Ubumi bwa kwa Yesu no Butumikishi

Ukusansalikwa ku Filangililo fye Bala lya Myangashi

YESU ali pe tempele. Napesha amano intungulushi sha butotelo abafwaile ukwishiba ni ku maka ya kwa ani alecitila ifintu. Pa ntanshi tabalapuputuka ukufuma ku kufulunganishiwa kwabo, Yesu aipusha ukuti: “Muletila shani?” Kabili lyene pa kubomfya icilangililo abalanga umusango wa bantu mu cine cine bali.

“Umuntu ali na bana baume babili,” e fintu Yesu ashimika. “Aile ku wa ntanshi, ati, We mwana, kabiye, kabombe lelo mwi bala lya myangashi; na o alyaswike, ati, [Ee mukwai, lelo taile, NW.] Aile na ku wa cibili, asosele ifyo fine; na o alyaswike, ati, [Nshayeko. Pa numa alangulwike no kuya, NW.] Bushe ni ani pali abo babili acitile icafwaile wishi?” e fintu Yesu aipusha.

“Uwa pa numa,” (NW) e fintu bakakaanya bakwe bayasuka.

E co Yesu alondolola ukuti: “Ndemwebe cine cine, nati, bakasangula na banakashi bacilende balemutangilila ukwingila mu bufumu bwa kwa Lesa.” Bakasangula na banakashi bacilende, mu kupalako, pa kubalilapo balikeene ukubombela Lesa. Lelo lyene, ukupala umwana wa bubili, balilapile no kubombela wene. Pa lubali lumbi, intungulushi sha butotelo, ukupala umwana wa ntanshi, baitungile ukubombela Lesa, lelo, nga fintu Yesu amona: “Yohane [Kabatisha] aishile kuli imwe mu nshila ya bulungami, na imwe tamwamutetekele; awe bakasangula na banakashi bacilende balimutetekele, lelo imwe nangu ilyo mwamwene tamwalapiile pa numa no kumutetekela.”

Yesu mu kukonkapo alanga ukuti ukufilwa kwa ishi ntungulushi sha butotelo takuli fye ni mu kulekelesha ukubombela Lesa. Iyo, lelo mu cine cine bali bantu babipa, imbifi. “Kwali umuntu umwine wa ŋanda,” e fintu Yesu ashimika, “uwalimine ibala lya myangashi, ashingulwisheko no lubao, aimbilemo no mwa kukamina, no kukuulo lupungu; kabili aliseekeshe ku balimi, no kuya kumbi. Awe ilyo yapaleme inshita ya fisabo, atumine abasha bakwe ku balimi ku kupokako ifisabo fyakwe; na balimi baikete abasha bakwe, umo balimuumine, umbi balimwipeye, na umbi bamupoolele amabwe. Atumine kabili abasha bambi, abafulo kucila aba ntanshi; kabili babacitile ifyo fine.”

“Abasha” bali ni bakasesema abo “umwine wa ŋanda,” Yehova Lesa, atumine ku “balimi” abe “bala lya myangashi” lyakwe. Aba abalimi bali beminishi bakalamba aba luko lwa kwa Israele, uluko ulo Baibolo ishibisha nge “bala lya myangashi” ilya kwa Lesa.

Apantu “abalimi” basunga bubi bubi no kwipaya “abasha,” Yesu alondolola ukuti: “Pa numa [umwine we bala lya myangashi] atumine kuli bene umwana wakwe umwaume, ati, Bakacindiko mwana wandi. Lelo abalimi balya, pa kumono mwana wakwe, basoshenye abene, abati, Uyu e mpyani; aleni tumwipaye no kukwate bala lya myangashi. Kabili balimwikete, bamufumishe mwi bala lya myangashi, no kumwipaya.”

Nomba, pa kulanda ku ntungulushi sha butotelo, Yesu aipusha ukuti: “Ilyo akesa umwine ibala lya myangashi, akacita shani ku balimi balya?”

“Pa mulandu wa kuti babi” (NW) e fyo bayasuka, “Akabonaule cibi ababi balya . . . no kuseekeshe bala lya myangashi ku balimi bambi, abakalamupeele fisabo mu nshita sha fiko.”

Intungulushi sha butotelo muli fyo mu kukaanaishiba babilisha ubupingushi pa bene bene, apantu nabasanshiwamo mu “balimi” abena Israele abe “bala lya myangashi” ilya luko ilya kwa Yehova ilya kwa Israele. Ifisabo ifyo Yehova enekela ukufuma ku balimi ba musango yo citetekelo mu Mwana wakwe, Mesia wa cine. Pa mulandu wa kufilwa kwabo ukupayanya ifisabo fya musango yo, Yesu asoko kuti: “Bushe tamwatala amubelenga mu malembo [pe Ilumbo 118:22, 23], icatila: Ilibwe ilyo bakakuula basuulile, lyene lyabo mutwe wa pa cifutu: ici e cacita [Yehova, NW], kabili cabe ca kupapa mu menso yesu? Pa mulandu wa ici ndemweba, nati, ubufumu bwa kwa Lesa bukapokwa kuli imwe no kupeelwa ku luko ululetwale fisabo fya buko. Umuntu uukaponena pe bwe ili akafungaika, no yo likaponenapo likamushonaula.”

Bakalemba na bashimapepo bakalamba nomba bailuka ukuti Yesu alelanda pa lwa bene, kabili bafwaya ukumwipaya, “impyani” yakwate nsambu. E co ishuko lya kuba bakateka mu Bufumu bwa kwa Lesa likapokwa ukufuma kuli bene ngo luko, kabili uluko lupya ulwa ‘balimi be bala lya myangashi’ lukalengwa, lumo ulukaletako ifisabo fyalinga.

Pa mulandu wa kuti intungulushi sha butotelo batiina amabumba, abalanguluka Yesu ukuba kasesema, tabeseshe ukumwipaya pali aka kashita. Mateo 21:28-46; Marko 12:1-12; Luka 20:9-19; Esaya 5:1-7.

◆ Ni bani bantu abana babili mu cilangililo ca kubalilapo ica kwa Yesu bemininako?

◆ Ni bani baimininwako ku “mwine wa ŋanda,” “ibala lya myangashi,” “abalimi,” “abasha,” ne “mpyani” mu cilangililo ca bubili?

◆ Cinshi cikacitika ku ‘balimi be bala lya myangashi,’ kabili ni bani bakabapyana?