Ilyashi lya Bakabilisha ba Bufumu

Ukushukila Inshita Yonse

INTE SHA KWA YEHOVA shalishibikwa isonde lyonse pa mulimo wabo uwa masomo ya Baibolo. Lelo na kabili balacite milimo iileta ukumwenamo kumbi mu bwikashi. Uyu mulimo wa ku cintubwingi walipokelelwa bwino, nga fintu ifya kukumanya fikonkelepo ukufuma ku Ecuador filelangilila.

◻ Abatungulula fakitare ikalamba iipanga amaglasi bafwaile ukuteyanyapo amasambililo ya pa mibele isuma iya ndupwa sha babomfi babo. Umukalamba wa ncito uulolekesha pa babomfi alaalike abapatili ba mu Katolika ku kwisasambilishako lelo tabaishileko. Umupatili umo amwebele ukuti abapatili abengafikapo ukulanda bwino pali uyu mulandu banono nga nshi ica kuti limbi te kuti pasangwe nangu umo. Pa kumfwe fyo, umubomfi uwali ni Nte aapekenye ukuti munyina uubombela mu cifulo ca bukwebo libili libili akatandalile iyi fakitare.

Ubushiku bwakonkelepo fye, Nte aile ku mukalamba wa ncito uulolekesha pa babomfi nasenda na masambililo ya kusambililapo ayo aapekenye. Ifisambililo fyafumishiiwe mu mpapulo shapusanapusana isha Watch Tower Society. Uyu mukalamba wa ncito alitemenwe. Asalilepo imilandu ya kulanshanyapo itatu—ifya kubomba na bantu banensu, ifishinte fya kukonka pa ncito, ne fishinte ifya kukonka mu lupwa. Lyene bapekenye ukulanshanya ifi fyebo na babomfi bonse aba pali iyi fakitare.

Ababomfi balyakanishiwe mu mabumba 7 ayakwete abantu 30 mwi bumba limo limo, pa numa bamunyina batatu abafikapo balandile ifyebo kuli bene. Finshi fyafuminemo? Ababomfi bafulilako balombele ukulatandalilwa mu mayanda yabo, kabili ifitabo 216 ifya kwaafwa ukusambilila Baibolo fyalishalikwe. Abatungulula fakitare balitemenwe nga nshi ica kuti balombele baNte ukupekanyako amasambililo na yambi ayakonkana.

◻ Nomba line, Ecuador yapangile ifunde ilisuminisha ukusambilisha ifya mipepele mu sukulu. Nkashi uuli ni mishonari atandalile umwanakashi umukalamba we sukulu lya ku praimale no kumwipusha ifyo ili funde lipya lyalebomba. Uyu mukalamba we sukulu alondolwele ukuti balyesesheko ukutendeka programu wa kupepa Maria lelo taatungulwike. Lintu nkashi alandilepo kuti ukupepa kwa musango yo kuti kwakosela abana abashili baKatolika, uyu mukalamba we sukulu alisuminisheko. Mishonari atile, “Nangu ni fyo, twalikwata programu wa kusambilisha ifishinte fya myendele isuma ukufuma muli Baibolo uushipatikisha muntu ukukonka umusango wa mipepele imo.” Umukalamba we sukulu aipwishe ati: “Ni lilali mwingesa? Bushe ni bulya bushiku?” Pa numa uyu mishonari amulangile icitabo ca Ukukutika Kuli Kasambilisha Mukalamba, bapingwilepo ukuti bakasambilila icipandwa citila “Ba Nsansa Aba Mutende.”

Ilyo mishonari abweleeleko, apoosele amaawala yatatu ukulapita mu makalasi yapusanapusana 7 ninshi umukalamba we sukulu akonkelemo fye ukulakutikako. Pa numa ya kusambilila na ba mwi kalasi lya mu gredi 5, umo pa bana be sukulu atile: “Mukwai, mwilaba kupita muli ba gredi 6. Cila nshita balesha ukulatuboobaula no kutendeka ulubuli!” Kafundisha umo alandilepo kuti: “Ulubuli mulandu uwakakala nga nshi. Kuti cawama twaisalandapo na kabili.”

Balipekenye ukulabwelelako ku sukulu ku kulanda pa malyashi pamo nga icumfwila na ukubepa. Ukufika pali ino nshita ifyafumamo fyaliba bwino sana. Kanshi lintu mishonari aleenda mu musebo, abana besa balemubutukila ku kumuposha no kumwipusha ifipusho fya pali Baibolo. Bambi balayumfwamo icilumba ukumulondolola ku bafyashi babo. Ukulundapo, isambililo lya Baibolo ku bana be sukulu babili lyalitendekwa.