Sekeleleni Mwi Subilo Lya Bufumu!

“Sekeleleni mwi subilo. Shipikisheni pe samba lya bucushi.”—ABENA ROMA 12:12, NW.

 1. Mulandu nshi twingasangila ubuseko mu kubishanya na Yehova, kabili cinshi umutumwa Paulo acincishe Abena Kristu ukucita?

“LESA wa nsansa.” (1 Timote 1:11, NW) Fintu ici cilondolola bwino Yehova! Mulandu nshi? Pantu imilimo yakwe yonse ilaleta insansa kuli wene. Apantu Yehova e Ntulo ya fintu fyonse ifisuma ne filenge nsansa, ifibumbwa fyakwe fyonse ifya mucetekanya kuti fyasange nsansa mu kubishanya kwa fiko na wene. Mu kulinga, umutumwa Paulo acincishe Abena Kristu ukutesekesha ishuko lyabo ilya buseko ilya kwishiba Yehova Lesa, ukuba aba kutootela pa fya bupe Fyakwe fyonse ifya kupapusha ifya bubumbo, no kusekelela mu cikuuku ca kutemwa Wene abalanga. Paulo alembele ukuti: “Sekeleleni pe muli Shikulu; ndetila kabili, Sekeleleni.”—Abena Filipi 4:4; Ilumbo 104:31.

 2. Lisubilo nshi lileta ubuseko bukalamba, kabili cinshi Abena Kristu bakoseleshiwa ukucita ukulosha kuli ili subilo?

² Bushe Abena Kristu baleumfwila uku kukonkomesha kuntu Paulo apeele? Mu cine cine e fyo! Bamunyina ba ku mupashi aba kwa Yesu Kristu balesekelela mwi subilo lintu Lesa aiswile kuli bene. (Abena Roma 8:19-21; Abena Filipi 3:20, 21) Ee, balishiba ukuti bakakana mu kufikilisha isubilo likalamba ilya nshita ya ku ntanshi iya mutundu wa muntu, bonse aba mweo na bafwa, pa kubomba na Kristu muli kamfulumende wa Bufumu uwa ku mulu. Elenganya ifyo bakasekelela mu mashuko yabo pamo nge mpyani shinankwe, ukubomba nge shamfumu na bashimapepo! (Ukusokolola 20:6) Mwandi ni nsansa ishikaba shabo lintu baleafwa umutundu wa muntu uwa busumino ukufika ku kupwililika no kwaafwa ukutungulula ukubweshiwa kwa Paradise kwi sonde lyesu! Mu cine cine, ababomfi ba kwa Lesa bonse balikwata “[icishinte ce subilo lya, NW] mweo wa muyayaya untu Lesa, uushibepa, alaile ilyo shishilabako inshita sha muyayaya.” (Tito 1:2) Mu cilolwa ca ili subilo lyakulisha, umutumwa Paulo akoselesha Abena Kristu bonse ukuti: “Sekeleleni mwi subilo.”—Abena Roma 12:12.a

Ubuseko bwa Cine—Mibele ya Mutima

3, 4. (a) Cinshi cintu inumbwilo “ukusekelela” ipilibula, kabili lingi lyaba shani Abena Kristu balingile ukulasekelela? (b) Ubuseko bwa cine cinshi, kabili bwashintilila pali cinshi?

³ “Ukusekelela” kupilibula ukumfwa no kulumbulula ubuseko; takupilibula ukuba mu mibele yatwalilila iya kubilimuka, nelyo ukusangalala. Amaverbu ayomfwana na mashiwi ya ciHebere ne ciGreek ayabomfiwa muli Baibolo aya “buseko,” “ukwanga,” no “kuselekela” yalumbulula fyonse fibili ukuyumfwa kwa lwa nkati no kulangisha kwa ku nse ukwa buseko. Abena Kristu balakoseleshiwa “ukutwalilila ukusekelela,” “lyonse ukulasekelela.”—2 Abena Korinti 13:11, NW; 1 Abena Tesalonika 5:16, NW.

⁴ Lelo ni shani fintu umo engalasekelela lyonse? Ici kuti cacitika pantu ubuseko bwa cine bwaba mibele ya mutima, imibele yashika iya lwa nkati, iya ku mupashi. (Amalango 28:47; Amapinda 15:13; 17:22) Cili cisabo ca mupashi wa kwa Lesa, icatantikwa na Paulo pa numa fye ya kutemwa. (Abena Galatia 5:22) Pamo nge mibele ya mu kati, takwashintilila pa fintu fya ku nse, nelyo fye pali bamunyinefwe. Lelo kwashintilila pa mupashi wa mushilo uwa kwa Lesa. Kabili kwisa ukufuma kuli kulya kwikushiwa kwashika ukwa lwa nkati ukwa kwishiba ukuti walikwate cine, isubilo lya Bufumu, no kuti ulecita icitemuna Yehova. E ico, ubuseko te musango fye wa buntu untu tufyalwa na o; bwaba lubali lwa “buntu bupya,” ukulonganikwa kwa mibele ukwalekenye Yesu Kristu.—Abena Efese 4:24; Abena Kolose 3:10.

 5. Ni lilali kabili ni shani fintu pambi kwingabako ukumoneka kwa ku nse ukwa buseko?

⁵ Nangu cingati ubuseko mibele ya ku mutima, kuti nangu ni fyo bwalangwa lwa ku nse pa kashita kamo. Ni kuli kwi uku kulangishiwa kwa mu nshita mu nshita, ukwa ku nse ukwa buseko? Kuti kwaba icili conse ukufuma ku mutalalila wa pa mpumi ukufika ku kusamwa. (1 Ishamfumu 1:40; Luka 1:44; Imilimo 3:8; 6:15) Bushe ici cilepilibula, lyene, ukuti abantu bashilandalanda nelyo abashimwentula lyonse tabakwato buseko? Iyo! Ubuseko bwa cine tabuilumbulwila ubwine mu kusosasosa kwatwalilila, uluseko, ukumwentula, nelyo ukusekaseka. Imibele ilenga ubuseko ukuilanga ubwine mu nshila shalekanalekana. Te buseko bweka butulenga abasuma pa Ŋanda ya Bufumu lelo, ukucila, icitemwishi ca bumunyina no kutemwa.

 6. Mulandu nshi Abena Kristu bengasekelela lyonse nelyo fye lintu balolenkana ne mibele yabipa?

⁶ Ulubali lwatwalilila ulwa buseko lwaba kubelelela kwa buko ukwa mu kati ngo lubali lwa kuyumfwa kwa ku mutima ukwa buntu bupya ubwa Mwina Kristu. Ici e cilenga cene ukucitikako ukulasekelela lyonse. Kwena, pa nshita shimo kuti pambi twakalifiwa pa lwa cintu cimo, nelyo kuti pambi twalolenkana ne mibele ishawama. Lelo nalyo line kuti twakwata ubuseko mu mutima wesu. Abena Kristu bamo aba mu kubangilila baali abasha, ukukwata bashikulu abali abaafya ukutemuna. Bushe Abena Kristu ba musango uyo baali na maka ya kulasekelela lyonse? Ee, pa mulandu we subilo lyabo ilya Bufumu no buseko mu mitima yabo.—Yohane 15:11; 16:24; 17:13.

 7. (a) Cinshi cintu Yesu asosele pa lwa buseko pe samba lya bucushi? (b) Cinshi citwaafwa ukushipikisha pe samba lya bucushi, kabili ni nani aimike ica kumwenako cawamisha muli kuno kuloshako?

⁷ Pa numa fye lintu umutumwa Paulo asosele ukuti: “Sekeleleni mwi subilo,” alundileko ukuti: “Shipikisheni pe samba lya bucushi.” (Abena Roma 12:12) Yesu na o wine alandile ulwa buseko pe samba lya bucushi lintu asosele pali Mateo 5:11, 12 ukuti: “Muli [aba nsansa, NW] ilyo bamupontela, no kumulamata . . . sekeleleni no kwanga, pantu icilambu cenu cikalamba mu mulu.” Ukusekelela no kwanga pano takulekabila ukuba kumoneka kwa cine cine ukwa ku nse; ukucilisha ni kulya ukwikushiwa kwashika ukwa lwa nkati kuntu umo akwata mu kutemuna Yehova na Yesu Kristu lintu aiminine uwashangila pe samba lya ca kwesha. (Imilimo 5:41) Mu cine cine, cili buseko ubutwaafwa ukushipikisha ilintu tuli pe samba lya bucushi. (1 Abena Tesalonika 1:6) Muli ici, Yesu aimike ica kumwenako cawamisha. Amalembo yatwebo kuti: “Pa mulandu wa kusekelela ukwabikilwe pa ntanshi yakwe, ashipikishe ku [cimuti ca kucushiwilwapo, NW].”—AbaHebere 12:2.

Ukusekelela mwi Subilo Te Mulandu ne Mpika

 8. Ni mpika nshi Abena Kristu pambi bengalolenkana nasho, lelo mulandu nshi impika tashifumishapo ubuseko bwa Mwina Kristu?

⁸ Ukuba umubomfi wa kwa Yehova takulubula umo ukufuma ku mpika. Kuti pambi kwabako impika sha lupwa, amafya ya fya ndalama, ubutuntulu bwa bumi bwalemana, nelyo imfwa ya batemwikwa. Ilintu ifintu fya musango uyo kuti pambi fyalenga ubulanda, tafifumyapo icishinte cesu ica kusekelela mwi subilo lya Bufumu, ubuseko bwa lwa nkati ubo twakwata mu mutima wesu.—1 Abena Tesalonika 4:13.

 9. Ni mpika nshi Abrahamu akwete, kabili twaishiba shani ukuti akwete ubuseko mu mutima wakwe?

⁹ Languluka Abrahamu, ku ca kumwenako. Ubumi tabwali lyonse ubwa kusekesha kuli wene. Alikwete impika sha lupwa. Kanakashi wakwe, Hagari, no mukashi wakwe, Sara, tabaumfwene. Kwaliko ukuumana. (Ukutendeka 16:4, 5) Ishmaele apumishe Isaki, ukumupakasa. (Ukutendeka 21:8, 9; Abena Galatia 4:29) Mu kupelako, umukashi wa kwa Abrahamu uwatemwikwa, Sara, alifwile. (Ukutendeka 23:2) Te mulandu ne shi mpika, alisekelele pe subilo lya Lubuto lwa Bufumu, Ulubuto lwa kwa Abrahamu, ukupitila muli uyo indupwa shonse isha pe sonde shali no kuifwaila ukupaalwa. (Ukutendeka 22:15-18) Mu kuba no buseko mu mutima wakwe, ashipikishe mu mulimo wa kwa Yehova pa myaka umwanda umo pa numa ya kusha umusumba wa ku mwabo uwa Uri. E ico calembelwa ulwa wene ukuti: “Alelolelo Musumba uuli ne ca kukuulapo, uo kelenganya wa uko kabili kakuula wa uko ni Lesa.” Pa mulandu wa citetekelo ca kwa Abrahamu mu Bufumu bwa buMesia ubuleisa, Shikulu Yesu, lintu abe nasontwa kale kale kuli Lesa ukube Mfumu, aali na maka ya kusoso kuti: “Abrahamu . . . ayangile ukuti amone ubushiku bwandi; kabili abumwene no kusekelela.”—AbaHebere 11:10; Yohane 8:56.

10, 11. (a) Kushomboka nshi uko ifwe nga Bena Kristu twakwata, kabili ni shani fintu tupokololwa? (b) Cinshi cikumanisha ukubulwa kwesu amaka ku kulwisha mu kupwililika umubili wesu uwa lubembu?

¹⁰ Nga bantunse abashapwililika, twalikwata na kabili umubili wesu uwa lubembu uwa kulwishanya na o, kabili uku kushomboka ku kucita icalungama kuti kwaba ukwa kupopomeka nga nshi. Ukulwisha kwesu amabunake yesu takupilibula, nangu ni fyo, ukuti tatwakwata isubilo. Paulo ayumfwile ubulanda pali uku kukangana, kabili atile: “Ni ani akampokolola ku mubili uno uwa mfwa? Kube ukutootela kuli Lesa muli Yesu Kristu Shikulwifwe!” (Abena Roma 7:24, 25) Ukupitila muli Yesu Kristu ne cilubula cintu apayenye, tulapokololwa.—Abena Roma 5:19-21.

¹¹ Ilambo lya cilubula ilya kwa Kristu lilakumanisha ukubulwa kwesu amaka ku kulwa ubulwi mu kupwililika. Kuti twasekelela muli ici cilubula pantu cilenga ukucitikako kampingu wasangululwa no kulekelelwa kwa membu shesu. Pa AbaHebere 9:14, Paulo alanda ulwa “mulopa wa kwa Kristu” uwakwata amaka ya ‘kusangulula bakampingu wesu ku milimo yafwa.’ Muli ifyo, bakampingu ba Bena Kristu tabakabila ukufinininwa no kusenukwa no kuyumfwa kwa kukwato mulandu. Ici, capamo ne subilo twakwata, cipanga ukutuninkisha kwakosa ku nsansa sha buseko. (Ilumbo 103:8-14; Abena Roma 8:1, 2, 32) Pa kwetetula pe subilo lyesu, ifwe bonse tukakoseleshiwa ukulwa ubulwi mu kutunguluka.

Ukusunga Isubilo Lyesu mu Kupalamisha mu Muntontonkanya

12. Lisubilo nshi Abena Kristu basubwa bengetetulapo?

¹² Cili cacindama kuli bonse abashalapo basubwa no mupashi ne mpaanga shimbi ukusunge “subilo lye pusukilo” mu muntontonkanya, ukufwala kwene nge ca kucinge cifuba. (1 Abena Tesalonika 5:8, NW) Abena Kristu basubwa kuti baetetula pe shuko lya kupapusha ilya kunonka bumunshifwa mu mulu, ukukwate nshila ya kufika kuli Yehova Lesa, no kuipakisha ukubishanya kwa pa lwabo na Yesu Kristu wakatamikwa na batumwa na bambi bonse aba muli ba 144,000, abasungilile bumpomfu bwabo ukutentemuka ukupulinkana imyanda ya myaka. Mwandi bucindami bushingalondololwa ubwa kubishanya!

13. Ni shani fintu abasubwa abacili pe sonde bayumfwa pa lwe subilo lyabo?

¹³ Ni shani fintu abasubwa abanono abacili pe sonde bayumfwa pa lwe subilo lyabo ilya Bufumu? Ici kuti casupawilwa mu mashiwi ya kwa F. W. Franz, presidenti wa Watch Tower Society, uwabatishiwe mu 1913 ukuti: “Isubilo lyesu cintu cashininkishiwa, kabili likafikilishiwa mu kukumanina ukufika fye na ku wa kulekelesha uwa filundwa fya 144,000 ifya mukuni unono ukufika ku cipimo cacila na pa cintu twaelenganya. Ifwe fwe ba mu bashalapo fwe basangilweko mu 1914, lintu twaenekele bonse aba ifwe ukuya ku mulu, tatwalufya ukwiluka kwesu ukwa kukatama kwa lilye subilo. Lelo tuli abakosa kuli lyene nga fintu twali na kale lyonse, kabili tuletesekesha lyene ukucililako ukulingana no butali bwa nshita twalolela lyene. Cili cintu cimo icawamina ukulolela, nelyo fye nga ca kuti cafwaile imyaka milioni imo. Ndapimununa isubilo lyesu mu kusumbukilako ukucila na kale lyonse, kabili nshifwaya ukulufya ukutesekesha kwandi ukwa lyene. Isubilo lya mukuni unono na kabili lipeela ukwebekesha kwa kuti ukwenekela kwe bumba likalamba ilya mpaanga shimbi, ukwabula ukucitikako ukuli konse ukwa kufilwa, kukafikilishiwa ukucila pa kwelenganya kwesu ukwacilishapo kubembela. E mulandu wine tucili abaikatisha ukutentemuka ukufika na kuli lino line iawala, kabili tuli no kwikatisha ukufikila Lesa mu cishinka ashininkisha ukuti ali uwa cine ku ‘filayo [fyakwe] fikankaala kabili ifyakulisha.’”—2 Petro 1:4; Impendwa 23:19; Abena Roma 5:5.

Ukusekelela Nomba mwi Subilo lya Paradise

14. Lisubilo nshi ibumba likalamba likabila ukusunga mu muntontonkanya?

¹⁴ Inumbwilo ya musango uyo iya citetekelo ca kwanga ibika muli abo abali be bumba likalamba ilya mpaanga shimbi imilandu yakulisha iya kusekelela. (Ukusokolola 7:15, 16) Aba musango uyo balakabila ukusunga mu muntontonkanya isubilo lya kupusunsuka Armagedone. Ee, lolesheni ku ntanshi ku kumona Ubufumu bwa kwa Lesa bwaebela bumulopwe bwa mu kubumbwa konse ubwa kwa Yehova Lesa no kushisha ishina lyakwe ilya bukata pa kuleta ubucushi bukalamba, ubukasangulule sonde ukufumyapo ababifi abo Ciwa aba e mulungu. Mwandi cikaba buseko ukupusunsuka ubucushi bukalamba!—Daniele 2:44; Ukusokolola 7:14.

15. (a) Mulimo nshi uwa kundapa Yesu acitile lintu aali pe sonde, kabili mulandu nshi? (b) Finshi fikaba ukukabila kwa butuntulu bwa bumi ubwa bakapusunsuka ba Armagedone, kabili mulandu nshi bapusanina ukufuma kuli abo ababuushiwa?

¹⁵ Ukukuma kwi bumba likalamba, Ukusokolola 7:17 kusoso kuti: “Umwana wa mpaanga . . . akabacema, no kubatungulula baye pa tumfukumfuku twa menshi ya mweo; kabili Lesa akafuute filamba fyonse ku menso yabo.” Nangu cingati ubu busesemo bwalikwata ukufikilishiwa kwa ku mupashi nomba, bakapusunsuka ba Armagedone bakamona bwaisushiwa mu cine cine. Shani fyo? Cisuma, cinshi Yesu acitile lintu aali pe sonde? Aundepe abalemana, alengele abalemana amolu ukwenda, aiswile amatwi ya bankomamatwi na menso ya mpofu, kabili aposeshe ifibashi, ubulebe, no “bulwele bonse no kunakuka konse.” (Mateo 9:35; 15:30, 31) Bushe ico te cintu Abena Kristu ilelo bakabila? Ibumba likalamba bakasenda ubulema bwa calo cikote no kunakuka ukwingila na fyo mu calo cipya. Cinshi tuleenekela Umwana wa mpaanga ukucita pa lwa ico? Ukukabila kwa bakapusunsuka ba Armagedone kukaba ukwapusanako nga nshi ukufuma ku kukabila kwa abo abakabuushiwa. Abakabuushiwa mu kupalako bakabushiwa ne mibili yonse, iituntulu, iya bumi busuma, nangu cingati bakaba tabalakwata ukupwililika kwa buntunse. Pa mulandu wa cipesha amano ca kubuuka, mu kushininkisha tabakakabile pa numa ya ico ukuwamishiwa kwa bulema bwa kale ubuli bonse ku cipesha amano ca kundapa. Pa lubali lumbi, pa mulandu wa ca kumwenako caibela ica kupusunsuka Armagedone, ukuwamishiwa kwa cipesha amano e kuntu abengi abe bumba likalamba bakakabila kabili bakapokelela. Mu kumonekesha, imifwaile ikalamba iya kundapa kwa kwa Yesu yali kulangisha ku kukoseleshiwa kwe bumba likalamba icilolelo ca buseko ica kuti tabakapusunsuke fye lelo bakondapwa pa numa ya ico.

16. (a) Ni lilali lintu pambi ukundapa kwa cipesha amano ukwa bakapusunsuka ba Armagedone kwingacitika, kabili mu kuba na ca kufumamo nshi? (b) Ni mwi subilo nshi tukatwalilila ukusekelela mu kati ka Myaka Ikana Limo?

¹⁶ Ukundapa kwa cipesha amano ukwa musango uyo kukacitika mu kubamo amano pa kati ka bakapusunsuka ba Armagedone mu kwampanako bwangu bwangu fye pa numa ya Armagedone kabili ilyo ukubuuka takulatendeka. (Esaya 33:24; 35:5, 6; Ukusokolola 21:4; linganyeniko Marko 5:25-29.) Lyene abantu bakapoosa amaglasi ya mu menso, imikonkoto, ifya kusemenako, ifipuna fya mipeto, ameno ya cifwanikisho, ifya kumfwilako, ne fyapalako. Mwandi mulandu wa kusekelela! Fintu incitilo ya kubweseshamo iya mu kubangilila iya musango uyo iya kwa Yesu ilingana no lubali lwa bakapusunsuka ba Armagedone pamo nge citendekelo ce sonde lipya! Amalwele yalengo kupomponteka yakafumishiwa mu nshila pa kuti aba bakapusunsuka bengaselela ku ntanshi mu kuba no kucincimuka, ukulolesha mu kupamfiwa ku mibombele ya kusungusha iya Myaka Ikana Limo iili ku ntanshi yabo, te kubombomanikwa ku kucululuka uko icalo cikote pambi caleta pali bene. Kabili bonse mu kati ka Myaka Ikana Limo, bakalasekelela mwi subilo lya kufika ku mwisulo wine uwa bumi bwa buntunse ubwapwililika ukufika ku mpela ya ilya myaka ikana.

17. Mabuseko nshi yakabako ilyo umulimo wa kubwesha Paradise uletwalilila?

¹⁷ Nga ca kuti ico cili e subilo lyobe, etetula na kabili pa buseko bwa kwakana mu kubweshiwa kwa Paradise pe sonde. (Luka 23:42, 43) Ukwabulo kutwishika bakapusunsuka ba Armagedone bakaafwa ukusangulula isonde kabili muli ifyo bakapayanya ififulo fyawama uko abafwa bakabuushiwa. Ifililo kuti pambi fyapyanikwapo no tushita twa kusengela kuli abo ababweshiwa mu kubuushiwa, ukusanshako abatemwikwa besu bene abatentemukila mu mfwa. Kabili tontonkanya ulwa bunabo bwa kunonsha pamo na baume na banakashi ba busumino ukufuma ku myanda ya myaka iyapita. Ni bani abo ukucilisha ufwaya ukulandako? Bushe ni Abele, Enoke, Noa, Yobo, Abrahamu, Sara, Isaki, Yakobo, Yosefe, Mose, Yoshua, Rahabu, Debora, Samsone, Davidi, Eliya, Elisha, Yeremia, Esekiele, Daniele, nelyo Yohane Kabatisha? Cisuma, lyene, ici cilolelo ca kucankilwamo cili na kabili ulubali lwe subilo lyobe. Ukaba na maka ya kulanshanya na bene, ukusambilila ukufuma kuli bene, no kubomba capamo na bene mu kulenga isonde lyonse paradise.

18. Mabuseko nshi ayalundwako yengetetulwapo?

¹⁸ Elenganya, na kabili, ica kulya cawama, amenshi yasanguluka, no mwela wabulamo ifiko, mu kuba ne sonde lyonse ukubweshiwa ku kushikatala kwa liko ukwapwililika ukwa kwampana kwa fyashingulukako mu nshila Yehova alibumbile ukubelamo. Ubumi lyene bukaba, te kuipakisha fye kwatalalila ukwa kupwililika, lelo ukwakanamo kwacincila kabili ukwabamo bupilibulo mu mibombele ya buseko. Etetula pali sosaite ya mu kusaalala kwa calo iya bantu balubuka ukufuma ku misoka, amatutumuko, akalumwa, ukuumana—bumunyina uko ifisabo fya mupashi filakushiwa no kuletwako na bonse. Fintu cili ica kucincimusha!—Abena Galatia 5:22, 23.

Isubilo Ililenga Ubumi Ubwawamina Ukwikala

19. (a) Ni lilali ukusekelela kwalumbulwa pa Abena Roma 12:12 kuli no kusangwa? (b) Mulandu nshi tulingile ukupampamina ukukanasuminisha ifisendo fya bumi ukusunkila isubilo lyesu pa mbali?

¹⁹ Ukwenekela kwafikilishiwa takuba na kabili isubilo, e co ukusekelela kwakoseleshiwa na Paulo pa Abena Roma 12:12 kuli no kusangwa nomba. (Abena Roma 8:24) Ukutontonkanya fye ulwa mapaalo ya nshita ya ku ntanshi yantu Ubufumu bwa kwa Lesa bukaleta cili ca kulenga ifwe ukusekelela muli lilye subilo nomba. E co bo wapampamina ukukanasuminisha ifisendo fya bumi mu calo cabola ukusunkila isubilo lyobe ilyakatama pa mbali. Wibo wafunshika no kunenuka, ukulufya icilola ce subilo lili ku ntanshi. (AbaHebere 12:3) Ukusha inshila ya Bwina Kristu takwakapwishe mpika shobe. Ibukisha, nga ca kuti umo aleko kubombela Lesa pa mulandu wa fisendo fyonse ifya bumi nomba, acili nakwata ifyo fisendo, lelo alufya isubilo kabili e co alufya ukucitikako kwa kusekelela mu filolelo fya kupapusha ifili ku ntanshi.

20. Kusonga nshi isubilo lya Bufumu lyakwata pali abo abalikwata, kabili mulandu nshi?

²⁰ Abantu ba kwa Yehova nabakwata umulandu uuli onse uwa kukwatila ubumi bwa nsansa. Isubilo lyabo ilyabembela, ilya kupuutamo lilenga ubumi ubwawamina ukwikala. Kabili tabasunga ili subilo lya buseko ku bene beka. Iyo, bali abafwaisha ukwakana lyene na bambi. (2 Abena Korinti 3:12) Muli ifyo cili ukuti abo abakwate subilo lya Bufumu bali bantu bacetekela, kabili bafwaya ukukoselesha bambi pa kubeba imbila nsuma ukufuma kuli Lesa. Ici cisusha ubumi bwa abo abapokelela ubukombe ne subilo lyacilishapo kusungusha ilyabala alipeelwa ku mutundu wa buntunse mu cinkumbawile—isubilo lya Bufumu ubukabwesesha Paradise kwi sonde. Nga ca kuti abantu tabalepokelela lyene, nalyo line tulatwalilila ukusekelela pantu twalikwate subilo. Abo abalwilako ukutwi kwakoma e balufya; tatulufya.—2 Abena Korinti 4:3, 4.

21. Cinshi cili mupepi, kabili ni shani fintu tulingile ukulingulula isubilo lyesu?

²¹ Icilayo ca kwa Lesa ca kuti: “Moneni, ifintu fyonse nafilenge fipya.” (Ukusokolola 21:5) Icalo cipya mu kuba na mapaalo ya ciko yonse aya kulengo kucankwa kabili ayabule mpela cili mupepi. Isubilo lyesu—ilya bumi mu mulu nelyo pe sonde lya paradise—lili ilyaumo mutengo; kakatila kuli lyene. Muli ishi nshiku sha kulekelesha ishakakala, ukucila na kale lyonse, limone “nge nanga ya [mweo, NW] icishingasendwa kabili icaikata.” Mu kuba ne subilo lyesu ukukwate nanga muli Yehova, “icilibwe ca muyayaya—Icilibwe ca nkulo ne nkulo,” mu kushininkisha natukwata umulandu wakosa kabili uwa kucincimusha pali nomba line ku ‘kusekelela mwi subilo’ lyaimikwa ku ntanshi yesu.—AbaHebere 6:19; Esaya 26:4, The Amplified Bible.

[Amafutunoti]

Ifipusho fya Kupitulukamo

◻ Cinshi cabe subilo likalamba ilya mutundu wa muntu?

◻ Cinshi cabo buseko bwa cine?

◻ Ni lilali lintu ukundapa kwa cipesha amano ukwa bakapusunsuka ba Armagedone mu kupalako kukacitika?

◻ Mulandu nshi tatulingile ukuleka ifisendo fya bumi ukusunkila isubilo lyesu pa mbali?

◻ Mabuseko nshi uloleshako ku ntanshi mu calo cipya?

[Icikope pe bula 9]

Bushe te kuti cisushe umutima obe no buseko ukucitilo bunte umusango wa kundapa untu Yesu acitile?

[Icikope pe bula 10]

Abo abalesekelela mu Bufumu balakoselesha bambi pa kwakana isubilo lyabo