Nani Akacingilila Abantu Bakaele Abashilwako Inkondo?—Finshi Baibo Yalandapo?

Ifyo lipoti ya kabungwe ka United Nations yalandile:

• Ukutendeka pa 7 October ukufika pa 23 October, 2023, inkondo iyo icalo ca Israel na ba mu musumba wa Gaza uwaba mu calo ca Palestine balelwa, nailenga abantu ukucila pali 6,400 ukufwa e lyo 15,200 e bacenekwe. Abengi pali aba te bashilika kabili te bakapokola. Na kabili, abantu abengi nga nshi nabafulumuka mu mayanda yabo.

• Ilyo calefika pa 24 September, 2023, ninshi abantu 9,701 balifwa pa mulandu ne nkondo iyaba pa calo ca Russia ne calo ca Ukraine, e lyo abantu 17,748 e bo bacena mu Ukraine.

Finshi Baibo ilanda ifingalenga abantu abacula pa mulandu wa nkondo baba ne subilo?

Baibo yalisobeele ukuti Lesa akalenga “inkondo ukupwa ukufika ku mpela sha pano isonde.” (Amalumbo 46:9) Akabomfya ubuteko bwa ku muulu nelyo ubufumu ku kufumyapo amabuteko yonse aya bantunse. (Daniele 2:44) Ubufumu bwa kwa Lesa bukafumyapo ukucula.

Moneni ifyo Yesu Kristu, Imfumu ya Bufumu bwa kwa Lesa akacita:

• “Akapususha umulanda uulekuuta mutuule, no wacula na onse uushakwata wa kumwafwa. Akomfwila ubulanda umulanda no mupiina, kabili akapususha imyeo ya bapiina. Akalubula imyeo yabo ukufuma ku ba mutitikisha na ku ba bunkalwe.”—Amalumbo 72:12-14.

Lesa akabomfya Ubufumu bwakwe ku kufumyapo ifilenga tulecula pa mulandu wa nkondo no bunkalwe.

• “Akafuuta ifilamba fyonse ku menso yabo, ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili. Ifya ntanshi nafiya.”—Ukusokolola 21:4.

Nomba line fye Ubufumu bwa kwa Lesa bukaalula ifintu pe sonde. Baibo yalisobeele “pa lwa nkondo” ishilecitika muno nshiku. (Mateo 24:6) Ishi inkondo ne fintu fimbi ifilecitika filelangilila apabuuta fye ukuti tuleikala “mu nshiku sha kulekelesha” isha miteekele ya bantunse.—2 Timote 3:1.