Mwiminine Abapwililila Kabili Abashininkisha

Amabungano ni Nshita sha Nsansa Ishishininkisha Ubwananyina Bwesu

JOSEPH F. Rutherford, uwali ne myaka 50 kabili uwalwele pa numa ya kupooswa mu cifungo ku lufyengo fye, alebomba ne nsansa umulimo wa kusenda ifyola. Alesenda ifyola no kwafwa Abena Kristu banankwe ukuya ku miputule yabo iya mu hotela. Babili abo ali na bo mu cifungo—abali Basambi banankwe aba Baibolo—balepeela ibumba likalamba ilyalelolela ukwa kwikala utupepala apo balembele umuputule bali no kwikalamo. Kwali ukubombesha ukufika nalimo pa kati ka bushiku. Bonse balicincimwike. Bushe cinshi calecitika?

Cali ni mu mwaka wa 1919, kabili Abasambi ba Baibolo (abaishibikwa lelo ukuti Inte sha kwa Yehova) e lyo balepuupuutuka fye pa numa ya kupakaswa icabipisha. Pa kukosha ubwananyina bwabo cipya cipya, bali ne bungano mu Cedar Point, Ohio, U.S.A., ukufuma pa September 1 ukufika pa 8, 1919. Pa bushiku bwa kulekelesha ubwa kulya kubungana, ibumba lyacincimuka ilya bantu nalimo 7,000 lyalekutikisha ilyo Munyinefwe Rutherford akoseleshe umo umo pa babungene ati: “Uli nkombe ya Mfumu ya shamfumu kabili Shikulu wa ba shikulu, ukubilisha ku bantu . . . ubufumu bwacindama ubwa kwa Shikulu.”

Ku bantu ba kwa Yehova, amabungano yatendeke mu nshiku sha bena Israele ba ku kale. (Ukufuma 23:14-17; Luka 2:41-43) Ukulongana kwa musango yo kwaleba ukwa nsansa, ukwafwa bonse abalesangwako ukulatontonkanya pa Cebo ca kwa Lesa. Amabungano ya Nte sha kwa Yehova na lelo line yalanda sana pa fya ku mupashi. Ku bantu ba bufumacumi, ukulongana kwa nsansa ukwa musango yo kulanga ukuti Inte shalikatana pa mulandu wa bwananyina bwa Bwina Kristu.

Ukubombesha pa Kusangwako

Abena Kristu ba lelo balishiba ukuti amabungano yabo yaba ni nshita ya kupembesulwa lwa ku mupashi no kusambilishiwa Icebo ca kwa Lesa. Bamona uku kulongana kukalamba ukuba inshila shacindamisha isha kubafwilamo ‘ukwiminina abapwililila kabili abashininkisha muli conse ico Lesa afwaya.’ (Abena Kolose 4:12, NW) E ico, Inte shilatungilila uku kulongana ne mitima yonse, ukubombesha pa kuti basangweko.

Kuli bamo, ukusangwa ku mabungano ya musango yo cikabila icitetekelo no kucimfya ifipindami fyapala impili. Ku ca kumwenako, tontonkanyeni pali Nte wa cikalamba ku Austria. Nangu ca kuti alwele ubulwele bwa shuga kabili alekabila ukulaswa inyeleti sha insulin cila bushiku, ashininkishe ukuti alesangwako inshiku shonse isha kulongana kwa citungu mu calo ekala. Ku India, ulupwa lukalamba ulwa Nte ulupiina icine cine talwaishibe nampo nga lwali no kusangwa kwi bungano. Umo muli ulu lupwa alyafwilisheko. Atile: “Apo nshalefwaya ukupuswako, nashitishe mipeto yandi iya ku matwi iya golde pa kusange ndalama sha kwendela. Ici calilingile, pantu ukubishanya twakwete e lyo ne fyo twamwene fyakoseshe icitetekelo cesu.”

Mu Papua New Guinea, ibumba lya bantu bashabatishiwa, abalefwaisha ukusambilila baleti kamo fye bakasangwe kwi bungano mu musumba ukalamba. Bailemona umwaume mu mushi baleikala uwakwete motoka no kumwipusha indalama engabalipilisha pa kubatwala kwi bungano. Apo tabakwate indalama abapingwile, bapangene ukubomba pa ng’anda ya ulya mwaume, ukuwamya kicini yakwe. E ico, balisangilwe kwi bungano lya citungu no kumwenamo pa kusangwa kuli programu onse.

Intamfu ya kubelele ibungano te cintu icingacilikila Inte sha kwa Yehova ishifwaisha ukusangwa ku mabungano. Mu 1978, umulumendo wa ku Poland uwalefwaya ukusangwa kwi bungano lyali mu Lille, ku France, acofele incinga amakilomita 1,200 pa nshiku 6. Mu lusuba lwa mu 1997, Inte shibili ukufuma ku Mongolia shaendele amakilomita 1,200 pa kusangwa ku kulongana kwa Bwina Kristu mu Irkutsk, ku Russia.

Ubwananyina bwa Cine Bulabomba

Abantu abafumacumi balamona nga nshi ukwikatana no bwananyina ifiba pa Nte ilyo bali ku mabungano yabo. Abengi balatemwa ukumona ukuti tapaba akapatulula pa basangwa ku mabungano no kuti baba na bucibusa bwa cine cine nangu fye ni ku bantu bakumana pa muku wa kubalilapo.

Pe bungano lya pa kati ka fyalo ilyali mu Australia, uutandasha abeni uwatandeshe abaile kwi bungano kabili uwali na bo pa mulungu umo alefwaya ukwikala na bo inshita na imbi pa kuti aipakishe ukuba nabo. Alitemenwe nga nshi ukumona ifyo batemwana ne fyo baikatana ica kuti afililwe ukusumina ukuti baleumfwana bwino sana, pantu abengi tabaishibene. Ilyo inshita ya kuti aye yafikile, abebele ati bakutikeko kuli wene. Pa kulanda nabo alebeta no kuti “bamunyinane ne nkashi shandi,” atendeke ukubatasha lelo afililwe ukupwisha, pantu ali ne cikonko pa mukoshi no kutendeka ukulila.

Mu 1997, ku Sri Lanka kwali ukulongana kwa citungu ukwali ukwa kubalilapo ukucitwa mu ndimi shitatu mu cibansa cikalamba. Programu yonse yacitilwe pa nshita imo ine mu ciNgeleshi, iciSinhalese, ne ciTamil. Muli cino calo caisulamo ukukansana pa mikowa, ukulongana kwa musango yu ukwa mu ndimi shitatu takwapwile fye ukwabula abantu ukwishiba. Kapokola umo aipwishe munyinefwe ati: “Bushe ni bani baletungulula lino ibungano—abena Sinhalese, abena Tamil, nelyo abaNgeleshi?” Munyinefwe ayaswike ati: “Tapali. Bonse tulecitila pamo.” Kapokola apapile nga nshi. Ilyo amabumba yonse yapepele no kulandila “Amene” pamo iyaumfwikike mu cibansa conse, abasangilwe kwi bungano balitootele. Nalimo bonse abasangilweko balililile. Ca cine, amabungano yaba ni nshita sha nsansa ishishininkisha ubwananyina bwesu.—Amalumbo 133:1.a

[Futunoti]