“Iseni Kuli Ine, . . . na Ine Nalamupeelo Kutusha”

Ukubile Cebo’ Kulapembesula

ALI muntu wapwililika uwalebomba umulimo wakatama. Alesambilisha bwino ica kuti “amabumba yapapile imisambilishishe yakwe.” (Mateo 7:28) Ali kabila uushalenaka. Alepoosa sana inshita, amaka, ne fyo alekwata, ku kushimikila pa lwa Bufumu bwa kwa Lesa. Cine cine, Yesu Kristu aendawike mu mushi wa ku mwabo onse alebila no kusambilisha. Ifwe te kuti tuilinganyeko.—Mateo 9:35.

Umulimo wapamfishe Yesu “kubile mbila nsuma ya bufumu” ku ba nkulo yakwe no kukansha abasambi bakwe ku mulimo umo wine uwa mwi sonde lyonse. (Mateo 4:23; 24:14; 28:19, 20) Bushe uyu mulimo wa kushimikila, uwapamfishe kabili uukalamba wali no kwansha abakonshi bakwe abashapwililika?

Awe iyo! Pa numa ya kweba abasambi bakwe ukupepa ku “Umwine wa kulobolola,” Yehova Lesa, ukuti atume ababomfi na bambi, Yesu abatumine ku kusambilisha abantu. (Mateo 9:38; 10:1) Lyene abebele ati ukuba abakonshi bakwe—ukusanshako no mulimo wa kushimikila—fikabaletela ukutusha ne cisansamushi. Yesu atile: “Iseni kuli ine, . . . na ine nalamupeelo kutusha.”—Mateo 11:28.

Uko Insansa Shifuma

Mwandini ubo bwite bwalangile ukutemwa ne cikuuku! Bwalangile ifyo Yesu asakamene abakonshi bakwe. Abasambi bakwe balasanga ukutusha ilyo balebomba umulimo wa kushimikila “imbila nsuma” ya Bufumu bwa kwa Lesa. Ici cibaletela insansa shine shine no busuma.—Yohane 4:36.

Ilyo Yesu ashilaisa pe sonde, Amalembo yakomaile pa kuti ababombela Lesa umulimo washila bafwile ukuba ne nsansa. Ici calyumfwikike bwino ilyo kemba wa malumbo aimbile ati: “Welesheni utupundu kuli Yehova, mwe ba pano isonde bonse, bombeleni Lesa ne nsansa; iseni ku cinso cakwe na kapundu.” (Amalumbo 100:1, 2) Pali lelo, abantu ba nko shonse balawelesha kuli Yehova, kabili amashiwi yabo aya kutasha yaba nga ukuwelesha kwa bacimfya ubulwi. Abaipeela kuli Lesa icine cine balesa kuli wene “na kapundu.” Na cine, e fyo cifwile ukuba, pantu Yehova ni “Lesa wa nsansa” uufwaya ababomfi bakwe ukusansamuka ilyo balemubombela ukulingana no kuipeela baipeela kuli wene.—1 Timote 1:11, NW.

Abatumikishi Bapembesulwa

Bushe cinshi cilenga ukuti ukubombesha mu butumikishi bwa mwi bala kwilatunasha lelo kuletupembesula? Kwena ukubomba umulimo wa kwa Yehova kwali nge ca kulya ca kupembula kuli Yesu. Atile: “Ica kulya candi kucito kufwaya kwa wantumine, no kupwisho mulimo wakwe.”—Yohane 4:34.

Na pali lelo, Abena Kristu bapimpa balasanga insansa ilyo ‘balebile cebo.’ (2 Timote 4:2) Connie umukashana wa myaka ya pa kati, uupoosa amaawala ukucila pali 70 cila mweshi mu mulimo wa kushimikila, atila: “Ilyo naya mu butumikishi, ndomfwa bwino kabili ndaba ne nsansa, nangu line ninaka ilyo ndeinuka.”

Ni shani nga abantu tabankwileko bwino ku bukombe bwa Bufumu? Connie asosa no kuti “Nampo nga bayankulako bwino nelyo iyo, nshabala nangulukapo nati cinshi naciila mu butumikishi. Ndeshiba ukuti ndecita icisekesha Yehova kabili ndaipakisha ukulanda pa cine pantu ukucite co, kulenga isubilo lishaiwamina ilya mu Baibolo ukumfika pa mutima.”

Bamo basanga ukuti ukwafwa abantu ukwishiba Lesa bwino bwino kulalenga ubumi bwabo ukuwama. Meloney umukashana uupoosa amaawala ukucila pali 50 cila mweshi mu mulimo wa kushimikila, atila: “Ubutumikishi bulampembesula pantu bulenga ubumi bwandi ukuba bwino no kukwata ubufwayo. Amafya na masakamika ya cila bushiku yalacepa nga nabombako umulimo.”

Millicent, umutumikishi na umbi uwa Nte sha kwa Yehova, atila: “Ubutumikishi bulanengo kumona ubushiku bumo na bumo ukubo bwacindama ilyo ndelondolwela bambi ifyo Lesa afwaya ukucitila abantunse ne fyo Paradise akabweshiwa pe sonde. Bulenga Yehova ukuba uwa cine cine kuli ine cila bushiku kabili bulampeela umutende wa lwa nkati uo umulimo umbi ushingampeela.”

Abashimikilwa Balapembesulwa

Ubutumikishi bwa Bwina Kristu kwena bulapembesula ababilisha Ubufumu, kabili abakutika balasansamushiwa ku bukombe bupeela umweo. Nangu line kafundisha wa pa sukulu mu Portugal asambilishiwe na banakashi abaipeelesha ku fya mipepele na bashimapepo, ayumfwile ukuti icalici alepepako talyamucitile ico alekabila ku mupashi. Ifipusho fyakwe ifya mu Baibolo tafyayaswikwe. Ukusambilila Baibolo ne Nte sha kwa Yehova lyonse kwalengele atendeka ukumfwikisha Amalembo. Uyu kafundisha wa pa sukulu alicankilwe. Atile: “Lyonse nalefuluka ukusambilila cila mulungu pali Citatu pantu amepusho yandi yaleasukwa panono panono ukufuma mu Baibolo.” Pali lelo, uyu mwanakashi mubomfi wa kwa Yehova uwaipeela, kabili na o alepembesula bambi ku cine ca mu Baibolo.

Kanshi cailanga fye ukuti ukucindama nelyo ubukulu bwa cifulo bashimikilamo pano isonde ponse takunasha Inte sha kwa Yehova. Tabafuupulwa nga ca kuti abantu tabangilweko ku cine nelyo nga balebakaanya. Balatukuta ukufishapo umulimo wabo uwa kushimikila Ubufumu. Balebako abantu pa lwa mbila nsuma konse uko bengasangwa—apeminina ifimbayambaya mu United States (icikope 1), pa cibansa ca ndeke ica mu Korea (2), mu Andes (3), nelyo pa matuuka ya mu musumba wa London (4). Abakonshi ba kwa Yesu aba muno nshiku balasekelela ukubomba umulimo wa kulambula mwi sonde lyonse. Kabili nga fintu abalaile, alabapembesula no kubabomfya ukupembesula bambi.—Ukusokolola 22:17.