Ukubilisha Imbila Nsuma mu Filime fya Mupunga Ifya mu Taiwan

Tuli Abakwate Citetekelo

Ukubilisha Imbila Nsuma mu Filime fya Mupunga Ifya mu Taiwan

ILINGI line ku Taiwan kulaloka imfula sana, icilenga umupunga ukumena uwingi nga nshi cila mwaka. Inshita shimo nangu cibe fyo, imfula taisa pa nshita ilingile ukulokelapo e co utumenwa tulelimbuka tulonaika. Bushe umulimi alafuupulwa ici nga cacitika? Iyo. Alishiba ukuti akabila ukuba no mupampamina. E co alatanda utumenwa na tumbi no ku tubyala mu cilime. Lyene imfula nga yaloka, umulimi alalobolola bwino. Ici inshita shimo calipalana sana no kubyala no kulobolola kwa ku Mupashi.

Aba Mupampamina mu Kulolobola kwa ku Mupashi

Pa myaka iingi Inte sha kwa Yehova mu Taiwan balibombesha nga nshi mu kubyala no kulobolola imbuto sha cine ca mu Malembo mu ncende shimo ishishalemoneka ukuba ishafunda. Ica kumwenako cimo ni ku citungu ca Miao-li. Abantu abaleankula ku cine kulya baali abanono nga nshi ilyo ubunte bwalecitwa mu nshita mu nshita. E co mu 1973 bapainiya baibela babili, umukashi no mulume, balituminwe ukuyabombela kulya pamo nga bakabilisha ba Bufumu aba nshita yonse. Pa kubala bamo balefwaya ukukutika ku mbila nsuma. Lelo bulya buseko bwa kusambilila icine bwalipwile pa numa ya nshita inono. Lyene aba bapainiya baibela balituminwe ku ncende imbi.

Mu 1991 bapainiya baibela bambi babili balituminwe kuli ilya ine ncende. Lelo na kabili camoneke kwati kuli iyi ncende te kuti kube ukulunduluka nelyo panono ukwa ku mupashi. Pa numa ya myaka inono, balya bapainiya baibela balituminwe ku ncende shimbi ishalemoneka kwati kuti kwaba ukulunduluka. E co ilya ncende yashele fye filya fine ukwabula ukushimikilwamo pa nshita iyatantalilako.

Ukutulukusha Kwabukululwa Kwabomba

Mu September 1998 capingwilwe ukuti kukabe ukwesha nga nshi ukufwaya ukwishiba incende umo ubutumikishi bubomba bwino mu fifulo fya mu Taiwan ifishakwata aba kubombelamo. Bushe ici cali no kucitwa shani? Ici cali no kubombwa pa kutuma bapainiya baibela 40 aba pa kashita akanono ku ncende ukwafula abantu ukushaba aba kubombelako.

Imisumba ibili iyasuntikana mu citungu ca Miao-li e imo iya ifyo fifulo ifyasalilwe ukuti fingabombelwamo. Bankashi basano abashimbe e bali no kubomba mulya pa myeshi itatu pa kutila bengeshiba nga umulimo kuti wabombwa kuli cilya cifulo. Tapakokwele sana pa numa ya kufika, balembele amakalata ya kucincimusha ayalelanda pa mpendwa ya bantu abalefwaya ukusambilila icine abo balesanga. Pa nshita lintu balepwisha imyeshi itatu iya bupainiya muli ilya ncende, baali baletungulula amasambililo ayengi. Batendeke fye no kukwata isambililo lya citabo kabili eluda umo ifi mu cilonganino ca mupepi e walebafwako.

Batatu pali aba bankashi balandile ukuti balefwaya ukutwalilila ukwafwa tulya “utumenwa” utushakosa utwalekula bwino nga nshi. Pa mulandu wa ico, babili pali abo balisalilwe ukuba bapainiya baibela aba lyonse, kabili uwa butatu atwalilile ukubomba nga painiya wa nshita yonse. Eluda mu cilonganino ca mupepi akuukile kuli ilya ine ncende pakutila engabafwako. Abantu ukucila pali 60 balisangilwe ku lyashi lya kubalilapo ilya cintubwingi ilyalandilwe muli ilya ncende. Ino nshita cilya cilonganino ca mupepi cilafwilishako ili ibumba lipya ukuti bengalalongana pa Mulungu lyonse ukulunda pa masambililo ya citabo bakwata. Tapakakokole sana ukuti icilonganino icipya cikapangwe muli ilya ncende.

Umupampamina Waleta Amapaalo mu Ncende Shimbi Isha mu Taiwan

Abantu mu fifulo fimbi namo balyankwileko mu nshila iyapalako. Mu citungu ca I-Ian incende iyabela lwa ku kapinda ka ku kuso aka cishi ca Taiwan, ibumba lye Sambililo lya Citabo ilipya lyalipangilwe mu ncende umwalebombela bapainiya baibela.

Icungulo cimo ifi ilyo painiya waibela aleshimikila ku ng’anda ne ng’anda, akumenye umulumendo no kumulanga akapepala apatantikwe inshita ilyo ifilonganino filongana. Apo pene aipwishe ukuti: “Bushe kuti nasangwako ku kulongana mailo ubushiku? Kabili nga ndi no kwisa, kuti nafwala finshi?” Uyu painiya aletungulula amasambililo 8 cila mulungu ku balefwaya ukwishibe cine. Abasambi ba Baibolo mu kwangufyanya baletontonkanya pa kuba bakasabankanya ba mbila nsuma, no kuba no buyo bwa kwisabatishiwa.

Umwanakashi umbi uwa mwi tauni ili line na o aleya ku calici pa myaka iingi lelo takwete muntu wa kumusambilisha Baibolo. Ilyo aumfwile pa lwe sambililo lya Baibolo, alitendeke ukusambilila ilyo line. Alikoseleshiwe ukupekanishisha libela. Ilyo painiya waibela uwa pa kashita akanono aishile mu kutungulula isambililo, asangile ukuti ulya mwanakashi aliipekanishishe libela pantu alishitile notibuku iyo alembelemo ifipusho baali no kusambililapo. Kabili alilembele ne ifyasuko fya ifi fipusho. Alembele fye na malembo yonse ayali muli lilya isambililo. Pa nshita lintu nkashi aleisa mu kutungulula isambililo lya kubalilapo, uyu mwanakashi ali napekanya amasambililo yatatu!

Ifyapalako e fyacitike na mwi tauni lya Dongshih ilyabela lwa pa kati ka Taiwan. Bapainiya baibela aba pa kashita akanono bashalike amabroshuwa ukucila pali 2,000 mu myeshi itatu iyo babombele kulya. Mu mweshi uwa butatu baletungulula amasambililo ya Baibolo 16. Ili tauni lyalyonawilwe sana ku cinkukuma icapitile mu ncende ya pa kati ka Taiwan pa September 21, 1999, lelo bamo abafwaya ukusambilila balitwalilila ukulunduluka lwa ku mupashi, nangu ca kuti balakabila ukwenda iawala ilituntulu pakuyasangwa ku kulongana pa Ng’anda ya Bufumu iyabela mupepi. Cine cine, umupampamina ulakabilwa pa kulobolola ifimenwa ifisuma, cibe fya ku mubili nelyo ifya ku mupashi.

[Mapu pe bula 8]

(Nga mulefwaya ukumona mapu, moneni muli magazini)

CHINA

Taiwan Strait

TAIWAN

[Abatusuminishe]