Icipandwa 23

Akalanda ka Cibili—Imilalo ya ba Pali Bakabalwe

 1. Ukwabulo kusakamana ukubombesha kwa bashibutotelo kwakufumyapo makanta, cinshi cacitika, kabili cinshi ico ukwisa kwa tulanda tubili twalundwapo kulangisha?

UKUTULA 1919 ukuya ku ntanshi, ukusansa kwa makanta wa cimpashanya pali Kristendomu kwalengele bashibutotelo ukukanasekelela ukukalamba. Balyesha ukufumyapo makanta, lelo uyu atwalilila ukulaba uwakosa ukucilapo. (Ukusokolola 9:7) Kabili ici te conse! Yohane alemba ati: “Ica kalanda ca ntanshi nacipita: moneni, palekonkapo ne fya kalanda fibili.” (Ukusokolola 9:12) Ifinkunka fyalundwapo fya kulungulusha fyabakilwa Kristendomu.

 2. (a) Cinshi cicitika lintu malaika wa mutanda alisha intandala yakwe? (b) Cinshi ico “ishiwi lya mu nsengo sha [cipailo, NW] ca golde” limininako? (c) Mulandu nshi bamalaika bane balumbwilwa?

² Cinshi cili intulo ya kalanda ka cibili? Yohane alemba ati: “Kabili malaika uwalenga mutanda alilishishemo; e lyo naumfwile ishiwi lya mu nsengo sha [cipailo, “NW”] ca golde ica ku cinso ca kwa Lesa, lilesosa kuli malaika uwalenga mutanda uwali ne ntandala, aliti, Kakula bamalaika bane abakakwa pa mumana ukalamba Yufrate.” (Ukusokolola 9:13, 14) Ukukakulwa kwa bamalaika kuli mu kwasuka ishiwi lyafumine ku nsengo sha cipailo ica golde. Uku e kuti cipailo ca golde ca fya cushi ce fungo, kabili mu kubangilila libili ifya cushi ce fungo fya nweno sha golde ukufuma pali ici cipailo fyalilundanishiwa na mapepo ya ba mushilo. (Ukusokolola 5:8; 8:3, 4) E ico, ili shiwi limo lileimininako amapepo yaikatana aya ba mushilo pe sonde. Balomba ukuti bene abene bene batuulilwe umulimo walundwako wabamo ulupikwe nge “nkombe” sha kwa Yehova, ubu ukuba e bupilibulo bwa citendekelo bwe shiwi lya ciGreek lyapilibulwa pano “bamalaika.” Mulandu nshi kwabela bamalaika bane? Iyi mpendwa ya cimpashanya imoneko kulangisho kuti bakaba abateyanishiwa nge ca kufimbe sonde mu kupwililika kwa liko.—Linganyako Ukusokolola 7:1; 20:8.

 3. Ni shani fintu bamalaika bane “bakakwa pa mumana ukalamba Yufrate”?

³ Ni shani abo bamalaika babele “abakakwa pa mumana ukalamba Yufrate”? Umumana Yufrate mu nshita sha pa kale wali umupaka wa ku kabanga ka kapinda ka ku kuso ka calo ico Yehova alaile kuli Abrahamu. (Ukutendeka 15:18; Amalango 11:24) Mu kumonekesha, bamalaika bashinshibikwe pa mupaka wa calo cabo capeelwe na Lesa, nelyo imibombele ya bufumu bwa pe sonde, bakanishiwe ukwingila mu kupwililika mu mulimo untu Yehova abapekanishishe. Yufrate kabili mu kupulamo abishenye no musumba wa Babiloni, kabili pa numa ya kuwa kwa Yerusalemu mu 607 B.C.E., abena Israele ba ku mubili bapoosele myaka 70 mulya mu bunkole, “abakakwa pa mumana ukalamba Yufrate.” (Ilumbo 137:1) Umwaka wa 1919 wasangile abena Israele ba ku mupashi abakakwa mu kushinshibikwa kwapalako, abankumbabulili na balelomba Yehova ubutungulushi.

 4. Kutumwa nshi uko bamalaika bane bakwata, kabili kwapwilikishiwa shani?

⁴ Mu kubamo insansa, Yohane kuti ashimika ati: “Awe balikakwilwe bamalaika bane, abapekanishiwe kuli ulya ora na kasuba no mweshi no mwaka, ku kwipaye cakaniko ca pali fitatu ica bantu.” (Ukusokolola 9:15) Yehova ni Kasunga wa Nshita walingisha. Alikwato kutantike nshita kabili alaibaka. E co, ishi nkombe shakakulwa mu kulingana fye no kutantika na mu nshita ya kupwilikisha ico bali no kucita. Elenganya ubuseko bwabo pa kufuma mu kufungwa mu 1919, abaipekanyo kubomba! Bakwata ukutumwa te kulungulusha fye lelo mu kupelako “ukwipaye cakaniko ca pali fitatu ica bantu.” Ici caampana ku finkunka fyabilishiwe ku kulila kwa ntandala shine isha ntanshi, ifyacushishe icakaniko ca pali fitatu ice sonde, bemba, ifibumbwa fya muli bemba, utumfukumfuku ne mimana, ne ntulo sha mu mulu isha lubuuto. (Ukusokolola 8:7-12) Bamalaika bane balalundapo. Bene ‘baleipaya,’ ukusansalika ku kupwililika imibele ya mfwa ya ku mupashi iya Kristendomu. Ukubilisha kwa ntandala, kwacitilwe ukutula 1922 ukuya ku ntanshi no kutwalilila ku nshita ya nomba, kwalipwilikishe ci.

 5. Mu kulosha kuli Kristendomu, ni shani iciunda ca kulila kwa ntandala ya mutanda caumfwikike mu 1927?

⁵ Ibukisha, malaika wa mu mulu nalisha intandala ya mutanda. Ukukonkana, kwa mutanda ukwa mabungano ya pa kati ka nko ya Basambi ba Baibolo ya pa caka kwacitilwe mu Toronto, Ontario, Canada. Programu kulya wa pa Mulungu, July 24, 1927, apishiwe mu mwela mu kulundanya kwa fitesheni fya ma radio 53, ukukakanya kwa mulabasa kwacililepo ukusaalala ukufika pali ilya nshita. Bulya bukombe bwalandilwe bwaile ku basangilweko mu kucitikako ukucila amamilioni ayengi. Intanshi, ukusuminishanya kwakosa kwasansalike Kristendomu pamo ngo wafwa lwa ku mupashi no kulundulula ukulaalika kwa kuti: “Muli ili awala lya kupelenganishiwa Yehova Lesa alekambisha abantu ukufuma no kusha kuli pe na pe ‘Kristendomu’ nelyo ‘ubuKristu bwateyanishiwa’ no kwaluluka umupwilapo ukufuma muli wene . . . ; [lekeni] abantu bapeele ukuipeelesha kwa mitima yabo no kunakila umupwilapo kuli Yehova Lesa na ku Mfumu yakwe na ku bufumu.” “Ukulubuka kwa Bantu” wali e mutwe wa lyashi lya cintubwingi ilya konkelepo. J. F. Rutherford, presidenti wa Watch Tower Society, apeele ili mu musango wakwe uwa lyonse uwa lupikwe, ukulingako ku “mulilo ne cushi ca [libwe lya mingu, NW]” ifyo Yohane akonkapo ukumona mu cimonwa.

 6. Ni shani fintu Yohane alondolola imilalo ya ba pali bakabalwe intu amona mu kukonkapo?

⁶ “Ne mpendwa ya milalo ya ba pali bakabalwe yali imyanda mishila ibili (naumfwile impendwa ya iko). Kabili e fyo namwene bakabalwe mu cimonwa, na baikelepo abali ne fya kucinge fifuba ifyakashika ngo mulilo, ne fya kafiifi, ne fya [libwe lya mingu, “NW”]; ne mitwe ya bakabalwe yali nge mitwe ya nkalamo, na mu tunwa twabo mwafumo mulilo ne cushi ca [libwe lya mingu, “NW”]. Kuli ifi [finkunka] fitatu [baipaileko] icakaniko ca pali fitatu ica bantu, ku mulilo uyo, ne cushi ico, ne [libwe lya mingu, “NW”] ifyafuma mu tumwa twabo.”—Ukusokolola 9:16-18.

7, 8. (a) Ni pe samba lya kutangilila kwa butungulushi bwa bani apo aba pali bakabalwe babulukutila? (b) Ni mu nshila nshi umo aba pali bakabalwe bapalila makanta wabatangilile?

⁷ Mu kumonekesha, aba pali bakabalwe babulukutila pe samba lya butungulushi bwa bamalaika bane. Mwandi ca kumoneka cakulengo mwenso! Elenganya ukwankulako kobe nga wali ica kulasapo ca ba pali bakabalwe ba musango yo! Ukumoneka kwa ciko kwine kuti kwalengo munsokwe mu mutima obe. Bushe wacimona, nangu ni fyo, ifyo aba aba pali bakabalwe bapalana na makanta atangilileko? Makanta apala bakabalwe; mu ba pali bakabalwe mubamo bakabalwe. Fyonse, lyene, fyabimbwa mu micitile ya nkondo ya teokratiki. (Amapinda 21:31) Makanta akwete ameno yapala aya nkalamo; bakabalwe ba pali bakabalwe bakwete imitwe iyapala inkalamo. Fyonse muli fyo fyakakililwa mu Nkalamo yashipa iya mukowa wa kwa Yuda, Yesu Kristu, uwaba Intungulushi yabo, Mushika, ne ca Kumwenako.—Ukusokolola 5:5; Amapinda 28:1.

⁸ Fyonse makanta na ba pali bakabalwe bakana mu mulimo wa kwa Yehova uwa bupingushi. Makanta afumine mu cushi icalangishe akalanda no mulilo wa bonaushi kuli Kristendomu; ukutula mu tunwa twa bakabalwe, mufumamo umulilo, icushi, ne libwe lya mingu. Makanta akwete ifya ku cinge cifuba fya cela, ukulangisho kuti imitima yabo yalicingililwe ku kuipeelesha ku bulungami bushipetama; aba pali bakabalwe bafwele ifya ku cinge cifuba ifyakashika, ifya fitulukila, ne fya munkubuyu, ukulangisha umulilo, icushi, ne libwe lya mingu ifya bukombe bwa bupingushi ubwabamo imfwa ubufuma mu tunwa twa bakabalwe. (Linganyako Ukutendeka 19:24, 28; Luka 17:29, 30.) Makanta akwete imicila iyapala iya bakaliŋongo ku kulungulusha; bakabalwe bakwete imicila iyapala insoka ku kwipaya! Cimoneka ukuti icatendekwe kuli makanta cili no kukonkelelwa ku ba pali bakabalwe mu kufulilako kwakosa ku kupwililika.

 9. Cinshi ico aba pali bakabalwe balangilila?

⁹ E co, cinshi ico abo aba pali bakabalwe balangilila? Pamo nge fyo ibumba lyasubwa lya buYohane lyatendeke ukubilisha kwapalo kwa ntandala ukwa bupingushi bwa kwa Yehova ubwa cilandushi ca bulesa ukulwisha Kristendomu, ukuba no bulashi bwa ‘kusuma no kucena,’ e co kuti twacetekela ibumba limo line ilya mweo ukubomfiwa mu ‘kwipaya,’ uko e kuti, mu kulenga ukwishibikwa ifyo Kristendomu na bashibutotelo bakwe balifwa umupwilapo lwa ku mupashi, ukupooswa na Yehova kabili bapekaniwa kwi “lungu lya mulilo” lya bonaushi bwa ciyayaya. Mu cine cine, conse ica Babiloni Mukalamba cilingile ukuloba. (Ukusokolola 9:5, 10; 18:2, 8; Mateo 13:41-43) Ukutangilila ubonaushi bwakwe, nangu cibe fyo, ibumba lya buYohane libomfyo “lupanga lwa ku [mupashi] ulo e cebo ca kwa Lesa,” mu kusansalika imibele ya Kristendomu yapale mfwa. Bamalaika bane na banina pali bakabalwe bapeelo butungulushi kuli uku kwipaya kwa cimpashanya kwa “cakaniko ca pali fitatu ica bantu.” (Abena Efese 6:17; Ukusokolola 9:15, 18) Ici cilangisha ukuteyanya kwalinga no butungulushi bwa teokratiki pe samba lya bwangalishi bwa kwa Shikulu Yesu Kristu lintu impuka ipuutamo umwenso ya bakabilisha ba Bufumu ileya ku ntanshi ku bulwi.

Imyanda Mishila Ibili ya Myanda Mishila

10. Ni mu mano nshi kwabelako imyanda mishila ibili ya myanda mishila ya ba pali bakabalwe?

¹⁰ Ni shani kwingabako imyanda mishila ibili iya myanda mishila ya ba pali bakabalwe? Umwanda mishila waba 10,000. E co imyanda mishila ibili ya myanda mishila kuti yaisa kuli 200 milioni.a Mu kubamo insansa, kwabako nomba amamilioni ya bakabilisha ba Bufumu, lelo impendwa yabo yapelebela nga nshi ukufika ku myanda mamilioni! Ibukisha, nangu ni fyo, amashiwi ya kwa Mose pa Impendwa 10:36 ayatila: “Mwe Yehova, bweleleni ku ba myanda mishila ba mikowa ya kwa Israele.” (Linganyako Ukutendeka 24:60.) Ico kuti capilibula, ukukonke shiwi, ‘Bweleleni ku makumi ya mamilioni aya kwa Israele.’ Israele, nangu cibe fyo, bali fye impendwa apepi na mamilioni yabili ukufika kuli yatatu mu kasuba ka kwa Mose. Cinshi, lyene, ico Mose alesosa? Ukwabulo kutwishika akwete mu muntontonkanya ukuti abena Israele bakaba ababulwo kupendwa nge “ntanda sha mu mulu, kabili ngo musensenga uuli pa nembenembe ya bemba,” ukucila pa kupendwa. (Ukutendeka 22:17; 1 Imilandu 27:23) E co abomfeshe ishiwi lya “umwanda mishila” ukulangisha impendwa iikalamba ishalumbulwa. Muli fyo, The New English Bible ipilibula ici cikomo ukuti: “Tusha, SHIKULU wa makana iminshipendwa ya kwa Israele.” Ici cumfwana no bulondoloshi bwa cibili ubwe shiwi lya “umwanda mishila” lisangwa mu madikishonari ya ciGreek ne ciHebere butila: “cinkupiti uushingapendwa,” “cinkupiti.”—The New Thayer’s Greek-English Lexicon of the New Testament; A Hebrew and English Lexicon of the Old Testament ya kwa Gesenius, yapilibwilwe kuli Edward Robinson.

11. Pa kuti ibumba lya buYohane libe imyanda mishila nelyo fye mano ya cimpashanya, cinshi cingakabilwa?

¹¹ Nangu ni fyo, abo abe bumba lya buYohane bacili pe sonde bapendwa abacepa ukucila na pali 10,000—ukucepa ukucila na pa mwanda mishila wa cine cine. Ni shani bengapashanishiwa ku makana ayashingapendwa aya ba pali bakabalwe? Ukuba imyanda mishila nangu fye mu mano ya cimpashanya, bushe te kuti bakabile abalundwako? Ico e cintu bakabile, kabili ku cikuuku ca pa fye ca kwa Yehova, ico e cintu bapokelele! Bushe aba bafuma kwi?

12, 13. Kulunduluka nshi kwa mu lyashi lya kale ukutula 1918 ukufika 1935 kwalangishe intulo ya balundwako?

¹² Ukutula 1918 ukufika 1922, ibumba lya buYohane lyatendeke ukutambika ku buntunse bwapelelwa icilolelo cabamo insansa ukuti “amamilioni abali aba mweo nomba tabakabale abafwa.” Mu 1923 na kabili calilengelwe ukwishibikwa ukuti impaanga sha pali Mateo 25:31-34 bakapyano bumi pe sonde pe samba lya Bufumu bwa kwa Lesa. Isubilo lyapalako lyatambikwe mu katabo Freedom for the Peoples (Ubutungwa bwa Bantu), ako kakakwilwe pe bungano lya pa kati ka nko mu 1927. Mu kubangilila kwa ba 1930 ibumba lyalungama lya buYehonadabu na ‘abaume baloosha no kuteta’ pa mibele yabamo ubulanda ya Kristendomu balangililwe ukuba abapalana ne mpaanga sha cimpashanya shakwete icilolelo ca bumi bwa pe sonde. (Esekiele 9:4, NW; 2 Ishamfumu 10:15, 16) Ukusontelela aba musango yo ku ‘misumba ya kushinamo’ ya kasuba ka muno nshiku, The Watchtower wa August 15, 1934, alondolwele ati: “Abo abe bumba lya buYonadabu balyumfwa ukulila kwa ntandala ya kwa Lesa kabili balisakamana ukusoka mu kubutukila ku kuteyanya kwa kwa Lesa no kubishanya na bantu ba kwa Lesa, kabili mulya e mo balingile ukwikala.”—Impendwa 35:6.

¹³ Mu 1935 abo abe bumba lya buYonadabu mu kwebekesha balalikwe ukusangwa kwi bungano lya Nte sha kwa Yehova mu Washington, D.C., U.S.A. Kulya, pali Cisano, May 31, J. F. Rutherford apeele ilyashi lyakwe lyalumbuka ilya “Cinkupiti Mukalamba,” umo alangishe mu kumfwika ukuti ili bumba lya pa Ukusokolola 7:9 (King James Version) lyali limo line ne mpaanga sha pali Mateo 25:33—ibumba lyaipeela lyakwata amasubilo ya pe sonde. Pamo nga basolwesolwe ba fintu fyali no kwisa, pali lilye bungano 840 Inte shipya balibatishiwe, ubwingi bwabo ukuba abe bumba likalamba.b

14. Bushe ibumba likalamba kuti lyakwatamo ulubali mu kusansa kwa ba pali bakabalwe ba cimpashanya, kabili kupingulapo nshi kwalumbulwilwe mu 1963?

¹⁴ Bushe ili bumba likalamba lyalikwata ulubali mu kulwisha kwa ba pali bakabalwe uko kwatendeke mu 1922 no ko kwapokelele ukukomailapo kwaibela pe bungano lya ku Toronto mu 1927? Pe samba lya butungulushi bwa bamalaika bane, ibumba lya buYohane lyasubwa, mu kushininkisha lyalikwata! Pe bungano lya mu 1963 lya “Imbila Nsuma ya Muyayaya” ilyashingulwike icalo, lyailundile kwi bumba lya buYohane mu kusuminishanya kwakosa ukwa kucincimusha. Uko kwabilishe ukuti icalo “cilolenkene ne cinkukuma ca bucushi bwa calo cishabalile acishibikwa, no kuti fyonse ifyaimikwa fya bupolitiki no butotelo bwa muno nshiku bwa Babiloni fikatenshiwa ukubo tupimfya.” Ukusuminishanya kwakosa kwalumbulwile ukutila “tukatwalilila ukubilisha ku bantu bonse ukwabula akapatulula ‘imbila nsuma ya muyayaya’ iyakuma ku Bufumu bwa kwa Lesa bwa buMesia no kukuma ku mapingushi yakwe, ayapale cinkunka ku balwani bakwe lelo icikaputunkanishiwa ku kulubulwa kwa bantu bonse abafwayo kupepa Lesa Kabumba ukupokelelwa mu mupashi na mu cine.” Uku kusuminishanya kwakosa kwapokelelwe mu kucincimuka pa kulongana 24 ukushinguluka icibulungwa conse pa mpendwa yapuminkanishiwa iya 454,977 abalongene, abo ukucila pali 95 peresenti bali be bumba likalamba.

15. (a) Mu 1988 ibumba likalamba lyapangile peresenti nshi uwa mpuka ya mulimo intu Yehova abomfya mwi bala? (b) Ni shani ipepo lya kwa Yesu pali Yohane 17:20, 21 lilumbulula ukwikatana kwe bumba likalamba na be bumba lya buYohane?

¹⁵ Ibumba likalamba lyalitwalilila ukubilisha ukwikatana kwa liko kushapelela ne bumba lya buYohane mu kupongolola ifinkunka pali Kristendomu. Mu 1988 ili bumba likalamba lyapangile ukucila 99.7 peresenti uwa mpuka ya mulimo iyo Yehova alebomfya mwi bala. Ifilundwa fya liko fyaba no mutima onse ukumfwana ne bumba lya buYohane, ukukuma kuli abo Yesu apepele pali Yohane 17:20, 21 ati: “Kabili nshilelombela aba beka, lelo na bakantetekela pa mulandu wa cebo cabo; ukuti bonse babe bamo; ifyo imwe, mwe Tata, mwaba muli ine na ine muli imwe, e fyo na abo babe muli ifwe: ukuleka aba pano isonde batetekele ukuti ni mwe mwantumine.” Nga fintu ibumba lyasubwa lya buYohane libuula ukutungulula pe samba lya kwa Yesu, ibumba likalamba lyapimpa lyakana na bene mu kulwisha kwacilapo ukonaula kwa ba pali bakabalwe mu lyashi lya buntunse lyonse!c

16. (a) Ni shani fintu Yohane alondolola utunwa ne micila ya bakabalwe ba cimpashanya? (b) Ni shani fintu utunwa twa bantu ba kwa Yehova twapekanishiwa ku mulimo? (c) Cinshi cumfwana ku cishinka ca kuti “imicila yabo yapale nsoka”?

¹⁶ Aba pali bakabalwe bakabila imicitile ya nkondo. Kabili fintu Yehova apayanya ici mu kupapusha! Yohane acilondolola ati: “Pantu amaka ya bakabalwe ni mu tunwa twabo e mo yaba, na mu micila yabo (pantu imicila yabo yapale nsoka; yaba ne mitwe, na kuli iyo e ko bacenena).” (Ukusokolola 9:19) Yehova abisha abatumikishi bakwe baipeela, babatishiwa kuli uyu mulimo. Ukupitila mwi Sukulu lya Butumikishi bwa Teokratiki no kulongana kumbi ukwa cilonganino na masukulu, alibasambilisha ifya kushimikila icebo, ica kuti baba na maka ya kulanda mu kuba no bulashi no “lulimi lwa basambilila.” Alibika amashiwi yakwe mu tunwa twabo no kubatuma ukuyalengo kwishibikwa amapingushi yakwe “[pa cintubwingi, NW] na mu ŋanda ne ŋanda.” (2 Timote 4:2; Esaya 50:4; 61:2; Yeremia 1:9, 10; Imilimo 20:20) Ibumba lya buYohane ne bumba likalamba basha ku numa ubukombe busuma, ukumfwana ku “micila,” mu maka ya mamilioni ya maBaibolo, ifitabo, amabroshuwa, na bamagazini ifyaananishiwa pa myaka iingi. Kuli bakakaanya babo, abebwa ulwa ‘kucena’ kuleisa ukufuma kuli Yehova, iyi milalo ya ba pali bakabalwe mu cine cine imoneka ukupala imyanda mishila ibili ya myanda mishila.—Linganyako Yoele 2:4-6.

17. Bushe Inte sha kwa Yehova shalikwatamo ulubali mu kusansa kwa ba pali bakabalwe mu fyalo umo impapulo shishingaananishiwa pa kuti umulimo walibindwa? Londolola.

¹⁷ Icakaniko cacilapo ukupimpa ica aba ba pali bakabalwe cacitwa na bamunyina mu fyalo umo umulimo wa Nte sha kwa Yehova waba pe samba lya kubindwa. Ukupala impaanga mu kati ka mimbulu, aba bali no kuba “abacenjela nge nsoka, kabili abafuuka nge nkunda.” Mu cumfwila kuli Yehova, te kuti baleke ukulanda ulwa fintu ifyo bamona no kuumfwa. (Mateo 10:16; Imilimo 4:19, 20; 5:28, 29, 32) Apo bakwata finono nangu ukukanakwata ifyalembwa ifyakwananya pa cintubwingi, bushe kuti twasondwelelo kuti tabakwata kwakana mu kulwisha kwa ba pali bakabalwe? Nakalya! Balikwato tunwa twabo no bulashi ukufuma kuli Yehova ukufibomfya mu kulumbulula icine ca Baibolo. Ici balacita, mu lyashi na mu kunashanasha, ukwimika amasambililo muli Baibolo no kulenga “abengi ukulungama.” (Daniele 12:3) Nelyo bashingasumina ku micila yabo mu mano ya kusha ifitabo fipama mu kukosa, umulilo wa cimpashanya, icushi, ne libwe lya mingu fifuma mu tunwa twabo lintu bacitilo bunte mu kucenjela na mu kushilimuka ukukuma ku bushiku bwa kwa Yehova bulepalamina ubwa kwebela.

18. Ni mu ndimi shinga kabili ni ku cipendo nshi uko aba aba pali bakabalwe baananya ubukombe bulenge cinkunka mu mibele yapulintwa?

¹⁸ Mu fifulo fimbi, impapulo sha Bufumu shitwalilila ukusansalika ifisambilisho fya cina Babiloni fya Kristendomu ne nshila, ukumuletela ukucena kwamuwaminwa mu nshila ya mampalanya. Mu kubomfya inshila sha kupulintilamo shalingana ne nshita, ili bumba lya ba pali bakabalwe pa myaka 50 pa ntanshi ya 1987 lyali na maka ya kwananya, ukunina ukufika ku ndimi sha pe sonde 200, amaBaibolo, ifitabo, bamagazini, na mabroshuwa ku mpendwa yafulisha ya makope 7,821,078,415—imiku iingi ukucila imyanda mishila ibili ya myanda mishila. Mwandi kusuma uko iyo micila yacita!

19, 20. (a) Nangula ica kulasapo caibela ca bukombe cacite cinkunka caba ni Kristendomu, ni shani ifyo bamo mu fyalo fyabo kutali na Kristendomu baankulako? (b) Ni shani fintu Yohane alondolola ukwankulako kwa bantu mu cinkumbawile?

¹⁹ Yehova afwaile ukuti ubu bukombe bucite cinkunka “ukwipaye cakaniko ca pali fitatu ica bantu.” E co, ica kulasapo ca buko caba Kristendomu. Lelo bwalifika ku fyalo ifyaba ukutali kwa Kristendomu, ukusanshako ne fingi umo ubumbimunda bwa mabutotelo bwa Kristendomu bwaishibikwa bwino. Bushe abantu ba muli ifi fyalo balipalamina kuli Yehova pamo nge cakufuma mu kumona ukucite cinkunka kuli uku kuteyanya kwabola ukwa butotelo? Abengi balicita! Kwabako ukwankulako kwaiteyanya mu kati ka bantu bafuuka na baba no kutemwa abekala mu ntunga ku nse ya mutande wapalamisha wa Kristendomu uwa kusonga. Lelo ku bantu mu cinkumbawile, Yohane alondolola imicitile yabo: “Lelo abantu abashelepo, abashaipaiwe ku [finkunka] ifi, tabalapiile ku milimo ya minwe yabo, ku kuleko kushinshimune fiwa no tulubi twa golde no twa silfere no twa butale no twa libwe no twa cimuti, utushingamona nangu kuumfwa nangu kwenda; kabili tabalapiile ku fya misoka fyabo, nangu ku fya buloshi fyabo, nangu ku fya bulalelale fyabo, nangu ku fya bupupu fyabo.” (Ukusokolola 9:20, 21) Takwakabeko kwalule calo ukwa bashalapila ba musango yo. Bonse abakakatila mu nshila shabo shabipa bakalolenkana no bupingushi bwakosa ukufuma kuli Yehova mu bushiku bukalamba bwa kwebela kwakwe. Lelo ‘onse uukalilila kwi shina lya kwa Yehova akapusuka.’—Yoele 2:32; Ilumbo 145:20; Imilimo 2:20, 21.

²⁰ Ifyo twalanshanyapo lubali lwa kalanda ka cibili. Kuli ifingi ificili no kwisa intanshi aka kalanda takalapwililika, nge fyo tulemona mu fipandwa fyakonkapo.

[Amafutunoti]

[Icikope pe bula 149]

Ukulila kwa ntandala yalenga mutanda kwaletako akalanda ka cibili

[Ifikope pe bula 150, 151]

Bamalaika bane batungulula ukusansa kwacilapo ubukulu mu lyashi lya kale ukwa ba pali bakabalwe

[Ifikope pe bula 153]

Aba pali bakabalwe bashingapendwa baananya amamilioni yashingapendwa ya mpapulo shashimpwa pali Baibolo

[Ifikope pe bula 154]

Abantu abashelepo tabalapiile