“Baibolo wa Munwe Umo”

ILYO alwele ubulebe pa mulandu wa lupuma lulengwa na kasuba, Joseph Schereschewsky aletaipa fye ku munwe umo. Nalyo line alisukile apwisha ico aimininepo—ne co cali kupilibula Baibolo mu ciChinese, lumo ulwa ndimi shayafya ukusambilila ku muntu wafuma ku calo cimbi.

Schereschewsky aali mu Yuda, kabili afwailishe UbuKristu no kusanguka Umwina Kristu ilyo akulile. Mu kuya kwa nshita abele mishonari mu China. Ukutendeka mu kubangilila ukwa mu 1866 no kuya mu myaka ya kubangilila iya ba 1900 abombeleko imilimo iingi iya kupilibula. Schereschewsky alishibishe iciHebere ukucila abasoma banankwe pa mulandu wa kukulila mu buYuda. Muli fyo, apeelwe umulimo wa kupilibula Amalembo ya ciHebere yonse. Ku kupwa kwa mulimo wakwe uushailepela, alipilibwile Baibolo ya ciChinese yonse no kubikamo ifya kuloshako.

Nga kapilibula wa Baibolo, Joseph Schereschewsky aali kaafwilisha wa maka uwa mabupilibulo ya ndimi shaseeka. Lelo umulimo wakwe tawayangwike. Icitabo ca The Book of a Thousand Tongues cisosa ukuti ifyo asangwileko kuli Baibolo ya ciChinese fintu fyaibela “pantu yalyanguka ukumfwa kabili yalembelwe mu kuba na mafya ayengi.”

Na pa numa amaboko ya kwa Schereschewsky yalemene ku bulebe, atwalilile no mulimo wakwe. Apantu alilemene amaboko, ukutaipa kwakabile ukubombesha sana. E mulandu wine ainikile ubu ubupilibulo ati Baibolo wa munwe umo. Pa kuti aipilibule, te mulandu na mafya, Schereschewsky ashipikishe pa myaka 25. Ukupitila mu kukanatompoka, alengele Icebo ca kwa Lesa ukumfwika mu ciChinese—ululimi lulandwa na bantu abengi ukucila ululi lonse.

[Abatusuminishe Ukubomfya Icikope pe bula 11]

Ifikope fyonse fibili: Mu kuba no kusuminisha kwa American Bible Society Archives