Bushe Lesa E Walengele Ifya Mweo Fitendeke Ukusanguka?

Awe. Baibolo ilanda ukuti Lesa abumbile abantu e lyo ne “misango” yalekanalekana iya nama ne filimwa.a (Ukutendeka 1:12, 21, 25, 27; Ukusokolola 4:11) Ilanda no kuti abantu bonse batuntwike ku bafyashi besu aba kubalilapo, Adamu na Efa. (Ukutendeka 3:20; 4:1) Baibolo taisambilisha ukuti Lesa e walengele ifya mweo fitendeke ukusanguka. Icishinka ca kuti ifyo Baibolo ilanda tafyapusana ne fyo basayantisiti balanda ukuti ifya mweo fyonse fyali-ibela.

• Bushe Lesa e walengele ifintu fitendeke ukusanguka?

• Bushe Baibolo isambilisha ukuti ifintu fyasangwike fye?

• Bushe ifi ifimenwa ne nama shishifwa nga bashitwala uko imiceele yapusana na uko shabelela cilanga ukuti icisambilisho ca kuti ifintu fyasangwike fye ca cine?

Abantu abasumina ukuti Lesa e walengele ifintu fitendeke ukusanguka balalanda ifyapusanapusana pa fyo cali pa kuti ifintu fitendeke ukusanguka. Ukulingana ne citabo ca Encyclopaedia Britannica abantu bamo batila “Lesa apangile ifya mweo ukuti fimo filetwalilila ukubako e lyo fimbi filefwa.”

Mu cisambilisho ca kuti Lesa e walengele ifintu filesanguka mwaba na ifi:

• Ifya mweo fyonse fyatuntwike ku cintu cimo icaliko kale sana.

• Ica mweo cimo kuti casangukila mu ca mweo cimbi icaibela. Ku ca kumwenako abantu basambilisha ukuti kolwe kuti asangukila mu muntu.

• Lesa e walenga ukuti ifi fyonse ficitike.

Abasumina mu cisambilisho ca kuti Lesa e walengele ifintu fitendeke ukusanguka bamona kwati ifyo Baibolo ilanda mwi buuku lya Ukutendeka fya bufi. Lelo Yesu alandile ukuti amalyashi yaba mwi buuku lya Ukutendeka ya cine. (Ukutendeka 1:26, 27; 2:18-24; Mateo 19:4-6) Baibolo ilanda ukuti ilyo Yesu ashilaisa pano isonde, ali ku muulu na Lesa kabili “ifintu fyonse” fyapangilwe ukupitila muli Yesu. (Yohane 1:3) Kanshi Baibolo taisambilisha ukuti Lesa e walengele ifintu fitendeke ukusangukila mu fintu fimbi.

Baibolo tailanda ukuti ifya mweo ifyaba mu musango umo filasangukila mu fya mweo fimbi ifyaba mu musango umo wine. Na kabili Baibolo taikaana ukuti imisango ya nama ne ya fimenwa ifyalekanalekana iyo Lesa apanga kuti fya-alukako panono mu musango umo wine ilyo filefyalana nelyo ilyo bafitwala ku ncende imbi ukwaba imiceele iyapusana ne yo fyabelesha. Nangu ca kuti abantu bamo bamona ukuti ifi ificitika fyaba mu cisambilisho ca kuti ifintu fyasangwike fye, uku kwaluka takulenga kube ifya mweo ifya musango umbi.