Ni Shani Mwingalangisha Ukuicefya kwa Cine Cine?

UKUICEFYA kwa cine cine kwalicindama nga nshi kuli Lesa. Yakobo alembele ukuti: “Lesa acincintila aba miiya; lelo ku bapetama [“abaicefya,” NW] apeelo kusenamina.” (Yakobo 4:6) Pano Yakobo limbi alelosha ku mfundo shimo ishaba mu Malembo ya ciHebere pamo nga ishi: “Yehova alisansabala, lelo alolesha [abaicefya, NW] na batakalala abeshibilo kutali.” “Amenso ya kusansabala kwa bantuuntu fye yakacendwa, no kutumpuka kwa bantungwa kukafwama, kabili Yehova eka akasansuka.” “Aba micendo wene [Lesa] alabacenda, lelo asenamina abalanda.”—Ilumbo 138:6; Esaya 2:11; Amapinda 3:34.

Umutumwa Petro na o akoseleshe ukuicefya. Alembele ati: “Imwe bonse, ikakeni mu musana aka kufwala ka bupete ku kupyungilana; pa kuti Lesa acincintila aba miiya, lelo ku bapetama [“abaicefya,”NW] apeelo kusenamina.”—1 Petro 5:5.

Ica Kumwenako ca kwa Kristu Ica Kuicefya

Kuti mwaipusha amuti, Busuma nshi nelyo ubunonshi bwaba mu kuicefya? Ku muntu uulefwaya ukuba Umwina Kristu wa cine cine icasuko cili icakatama, pantu ukuicefya e kuba nga Kristu. Yesu alangishe ukuicefya pa kupokelela umulimo waibela uwa kwisa pe sonde ukufuma mu muulu no kwisaba umuntunse, uwacepako pali bamalaika. (AbaHebere 2:7) Nangu aali Mwana wa kwa Lesa, ashipikishe umuseebanya wafumine ku balwani bakwe aba fya mipepele. Alitekeenye mu fya kwesha alepitamo, nangu cingatila afwaya nga alilombele amatulwe ya bamalaika ku kumwaafwa.—Mateo 26:53.

Mu kupelako, Yesu akobekwe pa cimuti ca kucushiwilwapo mu museebanya, lelo atwalilile uwa busumino kuli Wishi. Ni pali co Paulo alembele pa lwa wene ukuti: “Muli imwe mube ukwangwa ukwali na muli Kristu Yesu. Wene, pa kuba mu cipasho ca kwa Lesa, tatontonkenye ukuti ukulingana na Lesa cintu ca kusompola; lelo aisangwile uwa fye, pa kubuule cipasho ca busha, pa kufyalwa mu cipasho ca buntunse. No kusangwa mu mibele ya buntunse, aipetamike no kubo wa kunakila ukufika na ku mfwa, awe ukufika ku mfwa ya pa [cimuti ca kucushiwilwapo, NW].”—Abena Filipi 2:5-8.

Lelo ni mu nshila nshi twingalangisha ukuicefya kwa cine cine? Mu ncitilo, ni shani fintu twingankulako mu kuicefya ukucila ukwankulako cilumba cilumba?

Ifyo Umuntu Waicefya Acita

Lekeni tulanguluke ukuicefya kwa pa ncito, nelyo mu mulimo wa Bwina Kristu. Pa kuti incito ibombwe bwino, bakangalila, bamaneja, na bakapitao kuti bakabilwa. Kufwile ukubako uwa kupingula. Mucita shani? Bushe mutila, “Finshi ali pa kulanjeba ifya kucita? Nalibomba iyi ncito imyaka iingi ukumucila.” Ca cine, nga mwalikwate cilumba, mukapata ukunakila. Uwaicefya ena alesha ukukonka amashiwi yatila: “Mwicita cintu mu kuisakamana nangu ni ku matutumuko, lelo mu kupetama mutunge abanenu ukuba abacila imwe bene.”—Abena Filipi 2:3.

Muyumfwa shani nga imitubululo yafuma ku wacaice nelyo ku mwanakashi? Nga mwaliicefya, mukailangulukapo. Nga muli ba cilumba, mukaikaana apo pene fye. Bushe kuti mwatemwa ukulumbanishiwa no kutashiwa muli bubumbimunda ukwingamonaula, atemwa ukupanda mano kusuma ukwingamukuulilila?—Amapinda 27:9; 29:5.

Bushe kuti mwacimfya amacushi? Ukuicefya kukamwafwa ukulolenkana ne mibele yaafya no kushipikisha, nge fyacitile Yobo. Nga muli ba cilumba, mukafuupulwa no kukalifiwa no kufiitwa pa mafya yabipisha na pa tuntu utunono utwa kutunganya fye.—Yobo 1:22; 2:10; 27:2-5.

Uwaicefya wa Kutemwa Kabili Aleleela

Abantu bamo balasango bwafya bwa kulanda ukuti, “Munjeleleko. Naciluba. Mwacilungika.” Mulandu nshi? Icilumba cacishamo! Lelo, ilingi line ukupaapaata kwa cine cine kuti kwapwisha ukukansana kwa mu cupo.

Bushe mulaitemenwa ukweleela lintu umo amulufyanya? Atemwa bushe icilumba cimulenga ukuba ne cikonko, nalimo pa nshiku ishingi nelyo imyeshi, ukukanalanda no untu mutunga ukuti alimulufyanya? Bushe mulenda ne cikonko pa kuti mpaka mukalandule? Abantu baliipaiwa pa mulandu ne cikonko. Bambi nabo babomfya inshila ya konawila abanabo ishina. Lelo, umuntu waicefya alikwata ukutemwa kabili aleleela. Mulandu nshi? Pantu ukutemwa takulinga cabipa. Yehova aali uwaitemenwa ukweleela Abena Israele nga balekele icilumba. Umukonshi waicefya uwa kwa Yesu aleleela, nangu fye imiku iingi!—Yoele 2:12-14; Mateo 18:21, 22; 1 Abena Korinti 13:5.

Umuntu waicefya ‘alaitangisha ku kulangisha umucinshi.’ (Abena Roma 12:10) Baibolo ya New International Version yena itila: “Mulecindikana ukucila ukuicindika mwe bene.” Bushe mulatasha bambi no kukatamika imibombele yabo no kulamuka? Atemwa bushe lyonse mulafwailisha ubunake pa kuti monaule ishina lyabo? Bushe icine cine mulatasha bambi mu bufumacumi? Nga ca kuti mwalikwata ubwafya muli ici, nalimo mwalikwata akaso ne cilumba.

Umuntu wa cilumba tatekanya. Uwaicefya alatekanya no kushishimisha. Nga imwe? Bushe mulainong’onya lintu mwamona kwati mulecushiwa? Ukucite co te kushishimisha. Nga mwaliicefya, tamwakaleituntumba. Ibukisheni icacitike lintu abasambi ba kwa Yesu baituntumbile. Baimishe ifikansa pa wali no kuba umukalamba pali bonse. Balilabile ukuti bonse baali “finangwa fya basha”!—Luka 17:10; 22:24; Marko 10:35-37, 41.

Kalemba umwina France, Voltaire alondolwele ukuicefya nga “ubufuke bwa mweo . . . umuti wa cilumba.” Cine cine, ukuicefya e bupete. Umuntu waicefya alifuuka umutima, takwata filumba. Alikwatisha umucinshi.

E ico, mulandu nshi uwa kutukuta ukuti tube abaicefya? Pantu Lesa alisuminisha kwene kabili kutwaafwa ukukwata ubutungulushi bwakwe. Ukuicefya kwa kwa Daniele e kwalengele Yehova ukumumona ngo “watemwikwa” no kumutumina malaika ne cimonwa! (Daniele 9:23; 10:11, 19) Ukuicefya kuleta amapaalo ayengi. Kuleta ifibusa fya cine cine ifya mutemwa. Ne cacilishapo, kuleta ipaalo lya kwa Yehova. “Icilambu ca kufuuka [“ukuicefya,” NW] na katiina ka kuli Yehova, bucindami no bukata no mweo.”—Amapinda 22:4.

[Icikope pe bula 7]

Ishiwi lyafuuka ilya kulombo kweleelwa kuti lyawamya ifintu