Bushe Ulecita Apapela Maka Yobe?

“NKACITA apo ningapesha.” Fintu aya mashiwi ilingi yakonkwapo na “lelo” no mutande walepa uwa mwa kulesesha pa kukanaibikilishako! Ni shani pa lwa kuipeela kwesu kuli Yehova? Bushe tulefikilisha ubulayo bwesu ubwa kupeela icawamisha kuli wene?

Ukucito kuipeela cipilubula ‘ukuipeelesha mu kuipaatula ku mulimo nelyo ukupepa kwa wabako wa bulesa nelyo ku kubomfiwa kwashila.’ Yesu acitile fingi ukulangilila cintu ukuipeela kuli Yehova cabimbilemo pa kusoso kuti: “Umuntu nga afwayo kunkonka pa numa, aikaanye, asende ne [cimuti cakwe ica kucushiwilwapo, NW], no kunkonka.” (Mateo 16:24) Umo uwaikaana umwine no kuipeela kuli Lesa alenga ukucita ukufwaya kwa bulesa ukuba icikonkelelo cacindamisha mu bumi bwakwe.

Pamo nga bantu baipeela, tuli no kuiceeceeta fwe bene ukumona nampo nga tuleikalilila ku kuipeela kwesu. Petro alangilile umulandu tulingile ukuibebetela fwe bene lintu akoseleshe Abena Kristu basubwa ati: “[Citeni apapela maka yenu, NW] ku kwikasho bwite bwenu no kusalwa kwenu; pantu pa kucite fi fintu tamwakaipunune nakalya.” (2 Petro 1:10) Ee, nga twacita apapela maka yesu, tatwakeseba bacifilwa ba ku mupashi.

Amaka Yesu Kuti Yalundwako

Mu mano yasaalala, ababomfi baipeela bonse aba kwa Lesa benekelwa ukucita apapela maka yabo, nelyo apo bengapesha, ku kutemuna Yehova. Nangu cibe fyo, amaka yesu mu kucito kufwaya kwa kwa Lesa kuti pambi yakula. Kuli kalume wa myaka ya bukulu itatu, ukutumwa e cawamisha engacita ku kwaafwako nyina, lelo ilyo alekulilako, akaba na maka ya kucita ifyafulilako. Mu musango umo wine no kukula kwesu kwa ku mupashi—icali kale apengapela maka yesu te kuti na kabili cibe nge fyo. Tulaseshiwa ukucitila Yehova ifyacilapo.

Ukutasha kwesu kwaingilishiwako kwa kuli Yehova kucincisha ukuitemenwa kwesu ku kucite fyacilapo. Ukutasha pa fintu atucitila kulakoshiwa ukupitila mwi sambililo lya pa lwesu ilya Cebo cakwe, Baibolo. Ku ca kumwenako, lintu twafwailisha mu kusakamanisha no kwetetula pa fyo Yehova atumine Umwana wakwe ku kupeela umweo wakwe ku kulubula umutundu wa muntu ukufuma ku lubembu, tulaseshiwa ukubombela Katendeka wa kutantika kwa cilubula. (Yohane 3:16, 17; 1 Yohane 4:9-11) Lintu tucililako ‘ukusonda no kumono kuti aliwama Yehova,’ e lintu imitima yesu icililako ukuseshiwa ku kubombela wene.—Ilumbo 34:8.

Umutumikishi wa nshita yonse uwe shina lya Jetter aishileishibe ci. Pa kwimba mu kushikilako mu fintu alesambilila, apaatwileko umuputule unono mu ŋanda yakwe kuli iyo mifwaile. Atantike wene mu nshila ya kuti engalafindamina lintu alecito kusapika. Alakwata ama Watch Tower Publications Indexes pamo pene na mabaundi volyumu ya The Watchtower na Awake! mupepi pa shelufu wa fitabo. “Lintu nashula ifyebo fya kusekesha,” e fyo asosa, “nshishingashinga ukwakana fyene na bambi.”

Nangu cibe fyo, pamo fye nga fintu ukulya ica kulya ca maliila mu tushita mu tushita kushilubula muntu ku kukabila kwa cila bushiku ukwa kulya ifya kulya fya lyonse, ukusapika kwashika lelo ukwa pa nshita imo fye muli Baibolo takufumyapo ukukabila kwa cila bushiku ukwa kukwata ica kulya ca ku mupashi. Ruth alitesekesha uku kukabila, pantu ukubwelela ku numa nga fintu engebukisha, ulupwa lwakwe balebelenga Baibolo capamo cila lucelo ne cungulo pa numa ya fya kulya. Nomba, pa mushinku wa myaka 81, pa kuba napoose myaka ukucila pali 60 mu butumikishi bwa nshita yonse, acili alabelenga Baibolo lyonse pa numa ya kubuuka pa 6 koloko ulucelo. Mu kwangufyanya lintu apokelela bamagazini ba Ulupungu lwa kwa Kalinda na Loleni!, Ruth alalubule nshita ku kubabelenga. Alapituluka mu cipande mu kucefyako imiku itatu nelyo ine pa ntanshi ya kusambilila cene mu cilonganino. “Ukwishiba Icebo ca kwa Lesa e co ukabila pa kuisunga uwakosa mu citetekelo,” e fyo asosa. Na kabili calimwaafwa ukutwalilila mu mulimo wa bumishonari pa myaka iingi.

Ukucita Apapela Maka Yesu mu Kwaafwa Bambi

Kwi sambililo lya lyonse ilyashika ilya Cebo ca kwa Lesa, ukupimpa kwesu kwa kubombela Lesa kulakula, kabili icintu cimo mu kati kesu citucincisha ukucite fyacilapo. (Linganyako Yeremia 20:9.) Ukupimpa kwa musango yo kwaseseshe Hirohisa ku kupwilikisha ubutumikishi bwakwe mu kukumanina. (2 Timote 4:5) Aikele mu ŋanda ya mufyashi waba eka mu kuba na bamunyina ne nkashi abaice bane. Ilyo ali mu myaka ya bupungwe, Hirohisa ayafwilishe ulupwa lwakwe ku kwima pa 3 koloko ku maca ku kutwala inyunshipepala. Afwaile ukucite fyafulilako mu kwebako bambi pa lwa kwa Yehova, e co Hirohisa aipwishe umulimo wa bupainiya, nga fintu ubutumikishi bwa nshita yonse ubwa Nte sha kwa Yehova bwitwa. Nangu aali umwaice, aipakishe ukwafwako bambi ukuilunda kuli wene mu kucita apapela maka yabo ku kulumba Yehova.

Ukucita apo twingapesha mu kwaafwa bambi cisanshamo ukuba aba kufumamo cimo mu butumikishi bwesu. Yesu inshita imo akoseleshe abasambi bakwe ati: “Nga mwaishibe fintu ifi, ninshi mwalishuka nga muleficita.” (Yohane 13:17) Naomi ali ca kumwenako cisuma ica kubika mu kubomba imitubululo ipeelwa no kuteyanya kwa kwa Yehova ku kuwamyako ubutumikishi bwesu. Alikwete ubwafya mu kulanda ku bantu ashaishiba ukufuma ku ŋanda ne ŋanda kabili ilingi taleishiba ifya kusosa ilyo ali pa minshi. Baeluda mu cilonganino bamukoseleshe ukubomfya imitubululo iisangwa mu citabo ca Ukupelulula Ukufuma mu Malembo, mu lubali lwa “Imitendekele Ya Kubomfya mu Butumikishi bwa mwi Bala.”a Asungile ku mutwe imitendekele pe samba lya mutwe wa “Ulupwa/Abana” kabili abeleshe yene imiku iingi. Pamo nge ca kufumamo, ali na maka ya kucito kulanshanya na namayanda uwali mu myaka yakwe ya ba 30. Nangu fye pa ntanshi Naomi talacita icipempu ca kubwelelamo, uyu mwanakashi alishile ku Ŋanda ya Bufumu. Isambililo lya Baibolo lyalitantikwe. Namayanda no mulume wakwe bali nomba Bena Kristu babatishiwa, ukuipakisha ubumi bwa lupwa ubwa nsansa na bana babo.

Ukucita Apapela Maka Yesu mu Kulangisha Ubuseko bwa pa Lwesu

Kuti na kabili twapashanya umutumwa Paulo, uwatile: “Ifintu fyonse ncitile mbila nsuma, ukuti mbe uwa kukumako.”—1 Abena Korinti 9:22, 23.

Hatsumi abelebesha iyi mibele. Ilintu Hatsumi aali mu butumikishi bwa cintubwingi, umwanakashi umo mu kubamo mucinshi asosele muli mashini wa kumfwaninamo ukuti aali uwacishamo kupamfiwa ica kuti te kuti balanshanye. Ukumfwika kwe shiwi lya kwa mwine ŋanda kwali ukwanakilila, e co Hatsumi atwalilile ukumutandalila. Mwine ŋanda aleasukila fye muli mashini wa kumfwaninamo, ukukanafuma pa nse ku kukumanya Hatsumi. Ici catwalilile pa myaka ibili na citika.

Bushiku bumo Hatsumi ateulwile inshita ya kutandala kwakwe, ukwisa mu kucelwako icungulo. Takwali nangu umo uwayaswike. Ilintu alefumapo, nangu cibe fyo, ishiwi likaaya ku numa lyalimwipwishe aliti, “Ni we ani?” Umwanakashi elyo abwelele fye ukufuma uko aile. Pa kumfwa ishina lya kwa Hatsumi, bwangu bwangu alyankwileko ukuti, “Oh, ni we untandalila. Natootela pa kulansakamana lyonse.” Apantu umwanakashi alilekele isambililo lyakwe lya Baibolo ne Nte sha kwa Yehova mu cifulo cimbi, ali wa nsoni nga nshi ku kwisula iciibi kuli Hatsumi. Isambililo lya Baibolo lyalitendeke cipya cipya, kabili mwine ŋanda alelunduluka bwino nga nshi. Bushe tulasakamana mu nshila imo ine pa lwa bantu tukumanya mu butumikishi bwa ku ŋanda ne ŋanda?

Cita Apapela Maka Yobe

Yehova alatasha ukubombesha kwesu kwa kumubombela ukufika apapela maka. Aba nga wishi untu umwana mwaume wakwe esa kuli wene ne fya bupe. Ukupulinkane myaka, ica bupe pambi kuti caba icapusanapusana ukushintilila pa mushinku wa mwana na maka. Kwati fintu wishi aba uwa nsansa ukupokelela ubupe ubuli bonse ubwa kufuma ku mutima umwana wakwe apeela kuli wene, e fyo Yehova bwangu bwangu apokelela umulimo wesu wa mutima onse mu kulingana no kukula kwesu kwa ku mupashi.

Kwena, takwaba mulandu wa kulinganishisha amaka yesu na yo aya bambi. Nga fintu Paulo asosa, tukakwata apa kutakishisha ukukuma kuli fwe bene, “te mu kulinganya no muntu umbi.” (Abena Galatia 6:4, NW) Shi natutwalilile ukumfwila ukukonkomesha kwa mutumwa Petro ukwa kuti: “[Citeni apapela maka yenu, NW] ukuti mukasangwe ababula akabi kabili ababula akalema mu mutende.”—2 Petro 3:14.

[Futunoti]

[Icikope pe bula 29]

Bushe ulecita apo wingapesha mu kubomfya imitubululo ya mu butumikishi bwa mwi bala?