Ababelenga Ino Magazini Balepusha Ukuti
Bushe Ilyeshi lya mu Nshiku sha kwa Noa Cishinka Lyali fye Isonde Lyonse?
Ilyeshi lyaliko mu nshita ya kwa Noa lyacitike imyaka ukucila 4000 iyapita. E ico, takwaba nangu umo uwabapo ilelo uwamweneko lilya lyeshi uwingatwebako ifyo cali. Lelo kwena twalikwata ifyalembwa ifilanda pali kalya kayofi kacitike, ifitweba ukuti ilyeshi lyalibiishe ne mpili shalepesha ishaliko ilya nshita.
Ifyalembwa fitila: “Ilyeshi lyali pano isonde inshiku amakumi yane . . . Amenshi yalekoseshe cibi pano isonde; shasuka shabunda ne mpili shonse ishasansama isha mwi samba lya muulu onse, amenshi yalekosa, yalenina pa muulu wa shiko imikono ikumi na isano [amamita 6.5] shasuke mpili shabunda.”—Ukutendeka 7:17-20.
Bamo kuti batontonkanya ukuti filya ifyalembwa fitila isonde lyonse lyaliswilepo amenshi, lushimi fye nelyo bakukumya fye. Te lushimi, e fyo cali! Na kuba kuti twatila isonde na lelo line lyalisula na menshi pantu incende ikalamba sana iye sonde mwaba fye amenshi. Kanshi na lelo line amenshi ya lilya lyeshi e ko yacili. Ifimabwe fya menshi makasa ifyaba ku kabanga na ku masamba ye sonde nga fyalisungulwike, babemba kuti baisula no kubunsha imisumba pamo nga New York na Tokyo.
Abasambilila ifyo isonde lyaba, balisanga ukutila icitungu ca Amerika icabela lwa ku masamba calibunshiwapo imiku 100. Ilyeshi limo ilyaliko, lyalikulile sana ica kuti ibimbi lya menshi ilyalepele amamita 600 ukulola mu muulu, lyaleenda amakilomita 105 mwi awala limo, kabili lyafinine amatani ukucila amatrilioni yabili. Aya menshi yabushishe incende iikalamba sana (2000 cu km). Ukufwailisha na kumbi ukwapala uku kwalenga abasambilila ifya sayansi ukusumina ukuti ilyeshi lifwile e ko lyali.
Abasumina ukuti Baibolo Cebo ca kwa Lesa, bena balishininkisha ukuti Ilyeshi e ko lyali. Tabatwishika nangu panono. Yesu alandile kuli Lesa ati: “Icebo cenu e cine.” (Yohane 17:17) Umutumwa Paulo alembele ukutila Lesa afwaya “abantu ba misango yonse bakapusuke no kufika ku kwishiba bwino bwino icine.” (1 Timote 2:3, 4) Mu Cebo ca kwa Lesa amuba inshimi, bushe Paulo nga alesambilisha abatumwa ba kwa Yesu amafundisho ya cine?
Yesu tasumine fye ukuti Ilyeshi e ko lyali, lelo alisumine no kuti lyali fye isonde lyonse. Mu busesemo bukalamba alandile pa lwa kwisa kwakwe no kupwa kwa calo, Yesu atile ilyo akesa ifintu fikaba kwati ni filya fyali mu nshiku sha kwa Noa. (Mateo 24:37-39) Umutumwa Petro na o alilandilepo pa lyeshi lyaliko mu nshiku sha kwa Noa ilyo atile: “Icalo icalipo lilya, calyonawilwe ilyo cabunshiwe ku menshi.”—2 Petro 3:6.
Nga ca kuti Noa taliko kabili ne lyeshi takwali, ninshi ifyo Petro na Yesu basokele abantu ba mu nshiku sha kulekelesha fya fye. Mu nshita ya kuti umuntu asokwe, kuti nomba afulunganishiwa ica kuti nalimo aisafilwa no kupusuka ubucushi bukalamba ubwacila na pa Lyeshi lyaliko mu nshiku sha kwa Noa.—2 Petro 3:1-7.
Ilyo Lesa alelanda pa luse lwakwe ulwa muyayaya akwatila abantu bakwe, atile: “Nge nshiku sha kwa Noa: ifyo nalapile ukuti amenshi ya kwa Noa tayakabunshe kabili pano isonde, e fyo nalapa ukuti nshakakukalipile nangu kukwebaula.” Nga filya fiine Ilyeshi mu nshiku sha kwa Noa lyakumene isonde lyonse, e fyo no kutemwa kwa kwa Lesa kukaba pali bonse abamucetekela.—Esaya 54:9.