Loleleni mu Kutekanya

KACEMA uwalepunda libili libili ukuti, “Umumbulu!” ilyo kushali umumbulu asangile ukuti ilyo apundile umuku wakonkelepo takwali wabikileko mano. Ne lelo line, abengi balasuula ukupalamina kwa bushiku bwa kwa Yehova pantu ukusoka ukwingi uko baumfwapo takwafikilishiwa. Umulandu wine uwa kuti abafule fyo tabeluka ukusoka ukwingaba ukwa cine lyene no kukumfwila e walenga ulya muntu abepekesha ukuba “malaika wa lubuuto,” umulwani mukalamba uwa kwa Lesa, Satana, ukubashukila.—2 Abena Korinti 11:14.

Umulekelesha kuti wabo wa busanso nangu fye ku baabombela Yehova pa nshita ntali. Mulandu nshi? Langulukeni ukusoka kwa mutumwa Petro ukwa mu mwanda wa myaka uwa kubalilapo.

Tontonkanyeni mu Bufumacumi

Kalata wa bubili uwapuutwamo uwa kwa Petro aalecinkulako Abena Kristu ba mu kubangilila, kabili alatucinkulako na ifwe bene. Alembo kuti, “Nomba, mwe batemwikwa, uyu e kalata wa cibili uo namulembela, muli abo ncincisha imwe mu kwibulule mitima yenu ya bufumacumi.” (2 Petro 3:1) Bushininkisho nshi Petro akwete pa kuti asakamikwe muli iyi nshila? Petro akomaila pa kubapo kwa bakapumya abo ukupumya kwabo kunenuna itontonkanyo lya kuti inshita ababomfi ba kwa Lesa baleikalamo ye pamfya. Nomba e nshita ya kuba abacenjela ukukanabeepwa ku ba mitumfyo. E co Petro acincisha bakabelenga bakwe ‘ukwibukishe fyebo ifyasoselwe libela kuli bakasesema wa mushilo.’ (2 Petro 3:2; Imilimo 3:22, 23) Finshi bakasesema basosele?

Pa miku iingi ababomfi ba busumino aba kwa Lesa bakomaile pa fyo ubupingushi bwa bulesa bwafumishepo ububifi. Petro aibukishako bakabelenga bakwe ulwa Ilyeshi lya pa nshita ya kwa Noa ilyo Lesa abomfeshe ku kucitapo cimo lintu isonde lyaiswilemo ububi. Ulya Mulamba wa mukukulule aonawile icalo ca ilya nshita umupwilapo. Lelo Lesa aabakile Noa no lupwa lwakwe mu cibwato pamo ne fya mweo ifyasoobwelwemo “ifya mu fya mubili fyonse.” Inshimi ishishimikwa mwi sonde lyonse shishinina ukuti ubulondoloshi bwa mu Baibolo bwa cine.a—Ukutendeka 6:19; 2 Petro 3:5, 6.

Petro aita kulya kucitapo cimo ukwa kwa Lesa nge ‘cintu ico,’ abantu bamo ‘balubile umumbo.’ Lyene bambi baishilebelelekwa kuli bakapumya ba pali ilya nshita ukuwila mu mulekelesha. Nangu ni fyo, ifwe, twikatala atuluba ico Yehova aacita kale. Petro atwebo kuti: “Imyulu ne calo ifya nomba fyabikilwo mulilo ku cebo ico cine, fyabakilwo bushiku bwa kusekwa kabili bwa boni bwa bantu abashipepa.” (2 Petro 3:7) Ee, Lesa ali no kucitapo fimo na kabili.

Lesa Talafyalafya

Kale kale amakana ya myaka nayapitapo. Mulandu nshi Lesa aakokwele fi ukupwisha amafya ya bantu? Na kabili, Petro alanda pa cishinka cimbi. Atila: “Mwe batemwikwa, mwiluba ici cintu cimo, ica kuti kuli Shikulu ubushiku bumo bwaba nge myaka ikana limo, ne myaka ikana limo ngo bushiku bumo.” (2 Petro 3:8) Ifyo tumone nshita, te fyo Yehova aimona. Kuli Lesa wa muyayaya, inshita ipitilepo ukufuma pa kubumbwa kwa kwa Adamu ukufika nomba tayaakumana nangu fye mulungu umo. Lelo te mulandu no mo tumwena inshita, cila myaka ikana limo kabili cila bushiku ubwapita butupalamika ku kufikilishiwa kwa mifwaile ya kwa Yehova.

“Umufungufungu walaalike kapoli insala” e nsoselo iyalola mu kuti nga mwaikalila fye ukulalolela cimo ukucitika e lyo cicila ukukokola. Nangu ni fyo, Petro atashapo ukuba ‘abalolela no kufulukisho kwisa kwa bushiku bwa kwa Yehova.’ (2 Petro 3:12) Kuti twalundulula shani ukutontonkanya ukwingatulenga ukuba abaibukila pa lwa kupalamina kwa nshita ya kwa Lesa iya kucitapo fimo?

Imibele Yalicila pa Mashiwi

Petro aatonta pa milimo ne mibele. Alanda pa lwa “mibele ya mushilo” pamo ne ‘milimo ya bukapepa.’ (2 Petro 3:11) Cinshi ifi fisanshamo?

Umubomfi wine wine uwa kwa Lesa acite fintu mu nshila iitemuna Lesa. Icitetekelo ca uyo kapepa wa cine cimonekela mu mibele yakwe. Ici cilamulekanyako ku basumina muli Lesa na mu malayo yakwe pa kanwa fye. Napamo mwalimono kuti ubutumikishi bwa Nte sha kwa Yehova ubwa ku cintubwingi bulabapusanyako kuli bambi. Besa ku mayanda yenu ku kulanda pa malayo ya kwa Lesa ayalembwa mu Baibolo. Lelo na kabili balashimikila pa lwa masubilo yabo ne fisumino fyabo konse uko bengasanga abantu.

Nte uuipamfya ukulashimikila icitetekelo cakwe kuli bambi alalenga ifisumino fyakwe ukushikilako no kukoshiwa. Ukulumbulula kulenga ukumfwikisha kushike kabili pa nshita imo ine kulaleta insansa lwa nkati no kwikushiwa. Lintu twabilisha imbila nsuma iya Bufumu bwa kwa Lesa, tulatemuna na Yehova. Nga fintu Paulo umutumwa munankwe wa kwa Petro abilisha, twalishiba ukuti ‘tali uushalungama; takalabe umulimo wesu, no kutemwa uko tulanga kwi shina lyakwe.’—AbaHebere 6:10; Abena Roma 10:9, 10.

Cinshi cafuma muli uku kutemwisha ukwananya imbila nsuma iya Bufumu muli ishi nshiku sha mpela isha ino micitile ibifi iya fintu? Imyanda ya makana ya bafumacumi balesambilila ifya kusanguka ifibusa fyapalamisha ifya kwa Yehova, ukumwenamo mu cikuuku cakwe ica pa fye no kusange nsansa sha cine mu cilolelo ca bumi bwa muyayaya muli paradise wa pe sonde.

Ukwishibila Kabela

Nangu line twalishiba ukupitila muli Baibolo ukuti Yehova Lesa ali no kucitapo fimo mu nshita yakwe iyalinga, tulekabila ukumfwila ukusoka kwalundwapo ukwa kwa Petro. “Pa kwishibila kabela ifi fintu, ilindeni ukuti mwikulilwa pamo ku kuluba kwa ba bupulumushi, no kuwa ku kushangila kwenu kwine.”—2 Petro 3:17.

Cine cine Yehova alishibile kabela ukuti bamo abashakwete citetekelo cakosa kuti bafuupulwa ku cilemoneka kwati Lesa aleshingashinga ukucitapo cimo. Na kabili alishibe ukuti ukusonga kwa bashipepa kuti kwabotelesha ababomfi bakwe aba cine nelyo, ukweshako panono, ukunenunako cintu baasumine ukuti ukushishiwa kwe shina lya kwa Lesa nakupalama. Fintu cingaba ica bulanda ukufilwa ukushangila muli shi nshiku sha mpela!

Ino taili ni nshita ya kulatwishika nelyo ukulatunganya ifyo Yehova akacita. (AbaHebere 12:1) Mu cifulo ca ico, ino ni nshita ya kulundulula ukutesekesha ifyafuma mu kutekanya kwa kwa Yehova—isubilo lye pusukilo ku mamilioni abailunda kwi bumba likalamba ilya mwi sonde lyonse kabili abalolela ukwisapusunsuka ubucushi bukalamba ubuleisa. (Ukusokolola 7:9, 14) Petro akonkomesha ukuti: “Kulileni mu kusenamina no kwishiba kwa kwa Shikulwifwe kabili Umupusushi wesu Yesu Kristu. Kuli wene kube ubukata nomba na ku bushiku bwa muyayaya.”—2 Petro 3:18.

“Ibakileni mu Kutemwa kwa kwa Lesa”

Ukupamfiwa mu kushimikila Ubufumu no kulasangwa ku kulongana kwa Bwina Kristu lyonse ku kupepa no kusambilila Icebo ca kwa Lesa kulatucingilila. E co, tatwakabe ne nshita ya kucishamo ukusakamikwa pa lwa mibele ilebipilako mu micitile ibifi iilipo. Umwenso na masakamika tafilekabila ukutitikisha imikalile ya Bena Kristu ba cine. (1 Abena Korinti 15:58) Ilyo twacililako ukupamfiwa ukubombela Yehova, e lintu inshita yangufyanya ukupita.

Yuda, uwaikeleko pa nshita imo ine na Petro, kabili munyina wa kwa Yesu, atukonkomesha ukuti: “Imwe, mwe batemwikwa, ikuuleni pa citetekelo cenu icashilisha; pepeleni mu Mupashi wa mushilo; ibakileni mu kutemwa kwa kwa Lesa, no kulolelo luse lwa kwa Shikulwifwe Yesu Kristu ulwalola ku mweo wa muyayaya.” (Yuda 20, 21) Moneni ukukatama kwa kutontonkanya kusuma uko ipepo lya mukoosha liletako. (1 Abena Tesalonika 5:17) Lyene Yuda alundapo kuti: “Bamo abaletwishika, bena babeleleni uluse; na bambi pususheni no mwenso, ukubasompola mu mulilo no kupato mwingila uwakantaikwa ku fya mubili.” (Yuda 22, 23) Fintu cabe cacindama ukukoshanya muli shino nshita shayafya! Kabili fintu cabe cacindama ukukanawila mwi tunko, ukushukila ubu “bushiku bwe pusukilo” ubwalepa ngo bwelelo bwa kucitilamo “bucilende,” ubuseekele nga nshi muli cino calo ica mibele yabotelela.—Yuda 4; 2 Abena Korinti 6:1, 2.

Ukupitila mu kumfwila ukufunda kwa kutemwa ukwa kwa Petro, Paulo, na Yuda na mu kupamfiwa no kubombesha mu mulimo wa kwa Lesa, mu kutekanya kuti mwalolela Yehova ukucitapo fimo. Lelo bushe mukacite co?

Mwishingashinga ukumonana ne Nte sha kwa Yehova mu cifulo mwikala ku kumwaafwa ukukosha icitetekelo cenu mu bulayo bwa kwa Kabumba ubwa bumi bwa muyayaya. Sambilileni ififwaikwa pa kubombako uyu mulimo wa kushimikila uwa mwi sonde lyonse uushakabale aubwekeshiwapo uukapwishishiwa pa bucushi bukalamba ubulepalamina. (Marko 13:10) Pali ilya nshita, mukaba ne cilolelo ca kwikala mu calo cipya ica bulungami ico Yehova aalaya. (2 Petro 3:13) Umfwileni ifya kucinkulako fyakwe! Loleleni mu kutekanya! Pamfiweni!

[Futunoti]

[Icikope pe bula 7]

Sambilileni pa lwa bulayo bwa kwa Lesa ubwa Paradise nomba

[Abatusuminishe Ukubomfya Icikope pe bula 5]

Umumbulu: Animals/Jim Harter/Dover Publications, Inc.; kacema munono: Abana: A Pictorial Archive from Nineteenth-Century Sources/Grafton/Dover Publication, Inc.