Mwilacetekela Satana, Lelo Mulecetekela Yehova na Yesu

1. Bushe Satana acita shani pa kuti tuleke ukubombela Yehova?

NGA TWATENDEKA ukubombela Yehova, Satana ne fibanda tabatemwa kabili balacita ifingalenga twaleka ukutemwa Yehova. Lelo Satana alishiba ukuti te kuti atuleshe ukubombela Yehova nga ca kuti Yehova aletwafwa. E ico alacita ifingalenga twaleka ukutemwa Yehova pa kuti aleke ukutwafwa. Ku ca kumwenako, alalenga twatendeka ukulatontonkanya ukuti Yehova na Yesu tabatutemwa.—2 Kor. 11:14; Yako. 1:6.

2. Mulandu nshi cacindamina ukucetekela sana Yehova na Yesu?

² Abashilika nga balelwa inkondo, bafwile ukucetekela sana abalebatungulula. Nga ca kuti tabacetekele abalebatungulula, te kuti balekonka ne fyo balebeba kabili kuti calenga babepaya. Ifi fine e fyo caba na kuli ifwe, tuli bashilika pantu tulalwa ne “mipashi iyabipa” mu nkondo ya ku mupashi. (Efes. 6:12) Satana Kaseebanya alishiba ukuti nga twaleka ukucetekela Yehova Lesa na Yesu Kristu, nalimo kuti twaleka no kubomfwila. E ico alesha na maka ukucita ifingalenga twaleka ukubacetekela. Muli cino cipande, twalasambilila pa fyo Satana alecita kale pa kulenga abantu baleka ukucetekela Yehova e lyo ne fyo acita muno nshiku. Lyena twalasambilila pa fyo twingacita pa kuti tatulekele ukucetekela Yehova. Mu cipande cikonkelepo, tukasambilila pa fintu na fimbi fibili ifyo Satana acita pa kuti tuleke ukubombela Yehova.a

SATANA ALILANDILE IFYA BUFI PALI YEHOVA NA YESU

3. Finshi Satana aebele Efa ifyalengele aleka ukucetekela Yehova?

³ Tapakokwele ukutula apo Yehova abumbiile Adamu na Efa, Satana alefwaya ukuti baleke ukumfwila Yehova. Alitunkile Efa pa kuti atendeke ukulatontonkanya ukuti Kabumba wakwe tamutemenwe. Amwipwishe ati: “Bushe ca cine Lesa amwebele ukuti mwilalyako ku fimuti fyonse ifya mwi bala?” (Ukute. 3:​1-5) Satana alilengele Efa atendeka ukulatontonkanya ukuti Kabumba wabo talebapeela fyonse ifyo balekabila. Ku ca bulanda, Adamu na Efa balicetekele ifyo Satana ababepele. E ico nangu ca kuti Yehova e wababumbile kabili e wabapeele fyonse, balimupondokele.—Ukute. 3:6.

4. Finshi Satana acitile ilyo Yobo ali pe sonde?

⁴ Ukutula apo Adamu na Efa bapondokeele Yehova, Satana alitwalilila ukulanda ifya bufi pali Yehova. Ku ca kumwenako, alilengele abanankwe ba kwa Yobo batatu balenga Yobo alatwishika nga ca kuti Yehova alimutemenwe kabili alimubikileko amano pali filya ali uwa cishinka. (Yobo 22:​1-3) Satana alemona ukuti Yobo nga akwata amafya, ali no kuleka ukutemwa Yehova. Nangu ca kuti Satana alilengele Yobo alacula, Yobo alitwalilile ukubombela Yehova ne cishinka.—Yobo 27:​1, 5.

5. Finshi Satana alecita pa kuti alenge abantu baleke ukuba abasambi ba kwa Yesu? (Mateo 11:19)

⁵ Ilyo Yesu aishile pano calo, Satana alecita ifyalelenga abantu bamo baleka ukuba abasambi ba kwa Yesu. Ku ca kumwenako, alelenga intungulushi sha mapepo na bantu bambi abapatile Yesu balalanda ifya bufi pali Yesu. Ifi alecita fyalelenga abengi balesumina ifya bufi pali Yesu, kabili fyalengele bamwipaya.—Belengeni Mateo 11:19; 27:​27-31; Marko 14:​55, 56; Yoh. 8:​41-45.

6-7. Finshi Satana acitile pa kulwisha abasambi ba kwa Yesu aba kubalilapo?

⁶ Ilyo Yesu afwile, Satana alitwalilile ukulwisha abasambi ba kwa Yesu no kulabalesha ukulashimikila pali Yesu. Cimo ico acitile kulenga abantu balatwishika nga ca cine Lesa alibuushishe Yesu. Alilengele bamo batendeka ukubepa ukuti abasambi ba kwa Yesu balibile umubili wa kwa Yesu. (Mat. 28:​11-15) Ilyo papitile inshita, Satana alitendeke ukubomfya intungulushi sha mapepo ne ntungulushi sha buteko ukulacusha abasambi ba kwa Yesu. Ico Satana alefwaisha kutiinya abasambi ba kwa Yesu pa kuti baleke ukubomba umulimo Yesu abapeele.—Imil. 7:57–8:1; 12:​1-3; 28:22.

⁷ Nangu ca kuti Abena Kristu ba kubalilapo bamo balyumfwile umwenso kabili balilekele ukubila imbila nsuma, abengi balitwalilile ukwebako abantu pali Yesu. Balishibe ukuti Satana ne fibanda e balefwaya ukuti baleke ukubomba uyu mulimo. (Imil. 4:​18-20; 1 Pet. 5:8) Na muno nshiku mwine Satana alesha ukutulesha ukubombela Yehova. Natumone ifyo acita.

SATANA ALITWALILILA UKUBEPESHA YEHOVA NA YESU

8. Bushe Satana abomfya shani ababa mu mipepele ya bufi pa kuti balesambilisha ifya bufi pali Yehova na pali Yesu?

⁸ Cimo ico Satana acita muno nshiku, kulenga abantu bafilwa ukwishiba icine pali Yehova na pali Yesu. Apo Satana “e wishi wa bufi,” alabomfya ababa mu kupepa kwa bufi abasambilisha abantu ifishili fya cine pali Yehova na Yesu. (Yoh. 8:44) Ku ca kumwenako, alilenga abantu abengi bafilwa ukwishiba bwino Yehova no Mwana wakwe. (2 Kor. 4:​3, 4) Abengi ababa mu mipepele ya batila Bena Kristu basambilisha ukuti Yehova na Yesu balilingana. Ici calilenga abengi beishiba ishina lya kwa Lesa, kabili calilenga balapepa Yesu mu nshita ya kulapepa Yehova. Lelo Yehova na Yesu bafwaya abantu balepepa fye Yehova. (Mat. 4:10; Yoh. 4:23) Abengi balacetekela sana ifyo babasambilisha ica kuti balakaana ukukutika imbila nsuma.

9. Bushe Satana abomfya shani ababa mu kupepa kwa bufi pa kuti abantu beishiba Yehova? (Yeremia 23:​26, 27)

⁹ Nga tulefwaya ukwishiba umuntu, ico tubalilapo ukucita, kwishiba ishina lyakwe. Baibo ilanda ukuti nga twaishiba ishina lya kwa Lesa no kumucetekela akulatucingilila. (Amapi. 18:10) Lelo Satana tafwaya abantu baishiba Yehova kabili baba ifibusa fyakwe. E ico pa myaka iingi alabomfya ababa mu kupepa kwa bufi pa kuti abantu beishiba ishina lya kwa Lesa. (Belengeni Yeremia 23:​26, 27.) Ku ca kumwenako, alilenga bakapilibula ba Baibo abengi bafumya ishina lya kwa Lesa mu Baibo. Satana na kabili alilenga abantu balamona ukuti Yehova e ulenga tulecula. Ici calilenga abantu abengi balamona kwati te kuti babe ifibusa fya kwa Lesa. (Yako. 4:8) Lelo Satana alatunka na babomfi ba kwa Yehova pa kuti baleke ukumubombela.

10. Cinshi cingalenga Umwina Kristu afulilwa Yehova?

¹⁰ Nga twakwata amafya, Satana afwaya tuletontonkanya ukuti Yehova tatubikako amano. Na kabili nga ca kuti amafya yatwalilila, Satana afwaya twafulilwa Lesa pa mulandu wa kuti tapwishishe amafya tukwete. (Amapi. 19:3) Nga twafulilwa Yehova nalimo kuti twalatontonkanya ukuti: ‘Nga ca kuti Yehova talengafwa, mulandu nshi ningile ukulacitila ifyo afwaya?’ Nomba ifi nga e fyo twalatontonkanya, kuti twalenga Satana atemwa, mu cifulo ca kulenga Yehova alasekelela.

11. Finshi Satana abomfya ifingalenga twalatwishika ifyo Baibo ilanda? (Moneni ne cikope.)

¹¹ Satana alalenga ifyo abantu balanda pa Intaneti fyalenga twalatwishika nga ca kuti ifyo Baibo ilanda fyaliba fye bwino. Ku ca kumwenako, abantu bamo pa Intaneti balasuusha ifyo Baibo ilanda, kabili balanda ukuti cila muntu alingile ukuipangila amafunde ayo alingile ukulakonka. Ukwabula no kutwishika, Satana “kateka wa ici calo” alilenga abengi balamona kwati caliba fye bwino ukucita ifyabipa.—Yoh. 14:30; Esa. 5:20; 1 Tim. 4:​1, 2.

12. Mulandu nshi tushilingile ukulakonkela ifyo abantu ba muli ici calo ca kwa Satana balanda pa calungama ne calubana?

¹² Nga twalakonka ifyo abantu ba muli ici calo balanda pa calungama ne calubana, kuti twatendeka ukulatwishika ifyo Yehova atweba. Shannonb nkashi umukashana alandile ati: “Pa nshita imo nalitendeke ukutemwa ifyo Yehova amona ukuti fyalibipa pa mulandu ne fyo baletusambilisha ku sukulu e lyo na bantu nalesangwa nabo. Nalepoosa inshita iikalamba mu kubelenga ifyo abantu balelanda pa Intaneti, kabili ici calengele nalatontonkanya nge fyo baletontonkanya. Mu kuya kwa nshita, nalilekele ukuba ne nsansa ilyo nalebombela Yehova na lintu naleba na balupwa lwandi nelyo aba bwananyina mu cilonganino.” Finshi nkashi Shannon acitile pa kupwisha ubwafya akwete?

13. Finshi mwasambililako kuli nkashi Shannon?

¹³ Nkashi Shannon alilwike ukuti alingile ukwaluka sana pa kuti atwalilile ukuba cibusa wa kwa Yehova na Yesu. Atile: “Nalipepele kuli Yehova ukuti angafwe pa kuti nsange ifibusa ifisuma, kabili nalifwailepo ifyebo mu mpapulo shesu pa bwafya nakwete. Ifyo natambile muli vidio imo pa jw.org iyalelanda pali nkashi umo fyalingafwile sana.c Nkashi uwali muli ilya vidio alikwete ubwafya ubo na ine nakwete. Ali uwaicefya kabili alefwaya ukuti abafyashi bakwe bamwafwe. Nalefwaya sana ukumupashanya. Abafyashi bandi, baeluda na bankashi abakalamba mu fya kwa Lesa, balingafwile pa kuti mpate ifyo Yehova apata na pa kuti nsale bwino ifibusa. Naishileishiba ukuti pa kuti ndebombela Yehova, nshalingile ukupelela fye pa kulaya mu kulongana lyonse no kulaumfwila abafyashi, lelo nalingile ukupalama sana kuli Yehova. Na kabili nalingile ukwishiba icalenga nsumine mu fyo nasuminamo.”

MWILATWISHIKA UKUTI YEHOVA NA YESU BALIMUTEMWA SANA

14. Finshi tulingile ukucita pa kuti Satana talengele twaleka ukucetekela Yehova? (Moneni ne cikope.)

¹⁴ Pa kuti tutwalilile ukuba ifibusa na Yehova, tulingile ukusala bwino abalingile ukuba ifibusa fyesu. (Yako. 4:4) Na kabili tatulingile ukusumina fye fyonse ifyo twabelenga nelyo ifyo twaumfwa. Ku ca kumwenako, nalimo kuti twabelenga ilyashi limo nelyo twaumfwa fimo ifishili fya cine. Nga twatwalilila fye ukubika amano ku fyo twabelenga nelyo ifyo twaumfwa, kuti twatendeka ukusumina na malyashi ya bufi nelyo aya kuti muli icine e lyo no bufi. Nomba nga tulebelenga Baibo ne mpapulo shesu, kabili tulesangwa na bantu abatemwa Yehova, tatwakulasumina amalyashi ya bufi, kabili Satana takalenge tukaleke ukubombela Yehova.—Amapi. 13:20; Imil. 17:11.

15. Finshi tulingile ukucita pa kuti tushininkishe ukuti Yehova na Yesu balitutemwa kabili bafwaya twaba ne nsansa?

¹⁵ Nga tuleisambilisha Baibo kabili nga twaishiba bwino Yehova na Yesu, tatwakulatwishika ukuti bafwaya twaba ne nsansa. (Amapi. 22:19) Mu Baibo mwaliba amalyashi ayalanda pa baume na banakashi abacetekele Yehova na Yesu. Nga tuletontonkanya sana pa fyo Yehova na Yesu balangile ukuti balibatemenwe, tukabacetekela sana. Na kabili mu Baibo mwaliba amashiwi ayalanda pa fyo Yehova na Yesu batutemwa. Ku ca kumwenako, Yehova alilondolola ukuti alitemwa abantu bakwe ukucila fye ne fyo nyina uuleonsha atemwa umwana wakwe. (Esa. 49:15) Alilanda no kuti abantu abatemwa ishina lyakwe ‘balitemwikwa.’ (Mal. 3:​16, 17, futunoti) Na kuba, mu Baibo mwaliba amashiwi ayo Yesu umwine ailandiile pa fyo atutemwa nga nshi ica kuti alitufwilile.—Yoh. 15:​12, 13.

16. Mulandu nshi cacindamina ukutontonkanya pa fyo Yehova atwafwile ne fyo ayafwilepo bambi? (Amalumbo 118:​5, 6)

¹⁶ Nga tuletontonkanya pa fyo Yehova na Yesu batwafwa, tatwakulatwishika ukuti balitutemwa. Nalimo kuti twatontonkanya pa fyo Yehova ayaswike ipepo twapepele, ne fyo atwafwile ilyo twakwete ubwafya. Nga twaibukisha ifyo atwafwile, kuti twacetekela ukuti akatwalilila ukutwafwa. Kuti twaipushako na bamunyinefwe na bankashi ifyo Yehova abafwile ukupwisha ubwafya bakwete. (Amapi. 22:17) Nga tulecita ifi, tukashininkisha ukuti Yehova na Yesu bakulatwafwa.—Belengeni Amalumbo 118:​5, 6.

17. Ukulingana na Yohane 10:​29, finshi Yesu alaya abatwalilila ukumutemwa no kutemwa Yehova?

¹⁷ Bonse tulafwaya ukutwalilila ukuba ifibusa fya kwa Yehova Lesa na Yesu Kristu. Lelo Satana ne fibanda bakatwalilila ukucita ifingalenga twaleka ukucetekela sana Yehova na Yesu. Tabakaleke ukucita ifi mpaka Yehova akabonaule umuyayaya. (Ukus. 20:​1-3, 10) Pa kuti tutwalilile ukubombela Yehova ne cishinka, tulingile ukulakosha bucibusa bwesu na ena, kabili tatulingile ukulatwishika ukuti Yehova na Yesu balitutemwa. Lyena nga fintu Yesu alandile, Yehova akatwalilila ukutucingilila.—Belengeni Yohane 10:29; Yako. 4:7.

18. Finshi tukasambililapo mu cipande cikonkelepo?

¹⁸ Mu cipande cikonkelepo tukasambilila pa fintu na fimbi ifyo Satana acita pa kuti bucibusa bwesu na Yehova bupwe. Tukasambilila pa fyo acita pa kuti twilaumfwana na bamunyinefwe na bankashi, na pa fyo alenga abantu balatucusha. Na kabili tukasambilila pa fyo twingatwalilila ukubombela Yehova ne cishinka te mulandu ne fyo Satana engacita.