Bushe Paradise wa ku Mupashi Cinshi?

GUSTAVO akulile mu musumba unono ku Brazil.a Ukufuma ku bwaice, balemusambilisha ati abantu abasuma ilyo bafwa baya ku muulu. Taishibe nelyo kamo pa bufwayo bwa kwa Lesa ubwa kuti abantunse aba cishinka bushiku bumo bakaipakisha ubumi bwapwililika muli paradise pano isonde. (Ukusokolola 21:3, 4) Kwali na cimbi ico ashaishibe. Taishibe ukuti na pali ino ine nshita, kuti aba muli paradise wa ku mupashi.

Bushe mwalitala amumfwako ukuti kwaliba paradise wa ku mupashi? Bushe uyo paradise mwalimwishiba kabili bushe mwalishiba icifwaikwa pa kuti mube muli yene? Onse uufwaya ukuba ne nsansa shine shine afwile ukwishiba uyo paradise.

Ukufwayafwaya Paradise wa ku Mupashi

Ukulanda ati umuntu kuti aikala muli paradise pali ndakai kuti kwaumfwika kwati kusabaila fye. Cino calo tacapalako nelyo panono kuli paradise. Ifilecitikila abantu abengi nga nshi ni filya imfumu ya baHebere iya ku kale yalandile ukuti: “Moneni, ifilamba fya bacitwo lumanimani, abashaba na kasansamusha—ku kuboko kwa ba lumanimani kufuma amaka, lelo kuli aba takwaba kasansamusha!” (Lukala Milandu 4:1) Iminshipendwa ya bantu balacula ku mabuteko yabipa, imipepele yabipa, na ku boni bwa cuma ca calo, ica kuti tabakwata na “kasansamusha.” Abengi balapibilapo ilibe pa kuti fye balipile indalama sha fya kusonkelasonkela, bakushe abana, na pa kuti bacite ifintu na fimbi ifyo tushingakumamo kulumbula ifikabilwa pa kuti babe pano calo. Aba na bo kuti baumfwako bwino nga kwaba kasansamusha, uwa kuti abangushishako ubwafya, uleke bomfweko eyefilya. Imikalile ya aba bonse tayapalako nangu panono ku kwikala muli paradise.

Kanshi paradise wa ku mupashi aba kwi? Cisuma, amashiwi ya ciGriki ne ciHebere ayapilibulwa “paradise” yonse yalola mu kuti parka nelyo ibala lyayemba, icifulo ca mutende ica kupembula. Baibolo yalaya ukuti bushiku bumo isonde likaba paradise wine wine, icifulo capala ibala lyayemba umwa kwikala abantunse abashaba na lubembu. (Amalumbo 37:10, 11) Apo twaishibe fyo, kanshi paradise wa ku mupashi bwikashi busuma umo umuntu engekala na ku matwi tondolo. Afwile aleipakisha umutende na Lesa na bantu banankwe. Nge fyo Gustavo asangile, paradise wa ifyo e ko aba na lelo line, kabili abantu bekalamo baleya balefula.

Ilyo aali ne myaka 12, Gustavo aalefwaya ukuba umupatili ku Katolika. Apo na bafyashi balisumine, atendeke ukuya ku sukulu lya bupatili. Kuli lilye sukulu atendeke ukulisha ifilimba, ukwangala ifisela, no kuitumpa mu mapolitiki, ifyo icalici lyabikileko pa kuti abacaice abengi batemwe ukuyako. Alishibe ukuti umupatili afwile ukuipeelesha ku kubombela abantu kabili tafwile ukuupa. Lelo, abapatili bamo na basambi ba pa sukulu lyakwe abo Gustavo aishibe baalecita ubulalelale. Ukwikala na bantu ba ifyo kwalengele Gustavo bwangu bwangu aba cakolwa umwine mwine. Mwamona na imwe ukuti aali talasanga paradise wa ku mupashi.

Bushiku bumo, Gustavo abelengele trakiti wa Baibolo uwalelanda pali paradise wa pano isonde. Ico calengele atontonkanya pa co fwe bantu twabela pa calo. Atile: “Natendeke ukubelenga Baibolo libili libili, lelo nshaleumfwa. Nshaishibe no kuti Lesa alikwate shina.” Aafumine pa sukulu lya bupatili no kutandalila Inte sha kwa Yehova pa kuti bamwafwe ukumfwikisha Baibolo. Pa numa ya ico, bwangu bwangu alilundulwike no kuipeela kuli Lesa. Gustavo alesambilila pa lwa paradise wa ku mupashi.

Abantu ba pe Shina lya kwa Lesa

Gustavo asambilile ukuti ishina lya kwa Lesa, ilya kuti Yehova, te cintu ca kumfwisha fye bwino umusambi ukuti aishibako akantu kamo akapya. (Ukufuma 6:3) Lyalicindama mu kupepa kwa cine. Yesu aebele abasambi bakwe ukupepa ukuti: “Shifwe wa mu muulu, ishina lyenu libelwe akatiina.” (Mateo 6:9) Ukulanda pa Bena fyalo abaishileba Abena Kristu, umusambi Yakobo atile: “Lesa . . . [apempwile] Abena fyalo ku kubuulilamo ishina lyakwe uluko lwa bantu.” (Imilimo 15:14) Mu mwanda wa myaka uwa kubalilapo, abantu ba pe ‘shina lyakwe’ ni balya bali mu cilonganino ca Bwina Kristu. Bushe na lelo kwaliba abantu ba pe shina lya kwa Lesa? E ko baba, kabili Gustavo ailwike ukuti abo bantu ni Nte sha kwa Yehova.

Inte sha kwa Yehova balebomba mu fyalo 235. Aba batumikishi balicila pa mamilioni 6, kabili amamilioni na yambi 8 abomfwa bwino ukukutika ku fyo basambilisha balasangwa ku kulongana. Apo baishibikwa konse konse ukuti balashimikila, balefishapo amashiwi ya kwa Yesu aya kuti: “Ne mbila nsuma iyi ya bufumu ikabilwa ku fyalo fyonse ku kubo bunte ku nko shonse.” (Mateo 24:14) Lelo cinshi calengele Gustavo ukumfwa ukuti ilyo alebishanya ne Nte sha kwa Yehova ninshi aba muli paradise wa ku mupashi? Atila: “Nalingenye ifyo namwene mu calo na kucilisha ku sukulu lya bupatili ne fyo nasangile ku Nte sha kwa Yehova. Ico natemenweko sana kutemwa uko baba na ko.”

Abantu na bambi balanda cimo cine pa Nte sha kwa Yehova. Miriam, umukashana umwina Brazil atile: “Nshatalile mba ne nsansa, nelyo fye mu lupwa lwandi. Ku Nte sha kwa Yehova kwali e kwa kubalilapo ukumona ukutemwa ukushili kwa kulanda fye pa kanwa.” Umwaume we shina lya Christian atile: “Limo limo nalepupe mipashi, lelo ifya kupepa fyena e fyo nasuulile sana. Napoosele sana amano ku ncito yandi iya buinjiniya na ku kufwaya ukucindikwa mu bwikashi. Lelo, ilyo abakashi bandi batendeke ukusambilila Baibolo ne Nte sha kwa Yehova, namwene baleyalula imibele. Naleumfwa bwino sana ifyo abanakashi ba Bwina Kristu abaleisa mu kutandala ku mukashi wandi baalemoneka aba nsansa kabili abapimpa.” Cinshi abantu balandila amashiwi ya musango yu pa Nte sha kwa Yehova?

Paradise wa ku Mupashi Cinshi?

Cimo icalenga Inte sha kwa Yehova ukupusana sana na bambi ni co balacindikisha ico Baibolo yalanda. Baasumina ukuti Baibolo ya cine kabili Cebo ca kwa Lesa. Kanshi tabapelela pa kwishibako fye ifisambilisho fyacindamisha mu mipepele yabo. Cila muntu alatwalilila ukusambilila pa lwakwe no kubelenga Baibolo. Ilyo umuntu akokola ukubishanya ne Nte sha kwa Yehova, e lyo asambilila ifya kwa Lesa ifingi no kufwaya Kwakwe ukwasokololwa mu Baibolo.

Ukwishiba kwa musango yo kulalubula Inte sha kwa Yehova ku filenga abengi ukufilwa ukuba ne nsansa, ifili nga umutunganya wa kutiina ifishaishibikwa na mano yashalolamo. Yesu atile: ‘Icine cikamulenga abantungwa,’ kabili Inte sha kwa Yehova basanga ukuti ico ca cine. (Yohane 8:32) Fernando, uwalepupa imipashi kale, atile: “Mwandini nalyumfwile bwino sana ilyo naishibe ukuti kwaliba umweo wa muyayaya. Naletiina pantu nalishibe ukuti pali ine na bafyashi bandi, umo akafwa.” Icine calubwile Fernando ku kutiina ifibanda no kutiina ico abene beta ati icalo ca bafwa.

Muli Baibolo, ukwishiba Lesa kwalipalana sana no kwishiba paradise. Kasesema Esaya atile: “Tafyakacite bubi, kabili tafyakonaule, mu lupili lwandi lwa mushilo monse; pantu icalo cikesulamo ukwishiba Yehova, ifyo amenshi yafimba pali bemba.”—Esaya 11:9.

Kwena, ukwishiba fye kweka kweka te kuti kulete umutende wasobelwe na Esaya. Umuntu afwile ukucita ico alesambilila. Fernando atile: “Ilyo umuntu alundulula ifisabo fya mupashi, na o wine alalengako kwaba paradise wa ku mupashi.” Fernando alelanda pa mashiwi ya mutumwa Paulo, uwalandile ukuti imibele isuma iyo Umwina Kristu alundulula yaba “fisabo fya mupashi.” Atantawilile iyo mibele ukuti yaba “kutemwa, ukusekelela, umutende, ukutekanya, icongwe, ubusuma, icishinka, ukunakilila, ukuteko mutima.”—Abena Galatia 5:22, 23.

Bushe mwamona ifyo ukubishanya na bantu abalebombesha ukulundulula imibele ya musango yo kwingaba fye kwati muli mu paradise? Paradise wa ku mupashi uwasobelwe na kasesema Sefania kuti abako pa bantu ba ifyo. Atile: “Tabakacite bupondamishi, tabakasose bufi, kabili mu tunwa twabo tamwakasangwe ululimi lwa kufutika; pantu bene kuti bamema no kuyolola, apashaba na wa kututumya.”—Sefania 3:13.

Icacindama Ico Ukutemwa Kubomba

Nalimo mwamona ukuti ukutemwa e cisabo ca ku mupashi, ico Paulo abalilapo ukulumbula. Iyi e mibele Baibolo yalandapo sana. Yesu atile: “Muli ici e mo bonse bakeshibilo kuti muli basambi bandi, nga mwaba no kutemwana.” (Yohane 13:35) Kwena Inte sha kwa Yehova na bo bene tabapwililika. Limo balapusana mwi bumba lyabo mwine nga filya fine caleba na ku basambi ba kwa Yesu. Lelo balitemwana icine cine, kabili balapepa ukuti umupashi ulebafwa ilyo balelundulula ukutemwa.

E mulandu wine icumfwano cabo cabela icaibela. Kuli bena takwaba akapaatulula ka mushobo no kucilamo ukutemwa icalo cabo ukulenga ukuti abengi muno calo balepusana. Na kuba, Inte sha kwa Yehova abengi abaaleikala mu calo mwali ukwipayana kwa mikowa ku mpela ya myaka ya ba 1990 balefisa abanabo no kuibika mu kapoosa mweo. Nelyo fye “bafuma ku luko lonse ne mikowa ne misango ya bantu na bantu na ba ndimi,” balikatana ica kuti teti musumine, kano mwaimwena fye mwe bene.—Ukusokolola 7:9.

Paradise ku Bacita Ukufwaya kwa kwa Lesa

Muli paradise wa ku mupashi tamufwile ukuba abantu ababuuka, abalalelale, nelyo bakaitemwe. Abena Kristu baebwa ukuti: “Mwipalana no bwikashi buno; lelo musangulwe mu kulengwa kwa mitima yenu ipya, ukuti mulinge icabo kufwaya kwa kwa Lesa.” (Abena Roma 12:2) Ilyo tuleikala imikalile yasanguluka, ne mibele isuma nayo twakwata no kucita na fimbi ifyo Lesa afwaya, tulalengako ukuti kube paradise wa ku mupashi e lyo na ifwe fwe bene tulaba ne nsansa. Carla asangile ukuti ico ca cine. Atila: “Batata bansambilishe ukubombesha pa kuti ndeikwatila indalama shandi. Nangu ca kuti naleumfwako bwino pantu nalisomene amasomo ya ku yuniversiti, ico nshakwete lupwa lwaikatana ulwa mutende ifyo umuntu ashingamona, kano fye aishiba Icebo ca kwa Lesa.”

Kwena ukuipakisha paradise wa ku mupashi takufumyapo amacushi ya mu mikalile ayaculako abantu bonse. Abena Kristu bacili balalwala. Mu calo bekala nalimo kuti mwabuuka inkondo. Abengi bashipikisha fye no bupiina. Nalyo line, bucibusa na Yehova Lesa, pantu na kuba e bwacindamisha pa kuti umuntu abe muli paradise wa ku mupashi, bulenga twashintilila pali wene ku kutwafwa. Cine cine atucincisha ukuti ‘tupoose icisendo cesu icafina pali wene,’ na bengi kuti basumine co, pantu balimona ifyo Yehova abafwa ilyo bacula icine cine. (Amalumbo 55:22; 86:16, 17) Lesa alaya ukwafwa abamupepa nelyo fye baba mu “mupokapoka wa kufiita kwa mfwa.” (Amalumbo 23:4) Ukucetekela ukuti cine cine Lesa alapoosa sana amano ku kutwafwa kulenga twatwalilila no “mutende wa kwa Lesa uwapulamo mu kwiluka konse,” uwacindama nga nshi pa kuti tube muli paradise wa ku mupashi.—Abena Filipi 4:7.

Ukucita Ifingalenga Kwaba Paradise wa ku Mupashi

Abengi balomfwa bwino ukutandala muli parka nelyo mwi bala lyayemba. Balomfwa bwino ukwendaukamo nelyo ukwikala pa mbao no kuipakisha akamwela kasuma. E fyo na bengi bomfwa bwino ukubishanya ne Nte sha kwa Yehova. Basanga ukubishanya ne Nte sha kwa Yehova ukusuma sana, ukwa mutende kabili ukwa kupembesula. Lelo ibala lyayemba lifwaya ukusakamanwa pa kuti litwalilile ukumoneka nga paradise. E fyaba na paradise wa ku mupashi, icalenga ukuti abeko muli cino calo cabipa ni co Inte sha kwa Yehova balalundulula uyo paradise, kabili Lesa alabapaala pa fyo babombesha. Ni shani, lyene umuntu engacitako fimo ifyalondoloka ifya kulenga uyo paradise ukubako?

Intanshi, mufwile ukubishanya ne cilonganino ca Nte sha kwa Yehova, ukusambilila Baibolo na bene, no kufika pa kwishiba Baibolo, apashintilila paradise wa ku mupashi. Carla atile: “Takwaba paradise wa ku mupashi ukwabula ica kulya ca ku mupashi.” Pa kulya ifya ku mupashi, mufwile no kubelenga Icebo ca kwa Lesa lyonse no kutontonkanya pa co mulebelenga. Ifyo mwakulaishiba fikamupalamika kuli Yehova Lesa, kabili mukafika pa kumutemwa. Mukasambilila no kulanda kuli wene mwi pepo no kumulomba ukuti alemutungulula no kumupeelako umupashi wakwe ku kutungilila imwe ilyo mulecita ukufwaya kwakwe. Yesu atwebele ukuba no mukoosha mwi pepo. (Luka 11:9-13) Umutumwa Paulo atile: “Pepeni no kukanaleka.” (1 Abena Tesalonika 5:17) Ishuko lya kulanda na Lesa mwi pepo no kucetekela icine cine ukuti alemumfwa cintu cimo icacindama ilyo umuntu ali muli paradise wa ku mupashi.

Umuye nshiku, imikalile yenu ikawamako pa mulandu wa fyo mwakulasambilila, kabili mukasuka amufwaya no kwebako bambi ifyo mwaishiba. Ninshi mukomfwila amashiwi ya kwa Yesu aya kuti: “Ulubuuto lwenu lengeni lubalikile ku cinso ca bantu, ukuti bamone imilimo yenu iisuma, no kucindika Shinwe wa mu muulu.” (Mateo 5:16) Kulaba ukumfwe nsansa pa kwebako bambi ifyo umuntu aishiba pa lwa kwa Yehova Lesa na Yesu Kristu no kubalumbanya pa kutemwa kwabo ukukalamba uko batemwa abantunse.

Inshita ileisa ilyo isonde lyonse likaba paradise wine wine, likaba nge bala lyayemba ilishakoweshiwa kabili ubwikalo busuma icine cine ubwa bantunse bacishinka. Apo kwaba paradise wa ku mupashi muli shino ‘nshiku sha kulekelesha umwaba inshita ishayafya’ e ca kumwenako amaka ya kwa Lesa kabili ukusondela libela ico engacita kabili ico akacita ku ntanshi.—2 Timote 3:1.

Na lelo line, abaleipakisha paradise wa ku mupashi balemona ukufishiwapo kwa kwa Esaya 49:10 apatila: “Tabakabe na nsala, tabakabe na cilaka, takwakabome nangu cikabilila nangu kasuba; pantu uubacite nkumbu akalabacema, no kubatwala ku tumfukumfuku twa menshi.” José kuti asuminisha ico ukuti ca cine. Aalefwaisha ukuba kalisha wa filimba uwalumbuka, lelo asangile ukuti ukubombela Lesa mu cilonganino ca Bwina Kristu kuti kwawamako. Atila: “Ino nshita ndaipakisha imikalile isuma. Ng’umfwa uwacingililwa muli bamunyinane ba Bwina Kristu, kabili nalishiba ukuti Yehova ni Shifwe wa kutemwa uo twingacetekela.” Insansa sha kwa José, kumo ne sha bambi abengi nga nshi shalondololwa pa Amalumbo 64:10 apatila: “Uwalungama akasamwa muli Yehova, no kuuba muli wene.” Kwena uku mwandini e kulondolola bwino sana paradise wa ku mupashi!

[Futunoti]

[Icikope pe bula 10]

Ilyo tuleipakisha ukuba muli paradise wa ku mupashi, natuleafwilishako ukuitanununa!