“Bakacita wa Cebo” Aba Nsansa

“[Pokeleleni] mu bufuuke icebo icalimbuka, icili na ’maka aya kupusushe mitima yenu. Awe mube bakacita wa cebo, te ba kuumfwa fye iyo.”—YAKOBO 1:21, 22.

 1. Ni shani fintu ilembo lyesu ilya mwaka wa 1996 lili no kulangulukwa?

“MUBE BAKACITA WA CEBO.” Muli ubu bulondoloshi bwayanguka mwaba ubukombe bwa maka. Bwafuma muli “Kalata wa kwa Yakobo” uwa mu Baibolo, kabili bukalangishiwa mu Mayanda ya Bufumu apantu e lembo lya mwaka ilya Nte sha kwa Yehova ukupulinkana 1996 onse.

2, 3. Mulandu nshi Yakobo e wali uwalinga ukulemba kalata wakwate shina lyakwe?

² Yakobo, uwali munyina citika wa kwa Shikulu Yesu, aali uwalumbuka mu cilonganino ca Bena Kristu ica mu kubangilila. Pa kashita kamo ilyo Yesu aali nabuushiwa, Shikulwifwe umwine amonekele kuli Yakobo kabili lyene ku batumwa bonse. (1 Abena Korinti 15:7) Pa numa, lintu umutumwa Petro mu cipesha amano alubwilwe ukufuma mu cifungo, aebele ibumba lya Bena Kristu ilyalongene ukuti: “Kebeni Yakobo na ’ba bwananyina ifi fintu.” (Imilimo 12:17) Cilemoneka kwati, nangula ca kuti Yakobo wena taali umo uwa batumwa, e wayangalile ukukumana kwe bumba litungulula mu Yerusalemu lintu abatumwa na bakalamba bapingwilepo ukuti Abena fyalo abasangulwa Abena Kristu tabaalekabila ukusembululwa. Yakobo asupwile umulandu, no kupingulapo kwaliikashiwe no mupashi wa mushilo no kutumwa ku filonganino fyonse.—Imilimo 15:1-29.

³ Ukwabulo kutwishika, ukupelulula kwakosoka ukwa kwa Yakobo kwalimo ubulashi. Nangu cibe fyo, alisumine mu kuicefya ukuti wena aali fye “umusha wa kwa Lesa kabili uwa kwa Shikulu Yesu Kristu.” (Yakobo 1:1) Kalata wakwe uwapuutwamo akwatila Abena Kristu ba lelo ukufunda kwa mano ukwingi no kukoselesha. Apwishishiwe ukulembwa mupepi ne myaka ine ilyo abena Roma ukutungululwa na Mushika Cestius Gallus tabalasansa Yerusalemu pa muku wa kubalilapo, pa numa imbila nsuma “[yabililwe mu kusaalala] ku cibumbwa conse ca mwi samba lya muulu.” (Abena Kolose 1:23) Shali ni nshita shayafya, kabili ababomfi ba kwa Yehova baali abaibukila nga nshi ukuti ubupingushi Bwakwe bwali mupepi no kwishila uluko lwa ciYuda.

 4. Cinshi cilangilile fyo Abena Kristu ba kwamba balicetekele nga nshi Icebo ca kwa Lesa?

⁴ Balya Bena Kristu kale kale balikwete Amalembo ya ciHebere yonse no bwingi bwa Amalembo ya ciGriki. Bakalemba ba Baibolo Abena Kristu ukwabulo kutwishika balicetekele nga nshi Icebo ca kwa Lesa, nga fintu cimonwa ku miku ubwingi intu baloshako ku fyalembwa fyabatangilile. Mu kupalako, na ifwe ilelo tulakabila ukusambilila Icebo ca kwa Lesa mu mukoosha no kucibomfya mu bumi bwesu. Pa kuti tushipikishe, tulakabila amaka no bukose ifyo Amalembo ya Mushilo yapayanya.—Ilumbo 119:97; 1 Timote 4:13.

 5. Mulandu nshi tukabila ubutungulushi bwaibela ilelo, kabili ni kwi tuli no kubusanga?

⁵ Ilelo umutundu wa muntu wiminine pa nembenembe ya “bucushi bukalamba ubushatala abubako ukutula pa kutendeka kwa pano isonde ukufika kuli nomba, nangu takwakabeko.” (Mateo 24:21) Ukupusunsuka kwesu kwashimpwa pa kukwata ubutungulushi bwa bulesa. Ni shani fintu twingabusanga? Ukupitila mu kwangusha imitima yesu pa kuti ingapokelela ifisambilisho fya Cebo ca kwa Lesa icapuutwamo no mupashi. Ici cikatulenga ‘ukuba bakacita wa cebo,’ ukupala ababomfi ba kwa Yehova aba bucishinka aba ku nshita sha ku kale. Tufwile ukubelenga no kusambilila Icebo ca kwa Lesa no mukoosha no kucibomfya ku kuletela Yehova ilumbo.—2 Timote 2:15; 3:16, 17.

Ukushipikisha mu Kuba no Kusekelela

 6. Mulandu nshi tulingile ukusekelela ilyo twawila mu fya kwesha?

⁶ Mu mashiwi ya kwiswila kalata wakwe, Yakobo alumbulamo ukusekelela, icisabo ca cibili mu fisabo fya mupashi wa kwa Lesa. Alembo kuti: “Ishibeni ukuti ca kusekelela fye, mwe bamunyinane, ilintu mwawila mu fya kwesha fya misango misango, pa kwishibo kuti ukulabulwa kwa citetekelo cenu kucito kushipikisha. Kabili lekeni ukushipikisha kubombe umulimo wa kuko uwafikapo, ukuti mube abapwililila kabili abafikapo, ababulwe cintu nangu cimo.” (Yakobo 1:2-4; Abena Galatia 5:22, 23) Mulandu nshi cingasoselwe fyo ukuwila mu fya kwesha ifingi “ca kusekelela fye”? Nelyo fye ni Yesu mu Lyashi lyakwe ilya pa lupili atile: “Muli [ba nsansa, NW] ilyo bamupontela, no kumulamata, no kumwambo bufi icintu conse ca bubifi pa mulandu wa ine; sekeleleni no kwanga, pantu icilambu cenu cikalamba mu muulu.” (Mateo 5:11, 12) Kulaba ukwikushiwa kwa nsansa ilyo tulemona amapaalo ya kwa Yehova ukwisa pa kubombesha kwesu ilyo tulepilikita ukulola ku buyo bwa mweo wa muyayaya.—Yohane 17:3; 2 Timote 4:7, 8; AbaHebere 11:8-10, 26, 35.

 7. (a) Ni shani fintu twingafwiwa ukushipikisha? (b) Ni shani fintu twingalambulwa, ukupala Yobo?

⁷ Yesu umwine alishipikishe “pa mulandu wa kusekelela ukwabikilwe pa ntanshi yakwe.” (AbaHebere 12:1, 2) Ukutontomesha pa ca kumwenapo cabamo ubukose ica kwa Yesu, na ifwe bene kuti twashipikisha! Nga fintu Yakobo alandapo mu kusondwelela kwa kalata wakwe, Yehova alalambula bakasunga ba bumpomfu apakalamba. Yakobo atila: “Moneni, tuletila [ba nsansa, NW] abashipikisha; mwalyumfwo kushipikisha kwa kwa Yobo, kabili mwalimwene ukupanga kwa kwa Shikulu, kwa kuti Shikulu wa luse ulwingi kabili wa congwe.” (Yakobo 5:11) Ibukisha ifyo bumpomfu bwa kwa Yobo bwalambwilwe lintu ubulwele bwakwe bwaposhiwe kabili aipakishe ubumi bwa mwisulo, ubwa nsansa na batemwikwa bakwe. Ukushipikisha muli bumpomfu kuti kwakuletela ukusekelela kwapalako muli Paradise walaiwa mu calo cipya ica kwa Lesa, icikaba e kalume ka kusekelela twakwata ilyo tulebombela Yehova ilelo.

Ukusokota Amano

 8. Ni shani fintu twingasanga amano ya cine, ayabomba, kabili ni shani fintu ipepo lingatwaafwa muli ici?

⁸ Ukusambilila Icebo ca kwa Lesa mu mukoosha, capamo no kucibomfya ifyo cifwile ukubomba, kukafumamo amano ya bukapepa, ukutulenga ukushipikisha ifya kwesha muli ino micitile yabola iya kwa Satana iileya ku kupwa. Ni shani fintu twingashininwe fyo kuti twasanga amano ya musango yo? Yakobo atweba ati: “Nga umo uwa muli imwe abulwa amano, alombe kuli Lesa uupeela fye kuli bonse ukwabulo kwebaula, kabili yakapeelwa kuli wene. Lelo alombele mu citetekelo, no kutwishika nakalya; pantu uutwishika apale bimbi lya muli bemba ilyaimiwa no kusensenunwa ku mwela.” (Yakobo 1:5, 6) Tulingile ukupepa mu mukoosha, mu kuba no kucetekela kushipungaila ukwa kuti Yehova akomfwa ukupaapaata kwesu no kuti akaasuka kwene mu nshita yakwe iyalinga kabili mu nshila yakwe umwine.

 9. Ni shani fintu Yakobo alondolola amano ya bukapepa no mulimo wa yako?

⁹ Amano ya bukapepa yaba ca kupeelwa fye ukufuma kuli Yehova. Pa kulondolola ifya kupeelwa fya musango yo, Yakobo atila: “Ica kupeelwa conse icisuma ne ca bupe conse icafikapo cafuma mu muulu, ciika ukufuma kuli Shifwe wa fya lubuuto, uo takwabako ukwaluka kwa kutula no kuwa, nangu kupilibuka kwa kuloshe cinshingwa pa nshi.” Pa kashita kambi muli kalata wakwe, Yakobo alondolola icifuma mu kunonka amano ya cine aya uyo musango lintu asoso kuti: “N’ ani wa muli imwe uwa mano kabili uwasalapuka? Alange imilimo yakwe ku mibele yakwe isuma, mu bufuuke bwa mano. . . . Amano ayafuma mu muulu yena pa kubala yantu ya musangwela, e lyo ya mutende, ya mutembo, ya bupete, yaisulamo uluse ne milimo isuma, ayashitwishika, kabili ayabula bumyalumyalu.”—Yakobo 1:17; 3:13-17.

10. Ni shani fintu ukupepa kwa bufi kwacilana no kwa cine?

¹⁰ Mu buteko bwa calo ubwa kupepa kwa bufi, nampo nga ni mu Kristendomu nelyo mu fyalo fimbi, abaya ku mapepo ilingi line baakwata fye umwata wa kwimba inyimbo, ukukutika ku mapepo ya kubwekeshabwekeshapo, kabili inshita shimo shimo ukumfwako uko shimapepo alandapo amashiwi yamo. Tabakoseleshiwa pa lwa kubilisha ubukombe bwe subilo, pantu ku mipepele iingi ifilolelo fya nshita ya ku ntanshi tafyaba ifyabembela. Isubilo lyawamisha ilya Bufumu bwa kwa Lesa ubwa kutekwa na Mesia tabulandwapo nelyo nga bulalandwapo ninshi tabwaumfwikishiwa nangu panono. Mu busesemo ukukuma ku bakonshi ba Kristendomu Yehova atila: “Bubili ububi ubo abantu bandi bacita, basuula ine, ne kamfukumfuku ka menshi ya mweo, no kuyaifukwile fishima, ifishima ifyalalika ifishingekalamo amenshi!” (Yeremia 2:13) Tabakwata amenshi ya cine ca mu cebo ca kwa Lesa. Tabakwata amano yafuma ku muulu.

11, 12. (a) Ni mu nshila nshi umo amano ya bulesa yalingile ukutukunta? (b) Amano ya bulesa yatusoka ukukuma ku lwa finshi?

¹¹ Fintu caba icapusanako ku Nte sha kwa Yehova ilelo! Pa kuba na maka yapeelwa na Lesa, balesalanganya mwi sonde lyonse imbila nsuma ya Bufumu Bwakwe ubuleisa. Amano ayo balanda yashimpwa mu kukosa pa Cebo ca kwa Lesa. (Linganyako Amapinda 1:20; Esaya 40:29-31.) Mu cine cine, balabomfya bwino ukwishiba kwa cine no kumfwikisha ilyo balebilisha imifwaile yawamisha iya kwa Lesa kabili Kabumba wesu. Ukufwaisha kwesu kulingile kwaba kwa kuti bonse mu cilonganino “[besulemo] ukwishibo kufwaya [kwa kwa Lesa] mu mano yonse no mucetekanya ifya bumupashi.” (Abena Kolose 1:9) Pa kukwata ici ica kukuulapo, abacaice na bakalamba bonse bene bakakuntwa ukuba “bakacita wa cebo” lyonse.

¹² “Amano ayafuma mu muulu” yalatusoka pa lwa membu isho shingafumamo ukukaanwa kwa bulesa. Yakobo asoso kuti: “Ishibeni ici, mwe bamunyinane batemwikwa. Umuntu onse abe uwayanguka ku kuumfwa, uwakokola ku kulanda, uwakokola ku kukalipa: pantu ubukali bwa bantu tabubomba bulungami bwa kwa Lesa.” Ee, tufwile ukuba abayanguka, abaswangaana, ku kuumfwa ukufunda kwa bulesa no kukubomfya. Nangu cibe fyo, tufwile ukuibaka ukukanabomfya bubi bubi cilya “cilundwa cinono ca mubili,” ululimi. Ukulandila mu mampalanya, ululimi kuti lwabilimya ‘umutengo uukulu’ ukupitila mu kutakisha, ulwambo lushabamo kupelulula, nelyo imilandile ya bumano kuikwatila. Muli fyo tulekabila ukulundulula imilandile yalowa no kuilama mu kubishanya kwesu konse.—Yakobo 1:19, 20; 3:5.

13. Mulandu nshi cakatamina ukupokelela “icebo icalimbuka”?

¹³ “E ico talusheni conse ica busali ne ca busafya ca bubi, no kupokelela mu bufuuke icebo icalimbuka, icili na ’maka aya kupusushe mitima yenu,” e fyalemba Yakobo. (Yakobo 1:21) Cino calo cafunuka, no musango wa ciko uwa bumi uwa mataki, uwa kutemwe fikwatwa, uwa bukaitemwe ne mibele ya ciko iyabotelela, cili mupepi no kuya. “Lelo uucito kufwaya kwa kwa Lesa ekalilila umuyayaya.” (1 Yohane 2:15-17) Fintu cili icacindama kanshi, ukuti tupokelele “icebo icalimbuka”! Amano ayo Icebo ca kwa Lesa cipayanya yalipusanininako no bubi bwa cino calo cilefwa. Tatulefwaya ubo bubi. (1 Petro 2:1, 2) Tulekabila ukutemwe cine ne citetekelo cashangila ukulimbuka mu mitima yesu, pa kuti twingaba abapampamina ukukaanapaasuka nangu panono ukufuma ku nshila sha kwa Yehova isha bulungami. Lelo bushe nga twaumfwa fye Icebo ca kwa Lesa ninshi calaala capwa?

Ukuba “Bakacita wa Cebo”

14. Ni shani fintu twingaba “aba kuumfwa” kabili “bakacita” wa Cebo?

¹⁴ Pali Yakobo 1:22, tubelengapo ukuti: “Mube bakacita wa cebo, te ba kuumfwa fye iyo, e kuikopeka fye.” “Mube bakacita wa cebo”! Ici mu kushininkisha e capulamo muli kalata wa kwa Yakobo. Tufwile ukukutika, lyene ukucita ‘ifyo fine fye’! (Ukutendeka 6:22) Ilelo abantu abengi batunga ukuti ukumfwa fye ku kupepesha kwa kwa shimapepo nelyo ukuyapepako imipepele ya kubwekeshabwekeshapo mu nshita mu nshita ninshi capwa calilinga, apo pene ninshi bapela no kupela. Batontonkanye fyo kulila fye baleikala ‘ubumi ubusuma’ ukulingana ne fipimo fyabo abene, ninshi cili fye bwino. Lelo Yesu Kristu alondolwele ukuti: “Umuntu nga afwayo kunkonka pa numa, aikaanye, asende ne [cimuti cakwe ica kucushiwilwapo, NW], no kunkonka.” (Mateo 16:24) Imibombele ya kuipeela bulilambo no kushipikisha mu kukonka icipasho ca kwa Yesu mu kucita ukufwaya kwa kwa Lesa mu kumonekesha ilafwaikwa ku Bena Kristu ba cine. Kuli bena, ukufwaya kwa kwa Lesa ilelo kwaba fye cimo cine na fintu kwali mu mwanda wa myaka uwa kubalilapo lintu Yesu wabuushiwa akambishe ukuti: “E ico kabiyeni, kalengeni aba nko shonse ukuba abasambi.” (Mateo 28:19) Bushe ulebomba shani muli uyu mulimo?

15. (a) Cilangililo nshi Yakobo apeela, ukulangisha fintu twingaba “bakacita wa cebo” aba nsansa? (b) Mulandu nshi ukuya fye ku kupepa cishabela icakumanina?

¹⁵ Nga ca kuti twatwalilila ukulolesha mu Cebo ca kwa Lesa, kuti caba nge cilola ukutulangisha umusango untu twaba. Yakobo asoso kuti: “Uulolesha mu malango ayatuntulu aya buntungwa, no kwikalililamo, uushaba koomfwa wa cilafi lelo ni kacita wa mulimo, uyu akabo wapaalwa [uwa nsansa, NW] mu kucita kwakwe.” (Yakobo 1:23-25) Ee, akaba ‘kacita wa cebo’ uwa nsansa. Mu kulundapo, caliba icacindama ukuba “kacita” na mu tuntu utunono mu mikalile ya Bwina Kristu. Tatulingile ukuikopeka nangu panono ukutontonkanya ukuti ukuya fye ku kupepa calikumanina. Yakobo atufunda ukubaka imbali shimo isha kupepa kwa cine isho na Bena Kristu bapimpa napamo balekeleshe. Alembo kuti: “Ukupepa ukwasanguluka kabili ukushakowela ku menso ya kwa Lesa Shifwe ni uku: ukupempule nshiwa na bamukamfwilwa mu kucula kwabo, no kuibaka uwabula akabi ku fya pano isonde.”—Yakobo 1:27.

16. Ni mu nshila nshi umo Abrahamu abelele “Cibusa wa kwa Lesa,” kabili ni shani fintu twingaba pali bucibusa na Wene?

¹⁶ Tacakumanina ukulanda fye ati, ‘Nalitetekela muli Lesa,’ no kupwa ninshi capwa. Nga fintu Yakobo 2:19 alanda: “Iwe watetekelo kuti Lesa aba umo. Wacita bwino. Ifiwa na fyo fyatetekela, no kututuma.” Yakobo akomailapo ukuti “icitetekelo, nga tacakwata milimo cabe cafwa icine,” kabili alanda pali Abrahamu, ati: “Icitetekelo [cakwe] cabombele pamo ne milimo yakwe, na ku milimo e ko icitetekelo calengelwe ukufikapo.” (Yakobo 2:17, 20-22) Imilimo ya kwa Abrahamu yasanshishemo ukupayanishisha balupwa lwakwe ukukumbusuka, ukulangisha icileela, ukuipekanya ukupeela Isaki ilambo, no ‘kulumbula’ icitetekelo cishitelententa mu bulayo bwa kwa Lesa ubwa “Musumba uuli ne ca kukuulapo,” Ubufumu bwa buMesia ubucili ku ntanshi. (Ukutendeka 14:16; 18:1-5; 22:1-18; AbaHebere 11:8-10, 13, 14; 13:2) Mu kulinga, Abrahamu “aitilwe Cibusa wa kwa Lesa.” (Yakobo 2:23) Na ifwe bene kuti twapendelwako nge ‘fibusa fya kwa Yehova’ ilyo tulebilisha mu kucincila icitetekelo cesu ne subilo mu Bufumu bwa bulungami ubuleisa.

17. (a) Ni shani fintu Rahabu ‘alungamikwe,’ kabili cilambu nshi apokelele? (b) Mutande nshi uwalepa uwaba mu Baibolo uwa abo ‘abaali bakacita wa cebo’? (c) Yobo alambwilwe shani, kabili mulandu nshi?

¹⁷ Abo ababa “bakacita wa cebo” mu cituntulu “ni ku milimo . . . [balungamikilwa], kabili te ku citetekelo ceka iyo.” (Yakobo 2:24) Rahabu ni umo uwalundileko imilimo ku citetekelo cakwe mu “cebo” ico aumfwile pa lwa fya bumpalume fya kwa Yehova. Afishile inengu sha bena Israele no kubaafwa ukufyuka, kabili lyene alonganike aba ŋanda ya kwa wishi pa kuti bengabakwa. Pa kubuushiwa, fintu akasekelela ukwishibo kuti icitetekelo cakwe, icatungililwe ku milimo, calengele ukuti engaba nacikolwe wa kwa Mesia! (Yoshua 2:11; 6:25; Mateo 1:5) AbaHebere icipandwa 11 bapayanya umutande walepa uwa bambi ‘abaali bakacita’ mu kulangisha icitetekelo cabo, kabili bakalambulwa apakalamba. Kabili tatufwile ukulabako Yobo, uyo pe samba lya fya kwesha fyatapata atile: “Libe ilyapaalwa ishina lya kwa Yehova.” Nga fintu tulandilepo kale, icitetekelo cakwe ne milimo fyafuminemo icilambu cawamisha. (Yobo 1:21; 31:6; 42:10; Yakobo 5:11) Mu kupalako, ukushipikisha kwesu ilelo pa kuba “bakacita wa cebo” kukatuletela ububile bwa kwa Yehova.

18, 19. Ni shani fintu bamunyina abatitikishiwa pa nshita yalepa ‘baba bakacita wa cebo,’ kabili mapaalo nshi ayo imilimo yaleta?

¹⁸ Bamunyinefwe aba mu Eastern Europe baba pa kati ka abo abashipikisha nga nshi pa myaka iingi. Nomba apantu ifibindo ifingi fyalifumishiwapo, aba mu cine cine ‘baliba bakacita wa cebo’ mu mibele yayaluka. Bamishonari na bapainiya ukufuma mu fyalo ifiina mupalamano balikuukilako ku kwafwilisha mu kusambilisha, no kuteyanya ifintu. Umusambo wa mu Finland ne misambo imbi iya mu bwina mupalamano iya Watch Tower Society yalituma bakakuula incenshi, kabili bamunyina ba mu kusaalala kwa calo aba bukapekape balituma indalama ku kwafwilisha ubukuule bwa maofeshi yapya aya musambo na Mayanda ya Bufumu.—Linganyako 2 Abena Korinti 8:14, 15.

¹⁹ Fintu balya bamunyina batitikishiwe pa nshita ntali bayankulako mu kupimpa mu kubomba mwi bala! ‘Balecucutika no kupilikita’ ukubomba nga bengasanga amashuko bapushile, mu “nshita iishiyene.” (1 Timote 4:10; 2 Timote 4:2) Ku ca kumwenapo, muli uyu April wapwile mu Albania, uko ukunyanyantila kwali ukwakaluka nga nshi, amatrakiti yonse aya Imbila ya Bufumu aya mutwe wa kuti “Mulandu Nshi mu Bumi Mubelele Impika Shafulishe Fi” yalyananishiwe yonse mu nshiku fye shitatu. Uku kwali kukonkelelo buseko kwawamisha ukuya kuli abo abasangilwe ku Cibukisho ca mfwa ya kwa Yesu, uko kwasangilwe abantu 3,491—ukucila bakasabankanya abashimikila mulya ku mpendwa 538.

20. Cinshi cilangililwa ku mpendwa ya basangwa ku Cibukisho muli ino myaka, kabili ni shani fintu abengi aba bene bengaafwiwa?

²⁰ Ifyalo fimbi na fyo fyalisangwilileko apakalamba ku mpendwa iishatala aifikwapo iya basangilwe ku Cibukisho abacilile pali 10,000,000. Mu fifulo ifingi, abapya ‘baleba bakacita wa cebo’ ilyo icitetekelo cabo cakoshiwa ukupitila mu kusangwako no kubaka Icibukisho. Bushe kuti twakoselesha abengi abaleisa mu kubishanya na ifwe abapya pa kuti bengafikapo ku kukwata ilyo ishuko?

21. Ukulingana ne lembo lyesu ilya mwaka, ni nshila nshi tulingile ukuyamo, kabili mu kuba no buyo nshi?

²¹ Ukupala balya Bena Kristu bapimpa aba mu mwanda wa myaka uwa kubalilapo, na Bena Kristu abengi abaabako ukutule lyo, shi lekeni tupampamine pa kupilikita mu “[kukonkelela] ukulola ku buyo” bwa kupokelela umweo wa muyayaya, nampo nga ni mu Bufumu bwa mu muulu nelyo mu bwikashi bwa buko ubwa pe sonde. (Abena Filipi 3:12-14) Ubo buyo bwaliwaminwa ukubombesha na maka yesu yonse. Ino te nshita ya kushetukila ku kuba bakomfwa fye, lelo ni nshita ya lulumbi iya ‘kukosa no kubomba.’ (Hagai 2:4; AbaHebere 6:11, 12) Pa kuba ‘natupokelela icebo icalimbuka,’ shi ‘natube bakacita wa cebo aba nsansa’ nomba no kutwalilila na ku nshita ya ciyayaya iileisa.

Kuti Wayasuka Shani?

◻ Ni shani fintu twingashipikisha no kusekelela?

◻ Cinshi caba “amano ayafuma mu muulu,” kabili ni shani fintu twingayakonkelela?

◻ Mulandu nshi tulingile ‘ukuba bakacita wa cebo, te ba kuumfwa fye’?

◻ Malipoti nshi yalingile ukutucincimuna ukuba “bakacita wa cebo”?

[Icikope pe bula 17]

Shi na ifwe natwangushe imitima yesu pa kuti ipokelele isambilisho lya bulesa

[Icikope pe bula 18]

Bumpomfu bwa kwa Yobo bwala-mbwilwe lintu ubulwele bwakwe bwaposhiwe kabili aipakishe ubumi bwa mwisulo, ubwa nsansa na batemwikwa bakwe