Bushe Mulafuluka Ukubomba mu Kucishamo?

LAURA asosa ukuti: “Nalifuliilwe Yehova. Nalipepele imiku ne miku ukuti atwaafwe ukupwisha amafya ya fya ndalama pa kuti ningatwalilila ukubomba bupainiya—ukwabula ica kutumbukamo. Kwi pele pele nalilekele bupainiya. Kabili ukulande cishinka nalefimbila abali na maka ya kutwalilila ukubomba.”

Langulukeni na kabili, ifyo cali kuli Michael, umubomfi utumikila mu cilonganino ca Nte sha kwa Yehova. Aletinamina bucilolo. (1 Timote 3:1) Lintu ukufuluka kwakwe kushafikilishiwe pa myaka iingi, alikalifiwe ica kuti talefwaya no kulangulukwapo nga nafikapo. Atila: “Nshalefwaya ukushipikisha ukulengwe nsoni na kabili.”

Bushe mwalikumanyapo ifyapalako? Bushe mwalipatikishiwe ukuleka ishuko lya mulimo wa teokrasi ilyo mwatemenwe? Ku ca kumwenako, bushe mwalipatikishiwe ukuleka ukubomba bupainiya, bukabilisha bwa nshita yonse ubwa Bufumu? Nelyo bushe mulafuluka ifishingamo fya mu cilonganino fimo ifyaseekeshiwa kuli bambi? Napamo kuti mulafwaisha no kubombela pa Bethel nelyo bumishonari, lelo imibele mwabamo taisuminisha.

“Icacetekelwa icashimba cilwaliko mutima,” e fisumina ibuuku lya Amapinda. (Amapinda 13:12) Ici kuti cacilanapo nga ca kuti bambi e bapokelela amashuko ayo yene musubila. Bushe Icebo ca kwa Lesa cilapako ukushilimuka, icisansamushi, ne subilo ku bapita mu fya kulenge nsoni fya musango yu? Ee, cilapa. Na kuba, Ilumbo lyalenga 84 lilumbulula ukuyumfwa kwa mubomfi wa kwa Yehova uwakwete ukufuluka kwapalako pa lwa mulimo wa kwa Yehova lelo ukushafikilishiwe.

Ukutesekesha kwa Mwina Lebi

Bakashika ba Ilumbo lyalenga 84 baali bana ba kwa Kora, abena Lebi abalebombela Yehova pe tempele kabili balikatamike nga nshi amashuko yabo aya mulimo. Umo uwa bene abilikishe ati: “Ifyo yayemba amekalo yenu, mwe Yehova wa milalo! Umweo wandi wafuluka, na kabili walemba ku kufwaye mansa sha kwa Yehova; umutima wandi no mubili wandi fyawila Lesa wa mweo utupundu.”—Ilumbo 84:1, 2.

Uyu mwina Lebi alefuluka nga nshi ukubomba pe tempele lya kwa Yehova ica kuti ne mpanga ya fye mu nshila ya ku Yerusalemu yalemoneka iyayemba kuli wene. Asoso kuti: “Bapita mu mupokapoka wa filamba, baucito wa tumfukumfuku.” (Ilumbo 84:6) Ee, impanga iyo lyonse yaba iyauma kuli wene yali nge citungu catapililwa.

Pa mulandu wa kuti uyu kemba wa malumbo ali mwina Lebi uushali wa muli bushimapepo, kuti abomba pe tempele pa mulungu fye umo mu myeshi yonse 6. (1 Imilandu 24:1-19; 2 Imilandu 23:8; Luka 1:5, 8, 9) Inshita yakwe iyashala alepoosa ku ŋanda muli umo uwa mishi ya bena Lebi. Muli fyo aimbile ati: “Fyawile fiipailo fyenu, mwe Yehova wa milalo, Imfumu yandi kabili Lesa wandi; awe icuni nacisange ŋanda, na kamimbi icisansala, umo kengabika abana ba kako.” (Ilumbo 84:3) Fintu uyu mwina Lebi aali no kusansamuka aba nge fyuni ifyaleikalilila mwi tempele!

Nga calyangwike ku mwina Lebi ukukalifiwa pantu te kuti abombele pe tempele libili libili. Nangu cibe fyo, alitemenwe ukubomba ukufika pantu engapesha, kabili mu cine cine alilwike ukuti ukuipeela kwa mutima onse kuli Yehova kwaliwamino kubombesha. Cinshi cayafwile uyu mwina Lebi ukutwalilila uwaikushiwa mu mashuko yakwe aya mulimo?

Sambilileni Ukwikushiwa

Uyu mwina Lebi atila: “Ubushiku bumo mu mansa shenu bwawama ukucile nshiku ikana limo [1,000] pa nse: ninsalo kuba ku mwinshi wa ŋanda ya kwa Lesa wandi, ukucilo kwikala mu mahema ya babifi.” (Ilumbo 84:10) Alitesekeshe ukuti ukupoosa nelyo fye ubushiku bumo mu ŋanda ya kwa Yehova lishuko lishingalinganishiwako. Kabili uyu mwina Lebi alikwete inshiku shafulilanako isha kubombela pe tempele. Ukwikushiwa kwakwe pa mashuko yakwe kwamulengele ukwimba mu buseko.

Nga ifwe? Bushe tulapenda amapaalo yesu, nelyo bushe tulalaba amashuko twakwata kale kale mu mulimo wa kwa Yehova? Yehova aliseekesha ku bantu bakwe amashuko yalekanalekana ne milimo, pa mulandu wa kuti baliipeelesha kuli wene. Aya mashuko ne milimo yasanshamo ifishingamo fyafina ifya bwangalishi, ubucemi, ukusambilisha, ne mbali shalekanalekana isha mulimo wa nshita yonse. Lelo na kabili yasanshamo ifintu fimbi ifyaumo mutengo ifyakuma ku kupepa Yehova.

Ku ca kumwenako, langulukeni pa butumikishi bwa Bwina Kristu. Umutumwa Paulo atile ishuko lyesu ilya kushimikila imbila nsuma lyaba kwati twakwate ‘cuma mu fipe fye bumba.’ (2 Abena Korinti 4:7) Bushe mumona umulimo wa musango yo nge cuma caumisho mutengo? Yesu Kristu, uwali solwesolwe mu mulimo wa kushimikila Ubufumu, e fintu aumwene, muli fyo ukutwimikila icipasho. (Mateo 4:17) Paulo atile: “Pa kuba [no butumikishi, NW] ubu . . . , tatunenuka.”—2 Abena Korinti 4:1.

Ukulongana kwa Bwina Kristu na ko kupayanya kwashila uko tushilingile ukwangusha. Ku kulongana kwesu, tulapokelela ukufunda tufwaya no kuipakisha ukubishanya uko tukabila. Na kabili ku kulongana kuti twalumbulula apabuuta icitetekelo cesu ne subilo ukupitila mu kwasukapo libili libili no kupitila mu kucitako ifintu fimbi muli programu. (AbaHebere 10:23-25) Cine cine ukulongana kwesu kwaba kupayanya ukufwile ukuteeswa!

Michael, uulumbwilwe ku numa, alikatamike aya mapaalo apakalamba no kuyatesekesha mu kushika. Lelo pa kulengwe nsoni pa kukanabomba nga eluda calengele uku kutesekesha kwakwe ukushibantukila pa kashita kanono. Ukupitila mu kuyatontomeshapo na kabili, ali na maka ya kunonka cipya cipya ukushikatala kwakwe no kulinda Yehova mu kutekanya.

Ukucila ukuyumfwa abashaikushiwa pa mulandu wa kukanakwata ishuko ilyo tulefwaya, cisuma ukubebeta cipya cipya inshila Yehova aletupaalilamo, nge fyacitile kemba wa malumbo.a Nga twafilwa ukumwensekesha, tulekabila ukulolesha na kabili, ukulomba ukuti Yehova esule amenso yesu ukuti tumone amashuko yesu ne nshila aletupaalilamo no kutubomfya ukumuletela ilumbo.—Amapinda 10:22.

Na kabili calikatama ukwishiba ukuti amashuko yaibela, pamo nga bucilolo, yafwaya imilingo ya kulungatika. (1 Timote 3:1-7; Tito 1:5-9) E co tulekabila ukuiceeceeta fwe bene, ukufwayafwaya umo tulekabila ukuwamyako no kubombesha no mukoosha ukuwamyako.—1 Timote 4:12-15.

Mwifuupulwa

Nga ca kuti tatupokelele ishuko limo ilya mulimo, tatulingile ukusondwelela ukuti Yehova alitemwishapo abo abaipakisha lyene nelyo ukuti aletutana ifisuma. Mu cine cine, tatulingile ukufimbila abapokelela amashuko no kutunga ukuti tabawaminwa no kuyakwata lelo ni pa mulandu fye wa muncishanya wa bantu te pa mulandu wa kusontwa kwa teokrasi. Ukutontonkanya mu kusakamikwa pa matontonkanyo ya musango yo kuti kwatungulula ku mufimbila, akafindwe, kabili nelyo ukunenuka fye.—1 Abena Korinti 3:3; Yakobo 3:14-16.

Laura, uulumbwilwe pa kutendeka, tanenwike. Mu kupita kwa nshita asukile abombelapo pa bukali bwakwe no mufimbila. Laura alipepele kuli Lesa mu kubwekeshabwekeshapo ukuti aafwiwe ukucimfya ububi aleyumfwa pa kukanaba na maka ya kubomba bupainiya. Na kabili alombele ukwaafwa ku baume bafikapo mu cilonganino kabili ayumfwile uwasansamushiwa pa lwa kutemwa kwa kwa Lesa. Atila: “Yehova alimpeele umutende wa muntontonkanya. Ilintu te kuti tubombe bupainiya no mulume wandi nomba, tulateesa inshita twabombeleko kabili ifya kukumanya twakumenye filatukoselesha. Na kabili tulaafwa umwana wesu uuli nomba umukalamba ukubomba bupainiya.” Pa kuba uwaikushiwa, Laura nomba kuti ‘asekelela pamo na basekelela’ mu mulimo wabo uwa bupainiya.—Abena Roma 12:15.

Imikeni Amabuyo Mwingafikapo

Ukwikushiwa kwesu na mashuko twakwata nomba aya mulimo takupilibula ukuti tuleke ukwimika amabuyo yambi aya teokrasi. Ilyo alelanda pa kubuuka kwa ku muulu, Paulo alandile pa lwa “kusupile fya ku ntanshi.” Na kabili atile: “Ico twafikapo, muli ico cine e mo twendele.” (Abena Filipi 3:13-16) Amabuyo ya teokrasi kuti yatwaafwa ukusupile fya ku ntanshi. Nangu cibe fyo, ubwafya bwaba mu kwimika ayo mwingakumamo.

Amabuyo mwingakumamo yaliba ayalinga kabili ayengafikwapo. (Abena Filipi 4:5) Ici tacilepilibula ukuti ubuyo ubwingasendako imyaka yafulilako no kubombesha ninshi tamwingabukumamo. Ubuyo bwa musango yo ubwa ku ntanshi kuti bwafikwapo panono panono ukupitila mu kwimika amabuyo ya pa kati, nelyo imibombele. Ifi e fingaba ifikongwani fya kupiminako ukulunduluka kwa ku mupashi. Ukubombelapo pali cimo na cimo bwino bwino kukapayanya ukwikushiwa ilyo mulelunduluka ukucila ukumulenge nsoni.

Ukumona Ifintu mu Kulinga

Nangu cibe fyo, calikatama ukwiluka ukuti pa mulandu wa mibele twabamo no kupelebela, amashuko yamo te kuti tuyakwate. Ukuyemika nga mabuyo kuti kwatwala fye ku kulengwe nsoni no kufulunganishiwa. Amabuyo ya ifyo yalingile ukulabwako, pali ino nshita. Tacakatwafye ukucite ci nga ca kuti twapepela ukwikushiwa kwa bukapepa no kulenga ukucita ukufwaya kwa kwa Yehova ukwangwako kwesu kukalamba. Lintu twatinamina amashuko, icakatama bukata bwa kwa Yehova—te kwishibikwa kwa fintu twabomba pa lwesu. (Ilumbo 16:5, 6; Mateo 6:33) Mu kulinga Baibolo itweba ati: “Konkomwena pali Yehova imilimo yobe, e lyo yakapampamikwa amapange yobe.”—Amapinda 16:3.

Mu kulanguluka Ilumbo lyalenga 84, kuti twamone fyo kemba wa malumbo alangishe iyo mibele ya mutima ku mashuko ya mulimo, kabili Yehova alimupaalile apakalamba. Ukulundapo, ili lumbo litwalilila ukunonsha abantu ba kwa Yehova ukufika na mu nshiku shesu.

Mu kuba no kushintilila pali Yehova mwi pepo, kuti mwafuluka amashuko yalundwapo lelo pa nshita imo ine ukwikushiwa na yantu muipakisha nomba. Te kwesha ukuleka ukufuluka kwa kubomba mu kucishamo kumupokolole co mwakwata nomba no buseko bwa kubombela Yehova ku ciyayaya. Tetekeleni Yehova, pantu ici cifumamo insansa, nga fintu calangililwa ku mashiwi ya mwina Lebi aya kuti: “Mwe Yehova wa milalo, alishuko muntu uumutetekela!”—Ilumbo 84:12.

[Amafutunoti]

[Akabokoshi pe bula 11]

Amabuyo Twingaimikila

Ukubelenga Baibolo cila bushiku.—Yoshua 1:8; Mateo 4:4

Ukuwamyako amaka yesu aya kulingulula ukupitila mu kukansha kwa Amalembo.—AbaHebere 5:14

Ukulundulula ukwampana kwapalamisha na Lesa.—Ilumbo 73:28

Ukulundulula cimo na cimo ica fisabo fya ku mupashi.—Abena Galatia 5:22, 23

Ukuwamyako ifyo tusosa mu mapepo yesu.—Abena Filipi 4:6, 7

Ukulundako amaka ya kushimikila bwino no kusambilisha.—1 Timote 4:15, 16

Ukubelenga no kwetetula pali magazini umo na umo uwa Ulupungu lwa kwa Kalinda na Loleni!—Ilumbo 49:3

[Ifikope pe bula 9]

Pa kwimika amabuyo ya pa lwenu, bikeni ukucita ukufwaya kwa kwa Lesa intanshi