Icipandwa 29

Ukwimba Ulwimbo Lupya Ulwa Kucimfya

Icimonwa 9—Ukusokolola 14:1-20

Umutwe wa lyashi: Ba 144,000 bali no Mwana wa mpaanga pa Lupili lwa Sione; ukubilisha kwa bamalaika kwaumfwika ukupulinkane sonde; ukulobolola kwaseepwa

Inshita ya kufikilishiwa: 1914 ukufika ku bucushi bukalamba

 1. Cinshi tusambilile kale kale ukulosha ku Ukusokolola ifipandwa 7, 12, na 13, kabili finshi nomba tulesambilila?

IFYO caba ica kupembesula ukwalukila ku cimonwa cakonkapo ica kwa Yohane! Mu kucilana na mateyanyo yapale finama yabipisha ya ciŋwena, nomba twamona ababomfi ba cishinka aba kwa Yehova ne mibombele yabo mu kati ka bushiku bwa kwa Shikulu. (Ukusokolola 1:10) Kale kale, Ukusokolola 7:1, 3 na kufisulula kuli ifwe ukuti imyela ine iya bonaushi yalishinshibikwa ukufikila bonse 144,000 wa abo basha basubwa bakakatikwa. Ukusokolola 12:17 nakulengo kwishibikwa ukuti aba “basheleko ku bufyashi bwa mwanakashi” babe ica kulasapo caibela ica kwa Satana, iciŋwena, mu kati ka iyo nshita. Kabili Ukusokolola icipandwa 13 mu kumonekesha nakulangisha amateyanyo ya bupolitiki yaimishiwe pe sonde kuli Satana ukuleto kutitikisha kwakulisha no kupakasa kwakaluka pa babomfi ba kwa Yehova ba citetekelo. Lelo uyu mulwani mukalamba te kuti acilime imifwaile ya kwa Lesa! Nomba tulesambilila ukuti ukwabulo kusakamana imibombele ya buluku iya kwa Satana, bonse 144,000 balilonganikwa mu kucimfya.

 2. Kumwena kabela nshi ukwa mpelelekesho ya nsansa uko Yohane atupeela pa Ukusokolola 14:1, kabili Umwana wa mpaanga ni nani?

² Yohane, kabili pamo nankwe ibumba lya buYohane ilelo, apeelwo kumwena kabela kwa cilya ca kufumamo cabamo insansa: “E lyo naloleshe, kabili moneni, Umwana wa mpaanga naiminina pa lupili lwa Sione, kabili pamo nankwe pali aba makana umwanda umo na makana amakumi yane na makana yane, abakwate shina lyakwe ne shina lya kwa Wishi lyalilembwa pa mpumi shabo.” (Ukusokolola 14:1) Nge fyo tumwene, uyu Mwana wa mpaanga e umo wine nga Mikaele uwasangulwile imyulu mu kutamfyamo Ciwa ne fibanda fyakwe. E Mikaele u o Daniele alondolola nga “uwimininina abantu [ba kwa Lesa]” lintu alepekanya ‘ukwiminina’ mu kuputunkanya amapingushi yalungama ya kwa Yehova. (Daniele 12:1; Ukusokolola 12:7, 9) Ukutula 1914 uyu Mwana wa mpaanga wa kwa Lesa waipeele bulilambo aiminina pa Lupili Sione nge Mfumu ya buMesia.

 3. “Ulupili Sione” cinshi apo Umwana wa mpaanga na ba 144,000 ‘beminine’?

³ Cili fye kwati fintu Yehova asobele ati: “Ine ninsansabike mfumu yandi pa Sione, ulupili lwandi lwa mushilo.” (Ilumbo 2:6; 110:2) Ici tacilosha na kabili ku Lupili lwa Sione lwa pe sonde, icifulo ca mibele ya mpanga ca Yerusalemu wa pe sonde, muli uyu musumba ishamfumu sha buntunse sha mutande wa kwa Davidi shaleteka. (1 Imilandu 11:4-7; 2 Imilandu 5:2) Iyo, pantu Yesu, pa numa ya mfwa yakwe no kubuuka mu 33 C.E., abikilwe nge libwe lya pa cifutu pa Lupili lwa Sione wa ku mulu, icifulo ca mu mulu umo Yehova apampamine ukubika mu “musumba wa kwa Lesa wa mweo, Yerusalemu wa mu mulu.” E co, “Ulupili lwa Sione” pano lwimininako icifulo casumbuka ca kwa Yesu ne mpyani mbiye, abapanga Yerusalemu wa mu mulu, uwaba Ubufumu. (AbaHebere 12:22, 28; Abena Efese 3:6) Caba cifulo cakatama ca cifumu kuli ico Yehova abasumbwila mu kati ka bushiku bwa kwa Shikulu. Pa myanda ya myaka iingi, Abena Kristu basubwa, nga “amabwe ya mweo,” mu kupamfiwa balolesha ku ntanshi ku kwiminina pali lulya Lupili lwa Sione wa mu mulu, abaikatana na Shikulu Yesu Kristu wakatamikwa mu Bufumu bwakwe bukankaala.—1 Petro 2:4-6; Luka 22:28-30; Yohane 14:2, 3.

 4. Ni shani caba ukuti ba 144,000 bonse beminine pa Lupili lwa Sione?

⁴ Yohane amona te Yesu eka fye lelo ibumba lyapwililika ilya ba 144,000 impyani mbiye sha Bufumu bwa mu mulu nabeminina pa Lupili lwa Sione. Pa nshita bemininweko ku cimonwa, abengi, lelo te bonse, aba 144,000 bali kale kale mu mulu. Pa numa mu cimonwa cimo cine, Yohane asambilila ukuti bamo aba bashila bacili no kushipikisha no kufwa aba citetekelo. (Ukusokolola 14:12, 13) Mu kushininkisha, lyene, bamo aba ba 144,000 bacili pe sonde. E co ni shani Yohane amona bonse bene ukwiminina na Yesu pa Lupili lwa Sione?a Ni mu kuti, nge filundwa fya cilonganino ca Bena Kristu basubwa, aba nomba bapalamina “ku lupili Sione, ku musumba wa kwa Lesa wa mweo, Yerusalemu wa mu mulu.” (AbaHebere 12:22) Ukupala Paulo lintu acili pe sonde, kale kale—mu mano ya ku mupashi—balisumbulwa mu kuba na Kristu Yesu mu fifulo fya mu mulu. (Abena Efese 2:5, 6) Ukulundapo, mu 1919 bayankwile ku bwite bwa kuti, “Nineni, mwise kuno,” kabili mu nshila ya mampalanya “baninine baile mwi kumbi.” (Ukusokolola 11:12) Mu cilola ca aya malembo, kuti twamona ifyo bonse ba 144,000—ukulandila lwa ku mupashi—baba pa Lupili lwa Sione pamo na Yesu Kristu.

 5. Mashina ya bani yalembwa pa mpumi sha ba 144,000, kabili kulumbuka nshi kwe shina limo na limo?

⁵ Ba 144,000 tabakwata lubali pamo na bakapepa ba ciswango, abalembwa impendwa ya cimpashanya 666. (Ukusokolola 13:15-18) Mu kucilana, aba aba cishinka bakwata ishina lya kwa Lesa ne lya Mwana wa mpaanga ukulembwa pa mpumi shabo. Ukwabulo kutwishika Yohane, umuYuda, alimwene ishina lya kwa Lesa mu filembo fya ciHebere, יהוה.b Mu kukwata ishina lya kwa Wishi kwa Yesu mu cilangililo ukulembwa pa mpumi shabo, aba bakakatikwa balengwo kwishibikwa kuli bonse ukuti bali inte sha kwa Yehova, abasha Bakwe. (Ukusokolola 3:12) Ukukwata kwabo ishina lya kwa Yesu ukulangishiwa pa mpumi shabo cilangililo kuti balasuminisha ukuba abanonkwa na wene. Wene e “mulume” wabo uwa bakobekela, kabili bali “nabwinga” wakwe wenekelwa, “icibumbwa cipya” babombela Lesa mu kuba no bumi bwa mu mulu mu cilolwa. (Abena Efese 5:22-24; Ukusokolola 21:2, 9; 2 Abena Korinti 5:17) Ukwampana kwabo kwapalamisha na Yehova na Yesu Kristu kwambukila amatontonkanyo yabo yonse ne mibombele.

Ukwimba Kwati Lwimbo Lupya

 6. Kwimba nshi uko Yohane aumfwa, kabili akulondolola shani?

⁶ Mu kuumfwana ne ci, Yohane ashimika ati: “Naumfwile ne shiwi mu mulu, nge shiwi lya menshi ayengi, kabili nge shiwi lya cibulumo cikalamba; ishiwi ilyo naumfwile lyali nga bakalisha wa masese abalelisha amasese yabo; [kwati, “NW”] baleimbo lwimbo lupya ku cinso ca cipuna ca bufumu, na ku cinso ca fya mweo fine na bakalamba; kabili takwali uwaishibe ukusambililo lo lwimbo, kano aba makana umwanda umo na makana amakumi yane na makana yane abalubwilwe pe sonde.” (Ukusokolola 14:2, 3) Tacili ca kupapa ukuti Yohane, pa kuumfwa amashiwi ya ba 144,000 yailundile muli korasi umo wabamo kulongoloka, aibukishiwa ulwa kubuluma kwa fipooma fya menshi no kubuluma. Ifyo kwawama kulya kuisanshamo kwapale sese! (Ilumbo 81:2) Libumba lya bakemba nshi pe sonde lingafika kuli iyo korasi yawamisha?

 7. (a) Lwimbo lupya nshi ulwa Ukusokolola 14:3? (b) Ni shani caba ukuti ulwimbo lwa pe Lumbo 149:1 lupya mu kasuba kesu?

⁷ Kabili cinshi ulu “lwimbo lupya”? Nge fyo tumwene mu kulanshanya Ukusokolola 5:9, 10, ulwimbo lubomba ne mifwaile ya Bufumu bwa kwa Yehova no kupayanya kwakwe kwa kusungusha, ukupitila muli Yesu Kristu, ku kucita Israele wa ku mupashi ‘ishamfumu kabili bashimapepo ba kwa Lesa wesu.’ Lwaba lwimbo lwa kulumba Yehova ukusabankanya ifintu fipya alepwilikisha ukupitila muli Israele wa kwa Lesa na ku busuma bwakwe. (Abena Galatia 6:16) Ifilundwa fya uyu Israele wa ku mupashi fyankula ku bwite bwa kwa kemba we lumbo ubwa kuti: “[Lumbeni Jah, imwe mwe bantu!, NW] Imbileni Yehova ulwimbo lupya, ulwa kumutashisha mu kulongana kwa babile bakwe; lekeni Israele asaminwe mu Wamulenga, lekeni abana ba Sione baangile mu Mfumu yabo.” (Ilumbo 149:1, 2) Cine cine, ayo mashiwi yalembelwe imyanda ya myaka iingi yapitapo, lelo mu kasuba kesu, yaimbwa no kwiluka kupya. Mu 1914 Ubufumu bwa buMesia bwalifyelwe. (Ukusokolola 12:10) Mu 1919 abantu ba kwa Yehova pe sonde batendeke ukubilishe “cebo ca bufumu” no kupimpa kwa bukululwa. (Mateo 13:19) Ukubimbulwa kwi lembo lya mwaka lya Sosaite ilya 1919 (Esaya 54:17) no kukoseleshiwa ku kubweshiwa kwabo kuli paradise wa ku mupashi, batendeke muli ulya mwaka ‘ukwimba kuli Yehova ukuba no lwimbo mu mitima yabo.’—Abena Efese 5:19, NW.

 8. Caba shani ukuti ba 144,000 beka fye ebaba na maka ya kusambilila ulwimbo lupya ulwa pa Ukusokolola 14:3?

⁸ Mulandu nshi, nangu ni fyo, ukuti beka fye ba 144,000 ebaba na maka ya kusambilila ulwimbo lwalumbulwa pa Ukusokolola 14:3? Pantu lwakwata ukubomba ne fya kukumanya fyabo nge mpyani shasalwa sha Bufumu bwa kwa Lesa. Bena beka e bapokelelwa nga bana ba kwa Lesa no kusubwa no mupashi wa mushilo. Bena beka ebashitwa ukufuma pe sonde ukuba ulubali lwa bulya Bufumu bwa mu mulu, kabili bena beka “bakaba bashimapepo . . . kabili bakateka [nge shamfumu, NW]” pamo na Yesu Kristu pa myaka ikana limo ukuleta umutundu wa muntu ku kupwililika. Bena beka e bamonwa “[kwati, NW] baleimbo lwimbo lupya” ku cinso cine ca kwa Yehova.c Ifi fya kukumanya fyaibela ne filolelo fibapeela ukutesekesha kwaba kweka ukwa Bufumu no kubalenga ukwimba pa lwa bwene mu nshila ya kuti takwingaba nangu umo umbi uwingacita.—Ukusokolola 20:6; Abena Kolose 1:13; 1 Abena Tesalonika 2:11, 12.

 9. Ni shani ibumba likalamba lyaankula ku kwimba kwa basubwa, kabili kukonkomesha nshi uko bapokelela muli ico?

⁹ Nangu ni fyo, bambi balakutika no kwankula ku kwimba kwabo. Ukutula 1935 ibumba likalamba lilekula ilya mpaanga shimbi lyalyumfwa ulwimbo lwabo lwa kucimfya kabili baliseshiwa ukuilunda kuli bene mu kusabankanyo Bufumu bwa kwa Lesa. (Yohane 10:16; Ukusokolola 7:9) Cine cine, aba abeni te kuti basambilile ukwimba mu kulungatika ulwimbo lupya lumo lwine ulo bakateka ba nshita ya ku ntanshi a ba Bufumu bwa kwa Lesa bemba. Lelo na bo bene babilisha muli korasi walongoloka uwa kulumba Yehova ulwaba ulwimbo lwa kusabankanya Yehova ku fintu fipya ifyo wene alepwilikisha. Muli fyo bafikilisha ukukonkomesha kwa kwa kemba we lumbo ukutila: “Imbeni kuli Yehova ulwimbo lupya, imbeni kuli Yehova, mwe ba pano isonde bonse; imbeni kuli Yehova, cindikeni ishina lyakwe; bileni ukupususha kwakwe akasuba na kasuba. Londolweleni ubukata bwakwe mu nko, ifipesha amano fyakwe mu bantu na bantu bonse. Tuutubuleni Yehova, mwe ndupwa sha bantu na bantu bonse, tuutubwileni Yehova ubukata no bukose! Soseni mu nko, amuti, Yehova aleteka.”—Ilumbo 96:1-3, 7, 10; 98:1-9.

10. Ni shani cingacitika ukuti ba 144,000 bembe “pa cinso” ca bakalamba ba cimpashanya 24?

¹⁰ Ni shani ba 144,000 bengemba “ku cinso” ca bakalamba, apo abakalamba 24 ni ba 144,000 mu cifulo cabo ca bukata ica mu mulu? Mu kubangilila mu bushiku bwa kwa Shikulu, abo “bafwila muli Kristu” babuushiwe nge fibumbwa fya ku mupashi. Muli fyo, Abena Kristu basubwa aba citetekelo abacimfya nomba baba mu mulu, mu cilangililo ukufikilisha imibombele yalinganishiwa ku ya fyakaniko 24 ifya bakalamba ba bushimapepo. Basanshiwa mu cimonwa ca kuteyanya kwa kwa Yehova ukwa ku mulu. (1 Abena Tesalonika 4:15, 16; 1 Imilandu 24:1-18; Ukusokolola 4:4; 6:11) Abashalapo ba ba 144,000 bacili pe sonde muli fyo bemba ulwimbo lupya pa ntanshi, nelyo mu cilola ca, bamunyinabo babuushiwa mu mulu.

11. Mulandu nshi bakacimfya basubwa baloshiwako pamo nga bakalamba 24 pamo pene na ba 144,000?

¹¹ Pali ici cishinka kabili kuti twaipusha atuti: Mulandu nshi aba bakacimfya basubwa baloshiwako pamo nga bakalamba ba cimpashanya 24 pamo pene na ba 144,000? Cili ni pa kuti Ukusokolola kumona ili bumba limo ukufuma ku mimwene yalekanalekana ibili. Abakalamba 24 lyonse balangwa mu cifulo cabo ca kupelako ukushinguluka icipuna ca bufumu ca kwa Yehova, ukubikwa pa fipuna nge shamfumu na bashimapepo mu myulu. Balangilila ibumba lyonse ilya ba 144,000 mu cifulo cabo ca mu mulu, nangula pali nomba abashalapo banono ba aba bacili pe sonde. (Ukusokolola 4:4, 10; 5:5-14; 7:11-13; 11:16-18) Ukusokolola icipandwa 7, nangu cibe fyo, kutonta pali ba 144,000 nga bashitwa ukufuma mu mutundu wa muntu, kabili kwebekesha imifwaile ikalamba ya kwa Yehova iya kukakatika impendwa yapwililika ya bena Israele ba ku mupashi umo umo no kupeele pusukilo kwi bumba likalamba lishingapendwa. Ukusokolola icipandwa 14 kupayanya icikope cebekesha ukuti ibumba lya Bufumu ilyapwililika ilya ba 144,000 bakacimfya umo umo likalongana no Mwana wa mpaanga pa Lupili lwa Sione. Imilingo ili no kufikwapo pa kupendwa na ba 144,000 na yo yalilengwa ukwishibikwa, nge fyo twalamona.d

Abakonko Mwana wa Mpaanga

12. (a) Ni shani Yohane atwalilila ubulondoloshi bwakwe bwa ba 144,000? (b) Ni mu kumoneka nshi umo ba 144,000 baloshiwako nga bashatalile abopa?

¹² Ukutwalilila ubulondoloshi bwakwe bwa ba 144,000 “abalubwilwe pe sonde,” Yohane atweba ati: “Bene e bashakoweshiwe ku banakashi, pantu bashatalile abopa; aba e bakonko Mwana wa mpaanga konse uko aya; bene balubwilwe mu bantu, babe fisabo ifyabalilapo ukupya kuli Lesa na ku Mwana wa mpaanga. Na mu tunwa twabo tamwasangilwe ica bufi; bantu babulwa akalema.” (Ukusokolola 14:4, 5) Icishinka ca kuti ba 144,000 “bashatalile abopa” tacipilibula ukuti ifilundwa fya ili bumba mu kubako tabaupile ku mubili. Umutumwa Paulo alembele ku Bena Kristu abakwete ubwite bwa ku mulu ukuti, nangu cingatila kwabako ukumwenako ku bushimbe bwa Bwina Kristu, ukuupa kulasoobolwapo pe samba lya mibele imo imo. (1 Abena Korinti 7:1, 2, 36, 37) Icishibisha ili bumba kukanaupa kwabo lwa ku mupashi. Balisengauka ubucende bwa ku mupashi na mapolitiki ya mu calo kabili no butotelo bwa bufi. (Yakobo 4:4; Ukusokolola 17:5) Pamo nga nabwinga wakobekelwa wa kwa Kristu, baisunga abene beka abasanguluka, “mu kati ka nkulo iyapondama kabili iyapuuluka.”—Abena Filipi 2:15.

13. Mulandu nshi ba 144,000 babela nabwinga walinga wa kwa Yesu Kristu, kabili ni shani batwalilila ‘ukukonka Umwana wa mpaanga konse uko aya’?

¹³ Ukulundapo, “na mu tunwa twabo tamwasangilwe ica bufi.” Muli ici, bapala Imfumu yabo, Yesu Kristu. Ngo muntunse wapwililika, “wene tacitile ulubembu, no bucenjeshi tabwasangilwe mu kanwa kakwe.” (1 Petro 2:21, 22) Mu kuba capamo ukwabula akalema kabili aba cine, ba 144,000 bapekaniwa nga nabwinga wa musangwela uwa kwa Shimapepo Mukalamba uwa kwa Yehova. Ilyo Yesu ali pano isonde, aitile aba mitima yalungama ukumukonka. (Marko 8:34; 10:21; Yohane 1:43) Abo bayankwileko bapashenye inshila yakwe iya bumi no kumfwila ifisambilisho fyakwe. Muli fyo, mu kati ka mulimo wabo pe sonde, batwalilila ‘ukukonka Umwana wa mpaanga konse uko aya’ nge fyo abatungulula ukupulinkana mu calo ca kwa Satana.

14. (a) Caba shani ukuti ba 144,000 babe ‘ifisabo fya kubalilapo ukupya kuli Lesa na ku Mwana wa mpaanga’? (b) Ni mu mano nshi umo ibumba likalamba lyabela ifisabo fya kubalilapo ukupya?

¹⁴ Ba 144,000 “balubwilwe pe sonde,” “balubwilwe mu bantu.” Bapokelelwa nga bana ba ku mupashi ba kwa Lesa, kabili pa numa ya kubuushiwa kwabo, tabakabe na kabili abantunse fye aba munofu no mulopa. Nge fyo cilumbwilwe mu cikomo 4, “babe fisabo ifyabalilapo ukupya kuli Lesa na ku Mwana wa mpaanga.” Cine cine, ku numa mu mwanda wa myaka wa kubalilapo, Yesu aali “icisabo ca ntanshi ku balaala [mu mfwa, NW].” (1 Abena Korinti 15:20, 23) Lelo ba 144,000 baba “umusango wa fisabo” fya mutundu wa muntu ushapwililika, bashitwa kwi lambo lya kwa Yesu. (Yakobo 1:18) Nangu ni fyo, ukulonganikwa kwa fisabo ukufuma mu mutundu wa muntu takupwila pali bene. Ibuku lya Ukusokolola kale kale lyasonta ku kulobolola kwe bumba likalamba lishingapendwa abo bapuunda kwi shiwi likalamba abati: “Ipusukilo lya kwa Lesa wesu uwaikala pa cipuna ca bufumu, ne lya Mwana wa mpaanga.” Ili bumba likalamba likapusunsuka ubucushi bukalamba, kabili lintu batwalilila ukupembesulwa ku “tumfukumfuku twa menshi ya mweo,” bakasumbwilwa ku kupwililika kwa buntunse pe sonde. Inshita imo pa numa ya bucushi bukalamba, Imbo ikafumishiwamo, ne minshipendwa ya mamilioni ya bantunse bambi bakabuushiwa no kukwata ishuko lya mu nshita ilya kunwa ukufuma ku menshi ya mweo yamo yene. Mu kuba ne co mu muntontonkanya, kuti calungama ukwita ibumba likalamba ifisabo fya kubalilapo ukupya ifya mpaanga shimbi—bali e bakubalilapo ‘ukusamba amalaya yabo no kuyabuutusha mu mulopa wa Mwana wa mpaanga’ mu kuba ne subilo lya kwikala kuli pe na pe pe sonde.—Ukusokolola 7:9, 10, 14, 17; 20:12, 13.

15. Kuumfwana nshi kwabako pa kati ka fisabo fya kubalilapo ukupya fyalekanalekana fitatu ne mitebeto yasefiwe pe samba lye Funde lya kwa Mose?

¹⁵ Ifi fisabo fya kubalilapo ukupya fitatu (Yesu Kristu, ba 144,000, ne bumba likalamba) fyakwata ukumfwana kwabamo ukusekelela mu mitebeto yalesefiwa ukulingana ne Funde lya pa kale lya kwa Mose. Pa Nisani 16, mu kati ka Mutebeto wa Mikate Ishatutumuka, umwanshi wa fisabo fya kubalilapo ukupya wa kusombola kwa bare wapeelwe kuli Yehova. (Ubwina Lebi 23:6-14) Nisani 16 bwali e bushiku ubo Yesu abuushiwe ukufuma ku bafwa. Pa bushiku bwalenga 50 ukufuma pa Nisani 16, mu mweshi wa butatu, abena Israele basefeshe umutebeto wa kusombola kwa fisabo fibalilapo ukupya ifya kulobolola kwa ngano. (Ukufuma 23:16; Ubwina Lebi 23:15, 16) Uyu mutebeto waishileitwa Pentekoste (ukufuma kwi shiwi lya ciGreek ilipilibula “ifyalenga amakumi yasano”), kabili pali ni pa Pentekoste 33 C.E. e po ifilundwa fya kubalilako fya 144,000 fyasubilwe no mupashi wa mushilo. Mu kupelako, mu mweshi wa cinelubali lintu ukulobolola konse kwalonganikwe, kwali Umutebeto wa Nsakwe, inshita ya kupeelo kutootela kwa kusekelela ilyo abena Israele baikele umulungu onse mu nsakwe shacitilwe, pa kati ka fintu fimbi, ne misambo ya tuncindu. (Ubwina Lebi 23:33-43) Mu kuumfwanako, ibumba likalamba, ababa ulubali lwa kulonganika kukalamba, bapeela ukutootela pa ntanshi ya cipuna ca bufumu mu kuba ne “misambo ya tuncindu mu minwe yabo.”—Ukusokolola 7:9.

Ukubila Imbila Nsuma ya Muyayaya

16, 17. (a) Yohane amona malaika alepupuka kwi, kabili kubilisha nshi uko malaika alecita? (b) Ni bani babimbwamo mu mulimo wa kushimikilo Bufumu, kabili fyakukumanya nshi filangilila ici?

¹⁶ Yohane mu kukonkapo alemba ati: “E lyo namwene malaika umbi alepupuka mu kati ka mulu, akwete imbila nsuma ya muyayaya ya kubila ku baikala pe sonde, na ku luko lonse no mukowa no lulimi na bantu, alesose shiwi likalamba, ati, Tiineni Lesa, no kumupeelo mucinshi, pa kuti naiise nshita ya bupingushi bwakwe; pepeni uwacitile umulu ne calo na bemba no tumfukumfuku twa menshi.” (Ukusokolola 14:6, 7) Malaika alepupuka “mu kati ka mulu,” umo ifyuni fipupuka. (Linganyako Ukusokolola 19:17.) E co, ishiwi lyakwe kuti lyaumfwika ukushinguluka icibulungwa conse. Mwandi butali bwacilapo ukukula ukucila pali lipoti wa lyashi ilipi ilya pa televisioni ilili lyonse ilitumwa apo uku kubilisha kwa kwa malaika ukwa mu kusaalala kwa calo kupela!

¹⁷ Uuli onse alekonkomeshiwa ukutiina, te ciswango ne cimpashanya ca ciko, lelo Yehova, uwakwatisha amaka yashingalinganishiwako ukucila pa ciswango icili conse ica cimpashanya calamwa kuli Satana. Pantu, Yehova abumbile umulu ne sonde, kabili nomba inshita naiisa iya kuti wene apingule sonde! (Linganyako Ukutendeka 1:1; Ukusokolola 11:18.) Lintu ali pe sonde, Yesu aseseme ukukuma ku bushiku bwesu ati: “Ne mbila nsuma iyi ya bufumu ikabilwa ku fyalo fyonse ku kubo bunte ku nko shonse; e lyo impela ikesa.” (Mateo 24:14) Icilonganino ca Bena Kristu basubwa cilafikilisha uku kutumwa. (1 Abena Korinti 9:16; Abena Efese 6:15) Ukusokolola pano kufisulula ukuti bamalaika bashimoneka na bo balibimbwa muli uyu mulimo wa kushimikila. Ifyo ilingi line ubutungulushi bwa bumalaika bumoneka mu kuleta umo uwa Nte sha kwa Yehova ku ŋanda uko umweo wapelelwa walefuluka, nelyo fye ukupepela, ukwaafwa kwa ku mupashi!

18. Ukulingana na malaika alepupuka mu kati ka mulu, ni nshita ya cinshi yafika, kabili ni bani bakalacita ukubilisha kwalundwapo?

¹⁸ Nga fintu malaika alepupuka mu kati ka mulu abilisha, inshita ya bupingushi naifika. Bupingushi nshi ubo Lesa nomba alepeela? Amatwi yakawela pa kubilisha nomba kuli no kucitwa kuli bamalaika uwa cibili, uwa citatu, uwa cine, no wa cisano.—Yeremia 19:3.

[Amafutunoti]

[Ifikope pe bula 202, 203]

144,000

Abakalamba 24

Impyani shinankwe sha Mwana wa mpaanga, Kristu Yesu, nga fintu bamonwa ukufuma ku mimwene ibili iyalekanalekana