Ifyo Tusambilila Kuli Yesu

Pali Lesa wa Cine

Bushe Lesa alikwata ishina?

Yesu asambilishe ukuti Lesa alikwata ishina. Yesu atile: “Mufwile ukupepa ifi, amuti: ‘Shifwe wa mu muulu, ishina lyenu lishishiwe [licindikwe].’” (Mateo 6:9) Baibolo itweba ukuti ishina lya kwa Lesa ni Yehova. (Amalumbo 83:18) Ilyo alelanda pa basambi bakwe, Yesu apepele kuli Wishi ukuti: “Nalilenga beshibe ishina lyenu.”—Yohane 17:26.

Bushe Yehova ni Lesa wa musango nshi?

Yesu aitile Yehova ukuti ‘Lesa wa cine eka’ pantu e Kabumba. (Yohane 17:3) Yesu atile: “Bushe tamwabelengo kuti uwababumbile ukufuma pa kutendeka ababumbile umwaume no mwanakashi?” (Mateo 19:4) Yesu alandile no kuti: “Lesa Mupashi.” (Yohane 4:24) Kanshi Lesa te kuti tumumone.—Ukufuma 33:17-20.

Finshi Lesa afwaya ukuti tulecita?

Ilyo umuntu umo aipwishe ukuti lifunde nshi ilikalamba pali yonse, Yesu ayaswike ati: “Ilya ntanshi ni li, ‘Umfwa, we Israele, Yehova Lesa wesu ni Yehova umo, kabili uletemwa Yehova Lesa obe no mutima obe onse, no mweo obe onse, no kutontonkanya kobe konse, na maka yobe yonse.’ Ilya cibili ni li, ‘Uletemwa umunobe nga we mwine.’”—Marko 12:28-31.

Kuti twalanga shani ukutila twalitemwa Lesa?

Yesu atile: ‘Nalitemwa Tata.’ Alangile shani ati alitemwa Wishi? Umwine atile: “Ifyo na Tata ampeela ifunde lya kucite co, e fyo na ine ndecita.” (Yohane 14:31) Asosele no kuti: “Lyonse ncita ifya kumutemuna.” (Yohane 8:29) Kuti twateemuna Lesa nga tulesambilila pali ena. Ilyo alepepela abasambi bakwe, Yesu atile: “Awe ubu e bumi bwa muyayaya, ukuti baleishiba imwe, mwe Lesa wa cine mweka.”—Yohane 17:3; 1 Timote 2:4.

Kuti twasambilila shani pali Lesa?

Inshila imo tusambililamo pali Lesa kumona ifyo abumba. Ku ca kumwenako, Yesu atile: “Lolekesheni ifyuni fya mu muulu, pantu tafitanda imbuto nelyo kuseepa nelyo kututila mu matala; na lyo line Shinwe wa mu muulu alafiliisha. Bushe tamwaficila ukucindama?” Ni mwi Yesu aloseshe? Tatufwile ukusakamikwa sana pa fyo tukabila ica kutila twaleka no kubombela Lesa.—Mateo 6:26-33.

Icikalamba icitwafwa ukwishiba Yehova kusambilila Icebo cakwe, Baibolo. Yesu atile Baibolo “cebo ca kwa Lesa.” (Luka 8:21) Yesu aebele Lesa ukutila: “Icebo cenu e cine.”—Yohane 17:17; 2 Petro 1:20, 21.

Yesu alyafwile abantu ukusambilila icine pali Yehova. Umusambi wakwe umo alandile pali Yesu ukuti: “Bushe imitima yesu tayacilabilima ilyo acilalanda na ifwe mu nshila, ilyo acilatukupukwila Amalembo?” (Luka 24:32) Pa kwishiba Lesa tufwile ukuicefya no kufwaya ukusambilila. Yesu atile: “Tamwakengile mu Bufumu bwa mu muulu nakalya kano mwapilibuka no kuba nga bana banono.”—Mateo 18:3.

Mulandu nshi ukwishiba Lesa kuletela insansa?

Tulafwaya ukwishiba ico twabela pa calo, kabili Lesa alatwafwa ukucishiba. Yesu atile: “Bansansa abaishiba ukuti balakabila ifya ku mupashi.” (Mateo 5:3) Yehova alatusambilisha ifyo tufwile ukwikala pa calo. Yesu atile: “Aba nsansa ni abo abomfwa Cebo ca kwa Lesa no kucibaka!”—Luka 11:28; Esaya 11:9.

Nga mulefwaya ifyebo na fimbi pali ili lyashi moneni icipandwa 1 mu citabo citila Bushe Cinshi Baibolo Isambilisha?a

[Futunoti]

[Icikope pe bula 16]

“Nalilenga beshibe ishina lyenu.”—Yohane 17:26

[Ifikope pe bula 16, 17]

Kuti twasambilila pali Yehova ku fyo abumba na ku fyo Baibolo ilanda