Yohane Kabatisha—Ifyo Twingasambilila Kuli Ena pa Kuti Tulesekelela

BUSHE kwalibako umulimo uo mufwaya ukulabomba mu cilonganino lelo uo mushingabomba pali ino nshita? Nalimo mufwaya ukulabomba umulimo uo umuntu umbi abomba. Limbi uyo umulimo e o mwalebomba kale. Lelo mwalileka ukubomba imilimo imo mu cilonganino pa mulandu wa kuti namukula, mulalwalilila, imikalile nayafya, nelyo mulasakamana ulupwa. Nangu icalenga muleke ukubomba umulimo mwabombele pa myaka iingi ni co kwali ukwaluka mu cilonganino ca kwa Lesa. Nampo ifi twalandapo nga e fyalengele nelyo fintu fimbi, nalimo kuti mwalaumfwa ukuti tamubomba umulimo wa kwa Lesa ukulingana ne fyo mufwaya. Nga ca kuti mwalileka ukubomba imilimo imo, inshita shimo nalimo kuti muleumfwa ububi. Nomba finshi mulingile ukulacita pa kuti mwilafuupuka, kabili mwilaumfwa ububi? Finshi mwingacita pa kuti mulesekelela?

Kuti twasambililako isambililo ilyacindama kuli Yohane Kabatisha pa kuti twingatwalilila ukusekelela. Yohane alibombele imilimo iikalamba, lelo nalimo taishibe ifyali no kumucitikila ku ntanshi. Taleenekela ukuti bali no kumukaka pa inshita iitali ukucila pa yo ashimikile abantu pali Yesu. Na lyo line Yohane alitwalilile ukusekelela mpaka ne mfwa. Finshi fyalengele atwalilile ukusekelela? Kabili finshi fingalenga twatwalilila ukusekelela na lintu ifyo tushileenekela fyacitika?

Nalimo mu April mu mwaka wa 29 ninshi Yesu ali pano calo, Yohane atendeke ukubomba umulimo Yehova amupeele uwa kulenga abantu baipekanya ukupokelela Mesia. Alebila ati: “Lapileni, pantu ubufumu bwa mu muulu nabupalama.” (Mat. 3:2; Luka 1:12-17) Abantu abengi balicitilepo cimo. Na kuba, amabumba yalefuma ku ncende ishali ukutali no kuya kuli Yohane ku kukutika imbila alebila. Kabili abengi balilapiile, balibatishiwe no kubatishiwa. Yohane alesoka ne ntungulushi sha mapepo ishaleimona ukuti shilungami. Alesheba ukuti nga tashilapiile, Lesa ali no kushipingula. (Mat. 3:5-12) Yohane alicitile icintu icacindama nga nshi ilyo alebomba umulimo wakwe. Alibatishe Yesu nalimo mu October mu mwaka wa 29. Ukutula ilyo amubatishe, atendeke ukweba abantu ukuti balekonka Yesu, Mesia walaiwe.—Yoh. 1:32-37.

Apo Yohane alibombele umulimo uwaibela, Yesu alandile pali ena ati: “Pa bafyalwa ku banakashi tapatala apamoneka uwacila pali Yohane Kabatisha.” (Mat. 11:11) Ukwabula no kutwishika Yohane alesekelela pa fyo Lesa amupaalile. Nga filya fine cali kuli Yohane, na muno nshiku mwine Lesa alipaala abantu abengi. Ku ca kumwenako, natulandeko pali munyinefwe Terry. Ba Terry na bena mwabo ba Sandra balibomba umulimo wa nshita yonse ukucila pa myaka 50. Ba Terry batile: “Nalibombapo imilimo iingi kabili iisuma. Nalibombapo bupainiya, nalibombelapo pa Bethel, nalibombapo bupainiya bwaibela, nalipo kangalila wa muputule, kangalila wa citungu, kabili pali ino nshita momba bupainiya bwaibela na kabili.” Tulaba ne nsansa nga batupeela imilimo mu cilonganino ca kwa Yehova, lelo nga fintu twalasambilila kuli Yohane, tulingile ukuibikilishako pa kuti tutwalilile ukusekelela ifintu nga fyayaluka.

Icalengele Yohane Kabatisha atwalilile ukusekelela ni co lyonse aletasha pa milimo alebomba. Natulande pa ca kumwenako. Pa numa Yesu abatishiwa, abantu abaleya kuli Yohane batendeke ukucepa lelo abaleya kuli Yesu balefulilako. Ilyo abasambi ba kwa Yohane bamwene ifi, balisakamene kabili bamwebele abati: “Moneni, alebatisha, na bonse baleya kuli ena.” (Yoh. 3:26) Yohane abebele ati: “Uuli na nabwinga e shibwinga. Lelo cibusa wa kwa shibwinga ilyo aiminina no kumumfwa alelanda, alasekelela nga nshi pa mulandu wa kumfwa ishiwi lya kwa shibwinga. E ico na ine ninsekelela icine cine.” (Yoh. 3:29) Yohane talecimfyanya na Yesu, kabili tatontonkenyepo ukuti umulimo alebomba tawacindeme pa mulandu wa kuti umulimo Yesu alebomba e wacindemepo. Lelo Yohane alitwalilile ukusekelela pantu alemona umulimo alebomba ukuti walicindeme apo ali ni “cibusa wa kwa shibwinga.”

Ifyo Yohane alemona ifintu fyalengele atwalilile ukusekelela nangu ca kuti umulimo alebomba walikosele. Ku ca kumwenako, Yohane ali muNasiri ukutula fye ilyo afyelwe, e ico talingile ukunwa umwangashi. (Luka 1:15) Imikalile ya kwa Yohane yali iyayanguka, e co Yesu alandile ati: “Yohane aishile talelya nangu kunwa.” Lelo Yesu na basambi bakwe tabali abaNasiri, kabili baleikala fye nge fyo abantu bonse baleikala. (Mat. 11:18, 19) Na kabili, nangu ca kuti Yohane tacitilepo icipesha amano, alishibe ukuti abasambi ba kwa Yesu kumo fye na bamo abalipo abasambi bakwe, balibapeele amaka ya kucita ifipesha amano. (Mat. 10:1; Yoh. 10:41) Yohane taikalile fye ukutontonkanya pa fyo abasambi bakwe bapusene na basambi ba kwa Yesu, lelo abikile amano ku mulimo uo Yehova amupeele.

Na ifwe nga tulemona umulimo tubombela Yehova ukuti walicindama, tukatwalilila ukusekelela. Ba Terry abo tulandilepo balandile abati, “Nalebika sana amano ku mulimo onse uo balempeela.” Nga batontonkanya pa fyo baabomba umulimo wa nshita yonse, batila, “Nshilanguluka lelo ntontonkanya fye pa fisuma.”

Nga tuletontonkanya sana pa cilenga tulemona umulimo onse uo tubombela Yehova ukuti walicindama, tukalasekelela nga nshi. Cinshi cilenga tulemona ukuti walicindama? Ni co “tubombela pamo na Lesa.” (1 Kor. 3:9) Nga filya fine icintu icacindama sana cingatwalilila ukumoneka bwino lyonse nga tulecisakamana, e fyo na ifwe twingatwalilila ukusekelela nga tuletontonkanya pa fyo Yehova atucindika ifi tubombela pamo nankwe. Tatwakalelinganya umulimo tubomba ku milimo iyo aba bwananyina bambi babomba. Tatwakalemona ukuti umulimo uo Yehova atupeela tawacindama sana, lelo iyo apeela aba bwananyina bambi yalicindamapo.—Gal. 6:4.

Yohane afwile alishibe ukuti umulimo bamupeele tawali no kutwalilila, lelo nalimo taishibe ukuti wali no kupwa mu kupumikisha fye. (Yoh. 3:30) Mu mwaka wa 30 ninshi Yesu acili pano calo, Yohane balimukakile mu cifungo ku Mfumu Herode. Bamukakile nalimo pa numa ya myeshi 6 ukutula apo abatishishe Yesu. Nangu ca kuti balimukakile, alicitilepo cimo pa kuti atwalilile ukusambilisha abantu ifyalungama. (Marko 6:17-20) Cinshi calengele atwalilile ukusekelela ilyo ifintu fyayalwike? Ni co abikile amano ku fintu ifyo Yehova amona ukuti fyalicindama.

Ilyo Yohane ali mu cifungo, alyumfwile ilyashi pa fyo umulimo Yesu alebomba walekulilako. (Mat. 11:2; Luka 7:18) Yohane alishininkishe ukuti Yesu ali e Mesia, lelo nalimo aletwishika ifyo Yesu ali no kufikilisha fyonse ifyo Amalembo yalandile ukuti e fyo Mesia ali no kucita. Apo Yohane alishibe ukuti Mesia ali no kuba imfumu, nalimo alemona ukuti pali no kupita fye inshita iinono Yesu ali no kutendeka ukuteka. Na kabili nalimo alemona ukuti ali no kumufumya mu cifungo. Apo Yohane alefwaisha ukwishibilapo na fimbi pa fyo Yesu ali no kucita, atumine abasambi bakwe babili ku kuyaipusha Yesu ati: “Bushe ni we Uuleisa nelyo bushe tufwile ukulolela umbi?” (Luka 7:19) Ilyo babwelele, Yohane afwile alekutikisha ilyo balemushimikila ukuti Yesu alyundepe abantu mu cipesha amano, no kuti Yesu abebele ukuti babwelelemo no kuyaeba Yohane ati: “Impofu shileshibulwa amenso, abalemana bale-enda, aba fibashi baleundapwa na bankomamatwi baleumfwa, abafwa balebuushiwa, abapiina baleshimikilwa imbila nsuma.”—Luka 7:20-22.

Ukwabula no kutwishika, ilyashi ilisuma ilyo abasambi ba kwa Yohane bamwebele lyalimukoseleshe sana. Ili lyashi lyalelanga ukuti Yesu alefikilisha amasesemo pali Mesia. Nangu ca kuti Yesu tafumishe Yohane mu cifungo, Yohane alishibe ukuti umulimo uo abombele walicindeme. Nangu ca kuti Yohane balimukakile, alesekelela.

Na ifwe nga twabika amano ku kubombela Yehova nga filya Yohane acitile, tukalashipikisha muli fyonse, tukalasekelela kabili tukaba abatekanya. (Kol. 1:9-11) Nga tulebelenga Baibolo kabili tuletontonkanya sana pa fyo tulebelenga, tukalashipikisha pantu tukalaibukisha ukuti umulimo tubombela Lesa tauya fye nga mu menshi. (1 Kor. 15:58) Ba Sandra batile: “Cila bushiku ndabelenga icipandwa cimo mu Baibolo kabili ifi fyalenga mpalame sana kuli Yehova. Kabili fyalenga ndebika amano ku kubombela Yehova ukucila ukubika fye amano kuli ne mwine.” Na kabili kuti twabika amano ku malyashi ayalanda pa fyo bamunyinefwe na bankashi babombela Yehova. Nga twacita ifi kuti twaleka ukutontonkanya fye pa mafya tukwete. Ba Sandra batile: “Programu ya cila mweshi iya pa mulabasa wa JW Broadcasting^® ilenga tulepalama sana ku cilonganino ca kwa Lesa, kabili ilenga twatwalilila ukusekelela ilyo tulebombela Yehova.”

Pa nshita iinono iyo Yohane Kabatisha abombele umulimo uo Yehova amupeele, aubombele “na maka kwati ni Eliya,” kabili nga filya fine Eliya ali, Yohane na o “ali fye muntu nga ifwe bene.” (Luka 1:17; Yako. 5:17) Na ifwe nga tuletasha kabili tulebika amano ku kubombela Yehova nga filya Yohane alecita, tukalasekelela ilyo tulebomba umulimo wa Bufumu, nangu ifintu fikafye shani.