwa cibili, Paulo abatashishe ku citetekelo cabo icalekula, ukutemwa kwaingilishiwako, no kushipikisha kwa bucishinka. Lelo na kabili alangilile ifyo ubusangu bwali no kwisa pa ntanshi ya kubapo kwa kwa Yesu. E co kwaliko inshita shayafya ku ntanshi, kabili kalata ya kwa Paulo yaali no kubaafwa ukumfwila ukukonkomesha kwa kuti: “Mwinenuka mu kucite cisuma.” (2 Abena Tesalonika 3:13) Amashiwi ya kwa Paulo yatwaafwa mu nshila imo ine.

Ukusokololwa no Kubapo kwa kwa Yesu

Paulo mu kubalilapo alandile ulwa kwilulukwa ukufuma ku bucushi. (1:1-12) Uku kwali no kwisa ‘pa kusokololwa kwa kwa Shikulu Yesu ukufuma mu mulu mu kuba na bamalaika bakwe aba maka.’ Uboni bwa ciyayaya lyene bwali no kwisa pali abo bashinakila ku mbila nsuma. Cili ca kusansamusha ukwibukisha ici lintu twacushiwa na bakapakasa.

Mu kukonkapo, Paulo alondolwele ukuti ‘umuntu wa bupulumushi’ aali no kusokololwa pa ntanshi ya kubapo kwa kwa Kristu. (2:1-17) Abena Tesalonika tabali na kucincimushiwa ku bukombe ubuli bonse ukutubulula ukuti “ubushiku bwa kwa [Yehova, NW]” kale kale bwali pali bene. Mu kubalilapo, ubusangu bwali no kucitika no muntu wa bupulumushi aali no kusokololwa. Pa numa ya ico, Yesu aali no kumonaula, ukucite fyo pa kumoneka kwa kubapo Kwakwe. Pa nshita imo ine, Paulo apepele ukuti Lesa na Kristu basansamushe imitima ya bena Tesalonika no kuilenga ukuba “[iyaikashiwa] mu mulimo onse usuma ne cebo conse cisuma.”

Ukubomba na Bekala mu Bunaŋani

Pa kati ka mashiwi ya kwa Paulo ayalundwako pali amakambisho pa fya kubomba na bantu umo umo abekala mu bunaŋani. (3:1-18) Alumbulwile ukucetekela kwa kuti Shikulu aali no kukosha abena Tesalonika no kubacingilila ukufuma ku mubifi, Satana Ciwa. Lelo bakabile ukubuula intampulo ku kumwenamo kwabo kwine ukwa ku mupashi. Baali no kutalukako ukufuma ku bekala mu bunaŋani, abo bacitile ubukwakwa mu milandu ishabakumine no kukaana ukubomba. “Ngo muntu tafwaya kubomba,” e fyasosele Paulo, “no kulya elalya.” Abantu ba musango uyo baali no kucelekwa, kabili takwali na kuba bucibusa na bene, nangu cingati baali no kukonkomeshiwa nga bamunyina. Abena Kristu ba cishinka aba mu Tesalonika tabali na kuleka mu kucite calungama, kabili Paulo afwaile ukuti ukusenamina kwa kwa Shikulu Yesu Kristu kwaba nabo bonse.

Kalata ya cibili iya kwa Paulo ku bena Tesalonika ipeela Inte sha kwa Yehova ukwebekesha kwa kuti ukwilulukwa ukufuma ku bucushi bwabo kukesa lintu Kristu na bamalaika bakwe baleta icilandushi pa bashinakila ku mbila nsuma. Cili na kabili ica kukoselesha icitetekelo pa kwishiba ukuti ‘umuntu wa bupulumushi’ (ibumba lya bashibutotelo ba Kristendomu) na mabutotelo yonse aya bufi mu kwangufyanya fikaletwa ku mpela. Pali ino nshita, natumfwile ukukonkomesha kwa kwa Paulo ukukananenuka mu kucite cisuma.

[Akabokoshi ne Cikope pe bula 23]

Icebo ca kwa Yehova Cileya Ulubilo: “Tupepeleni,” e fyalembele Paulo, “ukuti icebo ca kwa [Yehova, NW] ciye ulubilo [nelyo, cibutuke”] no kucindamikwa, ifyo caba na kuli imwe.” (2 Abena Tesalonika 3:1; Kingdom Interlinear) Abasambilila bamo batubulula ukuti umutumwa alelosha kuli bakabutuka baleya ulubilo mu kucimfyanya. Ilintu ico tacili icashininkishiwa, Paulo aipwishe amapepo ya Bena Kristu ba mu Tesalonika ica kuti wene na bakabomba banankwe kuti pambi baananya icebo ca cine mu kuba ne pamfya kabili ukwabula ica kucilikila. Pa kuti Lesa asuka amapepo ya musango uyo, icebo cakwe ‘cileya ulubilo’ nga fintu imbila nsuma ileshimikilwa mu kuba ne pamfya muli ishi nshiku sha kulekelesha. Icebo ca kwa Yehova na kabili ‘cilecindamikwa,’ ukukatamikwa apakalamba ku basumina pamo nga ‘maka ya kwa Lesa aya kupususha,’ nga fintu cali pa kati ka bena Tesalonika abapokelele cene. (Abena Roma 1:16; 1 Abena Tesalonika 2:13) Fintu tuli aba nsansa ukuti Lesa alepaala bakabilisha ba Bufumu mu kukalakasha ukwingilishako imitande ya bakapepa bakwe!—Esaya 60:22.