Ubupilibulo bwe Pepo

“Mu ciHebere, ishiwi lya mpikwe kwi pepo lyafuma ku ntulo, ‘ukupingula’, no musango wa kusonga uwa lyonse . . . ukukonke shiwi lipilibula, ‘ukuipingula.’” E fimona The Authorised Daily Prayer Book. Ubupilibulo bwalundwapo bwaba bwa kuti umo uwa milimo ye pepo uli wa kuti lilingile ukwaafwa umuntu ukumona nga ca kuti nafika pa fipimo ne fikabilwa fya kwa Lesa ifyalungama.

Pali uyu mulandu, ukupulinkana Baibolo, twaebwa ukuti kano nga umo alecita ukufwaya kwa kwa Lesa, amapepo yakwe te kuti yomfwike mu kusenaminwa. “Yehova ali ukutali ku babifi, lelo omfwe pepo lya balungami.”—Amapinda 15:29; 1 Yohane 5:14.

Ukuibebeta pa ntanshi ya kwa Yehova Lesa mu kushininkisha kulingile ukulenga umo uulepepa ukuicefya no kuyumfwa uwa bulanda. Ici cipeela amaka yonse ku mulumbe wa kwa Yesu uwa muFarise wa matutumuko no musangushi wa bulanda abaishile kwi tempele ku kupepa.—Luka 18:9-14.

Muli ifyo, nampo nga twapepa kuli Yehova ku kutasha, ukulumbanya, nelyo ukumupaapaata, ipepo lyonse lyaba kashita ka kuibebeta fwe bene. Muli iyi nshila, ipepo litukulila mu kupalamisha kuli Yehova kabili lilakosha ukwampana kwesu na wene.