Twalilileni Ukucita Ifilanga Ukuti Mutungululwa no Mupashi wa kwa Lesa!

1, 2. Finshi munyinefwe umo ailwike, kabili finshi acitilepo?

BA ROBERT babatishiwe ilyo bali ne myaka 15, lelo tababikile sana amano ku cine. Abene batile: “Nshalecita ifyabipa, lelo nalepepela fye ico cine. Abantu balemona kwati nali uwakosa mu fya kwa Lesa, lyonse nalelongana kabili cila mwaka nalebombako bupainiya bwa kwafwilisha. Lelo kwali ifyo nshalecita.”

² Ba Robert tabailwike umo bashalecita bwino mpaka ilyo baupile. Bena na bena mwabo batendeke ukulaipushanya pa fya mu Baibolo nga baleisha. Abena mwabo abali abakosa mu fya kwa Lesa tacalebakosela ukwasuka amepusho, lelo ba Robert bena lyonse balefilwa ukwasuka, kabili baleumfwa insoni. Batile: “Naleumfwa kwati tapali ico naishibe. Naletontonkanya nati, ‘Apo nine mfwile ukulatungulula umwina mwandi mu fya kwa Lesa mfwile ukucitapo cimo.’” Ifi fine e fyo ba Robert bacitile. Batile: “Naleisambilisha sana Baibolo kabili nalimwene ifyo amalembo yayampana. Nalyumfwikishe amalembo, ne cacindamisha ca kuti nali sana cibusa wa kwa Yehova.”

 3. (a) Finshi tulesambilila kuli ba Robert? (b) Fishinka nshi ifikalamba ifyo twalasambilila?

³ Finshi tulesambilila kuli ba Robert? Nalimo twalishibako fimo ifya mu Baibolo kabili tulalongana lyonse, lelo ifi fyeka te kuti filenge twalatungululwa no mupashi wa kwa Lesa. Nelyo nalimo twalilunduluka mu fya kwa Lesa, lelo nga twaibeebeeta na kabili, kuti twasanga ukuti kuliko muno umo tufwile ukuwamyako. (Fil. 3:16) Pa kuti tutwalilile ukulunduluka, muli cino cipande twalayasuka amepusho yatatu ayacindama: (1) Finshi fingatwafwa ukuibeebeeta pa kuti twishibe nga tulatungululwa no mupashi wa kwa Lesa? (2) Finshi tulingile ukucita pa kuti tutendeke ukutungululwa no mupashi wa kwa Lesa na pa kuti utwalilile ukulatutungulula? (3) Bushe ukulatungululwa no mupashi wa kwa Lesa kuti kwatwafwa shani mu fyo tucita cila bushiku?

 4. Ni bani balingile ukukonka ifyo Baibolo ifunda pa Abena Efese 4:23, 24?

⁴ Ilyo twatendeke ukubombela Lesa, twalyalwike mu fintu ifingi. Na lintu twabatishiwe twalitwalilile ukwaluka. Baibolo itweba “ukuleka ukutontonkanya ifya kale lelo ukulatontonkanya ifipya.” (Efes. 4:23, 24) Apo tatwapwililika, bonse fye tulingile ukutwalilila ukwaluka. Nangu bantu ababombela Yehova pa myaka iingi balingile ukutwalilila ukutungululwa no mupashi wa kwa Lesa.—Fil. 3:12, 13.

 5. Mepusho nshi tulingile ukuyipusha ilyo tuleibeebeeta?

⁵ Pa kuti tutwalilile ukulatungululwa no mupashi wa kwa Lesa, tufwile ukuibeebeeta bwino. Nampo nga tuli bakalamba nelyo tuli baice, bonse tulingile ukuyipusha aya mepusho: ‘Bushe kuli fimo ifyo njalwikemo ifilelanga ukuti ndetungululwa no mupashi wa kwa Lesa? Bushe imibele yandi ileba nge ya kwa Kristu? Bushe imibele yandi ne fyo ncita pa kulongana filanga ukuti ndatungululwa sana no mupashi wa kwa Lesa? Bushe ifyo nandapo filanga ukuti finshi mfwaisha? Bushe ifyo njisambilisha, ifyo mfwala ne fyo njiyemfya nelyo ifyo ncita nga bamfunda filanga finshi pa fyo naba? Bushe ncita shani nga naeshiwa? Bushe nalilunduluka ukufika ku kuba umukalamba mu fya kwa Lesa?’ (Efes. 4:13) Nga tuletontonkanya pa fyasuko kuli aya amepusho kuti twaishiba nga tulatungululwa no mupashi wa kwa Lesa nelyo iyo.

 6. Finshi fimbi ifyo tulingile ukucita pa kuti twishibe nga tulatungululwa no mupashi wa kwa Lesa?

⁶ Inshita shimo tulakabila abantu bambi ukutwafwa pa kuti twishibe nga tulatungululwa no mupashi wa kwa Lesa. Umutumwa Paulo alandile ukuti umuntu uukonkelela ififwaya umutima te kuti eshibe ukuti ifyo acita tafisekesha Lesa. Lelo umuntu uutungululwa no mupashi wa kwa Lesa aleshiba ifyo Lesa amona ifintu kabili aleshiba ukuti Lesa tafwaya umuntu uukonkelela ififwaya umutima. (1 Kor. 2:14-16; 3:1-3) Baeluda abatontonkanya nge fyo Kristu atontonkanya ilingi line baleshiba bwangu ukuti umuntu alekonkelela ififwaya umutima. Nga ca kuti baeluda batweba ukuti natutendeka ukukonkelela ififwaya umutima, bushe tulasumina no kukonka ifyo batweba? Nga tulekonka ifyo batweba, ninshi tulelanga ukuti tulafwaisha ukulatungululwa no mupashi wa kwa Lesa.—Luk. Mil. 7:5, 9.

 7. Mulandu nshi ukwishiba fye ifya mu Baibolo kushingalengela twalatungululwa no mupashi wa kwa Lesa?

⁷ Mulingile ukulaibukisha ukuti, ukwishiba fye ifyo Baibolo isambilisha tacipilibula ukuti mulatungululwa no mupashi wa kwa Lesa. Imfumu Solomone yalishibe ifingi sana pa fyo Yehova afwaya. Ifyo yalelanda balifilemba na muli Baibolo. Na lyo line yalifililwe ukutwalilila ukuba ne cishinka kuli Yehova, kabili tayaletungululwa no mupashi wa kwa Lesa. (1 Isha. 4:29, 30; 11:4-6) Finshi fimbi ifyo tulingile ukucita ukucila fye pa kwishiba ifyo Baibolo isambilisha? Tulingile ukutwalilila ukulunduluka mu fya kwa Lesa. (Kol. 2:6, 7) Kuti twacita shani pa kuti tube abakosa mu fya kwa Lesa?

8, 9. (a) Finshi fingatwafwa ukuba abakosa mu fya kwa Lesa? (b) Mulandu nshi tuisambilishisha no kutontonkanya sana pa fyo tulesambilila? (Moneni icikope pa ntendekelo ya cino cipande.)

⁸ Paulo akoseleshe Abena Kristu mu nshita ya batumwa ‘ukulabombesha ukulola ku bukalamba.’ (Heb. 6:1) Finshi tulingile ukucita pa kuti tulekonka ifyo Paulo alandile? Cimo ico tulingile ukucita kusambilila icitabo citila “Ikalilileni mu Kutemwa kwa kwa Lesa.” Nga ca kuti mwapwisha ukusambilila ici citabo mukeshiba ifya kubomfya amashiwi ya kwa Lesa ayatutungulula mu mikalile yenu. Nga ca kuti mwalipwisha ukusambilila ici citabo, bushe te kuti ciwame mwatendeka ukubomfya impapulo shimbi ishingalenga icitetekelo cenu cakosa? (Kol. 1:23) Bushe mulatontonkanya sana pa fyo mwingabomfya ifyo muisambilisha?

⁹ Muleibukisha ukuti ico muisambilishisha no kutontonkanya sana pa fyo muleisambilisha, ni co mufwaya ukulacita ifisekesha Yehova no kulakonka amafunde yakwe no mutima wenu onse. (Amalu. 40:8; 119:97) Tatulingile no kulacita ifingalenga twafilwa ukulakula mu fya kwa Lesa.—Tito 2:11, 12.

10. Finshi abacaice balingile ukucita pa kuti batendeke ukulatungululwa no mupashi wa kwa Lesa?

¹⁰ Nga ca kuti muli bacaice, bushe mwalipanga ifyo mukacita mu mulimo wa kwa Lesa? Nga kuli ukulongana kwa muputule, munyinefwe uubombela pa Bethel alitemwa ukulanda na balebatishiwa ilyo ukulongana kushilatendeka. Abengi ababatishiwa bacaice. Munyinefwe abepusha pa fyo bapanga ukucita mu mulimo wa kwa Lesa. Ifyo abengi basuka filanga ukuti balishiba bwino bwino ifyo bafwaya ukucita pa kubombela Yehova, bamo bafwaya ukubombako umulimo wa nshita yonse nelyo ukuya mu kubombela uko ababila pa Bufumu bacepa. Lelo nshita shimo kulaba abacaice abashapanga ukucita nangu cimo mu mulimo wa kwa Lesa. Bushe ici cilanga ukuti tabaishiba ukuti balingile ukupanga ifya kucita mu mulimo wa kwa Lesa? Mwe bacaice, muleyipusha amuti: ‘Bushe ico mombelako imilimo ya kwa Lesa ni co e fyo abafyashi bandi bafwaya? Bushe ndapalama kuli Lesa pa kuti mbe cibusa wakwe?’ Kwena bonse fye tulingile ukupanga ifyo twingacita mu mulimo wa kwa Lesa. Nga tulepanga ifya kucita mu mulimo wa kwa Lesa tukalatungululwa sana no mupashi wa kwa Lesa.—Luk. Mil. 12:1, 13.

11. (a) Finshi tulingile ukulacita pa kuti tulelunduluka mu fya kwa Lesa? (b) Ni bani abo Baibolo yalandapo abo tulingile ukulapashanya?

¹¹ Nga twaishiba umo tufwile ukuwamyako, tulingile ukucitapo fimo ifingatwafwa ukulunduluka. Calicindama ukulatungululwa no mupashi wa kwa Lesa. Na kuba, nga tatuletungululwa no mupashi kuti twaisafwa. (Rom. 8:6-8) Lelo pa kuti tube abakosa mu fya kwa Lesa tacipilibula ukuti tulingile ukuba abapwililika. Umupashi wa kwa Yehova kuti watwafwa ukuwamyako umo tushicita bwino. Na lyo line tulingile ukulaibikilishako. Ba John Barr abali mwi Bumba Litungulula balandile pa fyaba pali Luka 13:24 abati, “Abengi balafilwa pantu tabangwa sana ku kuba abakosa.” Tulingile ukuba nga Yakobo uushanenwike ilyo aleshomboka na malaika mpaka amupaala. (Ukute. 32:26-28) Apo ukubelenga Baibolo kwaliwama, tatulingile ukulaibelenga kwati tulebelenga fitabo balembela ukulesheshamo icitendwe. Tufwile ukulafwayamo icuma icingatwafwa.

12, 13. (a) Finshi fingatwafwa ukulakonka ifyaba pa Abena Roma 15:5? (b) Finshi tulesambilila ku fyo umutumwa Petro aali e lyo na ku fyo atufundile? (c) Finshi mulingile ukucita pa kuti mutendeke ukulatungululwa no mupashi wa kwa Lesa? (Moneni akabokoshi akaleti “Ifyo Mwingacita pa Kuti Mukule mu fya kwa Lesa.”)

¹² Ilyo tuleibikilishako ukulatungululwa no mupashi wa kwa Lesa, umupashi wa mushilo ulatupeela amaka ya kwaluka mu fyo tutontonkanya. Umupashi nga watwafwa, panono panono tukatendeka ukulatontonkanya nga fintu Kristu aletontonkanya. (Rom. 15:5) Na kabili ukatwafwa ukuleka ukulakonkelela ififwaya umutima no kukwata imibele iilenga Lesa asekelela. (Gal. 5:16, 22, 23) Nga twamona ukuti tulatontonkanya sana pa kukwata ifyuma nelyo tulakonkelela ifyo imitima yesu ifwaya, tatulingile ukunenuka. Muletwalilila fye ukulomba umupashi wa mushilo kabili Yehova akamwafwa ukubika umutima pa fintu ifisuma na kabili. (Luka 11:13) Natulande pa mutumwa Petro. Pa miku iingi, talecita ifintu ngo muntu uutungululwa no mupashi wa kwa Lesa. (Mat. 16:22, 23; Luka 22:34, 54-62; Gal. 2:11-14) Na lyo line tanenwike. Panono panono, Yehova alyafwile Petro ukulatontonkanya nga Kristu. Na ifwe bene kuti twayaluka.

¹³ Na kuba, pa numa Petro alilandile ifyo tulingile ukucita. (Belengeni 2 Petro 1:5-8.) Nga ‘twabombesha’ ukuba ne mibele pamo nga ukuilama, ukushipikisha, no kutemwa, tukatwalilila ukutungululwa no mupashi wa kwa Lesa. Kanshi cila bushiku tuleyipusha atuti, ‘Finshi mfwile ukucita lelo pa kuti ntungululwe no mupashi wa kwa Lesa?’

14. Bushe ukulatungululwa no mupashi wa kwa Lesa kukuma shani ifyo tucita cila bushiku?

¹⁴ Nga tuletontonkanya nge fyo Kristu atontonkanya cikakuma ifyo tulanda, ifyo tucita pa ncito nelyo pa sukulu, ne fyo tupingula pa fintu cila bushiku. Ifyo tukalapingula pa fintu fikalanga ukuti tuleesha ukuba abasambi ba kwa Kristu. Apo tutungululwa no mupashi wa kwa Lesa, tatufwaya icintu nangu cimo calenga bucibusa bwesu na Shifwe wa ku muulu bwapwa. Nga ca kuti twatunkwa ukucita ifyabipa, tatwakaficite pantu tutungululwa no mupashi wa kwa Lesa. Ilyo tulepingula pa fintu, tulingile ukutontonkanya pali aya amepusho: ‘Mashiwi nshi ayatutungulula ayengangafwa ukupingula bwino? Bushe nga ni Kristu kuti acita shani? Bushe mfwile ukupingula shani pa kuti Yehova asekelele?’ Pa kuti tuisambilishe ukulatontonkanya muli iyi nshila, natulande pa fya kumwenako fimo. Mu ca kumwenako cimo na cimo, twakulalanda pa mashiwi ya kwa Lesa ayatutungulula ayengatwafwa ukupingula bwino ifya kucita.

15, 16. Bushe nga tuletontonkanya nge fyo Kristu atontonkanya tukapingula shani (a) pa wa kuupana nankwe? (b) pa kusala ifibusa?

¹⁵ Ukusala uwa kuupana nankwe. Amashiwi ya kwa Lesa ayatutungulula ayengatwafwa yaba pali 2 Abena Korinti 6:14, 15. (Belengeni.) Paulo alandile ukwabula ukupita na mu mbali ukuti umuntu uutungululwa no mupashi wa kwa Lesa te kuti ekale bwino no muntu uukonkelela ififwaya umutima wakwe. Kuti twabomfya shani ifi Paulo alandile ilyo tulesala uwa kuupana nankwe?

¹⁶ Ifibusa. Moneni amashiwi ya kwa Lesa ayatutungulula ayaba pali 1 Abena Korinti 15:33. (Belengeni.) Umuntu uutungululwa no mupashi wa kwa Lesa te kuti aleyampana na bengalenga aleka ukuba cibusa wa kwa Lesa. Mepusho nshi ayengamwafwa ukulabomfya amashiwi ya kwa Lesa ayatutungulula? Ku ca kumwenako, kuti twabomfya shani aya mashiwi kubo tulanshanya nabo pa intaneti? Nelyo finshi mulingile ukucita nga ca kuti abo mushaishiba balefwaya muteye nabo ifyangalo fya pa intaneti?

17-19. Bushe nga muletungululwa no mupashi wa kwa Lesa kuti camwafwa shani (a) ukukanacita ifya fye? (b) ukupanga ifya kucita? (c) ukutendeka ukumfwana nga mwapusana?

¹⁷ Ifintu ifingalenga twafilwa ukukula mu fya kwa Lesa. Paulo alisokele Abena Kristu banankwe mu mashiwi alandile ayaba pa AbaHebere 6:1. (Belengeni.) Bushe “imilimo ya fye” iyo tulingile ukutaluka milimo nshi? Fintu fyonse ifingalenga twafilwa ukukula mu fya kwa Lesa. Aya mashiwi ayatutungulula kuti yatwafwa ukwasuka amepusho ayengi ayo twingakwata, pamo nga: ‘Bushe uyu umulimo waba pa milimo iya fye? Bushe mfwile ukucitako ubu bukwebo? Mulandu nshi uo nshifwile ukuitumpila mu tubungwe utufwaya ukwalula ifintu mu calo?’

¹⁸ Ifyo mwapanga ukucita mu mulimo wa kwa Lesa. Ifyo Yesu alandile mu Lyashi lya pa Lupili filatutungulula mu fyo tulingile ukupanga ukucita mu mulimo wa kwa Lesa. (Mat. 6:33) Umuntu uutungululwa no mupashi wa kwa Lesa abika intanshi ifya Bufumu. Nga tuletontonkanya pali aya mashiwi ya kwa Lesa ayatutungulula tukalayasuka amepusho pamo nga: ‘Bushe ningile ukulundapo amasambililo? Bushe mfwile ukwingila iyi ncito?’

¹⁹ Nga twapusana. Bushe ifyo Paulo afundile abali mu cilonganino ca mu Roma kuti fyatwafwa shani ukutendeka ukumfwana nga twapusana? (Rom. 12:18) Apo tuli basambi ba kwa Kristu, tulingile “ukuba aba mutende ku bantu bonse.” Bushe tucita shani nga twapusana? Bushe cilatukosela ukukonka ifyo bambi balemona ifintu, nelyo bushe abantu batwishiba ukuti tuli “bantu ba mutende”?—Yako. 3:18.

20. Mulandu nshi mulingile ukulafwaila ukulatungululwa no mupashi wa kwa Lesa?

²⁰ Ifi twalandapo finono fye pa fya kumwenako filanga ifyo ukutontonkanya pa mashiwi ya kwa Lesa ayatutungulula kwingatwafwa ukulapingula bwino pa fintu pa kuti tulelanga ukuti tutungululwa no mupashi wa kwa Lesa. Nga tuletungululwa no mupashi wa kwa Lesa tukalaba ne nsansa cila bushiku. Ba Robert abo tulandilepo pa ntendekelo ya cino cipande batile: “Ilyo nakoseshe bucibusa bwandi na Yehova, naishileba umulume umusuma kabili wishi umusuma. Umutima walikele kabili nali ne nsansa.” Na ifwe bene kuti twapaalwa nga ca kuti twabika amano ku kulunduluka mu fya kwa Lesa. Nga tuletungululwa no mupashi wa kwa Lesa, tukaba ne nsansa pali ino nshita, kabili ku ntanshi tukaba no “mweo wine wine.”—1 Tim. 6:19.