Ishiba Yehova Ukupitila mu Cebo Cakwe

“Awe uyu e mweo wa muyayaya, ukuti bamwishibe, mwe Lesa wine wine mweka, no yo mwatumine, ni Yesu Kristu.”—YOHANE 17:3.

1, 2. (a) Bupilibulo nshi ubwa “ukwishiba” na “ubwishibilo” nga fintu fyabomfiwa mu Malembo? (b) Fya kumwenako nshi filengamika ubu bupilibulo?

UKWISHIBA umo ngo wa kwishibana fye nankwe nelyo ukukwata ubwishibilo pa lwa cintu cimo mu nshila ya cipamanso te bupilibulo bwakumanina ubwa mashiwi “ukwishiba” na “ubwishibilo” nga fintu yabomfiwa mu Malembo. Muli Baibolo ici cisanshamo “incitilo ya kwishiba ukupitila mu kubelesha,” ubwishibilo ubo bulumbulula “ukwampana kwa kucetekela pa kati ka bantu.” (The New International Dictionary of New Testament Theology) Ico cisanshamo ukwishiba Yehova ukupitila mu kulanguluka incitilo shakwe shimo isha kulungatika, pamo nga shilya nshita shafulilako mwi buuku lya kwa Esekiele umo Lesa aputunkenye amapingushi ukulwisha bakacita wa fibi, ukubilisha ukuti: ‘E lyo mukeshibo kuti ni ne Yehova.’—Esekiele 38:23.

² Inshila shalekanalekana umo “ukwishiba” na “ubwishibilo” pambi shingabomfiwa kuti shalondololwa mu kumfwika mu kuba ne fya kumwenako ifinono. Ku bengi abaleitunga nga babombele mwi shina lyakwe, Yesu atile, “nshamwishiba nakalya”; tabalile akwata icili conse ica kucita na bene. (Mateo 7:23) Abena Korinti wa Cibili 5:21 patila Kristu ‘taishibe ulubembu.’ Ico tacipilibula ukuti taali uwaibukila pa lwa lubembu lelo, ukucila, ukuti takwete ukubimbwamo kwa pa lwakwe na bwene. Mu musango umo wine, lintu Yesu atile: “Awe uyu e mweo wa muyayaya, ukuti bamwishibe, mwe Lesa wine wine mweka, no yo mwatumine, ni Yesu Kristu,” ifyacilapo fyalibimbilwemo ukucila pa kwishiba fye ifintu fimo pa lwa kwa Lesa na Kristu.—Linganyeniko Mateo 7:21.

 3. Cinshi cishinina ukuti Yehova alangisha icishibilo ca kwa Lesa wa cine?

³ Imibele iingi iya kwa Yehova kuti yaishibikwa ukupitila mu Cebo cakwe, Baibolo. Imo iya yene yaba maka ya kusesema mu kulungika. Ici cishibilo ca kwa Lesa wa cine: “Awe balete kuno, no kutulongwela, ifyapona ifya ntanshi; ni shani ifi fintu? longoleni, ukuti tubikepo imitima yesu; napamo tulengeni ukuumfwe fikesabako, twishibe ne fya kukonkapo; longoleni ifikesa ku nshita iikakonkapo, no kuleka twishibe ukuti muli milungu.” (Esaya 41:22, 23) Mu Cebo cakwe, Yehova alongola ifyapona ku ntanshi ukukuma ku bubumbo bwakwe ubwe sonde no bumi bwabapo. Asosele mu kubangilila nga nshi ifintu fyali no kucitika pa numa kabili ifyo fyaishilecitika. Kabili nelyo fye ni nomba ‘alatulenga ukuumfwe fikesabako,’ ukucilisha ifintu fili no kucitika muli ishi “nshiku sha kulekelesha.”—2 Timote 3:1-5, 13; Ukutendeka 1:1-30; Esaya 53:1-12; Daniele 8:3-12, 20-25; Mateo 24:3-21; Ukusokolola 6:1-8; 11:18.

 4. Ni shani fintu Yehova abomfya imibele yakwe iya maka, kabili ni shani akaibomfya?

⁴ Imibele na imbi iya kwa Yehova yaba maka. Caliba icamonekesha mu myulu umo intanda shibomba nga malungu ya kupuminkana kukalamba yapongolola ulubuuto ne cikabilila. Lintu abantu ba bucipondoka na bamalaika basonsomba bumulopwe bwa kwa Yehova, abomfya amaka yakwe ngo “musalifi ku bulwi,” ukupokololako ishina lyakwe ilisuma ne fipimo fyakwe ifyalungama. Pa tushita twa musango yo tashimunuka ukulekelako amaka yakwe mu konaula, pamo nga mu Lyeshi lya mu kasuba ka kwa Noa, mu bonaushi bwa Sodomu na Gomora, na mu kulubula Israele ukupita muli Bemba Wakashika. (Ukufuma 15:3-7; Ukutendeka 7:11, 12, 24; 19:24, 25) Mu kwipipa, Lesa akabomfya amaka yakwe ku ‘kushonawila Satana mwi samba lya makasa yenu.’—Abena Roma 16:20.

 5. Capamo na maka yakwe, mibele nshi iyo Yehova na kabili akwata?

⁵ Nalyo line, nelyo fye mu kuba na ya maka yonse ayashapelela, kwalibako ukuicefya. Ilumbo 18:35, 36 litila: “[Ukuicefya kwenu, NW] kulankusha. Mwalefya amatampulo yandi ya mu molu yandi.” Ukuicefya kwa kwa Lesa kumusuminisha ‘ukulolesha apatali pa myulu na pe sonde. Ukwimyo mulanda mu lukungu, no kusumbulo mubusu ukufuma pa cishala.’—Ilumbo 113:6, 7.

 6. Mibele nshi iya kwa Yehova iyaba ya kupususho bumi?

⁶ Inkumbu sha kwa Yehova mu kubomba na bantu sha kupususho bumi. Mwandi ni nkumbu shalangilwe kuli Manase lintu alekelelwe, nelyo cingati aali nacita ubukalushi! Yehova atila: “Ilyo natila ku mubifi, Ukufwa ukafwa, kabili abwela ku lubembu lwakwe, no kucite casuminishiwa no bulungami; imembu shakwe shonse isho abembuka tashakebukishiwe kuli wene; nacite casuminishiwa no bulungami, ukuba no mweo akaba no mweo.” (Esekiele 33:14, 16; 2 Imilandu 33:1-6, 10-13) Yesu alebelebesha Yehova lintu acincishe ukulekelela imiku 77, nelyo fye imiku 7 mu bushiku bumo!—Ilumbo 103:8-14; Mateo 18:21, 22; Luka 17:4.

Lesa Uwakwata Imyumfwile

 7. Ni shani fintu Yehova aba uwapusanako ukufuma kuli tulesa twa cina Greece, kabili lishuko nshi ilya mutengo ilyaisuka kuli ifwe?

⁷ Aba mano ya buntunse aba ciGreek, pamo nga bena Epikuri, basumine muli tulesa lelo bamwene twene ngo twaba ukwalepesha ukufuma kwi sonde ica kuti te kuti tukwate ubuseko mu muntu nelyo ukwambukilwa ku kuyumfwa kwakwe. Fintu ukwampana kwa kwa Yehova ne Nte shakwe isha busumino kwaba ukwapusanako! “[Yehova, NW] acankilwa abantu bakwe.” (Ilumbo 149:4) Ababifi pa ntanshi ya Lyeshi bamulengele ukulanguluka no “kulunguluka ku mutima wakwe.” Israele ku kubulwo busumino kwakwe aletele Yehova ukukalipwa no kulunguluka. Abena Kristu ku kubulwe cumfwila kwabo kuti balenga umupashi wa kwa Yehova ubulanda; ku busumino bwabo, nangu cibe fyo, kuti bamuletela ubuseko. Fintu caba ica kupapusha ukuti umuntu uwacepesha pe sonde kuti alenga Kabumba wa kubumbwa konse ukulunguluka nelyo ubuseko! Mu cilolwa ca fyonse ifyo atucitila, fintu caba icawamisha ukuti twalikwata ishuko lyaumo mutengo ilya kumuletelo buseko!—Ukutendeka 6:6; Ilumbo 78:40, 41; Amapinda 27:11; Esaya 63:10; Abena Efese 4:30.

 8. Ni shani fintu Abrahamu abomfeshe ukupama kwakwe kuli Yehova?

⁸ Icebo ca kwa Lesa cilangisho kuti ukutemwa kwa kwa Yehova kulatusuminisha “ukupama.” (1 Yohane 4:17) Moneni umulandu wa kwa Abrahamu lintu Yehova aishile ku konaula Sodomu. Abrahamu atile kuli Yehova: “Bushe cine cine mukonawila abalungami pamo na babi? Nalimo muli abantu abalungami amakumi yasano mu kati ka musumba; bushe cine cine mukonaula palya pantu, no kukanalekelela pa mulandu wa balungami amakumi yasano abalimo mulya mu kati? . . . Citaluke kuli imwe. Bushe Kapingula wa pano isonde ponse takacite icalungama?” We mashiwi ya kusosa kuli Lesa! Nalyo line Yehova alisumine ukupususha Sodomu nga ca kuti abalungami 50 baali mulya. Abrahamu alitwalilile no kubweshako icipendo ukufuma kuli 50 ukwisa kuli 20. Abele uwa mwenso ukuti napamo aleipukishisha. Atile: “Shi belafulwa baShikulu, baleke nsose uyu muku umo fye: nalimo kukasangwamo ikumi limo.” Na kabili Yehova asumino kuti: “Nshakawonaule, pa mulandu we kumi limo.”—Ukutendeka 18:23-33.

 9. Mulandu nshi Yehova asuminishishe Abrahamu ukusosa muli ilya nshila, kabili cinshi twingasambilila ukufuma kuli ici?

⁹ Mulandu nshi Yehova asuminishishe Abrahamu ukulanda mu kupama kwa musango yo pa kuti engalanda muli yi nshila? Ica kubalilapo, Yehova alishibe ulwa kuyumfwa ukushikitika kwa kwa Abrahamu. Alishibe ukuti umwipwa wa kwa Abrahamu Lote aikele mu Sodomu, no kuti Abrahamu aali uwasakamikwa pa lwa kucingililwa kwakwe. Na kabili, Abrahamu aali cibusa wa kwa Lesa. (Yakobo 2:23) Lintu umo alanda kuli ifwe mu kukaluka, bushe tulesha ukwiluka ukuyumfwa kuli ku numa ya mashiwi yakwe no kulanguluka icisangwilileko, ukucilisha nga ca kuti ni cibusa uuli pe samba lya kutitikisha kwa mu nkuntu ukwa musango umo? Bushe taciba ca kusansamusha ukumona ukuti Yehova akaba uulangulukilako ulwa kupama kwesu, nga fintu aali kuli Abrahamu?

10. Ni shani fintu ukupama kutwaafwa mwi pepo?

¹⁰ Ukucilisha lintu twafwaya wene nga “Komfwa we pepo,” wesu e lintu tufulukisha uku kupama ku kupongolola umweo wesu kuli wene, lintu tuli abashikitika icabipisha kabili abapelenganishiwa lwa mu nkuntu. (Ilumbo 51:17; 65:2, 3, NW) Nelyo fye ni pali isho nshita lintu te kuti pambi tusange amashiwi yalinga, “[umupashi] wine utupaapaatila no kuteta ukushingasoswa,” kabili Yehova alakutika. Kuti aishiba amatontonkanyo yesu: “Mwailukilo kutontonkanya kwandi ukutali; apo tapalaisa icebo pa lulimi lwandi, moneni, mwe Yehova, mwaliciishiba conse.” Nalyo line, tulingile ukutwalilila ukulomba, ukufwaya, no kukunkunsha.—Abena Roma 8:26; Ilumbo 139:2, 4; Mateo 7:7, 8.

11. Ni shani fintu calangwa ukuti Yehova mu cituntulu alatusakamana?

¹¹ Yehova alasakamana. Alapayanishisha ubumi abumbile. “Amenso ya bonse yalolela imwe, na imwe mubapeele cilyo cabo mu nshita ya ciko; ni mwe mufumbatule minwe yenu, no kwikusha conse ica mweo ifyo cilefwaya.” (Ilumbo 145:15, 16) Tulalaalikwa ukumona ifyo aliishe fyuni mu mpanga. Lolesheni bacananika ba mu mpanga, ifyo abafwika mu kuyemba. Yesu alundileko ukuti Lesa akatucitila ifyacilapo apakalamba ukucila ifyo abacitila. E co mulandu nshi uwa kubela abasakamikwa? (Amalango 32:10; Mateo 6:26-32; 10:29-31) Petro wa Kubalilapo 5:7 amulaalika ukubika “amasakamika yenu yonse . . . pali wene, pa kuti asakamana imwe.”

“Cipasho ca Musango Wakwe”

12, 13. Ukulunda ku kumona Yehova ukupitila mu bubumbo bwakwe ne ncitilo shakwe ishalembwa muli Baibolo, ni mu nshila nshi shimbi twabela na maka ya kumumona no kumumfwa?

¹² Kuti twamona Yehova Lesa ukupitila mu bubumbo bwakwe; kuti twamumona ukupitila mu kubelenga ulwa ncitilo shakwe muli Baibolo; na kabili kuti twamumona ku mashiwi ne ncitilo ifyalembwa ukukuma kuli Yesu Kristu. Yesu umwine wine asose fyo, pali Yohane 12:45: “Uumona ine amono wantumine.” Na kabili, pali Yohane 14:9: “Uwamona ine, amona na Tata.” Abena Kolose 1:15 palondololo kuti: “[Yesu] e cipasho ca kwa Lesa uushimoneka.” AbaHebere 1:3 pabilisho kuti: “[Yesu, e] kubeeka kwa bukata bwa kwa Lesa, ne cipasho ca musango wakwe.”

¹³ Yehova atumine Umwana wakwe te kukupayanya fye icilubula lelo na kabili ku kwimika ica kumwenako cili no kwambulwa, ponse pabili mu cebo na mu ncitilo. Yesu alandile ifyebo fya kwa Lesa. Pali Yohane 12:50 atile: “Ifyo nanda, nandila umo Tata anjebeele.” Taleicitila fye fintu, lelo acitile ifintu ifyo Lesa amwebele ukucita. Pali Yohane 5:30 atile: “Ine nshingacita kantu neka.”—Yohane 6:38.

14. (a) Kumoneka nshi kwalengele Yesu ukwikatwa inkumbu? (b) Mulandu nshi inshila ya kwa Yesu iya kulandilamo yalengele abantu ukukonkomokela ku kumumfwa?

¹⁴ Yesu amwene abantu abalwele ifibashi, abalemana, bankomamatwi, impofu, na bakwata ifibanda na baleloosha abafwa babo. Ukuseshiwa ku nkumbu, alyundepe abalwala no kwimya abafwa. Amwene amabumba ayalulunkaniwa kabili ayapaswa lwa ku mupashi, kabili atendeke ukubasambilisha ifintu ifingi. Asambilishe te fyebo fye ifyalungama lelo na kabili mu kuba na mashiwi ya kusenamina ukufuma ku mutima wakwe ifyo fyaile mu kulungatika mu mitima ya bambi, ifyabapalamike kuli wene, ifyo fyabalengele ukucelela ukuya kwi tempele ku kumukutika, ifyo fyabalengele ukukonenena kuli wene, ukukutika kuli wene mu kuba no buseko. Balekonkomoka ku kumumfwa, ukubilisho kuti “takwatala akuba untu alandile ngo yu muntu.” Balipapile imisambilishishe yakwe. (Yohane 7:46; Mateo 7:28, 29; Marko 11:18; 12:37; Luka 4:22; 19:48; 21:38) Kabili lintu abalwani bakwe bafwaile ukumwikatila ku fipusho, alengele imibele ukubalukila, ukubatalalika.—Mateo 22:41-46; Marko 12:34; Luka 20:40.

15. Cinshi cali umutwe ukalamba uwa kushimikila kwa kwa Yesu, kabili kufika ku cipimo nshi asanshishemo bambi mu kwananya wene?

¹⁵ Abilishe ukuti “ubufumu bwa mu muulu [bwali] nabupalama” kabili bakakutika ukutwalilila ‘ukufwaya intanshi ubufumu.’ Atumine bambi ukubila ukuti bwali “[nabupalama] ubufumu bwa mu muulu,” ku kulenga “aba nko shonse ukuba abasambi,” ukube nte sha kwa Kristu “ukufika ku mpela ya pano nse.” Ilelo Inte sha kwa Yehova mupepi na mamilioni yane na citika baleenda mu ntampulo shakwe, ukucita ifyo fintu.—Mateo 4:17; 6:33; 10:7; 28:19; Imilimo 1:8.

16. Ni shani fintu imibele ya kwa Yehova iya kutemwa yabikilwe ku kweshiwa kwatapata, lelo cinshi yapwishishishe umutundu wa muntu?

¹⁶ “Lesa kutemwa,” e fyo twaebwa pali 1 Yohane 4:8. Iyi mibele yakwe iyapulamo yabikilwe ku kwesha kwabipisha ukwingelenganishiwa lintu atumine Umwana wakwe uwafyalwa eka kwi sonde ku kufwa. Ukushikitika uyu Mwana watemwikwa aculile no kupaapaata alumbulwile kuli Wishi wa ku muulu kufwile kwalilungulwishe Yehova apakalamba, nelyo cingatila Yesu ashininkishe ukusonsomba kwa kwa Satana ukwa kuti Yehova te kuti akwate abantu pe sonde abengekatilila bumpomfu bwabo kuli Wene pe samba lya kwesha kwatapata ngo kwa bufi. Na kabili tulingile ukutesekesha ubukulu bwe lambo lya kwa Yesu, pantu Lesa amutumine pano ku kutufwila. (Yohane 3:16) Iyi tayali ni mfwa yayanguka, iya mu kwangufyanya. Ku kutesekesha umutengo kuli bonse babili Lesa na Yesu na muli ifyo ukumwensekesha ubukulu bwe lambo lyesu kuli ifwe, lekeni tubebete icalembwa ca Baibolo ica kukonkana kwa fyacitike.

17-19. Ni shani fintu Yesu alondolwele ica kukumanya cabipa icamulaalilile ku ntanshi?

¹⁷ Mupepi ne miku ine, Yesu alondolwele ku batumwa bakwe icamulaalilile ku ntanshi. Inshiku fye shinono pa ntanshi tacilacitika, atile: “Moneni tulenina tuleya ku Yerusalemu, no Mwana wa muntu akapeelwa kuli bashimapepo bakalamba na bakalemba; bakamupingwilo kufwa, no kumupeela ku Bena fyalo, na bo bakamupumya, no kumufwishila amate, no kumufopaula, no kumwipaya.”—Marko 10:33, 34.

¹⁸ Yesu aumfwile ukutitikisha kwa cali ku ntanshi yakwe, ukumfwikisha ukutiinya kwa kufopaula kwa bena Roma. Imyando ya mpapa iya cikoti calebomfiwa ku kufopawilako yakwete utubulungwa twa cela na mafupa ya mpaanga ukukakilwa kuli yene; e co ilyo ukufopaula kwatwalilile, mu numa na ku molu kwalesanguka inkanda yasakalala iilesuumo mulopa. Imyeshi pa ntanshi, Yesu alangilile ukushikitika kwa mu nkuntu uko ica kukumanya cabipa icali ku ntanshi calemuletela, ukusosa nga fintu tubelenga pali Luka 12:50 ukuti: “Ndi no kubatishiwa ulubatisho; kabili naobelwa nga nshi lusuke lupwililile.”

¹⁹ Ukutitikisha kwaletulumana ilyo ilya nshita yalepalamina. Alandile pa lwa kwene kuli Wishi wa ku muulu ukuti: “Nomba umutima wandi wasakamikwa. Nga ndesosa shani? Bushe nsose, nati, Tata, ntuuleni ku nshita ino? Lelo ni pali ici e co naishila ku nshita ino.” (Yohane 12:27) Fintu Yehova afwile ayambukilweko kuli uku kupaapaata ukufuma ku Mwana wakwe uwafyalwa eka! Mu Getsemane, amaawala fye yanono pa ntanshi ya mfwa yakwe, Yesu abele uwacushiwa icibi no kusosa kuli Petro, Yakobo, na Yohane ukuti: “Kwafiite cibi ku mutima wandi, cikanga ne mfwa.” Amaminiti ayanono pa numa ya ico apepele ipepo lyakwe ilya kupelako pa lwa cene kuli Yehova ati: “Tata, nga mwafwaya, fumyeni pali ine ulukombo ulu. Lelo te kufwaya kwandi, kano kwenu, e ko kucitwe. Kabili pa kuba mu kulunguluka, alapepa no kupimpo kwacila; na mabe yakwe yaba nga matoni yakalamba ya mulopa ayaleponena pa nshi.” (Mateo 26:38; Luka 22:42, 44) Ici kuti pambi cali icaishibikwa mu fya mu cipatala pamo nga hematidrosis. Ca limo limo lelo kuti cacitika mu mibele ya nkuntu shikalamba nga nshi.

20. Cinshi caafwile Yesu ukupula mu ca kukumanya cakwe icabipa?

²⁰ Ukukuma kuli iyi nshita mu Getsemane, AbaHebere 5:7 patila: “Wene mu nshiku sha mubili wakwe wa buntunse, pa kuniniko kulomba no kupaapaata pamo no kukuuta kwa kalanda ne filamba ku wali na maka ya kumutuula ku mfwa; kabili aumfwilwe pa mulandu wa kutiina Lesa.” Apantu tatuulilwe ukufuma ku mfwa kuli umo “uwali na maka ya kumutuula ku mfwa,” ni mu mano nshi ipepo lyakwe lyaumfwilwe? Luka 22:43 asuko kuti: “Kuli wene kwamoneke malaika wa mu muulu, alemukosha.” Ipepo lyalyaswikwe mu kuti malaika uo Lesa atumine alikoseshe Yesu ukushipikisha pe samba lya ca kukumanya cabipa.

21. (a) Cinshi cilangisho kuti Yesu alipitile mu ca kukumanya cabipa uwacimfya? (b) Lintu ifya kwesha fyesu fyaluma, cinshi tukafwaya ukuba na maka ya kusosa?

²¹ Ici cali icamonekesha ukufuma ku ca kufumamo. Lintu ukushomboka kwakwe ukwa lwa nkati kwapwile, Yesu alimine, abwelele kuli Petro, Yakobo, na Yohane, no kutila: “Imeni, natuleya.” (Marko 14:42) Mu cishinka aletila, ‘Lekeni ndeya ku kufutukwa no kufyompwa, ku kwikatwa kwi bumba, ku kulubulushiwa kushili kwa mwi funde, ukusenukwa mu kuluba. Lekeni ndeya ku kupumiwa, ukufwishilwa, ukufopaulwa, no kupoopelwa ku cimuti ca kucushiwilwapo.’ Pa maawala mutanda akobeme palya, mu kukalipa kwabipisha, ukushipikisha ukufika ku mpela. Ilyo alefwa, alikuutile mu kucimfya ati: “Nacipwishishiwa!” (Yohane 19:30, NW) Alitwalilile uwashangila kabili aali nashininkisha bumpomfu bwakwe mu kusumbula bumulopwe bwa kwa Yehova. Fyonse ifyo Yehova amutumine ukucita kwi sonde aali napwishishisha. Lintu twafwa nelyo lintu Armagedone yapama, bushe tukaba na maka ya kusosa ukukuma ku mulimo wesu kuli Yehova ukuti: “Nacipwishishiwa”?

22. Cinshi cilangisha icipimo ca kwanana kwa kwishiba Yehova?

²² Mu cishinka, kuti twaba abashininkisha ukuti mu nshita yalinga iya kwa Yehova iilepalamina lubilo lubilo, “icalo [conse] cikesulamo ukwishiba Yehova, ifyo amenshi yafimba pali bemba.”—Esaya 11:9.

Bushe Uleibukisha?

◻ Cinshi cipilibula ukwishiba no kukwata ubwishibilo?

◻ Ni shani fintu inkumbu sha kwa Yehova no kulekelela fyalangwa kuli ifwe mu Cebo cakwe?

◻ Ni shani fintu Abrahamu abomfeshe ukupama kuli Yehova?

◻ Mulandu nshi twingalolesesha pali Yesu kabili muli wene ukumona imibele ya kwa Yehova?