Ukutuntukila ku Musumba Witwa The Bottom pa Cishi ca Saba

ICISHI ca Saba icaletekwa na bena Holland ku kale e palefikila abaletapa icuma abaleenda na mato pali Bemba wa Caribbean ilyo baleya balafwaya icuma. Pali lelo aka kacishi kanono kaba bakilomita 240 ukulola ku kabanga ka Puerto Rico kabili pasangwa abantu 1,600 e lyo pali aba bonse, abantu basano ni Nte sha kwa Yehova. Lelo aba bakashimikila bapimpa bena baaya ku kufwaya icuma ca mutengo nga nshi ukucila ifipe fya kutapa. Bafwayafwaya abantu ‘abalemenena ku bumi bwa muyayaya.’—Imilimo 13:48.

Imbila nsuma iya Bufumu bwa kwa Lesa yabalile ukubilwa pali ci cishi pa June 22, 1952, ilyo ubwato bwalepele amamita 18 ubwaleitwa Sibia, bwashiikile pa lulamba lwa cishi ca Saba. Abaleoba ubu bwato ni Nte sha kwa Yehova. (Mateo 24:14) Bamishonari Gust Maki na Stanley Carter batampa no kunina The Ladder, amastepu ya mabwe ukucila 500 ayo batantamika ukupanga akashila akatuntukila ku musumba witwa ati Bottom. Na kuba uyu e musumba ukalamba pa cishi ca Saba. Pa myaka iingi nga nshi, aka kashila kafyenenkana e kalebomfiwa fye epela pa kufika ku bantu ba pali ci cishi.

Lipoti wa kubalilapo ukulembwa pa mulimo wa kushimikila kwa Bena Kristu pa cishi ca Saba aali muli 1966 Yearbook of Jehovah’s Witnesses. Ukulingana na ulya lipoti, kwali fye Nte umo pali ci cishi. Pa numa, ulupwa lumo ukufuma ku Canada lwapoosele imyaka iingi ukushimikila abantu imbila nsuma kulya. Nomba line, baRussel na baKathy, abaupana babili abapoka penshoni ku United States, baile ku Saba no kutendeka ukushimikila kulya. Natumfwe ifyo balatushimikila.

Ukutandalila Saba

Ine no mukashi wandi twaendele ne ndeke ku kutandalila baRonald, abaali e baNte beka fye pali ci cishi imyaka iingi iya ba 1990. Twasanga baRonald baletulolela pa cibansa ca ndeke. Batemwa nga nshi pa musalu unono uo tubatwalilile ngo bupe, apo pali ci cishi tapaba abalima umusalu wa kushitisha. Twanina icimbayambaya cinono no kwenda mu musebo wanyongana mu mbali ya Lupili lwa Scenery ukuyafika fye na pa muulu wa ulu lupili ulwapuukile umulilo kale.

Twatala twaiminina pa mushi witwa Hell’s Gate ilyo baRonald batampa ukumona pa cipampa apo bakambatika ifya kukambatikakambatika ku kumona nge cipepala balembele ica kulaalika abantu ukusangwa ku lyashi lya cintubwingi pa Mulungu e po cicili. Twatemwa ukusanga ukuti e po cicili. Bwangu bwangu babwelela kuli motoka, kabili twakonkanyapo ulwendo lwesu ukulungama ku mushi wakulisha pali ci cishi uwitwa, Windwardside. Uyu mushi wayemba wabela uko umwela wa pa cishi ulola, apali bamita 400 ukufuma pali bemba. Ilyo twafika pa ng’anda ya baRonald, twamona icipampa icisuma pa ntanshi apalembelwe ati Ing’anda ya Bufumu iya Nte sha kwa Yehova.

Ilyo tulelya ica kulya ca kasuba naipusha icipusho icilengele tubatandalile, “Caishilesangwa shani ukuti muleshimikila abantu pa Bufumu mu Saba?”

BaRon batile: “Ilyo ubukuule bwa maofeshi ya Nte sha kwa Yehova mu Puerto Rico bwapwile mu 1993, ine no mukashi wandi twalefwaya ukukonkanyapo ukubombela ku fyalo fimbi. Ku numa uku, twatandalile icishi ca Saba pamo na bapainiya babili abaupana kabili twaumfwile ukuti abekashi bonse baali 1,400 lelo Nte nangu umo. E ico twalandile na Komiti wa Musambo uwa ku Puerto Rico nga kuti twakuukila kuno.

“Ifintu fyaendele bwino sana ica kuti twasukile twapokelela kalata wa kutweba ukukuuka. Ku ca bulanda, pa numa fye ya myaka ibili, umukashi wandi alilwele nga nshi, e ico twabwelele ku California. Pa numa ya mfwa yakwe, nabwelele ku Saba. Ubwafya bwandi bwa kuti mfwaya nga natendeka umulimo mpaka fye ngupwishe.”

Ukushimikila ku Ng’anda ne Ng’anda pa Cishi ca Saba

Umuputule wa kutuushishamo uwa baRon uwa mu ng’anda yabo iikwete imyaka 100 ukutula apo yakuulilwe ulabomfiwa nge Ng’anda ya Bufumu.a Ilyo tulelya umwikulo no kupekanishisha ukuya ku kushimikila, imfula ya mu lupita fye yalenga mu kicini ukunang’ana pantu uyu kicini takwata umutenge. Ilyo twaikula, twatampako ninshi kwena mu muulu muli na makumbi ya mfula patali patali. Luno lwendo lwa kushimikila ku ng’anda ne ng’anda mu musumba wa Bottom. Pa ng’anda ponse apo twafika, baRon baleposha abene ba ng’anda mwi shina. Ukulanshanya kwesu kuletendekela pa fyalandilwe nomba line mu lyashi. Abengi balishiba baRon no mulimo babomba, kabili mu nsansa bapokako impapulo sha Baibolo.

Ukwishiba bwino amayanda ya bantu abalefwaisha ukumfwa ubukombe bwa Bufumu kwalyafya pali ci cishi nga ca kuti tawabeleshanya na bekalapo. Mulandu nshi? BaRon batila ni pa mulandu wa kuti “ifunde lifwaya ukuti amayanda yonse yapentwe na penti imo ine.” Na kaendi, ilyo nalolesha konse konse namono kuti amayanda yonse pa cishi ca Saba yapentwa na penti wabuuta e lyo umutenge wena uwakashika.

Twalecita nga twapwisha ukulanshanya na bantu ifya mu Baibolo, twabalaalika ukusangwa ku lyashi lya ku cintubwingi pa Mulungu ku Ng’anda ya Bufumu. Lyonse baRon e balanda ilyashi lya cintubwingi cila mulungu kano fye nga tabalipo. Pali ino nshita, amasambililo ya Baibolo 17 yalatungululwa pa cishi ca Saba. Abantu 20 e basangilwe ku Cibukisho ca mfwa ya kwa Kristu mu 2004. Nangu ca kutila iyi mpendwa kuti yamoneka iinono, mukwai ikulu ukulinganya ku bantu bonse ababa pali ci cishi!

Cine cine, Inte sha kwa Yehova balibombesha nga nshi ukufika ku bantu abengi no kubashimikila ubukombe bwa kwa Lesa ubwe pusukilo. Nampo nga ni pa cishi cinono kwati Saba nelyo calo icikalamba, Inte sha kwa Yehova mu busumino balebomba umulimo wa ‘kulenga aba nko shonse ukuba abasambi.’—Mateo 28:19.

Ku ca bulanda, ukutandala kwesu kwapwila pano. Ilyo twanina indeke, twapepesha amaboko ukushalikapo shibweni wesu. Lyonse twakulaibukisha ukutandala kwesu uko twatandalile icishi ca Saba ne nshita twapoosele ukunina amastepu no kutuntukila ku musumba wa Bottom!

[Futunoti]

[Amamapu pe bula 10]

(Nga mulefwaya ukumona amamapu, moneni muli magazini)

PUERTO RICO

[Abatusuminishe Ukubomfya Icikope pe bula 10]

Pe samba: www.sabatourism.com