Aba Bwananyina ba mwi Sonde Lyonse Balafwana

KONSE uko twalolesha, kuli abantu. Abengi bakalamba, bamo balilemana ica kuti cilafya no kwenda. Pali abanakashi abali pa bukulu na bacaice baupana abali no mulongo wa bana. Bonse aba ni mbutushi—abaume, abanakashi, na bana abo inkondo ya bana calo, ubusanso ubulengwa ne fyabumbwa pe sonde, nelyo imibele imo ilenga bafulumuka ku mwabo no kuyafwaya icubo mu fyalo ifina mupalamano. Bamo balapatikishiwa ukusha amekalo yabo libili libili. Nga bamona fye ifishibilo fya nkondo ya bana calo nelyo ubusanso bulengwa ne fyabumbwa pe sonde, basenda utupe tumo utwa mu ng’anda na bana, no kuya ku cifulo kushili busanso. E lyo nga kwawama, imbutushi ishingi shilabwelela ku kuyakuula amayanda no kutendeka ukwikala cipya cipya.

Pa myaka iingi, icalo ca Central African Republic, calipokelela imbutushi ukufuma ku fyalo ifingi. Nomba line, iminshipendwa ya bantu ukusanshako Inte sha kwa Yehova ishingi, balifulumwike inkondo mu calo ca Democratic Republic of Congo no kuya ku calo ca Central African Republic ukushali inkondo.

Bamunyina Bayafwa Abalekabila

Inte sha kwa Yehova mu Central African Republic bamwene ukuti calilingile kabili cali lishuko ukuti bateyanye ubwafwilisho. Bafwaile ukwa kwikala bamunyinabo abaleisa. Pa kubala, babafwaile imiputule mu mayanda ya bantu, lelo ilyo imbutushi shafulile, cailangile fye ukuti balekabila ukubafwaila icifulo icikalamba. Amayanda ya Bufumu yamo bayasangwile imiputule ya kulalamo. Inte sha kwa Yehova kulya baliitemenwe ukutendeka ukubika amalaiti, ne mipaipi ya menshi, no kushingula pa nshi pa kuti bakekalemo bwino. Imbutushi na sho shalebombela pamo na bamunyina ba kulya ilyo balepanga iyi miputule ya pa kashita akanono. Programu onse fye uwa kulongana kwa Bwina Kristu alitantikwe mu Lingala pa kuti abaleisa balekwata ica kulya ca ku mupashi icipeelo mweo. Ukwikatana kwa Nte sha kwa Yehova isha kulya e lyo na balendo babo kwalangilile ukuti bumunyina bwa mwi sonde lyonse bwa cine cine.

Te lyonse indupwa sha mbutushi shalefikila capamo. Limo, aba mu lupwa abapaatukene balekumana nga bafika. Amashina ya balefika ukwabulo kucenwa yalesungilwa pa Ng’anda ya Bufumu imo imo. Kwali amapekanyo ya kuyafwaya abalubile. Aba kwi ofeshi linono ilya Watch Tower, ilitungulula umulimo wa kushimikila muli cilya calo, baletuma bamotoka batatu cila bushiku abakwafwilisha Inte sha kwa Yehova ishali mu nshila e lyo no kufwaya abaleluba. Aba bamotoka balebeshibila ku cishibilo icikalamba icalembelwepo ati “WATCH TOWER—Jehovah’s Witnesses.”

Elenganyeni ifyo ibumba lya bana 7, imbutushi, abapatwike ku bafyashi babo basekelele ilyo bamwene motoka ya Nte sha kwa Yehova. Apo pene fye babutukile kuli motoka no kuilondolola ukuti ni Nte sha kwa Yehova. Bamunyina balibafwile ukunina muli motoka no kubatwala ku Ng’anda ya Bufumu uko kuli pele pele baikele pamo ne ndupwa shabo.

Cinshi cayafwa aba Bena Kristu bafumaluka ukushipikisha aya mafya, pa miku iingi? Balishininwa bwino ukuti tuleikala mu nshiku sha kulekelesha nga fintu casobelwa mu Malembo ya Mushilo.—2 Timote 3:1-5; Ukusokolola 6:3-8.

E co, balishiba ukuti, Yehova Lesa alaswa apwishe inkondo, ulupato, ulukaakala, ne fikansa. Takwakabe imbutushi na kabili. Pali ino nshita, nga fintu Paulo akonkomesha pali 1 Abena Korinti 12:14-26, Inte sha kwa Yehova balatulukusha ukwafwana. Nangu ca kutila imimana, imipaka, indimi, ne ntamfu fyalibatalukanya, balyangwako kuli umo no munankwe, e co balangufyanya ukucitapo fimo ilyo umo alekabila.—Yakobo 1:22-27.

[Mapu pe bula 30]

(Nga mulefwaya ukumona mapu, moneni muli magazini)

AFRICA

Central African Republic

Democratic Republic of Congo

[Abatusuminishe]

Mountain High Maps® Copyright © 1997 Digital Wisdom, Inc.

[Ifikope pe bula 30]

Amayanda ya Bufumu yatatu apo imbutushi shalefikilila

[Icikope pe bula 31]

Mu kwangufyanya babikilemo ifipe mu kicini

[Icikope pe bula 31]

Imbutushi shalefulilako fye

[Ifikope pe bula 31]

Bafyalwa fye no kube mbutushi