Ukusapika Paradise

NGA FINTU CASHIMIKWA NA BA PASCAL STISI

Bwaliilile sana, na mu misebo ya mu musumba wa Béziers, ku kapinda ka ku kulyo aka France mwalitalele. Lintu ine no munandi twasangile icibumba capentwa ica cikuulwa baleshitamo ifitabo fya mapepo, twalembelepo amashiwi ya mwina German uwa mano ya buntunse Nietzsche mu filembo ifikulu ifyafiita aya kuti: ‘Balesa balifwa. Abe uwa mweo Superman [uwa maka]!’ Nangu cibe fyo, cinshi cantungulwile kuli ifi fyonse?

NAFYALILWE mu France mu 1951 mu lupwa lwa ciKatolika ulwa fikolwe fya bena Italy. Ilyo nali umwaice, twaba pa cuti ku kapinda ka kulyo aka Italy. Kulya, cila mushi walikwete icilubi ca kwa Maria Nacisungu. Lintu naleenda na shikulu, nakonkele ifi filubi mu mulongo walepa ifyafwikwa ukupulinkana impili, lelo nshashininwe. Napwishishe amasomo yandi aya kutendekelako pe sukulu lyaletungululwa na baJesuit. Nangu cibe fyo, nshibukisha ukumfwa icili conse icakunenga ukutetekela Lesa.

Ilyo natampile ukutontonkanya pa lwa mifwaile ya bumi ni lintu natendeke ukusambilila ifya budokota pa yuniversiti ku Montpellier. Tata alicenenwe mu nkondo kabili lyonse aleba na badokota mupepi no busanshi bwakwe. Bushe te kuti cibe bwino ukulesha inkondo ukucila ukupoosa inshita yakule fi na maka ukundapa abantu bacenenwe? Iyo nshita, Inkondo ya Vietnam yali pa kalume. Kuli ine inshila fye iya mano iya kupwishishamo kansa ya bapwapwa, yali kufumyapo fwaka iilenga ubu bulwele. Kabili ni shani pa lwa malwele yaletwa ne nsala mu fyalo ifipiina na yaletwa pa mulandu wa kuliisha mu fyalo ifikankala? Bushe tacingaba bwino ukufumyapo ifilenga ubwafya ukucila ukwesha ukuwamya imibele ya bulanda? Mulandu nshi kwabela ukucula kwafule fi pe sonde? Naleyumfwa ukuti kwaliko icalubene sana ne yi mikalile yabipa, kabili natile ubuteko e bulenga.

Icitabo natemwishishe calembelwe na cipondoka, kabili nalekopolola amashiwi ukufuma mu citabo no kuyalemba pa fibumba. Panono panono, na ine wine nasangwike cipondoka, uwabula icitetekelo nelyo ifunde lisuma, uushalefwaya Lesa nelyo uwa kuntungulula. Nalemona ukuti Lesa na mapepo fyaletelwe na bakankaala na ba maka pa kuti baletitikisha no kutuliila amasuku pa mitwe. Abakankaala bapalile kwati baleti, ‘tubombeleni pe sonde, kabili icilambu cenu cikaba icikulu mu paradise mu muulu.’ Lelo ukuteka kwa balesa kwali nakupwa. Abantu balingile ukwebwa. Inshila imo iya kubebelamo yali kulembaula pa fibumba.

Pali uyu mulandu, amasomo yandi yalilekeleshiwe. Pali iyo nshita nali nintendeka ukusambilila geography, [imimonekele ya mpanga] na ecology [ifilengwa na Lesa] pa yuniversiti imbi iya Montpellier apafulishe bucipondoka. Lintu naletwalilila ukusambilila ecology, nalecililako ukufulwa pa kumona ukukoweshiwa kwe sonde lyesu ilyayemba.

Cila mwaka pa cuti ulusuba, iminika bamotoka no kwenda amakana ya bakilomita ukupulinkana Ubulaya. Lintu naleba pa bulendo no kulanda ne myanda ya banamutekenya, naimwenene ifyo ububi bwaletitikisha abantunse. Bushiku bumo, lintu nalesapika paradise, nasangile ululamba lwa mucanga ulusuma nga nshi lelo ulwafimbwa ne fimafuta pa cishi cayemba ica Crete. Naiketwe ubulanda icine cine. Bushe kwalishalako paradise ukuli konse pano isonde?

Nabwelela ku Mushi

Abasambilila pa lwa filengwa na Lesa mu France balekoselesha ukubwelela ku mushi ukuti e kupikulula amalanda ya mu bwikashi. Nalefwaya ukuibombela. E ico nashitile ing’anda yakuulilwa na mabwe, iikote mu mushi wabela mwi samba lya Mpili sha Cévennes ku kapinda ka kulyo aka France. Pa mwinshi nalembelepo umucincisho wa ba hippie abena America uwa kuti “Uno E Paradise.” Natoolele umukashana wacaice umwina German uwaletandalila incende yesu. Nshalefwaya napacepa ukuti mwine mushi atuufye, pantu aali mwiminishi wa buteko. Nga pa lwa kuupila mu calici? Te kwa kutontonkanyanapo!

Ilingi tatwalefwala insapato, kabili nalitekele icunsu no mwefu wasakalala. Naleipakisha ukulima ifitwalo no musalu. Umulu walemoneka uwa kafifi mu lusuba na banyenye baleimba. Amaluba ya mu tumpusa yali ayasuma, ne myangashi na makunyu ifya ku Mediterranean twalimine fyali ifyalowa nga nshi! Camoneke fyo twalisangile incende yalinga mu paradise.

Ukusumina Muli Lesa Kwatendeka

Pa yuniversiti nasambilile sayansi ya fya nsandesande, ifya tunya mu mala, ne mipandilwe ya fya mweo, imibombele ya ifi no kupikana fyalinsungwishe nga nshi. Apo nalelolekesha no kulanguluka pa bubumbo cila bushiku, nalepapa ubusuma bwa fiko. Cila bushiku naleishibilako ifingi pa bubumbo. Bushiku bumo pa numa ya kwenda mu mpili no kutontonkanya sana sana pa bumi, nasondwelele ukuti Kabumba afwile e ko aba. Napingwile mu mutima wandi ukusumina muli Lesa. Kale, nalecula no mutima, ukucula ku kutalalilwa. Ubushiku nasumine ukuti Lesa e ko aba, naisoseshe nati, ‘Pascal, tawakatale auba weka na kabili.’ Nalicincimushiwe apakalamba nga nshi.

Pa numa ya ico, twakwete umwana umukashana, Amandine. Nalimutemenwe icine cine. Apo nomba nasumine muli Lesa, natendeke ukukonka amafunde yamo yamo naishibe pa lwa mibele isuma. Nalekele ukwiba no kubepa, kabili naishilesanga ukuti ndesengauka amafya ayengi na banandi. Kwena, twalikweteko amafya, kabili uyo taali ni paradise untu nalefwaya. Abalimi ba myangashi aba muli ilya ncende balebomfya umuti wa kwipailako utushishi no wa konawilako amankumba uwalekowesha ifilimwa fyandi. Icipusho candi pa lwa calenga ububifi cali tacilaasukwa. Na kabili, nangu cibe fyo nalisomene ifingi pa lwa bumi bwa lupwa, tatwalekele ukuumana no munandi. Twashele ne fibusa finono ifishali fya cine, fimo fyalesonga umunandi ukulaala na fyo. Nalefwaya paradise wawaminako.

Icasuko ku Mapepo Yandi

Ilingi line nalepepa umo naishibile ukuti Lesa antungulule. Bushiku bumo pa Mulungu ulucelo umwanakashi umo uwa bucibusa uwe shina lya Irène Lopez na kalume wakwe baishile pa mwesu. Ali ni Nte ya kwa Yehova. Nalikutike ku fyo alandile kabili nalisumine ukuti akabwele na kabili. Abaume babili balintandalile. Ukulanshanya twakwete, nasambilileko ifintu fibili, Paradise no Bufumu bwa kwa Lesa. Nasungilile fyo mu mutima, kabili pa numa ya myeshi, nakutulwike ukuti kasuba kamo nkakabila ukuwamya ubumi bwandi bumfwane no kufwaya kwa kwa Lesa pa kuti nkakwate kampingu wasanguluka ne nsansa shine shine.

Pa kuti tumfwane ne Cebo ca kwa Lesa, cibusa wandi pa kubala alisumine ukuti tukopane. Lelo, atendeke ukubishanya na bantu bapata Lesa na mafunde yakwe. Icungulo cimo muli shinde lintu nabwelele ku ng’anda, nalifulunganishiwe. Ing’anda yesu yali fye cibolya. Cibusa wandi alifyukile, asenda no mwana wesu umukashana uwa myaka itatu. Natwalilile ukulolela ukuti balabwela, lelo nakalya. Mu cifulo ca kupeela Lesa umulandu, nalipepele kuli wene ukungafwa.

Ilyo papitile nshiku sha kupenda, nabulile Baibolo, naikala mwi samba lya mukunyu, nalabelenga. Na kuba, nalyumfwikishe fyo nabelengele. Nelyo nabelengele ifitabo fyalembwa na basambilila ifya muntontonkanya, nshatalileng’umfwapo ifyebo fya mano nge fi. Ili buuku lifwile lyalipuutilwemo na Lesa. Icampapwishe fisambilisho fya kwa Yesu na fintu aishibe icifyalilwa ca buntunse. Amalumbo yalinsansamwishe kabili nalisungwike pa mano yabomba aya mu Amapinda. Nasangile ukuti nangu ukusambilila pa lwa bubumbo kulenga umo ukwishiba Lesa, kuti kwasokolola ifya “ku mpela fye fya mibombele yakwe.”—Yobo 26:14.

Inte shalinshilile ne citabo ca Icine Icitungulula ku Bumi bwa Ciyayaya ne ca Ukulenga Ubumi bwa Lupwa Lobe ubwa Nsansa.a Fyalingafwile pa numa ya kufibelenga. Icitabo ca Icine calingafwile ukumfwikisha umulandu kwafulila ukukowesha, inkondo, ulukakaala, ne cintiinya ca konaulwa na manyukiliya. Ifi fya kucitika fyaleshinina ukuti Ubufumu bwa kwa Lesa buli apepi, ukupala fintu umuulu wakashikila namwene mwi bala lyandi walesobela imiceele isuma ubushiku bukakonkapo. Kumfwa icitabo ca Ubumi bwa Lupwa, nafulwike ukulangako cibusa wandi no kumweba ifyo kuti twaba aba nsansa nga twalacita ifilanda Baibolo. Lelo cali kucelwa.

Ukulunduluka kwa ku Mupashi

Apantu nalefwaya ukwishibilapo na fimbi, naitile Inte ya kwa Yehova, Robert ukwisanjebako ifyafulilako. Alipapile pa kumfwa ukuti ndefwaya ukubatishiwa, e ico atendeke isambililo lya Baibolo. Bwangu bwangu fye natendeke ukushimikila bambi fintu nalesambilila kabili natendeke ukwananya impapulo nalefumya ku Ng’anda ya Bufumu.

Pa kusanga imikalile, natendeke isukulu lya bukakuula. Pa kumona ubusuma bwa Cebo ca kwa Lesa, naleshukila inshita iili yonse ukushimikila ku banandi na kuli bakafundisha. Icungulo cimo nakumenye Serge mu lukungu. Alikwete bamagazini. Namwebele nati: “Namona ukuti walitemwa ukubelenga.” Anjaswike ati: “Ee, lelo nintendwa na aba bamagazini.” Namwipwishe ukuti: “Bushe ulefwaya icintu cimo ica kubelenga icisuma icine cine?” Twalilanshenye bwino bwino pa lwa Bufumu bwa kwa Lesa, ica kuti alipokele impapulo shimo isha Baibolo. Umulungu wakonkelepo, alinkonkele ku Ng’anda ya Bufumu, kabili isambililo lya Baibolo lyalitendekwe.

Bushiku bumo naipwishe Robert nga kuti nashimikila ku ng’anda ne ng’anda. Aile ku muputule wakwe no kundetela suti. Pa Mulungu, natendeke ukuya mu butumikishi na wene. Mu kupelako, pa March 7, 1981, nalilangishe pa cintubwingi ukuipeela kwandi kuli Yehova Lesa ukupitila mu lubatisho.

Ukwafwa mu Kumanama

Pali iyi nshita nali ninjishiba kuntu Amandine na nyina baleikala ku calo cimbi. Ku ca bulanda, nyina abomfeshe ifunde lya calo aleikalamo ukundesha ukumona umwana wandi. Camponeshe pa musao. Nyina kwa Amandine alyupilwe, kabili ukupelelwa kwandi kwalicililemo lintu napokelele icishibisho ca mwi funde ica kuti umulume wakwe napoka umwana, ukwabula ine ukusuminishako. Calepilibula ukuti nshakwete nsambu ishili shonse pa mwana wandi. Te mulandu no kukonka ifunde, nshapeelwe nsambu sha kumutandalila. Nayumfwile kwati nimpapa icintu cafina nga nshi.

Lelo Icebo ca kwa Yehova calinkoseleshe mu nshila ishingi. Lintu nali mu kumanama icine cine kasuba kamo, nalandile mu kubwekeshabwekeshapo amashiwi ya pa Amapinda 24:10 ilitila: “Nga watompoka mu bushiku bwa kumanama, ninshi amaka yobe yanono.” Ici cikomo calingafwile ukutwalilila. Inshita imbi pa numa ya kwesha no kufilwa ukumona umwana wandi, nafyambete icola naya mu butumikishi. Pali iyo nshita yaafya, namwene bucine bwa Ilumbo 126:6 ayatila: “Uusende cipe ca mbuto, ukuya aleya no kulila; ukwisa akesa no tupundu, nasende myanshi yakwe.” Isambililo lyakatama nasambilile lya kuti nga wakumanya amesho yaafya, e lyo waesha apapela amaka yobe ukuyapwisha, ulingile ukuyalabako no kutwalilila mu mulimo wa kwa Yehova. Iyi e nshila fye yeka iya kusungilila ubuseko bobe.

Ukutinamina Ifyawaminako

Lintu abafyashi bandi bamwene ifyo naalwike, baliipeleshe ukungafwa ukutwalilila na masomo pa yuniversiti. Nalibatashishe fye, apo nomba nalikwete ifya kucita fimbi. Icine calindubwile ku mano ya buntunse, amalele no kupendule ntanda. Nomba nalikwete ifibusa fishingepayana mu nkondo. Kabili mu kupelako nalisangile casuko pa lwa mulandu ubucushi bwafulile fyo pe sonde. Pa kutasha Lesa, nalefwaya ukumubombela na maka yandi yonse. Nalefwaya ukukonka ica kumwenako ca kwa Yesu uwaipeeleshe ku butumikishi bwakwe.

Mu 1983, nalilekele umulimo wa bukakuula no kuba umutumikishi wa nshita yonse. Amapepo yandi yalyaswikwe ilyo nasangile incito ya nshita lubali mu parka pa kuti ndeyafwilisha. Fintu cali buseko ukusangwa ku sukulu lya bapainiya pamo na Serge, umulumendo nashimikile ilyo nali ku sukulu lya bukakuula! Pa numa ya kubomba imyaka itatu nga painiya wa nshita yonse, nafwaishe ukubomba ifyafulilako mu mulimo wa kwa Yehova. E co, mu 1986 nasontelwe nga painiya waibela mwi tauni lya Provins, mupepi na Paris. Ilingi nga nabwela ku ng’anda mu cungulo, nalefukama no kutasha Yehova pa fyo naipakishe ukulanda na bantu pa lwa wene. Na kuba, umo nsanga insansa shafulisha ni mu kulanda kuli Lesa na mu kulanda pa lwa wene.

Ubuseko na bumbi ubukalamba bwali lintu mayo uwa myaka 68 uwaleikala ku Cébazan, akamushi kanono ku kapinda ka kulyo aka France abatishiwe. Lintu mayo atendeke ukubelenga Baibolo, nalimulembeseshe Ulupungu lwa kwa Kalinda na Loleni! Ali muntu upelulula, kabili bwangu bwangu fye alilwike ukuti cintu alebelenga cali cine.

Bethel—Paradise wa ku Mupashi Uwawamisha

Lintu Watch Tower Society yapingwilepo ukucefyako impendwa ya bapainiya baibela, naliipwishe ukusangwa ku Sukulu lya Kukansha Ilya Butumikishi nelyo ukuya ku Bethel, iofesi linono ilya Nte sha kwa Yehova mu France. Nalefwaya Yehova ansalile ifyo ningamubombela bwino. Mu December 1989, pa numa fye ya myeshi inono, naliitilwe ku Bethel ya Louviers, ku France. Ici cali cisuma pantu canengele ukwafwilisha munyinane umwaice na bukwe ifya kusakamana abafyashi bandi lintu balwalishe. Mba mu mulimo wa bumishonari ukwalepa bakilomita abengi nga nshacitile ci.

Mayo alentandalila ilingi line pa Bethel. Nangu line cali kuipusula kuli wene ukukanaikala pamo na ine, alenjeba ati: “Mwana wandi, twalilila pa Bethel. Ndi ne nsansa pa kuti ulebombela Yehova muli iyi nshila.” Ku ca bulanda, abafyashi bandi bonse balifwa. Fintu mfuluka ukubamona mwi sonde lyasangulwa paradise wa cine cine!

Nasumina ukuti Bethel, “Ing’anda ya kwa Lesa” e ingalinga fye ubulondoloshi bwa kuti “Uno E Paradise,” pantu paradise wa cine cine ni uyo uwa ku mupashi, kabili bumupashi e bwaandatila Bethel. Twalikwata ishuko lya kulundulula ifisabo fya mupashi. (Abena Galatia 5:22, 23) Ica kulya cawamisha ica ku mupashi ico tukwata pe lembo lya Baibolo ilya cila bushiku na pe sambililo lya lupwa ilya Ulupungu lwa kwa Kalinda cilankoselesha mu mulimo wa pa Bethel. Ukulundapo, ukubishanya na bamunyina na bankashi bakosoka ababombela Yehova mu busumino pa myaka iingi cilenga Bethel ukuba icifulo caibela ica kukulilamo lwa ku mupashi. Kwena, imyaka 17 naipitapo ukwabula ukumonapo umwana wandi, lelo nalisanga abacaice abengi abapimpa pa Bethel abo mona nga bana bandi, kabili abo ukulunduluka kwabo ukwa ku mupashi kunkoselesha. Mu myaka 8 iyapitapo, nalipeelwa imbali 7 isha mulimo. Ukukansha kwa musango yo kulanonsha nangu ca kuti ukwalukaaluka takwayanguka lyonse.

Nalelima umusango wa cilemba uutwala sana. Mu kupalako, nalimona ukuti nga watanda ububi, ukalobolola ububi ubwingi, te bumo fye iyo. Ukubelesha kwaba nge sukulu kuntu amasambililo yakosesha umutengo. Nga nali no kusalapo, kuti nasala ukukanaba muli lilya sukulu, lelo ukukushiwa mu nshila sha kwa Yehova. We shuko we ku bacaice abakushiwa na bafyashi Abena Kristu! Ukwabulo kutwishika, cawamapo ukubyala ubusuma mu mulimo wa kwa Yehova no kulobolola umutende uwingi no kwikushiwa.—Abena Galatia 6:7, 8.

Ilyo nali painiya, limo limo nalepita apepi na pa cibumba ca cikuulwa baleshitamo ifitabo fya mapepo apo twalembele amashiwi ya bucipondoka. Nalingilapo na mu kati no kulanda no mwine wa cikuulwa pa lwa kwa Lesa wa mweo ne mifwaile yakwe. Cine cine, Lesa e ko aba! No kucila pali fyonse, Yehova, Lesa wa cine eka, ni Shifwe wa cishinka uushilekelesha bana bakwe. (Ukusokolola 15:4) Ukupitila mu kubombela no kulumbanya Lesa wa mweo Yehova, shi bacinkupiti ukufuma ku nko shonse nabasange paradise wa ku mupashi nomba na Paradise wabweshiwa uukesa!

[Futunoti]

[Ifikope pe bula 26]

Pa numa ya kumona ifipapwa fya bubumbo, napingwilepo ukusumina Lesa. (ku kulyo) Pa Bethel momba nomba