Ukwikalila Umwabela Ukuipeela kwa Bwina Kristu mu Buntungwa

“Ukuli Umupashi wa kwa Shikulu, e kuli ubuntungwa.”—2 ABENA KORINTI 3:17.

 1. Inte sha kwa Yehova shaipeela kuli ani, kabili mulandu nshi babomfesha ifibombelo fya mwi funde?

INTE SHA KWA YEHOVA shalisumino kuti ukupepa kwabo kukekalilila kuli pe na pe. Kanshi benekela ukubombela Lesa “mu Mupashi na mu cine” ku ciyayaya. (Yohane 4:23, 24) Pamo nge fibumbwa ifingaisalila, aba Bena Kristu baliipeela kuli Yehova Lesa ukwabulo kushako kabili balipampamina pa kwikalila umwabela uko kuipeela. Pa kucite co, baashintilila pa Cebo ca kwa Lesa na pa mupashi wakwe uwa mushilo. Ilyo balekonkelela ukuipeela kwabo ukwa Bwina Kristu no mutima onse mu buntungwa ubwapeelwa na Lesa, Inte shilanga umucinshi walinga ku mulimo ubomba “bakateka abacilamo,” aba mu buteko kabili balabomfya bwino ifibombelo na mapekanyo ifya mwi funde. (Abena Roma 13:1; Yakobo 1:25) Ku ca kumwenako, Inte babomfya Watch Tower Society nge cibombelo ca mwi funde—pa kati ka fingi ifyaba mu fyalo fyalekanalekana—ifibalenga ukubomba umulimo wabo uwa kwafwilisha abantu banabo, maka maka lwa ku mupashi. Lelo Inte uko shaipeela ni kuli Lesa, te ku cibombelo ca mwi funde icili conse, kabili ukuipeela kwabo kuli Yehova kukatwalilila kuli pe na pe.

 2. Mulandu nshi Inte sha kwa Yehova shitashisha pa kukwata Watch Tower Society ne fibombelo fimbi ifya mwi funde?

² Pamo nga ababomfi abaipeela kuli Lesa, Inte sha kwa Yehova shalikakililwako ukukonka amakambisho ya kwa Yesu aya ‘kulenga aba nko shonse ukuba abasambi, ukubabatishisha mwi shina lya kwa Tata ne lya Mwana ne lya Mupashi wa mushilo: ukulabasambilisha.’ (Mateo 28:19, 20) Uyu mulimo ukatwalilila ukufikile mpela ya ino micitile ya fintu, pantu Yesu na kabili atile: “Imbila nsuma iyi ya bufumu ikabilwa ku fyalo fyonse ku kubo bunte ku nko shonse; e lyo impela ikesa.” (Mateo 24:3, 14) Cila mwaka, ifikuulwa fya kupulintilamo ifya Watch Tower Society ne fibombelo fimbi ifya mwi funde filapayanishisha Inte sha kwa Yehova amamilioni ya maBaibolo, ifitabo, amabroshuwa, na bamagazini ifya kubomfya mu kushimikila kwabo ukwa mu calo conse. Ifi fipani fya mwi funde kanshi fyalicindama ku kwafwilishako ababomfi baipeela aba kwa Lesa ukwikalila umwabela ukuipeela kwabo kuli wene.

 3. Inte sha kwa Yehova akale shalebomfya shani inumbwilo ya kuti “Sosaite?”

³ Umo kuti pambi atila inshila baNte balandilamo ulwa Watch Tower Society—nelyo ilingi line ukuti fye “Sosaite”—ilangililo kuti balicisha pa kuimona fye nge cibombelo ca mwi funde. Bushe tabamona Sosaite ukuti e yakwata amaka yonse fye pa milandu ya fya kupepa? Icitabo ca Jehovah’s Witnesses—Proclaimers of God’s Kingdom cilalenga ici cishinka ukumfwika pa kulondololo kuti: “Lintu Ulupungu lwa kwa Kalinda [ulwa ciNgeleshi ulwa June 1, 1938] lwaloseshe kuli ‘Sosaite,’ ici tacaloseshe fye ku cibombelo ca mwi funde, lelo ni kwi bumba lya Bena Kristu basubwa ilyapangile ico cipani ca mwi funde no kulacibomfya.”a Iyi numbwilo kanshi yaiminineko “umusha wa cishinka kabili uwashilimuka.” (Mateo 24:45) Ni muli iyi nshila e mo Inte ilingi line balebomfesha ishiwi lya kuti “Sosaite.” Kwena icibombelo calembeshiwa mwi funde elyo no “musha wa cishinka kabili uwashilimuka” tashaba ni numbwilo ishingabomba kwati cintu cimo cine. Badairekita ba Watch Tower Society balabasala ukuba pa fifulo, ilintu baNte abo bapanga “umusha wa cishinka” basubwa no mupashi wa mushilo uwa kwa Yehova.

 4. (a) Ni shani fintu baNte abengi basosa pa kusengauka ukupelenganya? (b) Mulandu nshi tulingile ukubela abashikatala ukukuma ku mibomfeshe ya mashiwi?

⁴ Pa kufumyapo ukupelenganya, Inte sha kwa Yehova besha ukusakamana sana ilyo balelanda. Mu cifulo ca kusoso kuti, “Sosaite isambilisho kuti,” baNte abengi basoobolapo ukubomfya imilandile imo pamo ngo kuti, “Baibolo itila” nelyo, “Ine naishibe fyo Baibolo isambilisho kuti.” Muli iyi nshila balakomaila pa kupingulapo kwa pa lwabo kuntu Nte umo na umo apingulapo mu kupokelela ifisambilisho fya mu Baibolo kabili no kusengauka ukulange mfundo yalubana iya kuti baNte mu nshila imo balikakililwa ku fipoope fya cakaniko ca fya mapepo. Kwena, imitubululo pa lwa mibomfeshe ya mashiwi taili na kuba cintu ca kukansaninapo. Na kuba, imibomfeshe ya mashiwi icindama fye nga ca kuti yacilikila ukupelenganya. Ukushikatala kwa Bwina Kristu kulafwaikwa. Baibolo itukambisha “ukukanakansanine fyebo.” (2 Timote 2:14, 15) Amalembo na kabili yalumbule ci cishinte ica kuti: “Nga tamusosela mu lulimi insoso iingomfwika, kuti caishibwa shani icilelandwa?”—1 Abena Korinti 14:9.

Umupashi wa kwa Lesa Ulenga Amafunde Ukucepako

 5. Bushe 1 Abena Korinti 10:23 kuti twamulosha mwi?

⁵ “Kwena fyonse fyalisuminishiwa, lelo te fya kwafwa fyonse,” e fyalandile umutumwa Paulo. Alundilepo kuti: “Kwena fyonse fyalisuminishiwa, lelo fyonse tafikuula.” (1 Abena Korinti 10:23) Paulo ukwabulo kutwishika taloseshe mu kuti calisuminishiwa ukucite fintu ifyo Icebo ca kwa Lesa casenuka mu kulungatika. Amakambisho ayatungulula imikalile ya Bwina Kristu yanono nga nshi nga kuyalinganya ku mafunde ayali mupepi na 600 ayapeelwe kuli Israele wa pa kale. Kanshi, imilandu iingi ishalila fye kuli kampingu wa muntu umo umo. Umuntu uwaipeela kuli Yehova alaipakisha ubuntungwa ubwisa ukufuma mu kutungulula kwa mupashi wa kwa Lesa. Umwina Kristu apo alilenga icine ukuba icakwe, alakonka kampingu wakwe uwasambilishiwa na Baibolo no kushintilila pa butungulushi bwa kwa Lesa ubwa mupashi wa mushilo. Ici cilafwilisha Umwina Kristu waipeela ukumona ifili no ‘kukuula’ no kuba “ifya kwafwa” ku mwine wine na kuli bambi. Aleshibo kuti ifyo apingulapo fikambukila ukwampana kwa pa lwakwe na Lesa, untu aipeelako.

 6. Pa kulongana kwa Bwina Kristu, ni shani fintu twingalango kuti twalilenga icine ukube cesu?

⁶ Nte alangililo kuti alilenga icine ukube cakwe pa kwasukapo mu kulongana kwa Bwina Kristu. Pa kubala, kuti pambi alebwekeshapo fye ifilandilwe mu lupapulo ululesambililwa. Mu kupita kwa nshita, nangu cibe fyo, kuti alunduluka ukufika na ku kulailumbulwila ifisambilisho fya Baibolo mu mashiwi yakwe umwine. Muli fyo alango bushinino bwa kuti alelundulula ubupanda, talebwekeshapo fye fintu bambi basosele. Ukumumunga amatontonkanyo mu mashiwi yakwe umwine no kulumbulula amashiwi yalungama aya cine mu nshila ya kufuma ku mutima kukamuletela ukucankwa no kulango kuti alishininwa mu muntontonkanya wakwe.—Lukala Milandu 12:10; linganyeniko Abena Roma 14:5b.

 7. Kupingulapo nshi ukwacitwa mu buntungwa ku babomfi ba kwa Yehova?

⁷ Inte sha kwa Yehova shikuntwa no kutemwa kwa kuli Lesa na bantu banabo. (Mateo 22:36-40) Ca cine ukuti balikakilwa capamo ku cikakilo ca kutemwa ukwapala ukwa kwa Kristu ukwa bumunyina bwa mwi sonde lyonse. (Abena Kolose 3:14; 1 Petro 5:9) Lelo umo umo pa kuba icibumbwa icingaisalila, alipingulapo ukulabilisha imbila nsuma ya Bufumu bwa kwa Lesa, ukukanayobeka mu mapolitiki, ukutaluka ku mulopa, ukusengauka imisango imo iya fya kusekesha, no kwikalila ku fipimo fya Baibolo. Uku takwaba kupingulapo kwa kubapatikisha. Kupingulapo ukwaba mu nshila ya mikalile iyo abali no kuba baNte baisalila ukukonka ilyo bashilafika ku kuipeela kwa Bwina Kristu.

Bushe Balubulula kwi Bumba Litungulula?

 8. Cipusho nshi cilekabila ukulondololwa mu kumfwika?

⁸ Baibolo mu kulengama ilango kuti Abena Kristu ba cine tabapatikishiwa ukubombela Lesa. Itila: “Shikulu e Mupashi: kabili ukuli Umupashi wa kwa Shikulu, e kuli ubuntungwa.” (2 Abena Korinti 3:17) Lelo ni shani fintu ici cishinka cingampana ne mfundo ya kukwata “umusha wa cishinka kabili uwashilimuka” ne Bumba lyakwe Ilitungulula?—Mateo 24:45-47.

9, 10. (a) Ni shani fintu icishinte ca bumutwe cibomba mu cilonganino ca Bwina Kristu? (b) Pa kukonka icishinte ca bumutwe cinshi calefwaikwa mu cilonganino ca Bwina Kristu ica mu mwanda wa myaka uwa kubalilapo?

⁹ Pa kwasuke ci cipusho, tufwile ukwibukishe cishinte ca mu Malembo ica bumutwe. (1 Abena Korinti 11:3) Pa Abena Efese 5:21-24, Kristu aishibishiwa ngo “mutwe wa lukuta,” kuntu ulukuta “lunakila.” Inte sha kwa Yehova shalyumfwikisho kuti umusha wa cishinka kabili uwashilimuka apangwa na bamunyina ba ku mupashi aba kwa Yesu. (AbaHebere 2:10-13) Ili bumba lya musha wa cishinka lyasontwa ku kupayanishisha abantu ba kwa Lesa “ifya kulya [fya ku mupashi] mu nshita iyene.” Muli ino nshita ya mpela, Kristu alisonta uyu musha “pali fyonse ifyo akwata.” Icifulo ca ili bumba kanshi calilinga ukucindikwa ku uli onse uuitunga ukuba Umwina Kristu.

¹⁰ Ico kwabela bumutwe ni pa kusungilila ukwikatana no kushininkisho kuti “fyonse [filecitwa] busaka busaka kabili mu kukonkana.” (1 Abena Korinti 14:40) Pa kuti bengacite fyo mu mwanda wa myaka uwa kubalilapo, impendwa ya Bena Kristu basubwa ukufuma mwi bumba lya musha wa cishinka kabili uwashilimuka balisalilwe ku kwimininako ibumba lyonse. Nga fintu cashininkishiwe ku fya kucitika fyakonkelepo, ubwangalishi bwa ili bumba litungulula ilya mu mwanda wa myaka uwa kubalilapo bwalisuminishiwe no kupaalwa na Yehova. Abena Kristu ba mu mwanda wa myaka uwa kubalilapo mu nsansa balipokelele uku kutantika. Ee, balisuminisheko kabili bali aba kutasha ku busuma bwafuminemo.—Imilimo 15:1-32.

11. Ni shani fintu Ibumba Litungulula ilya muno nshiku lilingile ukumonwa?

¹¹ Ubucindami bwa kutantika kwa musango ulya na nomba buciliko. Pali ndakai, Ibumba Litungulula ilya Nte sha kwa Yehova likwetemo Abena Kristu basubwa 10, bonse bene abapwisha amakumi ya myaka mu kubelesha ubuKristu. Batungulula Inte sha kwa Yehova lwa ku mupashi, nge fyalecita ibumba litungulula ilya mu mwanda wa myaka uwa kubalilapo. (Imilimo 16:4) Ukupala Abena Kristu ba mu kubangilila, Inte shashintilila pali bamunyina bakosoka aba mwi Bumba Litungulula ku butungulushi ubwashimpwa pali Baibolo no kutungululwa mu milandu ya kupepa. Nangu cingatila ababa mwi Bumba Litungulula basha ba kwa Yehova na Kristu, nge fyaba Abena Kristu banabo, Baibolo itwebo kuti: “Beni aba cumfwila ku balemutungulula, no kubanakila; pantu bene balinde myeo yenu, nga bantu abakaba no kulubulula. Lekeni bacite ico no kusekelela, te mu bulanda iyo; pantu nga cabe fi, ninshi te ca kumwafwa cintu.”—AbaHebere 13:17.

12. Ni kuli ani kuntu Umwina Kristu umo na umo ali no kulubulula?

¹² Bushe icifulo ca bwangalishi cintu Amalembo yapeela kwi Bumba Litungulula cipilibulo kuti umo na umo uwa Nte sha kwa Yehova afwile ukulubulula kuli lyene pa fintu acita? Ico tacingomfwana na mashiwi ya kwa Paulo aya ku Bena Kristu ba ku Roma aya kuti: “Nga cinshi ico upingwila munonko? Na iwe, cinshi ico usuulila munonko? Pantu ifwe bonse tukeminina ku ca kupingwilapo ca kwa Lesa. . . . Ifwe bonse umo umo tukalubulula kuli Lesa.”—Abena Roma 14:10-12.

13. Mulandu nshi Inte sha kwa Yehova basebela umulimo wabo uwa kushimikila?

¹³ Nangu cibe fyo, bushe tacili ca cine ukuti baNte umo umo balenekelwa ukuseba umulimo wabo uwa kushimikila? Ee, lelo imifwaile ya ici yalilondololwa mu kulengama mu lupapulo lubomfiwa na baNte ulutila: “Abakonshi ba kwamba aba kwa Yesu Kristu babuulile ukusekelela mu malipoti ya kulunduluka mu mulimo wa kushimikila. (Marko 6:30) Lintu umulimo waletunguluka, amalipoti ya mpendwa yalelonganikwa pamo pene no bulondoloshi bwa fya kukumanya fyapulilemo [ifya abo] bakwete ukwakana mu kushimikile mbila nsuma. . . . (Imilimo 2:5-11, 41, 47; 6:7; 1:15; 4:4) . . . Ifyo caali ica kukoselesha kuli abo bena Kristu bakabomba ba citetekelo ukuumfwa amalipoti ya calepwilikishiwa! . . . Mu kupalako, ukuteyanya kwa kwa Yehova ukwa muno nshiku kubombesha ukusunga ifyalembwa fyaebekeshiwa ifya mulimo ucitwa mu kufikilisha Mateo 24:14.”

14, 15. (a) Ni shani fintu ilembo lya 2 Abena Korinti 1:24 libomba kwi Bumba Litungulula? (b) Ni pali cinshi Umwina Kristu umo umo ali no kushimpa ukupingulapo kwa pa lwakwe, ukwishiba bwino icishinka nshi?

¹⁴ Ibumba Litungulula kwaba kupayanya kabili ica kumwenako ca busumino icalinga ukupashanya. (Abena Filipi 3:17; AbaHebere 13:7) Pa kukakatila kuli Kristu no kumukonka nge cipasho, kuti balandako amashiwi ya kwa Paulo aya kuti: “Te kutila tuli na bucibinda pa citetekelo cenu, lelo tuli ababombela pamo na imwe [“bakabomba banenu,” NW] ku kumuletelo kusansamuka; pantu mwaimininina ku citetekelo cenu.” (2 Abena Korinti 1:24) Lintu Ibumba Litungulula lyabebeta inshila ifintu fileendelamo, lilatulosha ku kumwenamo kwaba mu kumfwila ukufunda kwa Baibolo, ukututubulwila fintu amafunde ne fishinte fya mu Baibolo fibomba, ukutusoka ulwa masanso yabelama, no kupayanishisha ‘bakabomba banabo’ ukukoselesha ukukabilwa. Muli fyo libomba umulimo wa liko uwa bukangalila bwa Bwina Kristu, no kubaafwa ukusungilila ukusekelela kwabo, no kubakuula mu busumino pa kuti bengaba abashangila.—1 Abena Korinti 4:1, 2; Tito 1:7-9.

¹⁵ Nga ca kuti Nte apingula pa fintu ukulingana no kufunda kwa mu Baibolo ukwapeelwe ne Bumba Litungulula, apingulapo ukulingana no kufwaya kwakwe umwine pa mulandu wa kuti isambililo lyakwe ilya Baibolo nalimushinina ukuti inshila yalinga ni yi ine. Pa kubomfya ukufunda kusuma ukwa mu Malembo ukupeelwa ne Bumba Litungulula, Nte umo na umo asongwa ne Cebo ca kwa Lesa, ukwishiba bwino bwino ukuti fyonse fintu akapingulapo fikambukila ukwampana kwa pa lwakwe na Lesa, untu aipeelako.—1 Abena Tesalonika 2:13.

Abasambi Kabili Ifita

16. Nangu cingati ukupingulapo ukukumine imyendele kwaba mulandu wa muntu umwine pa lwakwe, mulandu nshi bamo batamfiwilwa?

¹⁶ Nomba nga ca kuti ukupingulapo pa lwa myendele waba mulandu wa muntu pa lwakwe umwine, mulandu nshi untu bamo aba Nte sha kwa Yehova batamfiwilwa? Takwaba nangu umo uulanda mu kukakatisha bambi ifyo ukucito lubembu lwa musango umo kufwayo kutamfya. Mu cifulo ca ico, ukutamfya kufwaikwa ukulingana na Malembo lyeka fye uwa mu cilonganino mu kukaanalapila aibimba mu membu shabipisha, pamo nga shilya shalumbulwa mu cipandwa calenga fisano ica Bena Korinti wa Ntanshi. Muli fyo, ilintu Umwina Kristu kuti pambi atamfiwa pa kucito bulalelale, uku kutamfya kucitwa fye lyeka lintu umuntu akaana ukupokelela ukwaafwa kwa ku mupashi ukwa bakacema bakwato kutemwa. Inte sha kwa Yehova te beka abakonka iyi ncitilo ya buKristu. Icitabo ca The Encyclopedia of Religion citila: “Ubwikashi fye ubuli bonse bwalikwate nsambu ya kuicingilila kuli bamunshololwa abengapumfyanya ubusuma bwa cinabwingi. Mu fya mapepo iyi nsambu ilingi line yalikoshiwa mu kusumino kuti uku kukankambwa [ukwa kutamfiwa] kulambukila fintu umo aiminina na Lesa.”

17, 18. Ni shani fintu ukulinga kwa kutamfya kwingalangililwa?

¹⁷ Inte sha kwa Yehova basambi ba Baibolo. (Yoshua 1:8; Ilumbo 1:2; Imilimo 17:11) Programu wa kusambilisha Baibolo uupayanishiwa ne Bumba Litungulula kuti pambi apashanishiwa ku fili no kusambilishiwa mu sukulu ifitantikwa ne cipani ca fya masomo. Nangu cingatila ici cipani tacili e ntulo ya fyebo ifilesambilishiwa, cilapekanya ifili no kusambilishiwa, ukwimika inshila ya kusambilishishamo, no kwananya amakambisho ayengafwaikwa. Nga uuli onse mu kupama akaana ukwikalila ku filefwaya isukulu, ukulacusha abasambi banankwe, nelyo ukuleta umuseebanya pe sukulu, kuti bamutamfya. Ubulashi bwe sukulu bwalikwate nsambu ya kucitapo cimo ku kwaafwako abasambi bonse.

¹⁸ Ukulunda pa kuba abasambi, Inte sha kwa Yehova baba ifita fya kwa Yesu Kristu, abaebwa “ukulwa ubulwi busuma ubwa citetekelo.” (1 Timote 6:12, NW; 2 Timote 2:3) Nga fintu caba, ukutwalilila mu myendele ishalinga ku cita ca Bwina Kristu kuti kwalenga ukukanasuminishiwa na Lesa. Pamo ngo muntu uwapeelwa ubuntungwa bwa kuisalila, icita ca Bwina Kristu kuti capingula ukulingana na fintu cilefwaya, lelo cikacula ku fikafuma mu kupingulapo kwa ciko. Paulo apelulwile ati: “Uwa mulalo nangu umo takobwa mu mitabotabo ya bwikalo buno, e kuti atemune uwamulembele mu mulalo. Awe no muntu nga atangana na babiye tafwikwa mwaala, kano atangana na bo umwabela amalango.” (2 Timote 2:4, 5) Abena Kristu bakosoka, ukusanshako na baba mwi Bumba Litungulula, baliiteyanya fye lyonse ukubombela Intungulushi yabo, Yesu Kristu, ukusunga “amalango” pa kuti benganonka icilambu ca bumi bwa muyayaya.—Yohane 17:3; Ukusokolola 2:10.

19. Apo natulanguluka ifishinka pa lwa kuipeela kwa Bwina Kristu, kuti twaba abashininkisha ulwa cinshi?

¹⁹ Bushe ifishinka taficilenga ukumoneka fye apabuuta ukuti Inte sha kwa Yehova babomfi ba kwa Lesa, te basha ba bantu? Pamo nga Abena Kristu abaipakisha ubuntungwa ubo Kristu abalubwilileko, basuminisha umupashi wa kwa Lesa ne Cebo cakwe ukulatungulule myeo yabo ilyo balebomba mu kwikatana na bamunyinabo mu cilonganino ca kwa Lesa. (Ilumbo 133:1) Ubushininkisho bwa ici bulingile na kabili ukufumyapo ukutwishika ukuli konse pa lwa kuntu bafumya ubukose. Kuti baimbila pamo na kemba wa malumbo ukuti: “Yehova e bukose bwandi kabili ni nkwela yandi, umutima wandi walimutetekela, nayafwiwa, no mutima wandi ulaanga, e ico ndemutootela mu lwimbo lwandi.”—Ilumbo 28:7.

[Futunoti]

Kuti Mwayasuka Shani?

◻ Ni shani fintu Watch Tower Society ne fibombelo fimbi ifya mwi funde fyafwilisha Inte sha kwa Yehova?

◻ Ni shani fintu Abena Kristu bamwenamo mu mulimo we Bumba Litungulula ilya Nte sha kwa Yehova?

◻ Mulandu nshi abantu ba kwa Yehova basebela umulimo wabo uwa kushimikila?

◻ Ni lilali ukutamfya Umwina Kristu waipeela kuba ukwalinga?

[Icikope pe bula 19]

Ibumba litungulula ilya mu mwanda wa myaka uwa kubalilapo lyaebekeshe ukwikatana mu cifundisho

[Icikope pe bula 23]

Icalo conse, Inte sha kwa Yehova balaipakisha ubuntungwa ubo Kristu abalubwilileko