Ifya Kukumanya Ukusonsomba kwa Mibele Isuma iya Kuba Abapiina

“ABANTU baba abapiina pa mulandu wa kuti banaŋani,” e fyatungile dokota umo uwa ku Africa. “Umusumba waisulamo na bashibomba ncito. Nga ca kuti mu cituntulu balifwaile incito, kuti baisanga. Tacilekabilwa ku muntu uuli onse ukuba mu bupiina ilelo.”

Kwalibako ukutwishika kunono ukwa kuti abantu bamo baba abanaŋani kabili ukuti ubunaŋani kuti bwatungulula ku bupiina. Baibolo isosa ukuti: “Utulo tunono, ukushinshila kunono, ukolopa amaboko kunono pa kusendama: kabili ubupina bobe buleisa nge cipondo, no kubulwa kobe ngo muntu uwasakalala.” (Amapinda 24:33, 34) Nangu cibe fyo, abantu abapiina abengi te banaŋani. Ku ca kumwenako, languluka umwaume uwalembele ukuti: “Ukufika kuli ino nshita tuumfwe nsala, tuumfwe cilaka, tuli ubwamba, kabili tutuutwamo ififunshi, tuli ngulufi.” (1 Abena Korinti 4:11) Uushibombe ncito uushingondapwa? Nakalya. Ayo mashiwi yalembelwe no mutumwa Paulo. Asalilepo ukwikala ubumi ubwa nshila yapelela mu fya bunonshi pa kuti engasupila mu kucilapo kuwama ubutumikishi bwa Bwina Kristu. Kumo ukwa kupusulwa kwakwe kwaliko pa mulandu wa mibele iyacilile pa kulama kwakwe, pamo ngo kupakaswa kwa butotelo.

Ilelo, abengi aba bapiina ba mu calo baba finakabupalu fya mibele yacila pa kulama kwabo—nakalimo ukubulisha amasomo, ukufilwa kwa fya bunonshi fya mu mwabo, nelyo icimfulumfulu ca mapolitiki. Abengi balashomboka ukufuma mu kubangilila kwa lucelo ukufika ubushiku kabili limo limo bakumanisha imikalile. Amashuko ku kunonka mu fya ndalama ukupitila mu nshila shabulo bufumacumi kuti pambi yamoneka aya kucebusha, nangu fye ayakabilwa. Kwena, e fyo bamo bengapelulula ukuti Baibolo ilasuminisha ukulekelako kwa mu kashita ukwa mibele isuma! Na kuba, ilasosa ukuti: “Abantu [tabasuula, NW] fye umupupu ilyo aiba ku kupansho mweo wakwe ilyo ali ne nsala.” Kabili umuntu wa mano apepele ukuti: ‘Shi nibo mupiina no kwiba mu cituntulu.’—Amapinda 6:30; 30:8, 9.

Ubufumacumi—Icifulo ca Baibolo

Bushe aya malembo ya mu Baibolo mu cituntulu yalapeela ukusuminisha kwaumfwika ku kubulwa ubufumacumi? Cisuma, lekeni tubebete yene mu mashiwi ya yako ayashingulukako. Pa numa ya kwishiba ukuti abantu tabasuula umupupu ilyo aiba ku kwisusha ifumo lyabulamo akantu, Amapinda 6:31 yatwalilila ukuti: “Nga asangwa, akabweseshapo imiku cinelubali, no kupeele fyuma fyonse fya mu ŋanda yakwe.” Mu mashiwi yambi, lintu umupupu aikatwa, alolenkana no kukanda kwakumanina ukwe funde. Alalipila pa musoka wakwe! Ukucila ukukoselesha ukwiba, kanshi, aya mashiwi yasoka abantu bapiina ukuti ukwiba kuti kwafumamo ukulufya kwalundwapo ukwa fya bunonshi, ukulengwe nsoni ku bene bene na ku ndupwa shabo, no kulufya umucinshi wa pa lwabo.

Lelo ni shani pa lwe pepo lya muntu wa mano? Aipwishe ukuti tafwile ukwingila mu bupiina “no kwiba, kabili napelule shina lya kwa Lesa wandi.” (Amapinda 30:9) Ee, ukubulwa ubufumacumi pa lubali lwa muntu uutunga ukubombela Yehova kuti kwaleta umuseebanya pe shina lya kwa Lesa kabili na pa cilonganino ca bantu Bakwe. Umutumwa Paulo alembele ukuti: “We ubila, auti, Leko kwiba, bushe uleba?” Nga ca kuti bamo abaitunga ukuba Abena Kristu balibile, ici kuti calenga ‘ishina lya kwa Lesa ukupontelwa pa kati ka nko.’—Abena Roma 2:21, 24.

Ni pa mulandu usuma, lyene, Baibolo isosela ukuti: “Shimakabe uwenda muli bumpomfu bwakwe aliwama ukucilo wapondame mibele, nelyo abo mucindami.” (Amapinda 28:6) Nangula umwine wine alibulishe mu fikwatwa pa nshita shimo, umutumwa Paulo tatekeleshe nelyo ukwalukila ku kubulwa ubufumacumi. Mu cifulo ca ico, alembele ukuti: “Uwibile eiba kabili; lelo ukucila acucutike, alebomba ku minwe yakwe icawama, ukuti akwate ica kupeelako uwakabila.”—Abena Efese 4:28.

Ukupikulula: Kucetekela Muli Lesa

Ni shani pa lwa abo ababombesha lelo te kuti bakwate ishakumanina ku kusakamana indupwa shabo shine? Bushe ukubulwa ubufumacumi nelyo fye kwiba kwalilungamikwa mu mulandu wabo, ukucilisha nga ca kuti ukulwala kwapama icilundwa ca lupwa nelyo ica bukangalume cimo cacitika? Abantu bamo balatontonkanye fyo. E fyasosele umwikashi umo uwa mpanga ya mu Africa ukuti: “Mu calo cesu, nga ca kuti uli umufumacumi, tawakekale. Nga ca kuti ulefwaya ukupusunsuka, ukabila ukukwata ifinshonko finono mu nshila yobe iya bumi.”

Nalyo line, ukupulinkana Africa umuntu libili libili amona amashiwi “Tetekela Muli Lesa” ukulembwa pa fimbayambaya, ukulangishiwa pa fibumba fya mabwe, no kupaminwa pa fya kuyemfya ne fya kulambatika ku fishimbi fya myotoka. Baibolo iine isosa ukuti: “Tetekela Yehova umutima obe onse.” (Amapinda 3:5) Ukubulwa ubufumacumi te kuti kubale kumfwane no kukonkomesha kwa mu Baibolo. Lelo bushe ukutetekela muli Lesa mu cituntulu casuko cibomba ku kusonsomba kwa mibele isuma iya kuba abapiina?

Ngo mutumikishi wa kwa Lesa, umutumwa Paulo akumenye amafya ya musango yo pamo nge ‘nsala ne cilaka, ukubulishe ifya kulya, ukutalala, no bwamba.’ (2 Abena Korinti 11:27) Mu kushininkisha, Paulo afwile alipapile ifyo aali no kupusunsuka! Lelo pa numa ya myaka imo 25 iya cakukumanya ca Bwina Kristu, aali no kulemba ukuti: “Naishibilo kucendwa; naishibila no kusangalala. Mu fintu fyonse ne misango yonse nasambilishiwe nkama iya kwikuta no kuba ne nsala, kabili iya kufulilwa no kubulwa. Ndi na maka aya kucite fintu fyonse mu ulenkoselesha.” (Abena Filipi 4:12, 13) Ee, Paulo atetekele muli Lesa.

Paulo aishibe ukuti ifishinte fya mu Malembo tafyabe fya fye, amashiwi ya mfundo fye. Fyaba makambisho ukufuma kuli Lesa wa mweo uwapamfiwa ku kwaafwa no kwafwilisha abafwaya ukufibomfya. Kasesema wa pa kale asosele ukuti: “Pantu amenso ya kwa Yehova yalolo ku no ku yalabebeta mu calo conse ku kuilango kuti wa maka ku kwafwa ababa ne mitima ya mpomfu kuli wene.”—2 Imilandu 16:9.

Abapaalwa pa Kutetekela Muli Lesa

Mulandu nshi cabele fyo icakosa ku bantu abengi abatetekela muli Lesa? Ukwabulo kutwishika ni pa mulandu wa kuti ubutotelo bwabo bwalifilwa ukubapeela umulandu wakumanina uwa kucitile fyo. Amacalici yalilenga Lesa ukumoneka uwabulwe shina, uwafisama, uushili muntu, uwacila pa kwilukwa kwa buntunse. Lelo ukupitila mu kusambilila Baibolo, Inte sha kwa Yehova balisa mu kwishiba Lesa, te pamo nga maka yafisama, lelo pamo ngo Muntu uwakwate shina. (Ilumbo 83:18; AbaHebere 9:24) Balisambilila ukuti alikwata imibele iimulenga ukuwaminwa ukucetekela kwesu. Ku ca kumwenako, ukulingana no Ukufuma 34:6, Yehova ni “Lesa wa nkumbu kabili uusenamina, uukokolo kukalipa, kabili uwafulisho luse ne cishinka.” Inte shicetekela Lesa no kwishiba ukuti ‘alifulishamo icine.’ E ico, bakwata ukucetekela kwakumanina mu bulayo bwakwe ukuletako icalo cipya icalubuka ku bupiina bushonaula ubo nomba bupama abafulishe fyo aba mushobo wa buntunse.—2 Petro 3:13.

Amamilioni ya Nte sha kwa Yehova muli fyo balishinina ukuti calibe cibomba ukutetekela muli Lesa. Ku ca kumwenako, Rosaline, Inte mu Sierra Leone, alabombesha ukufuma pa faifi koloko mu lucelo ukufila mu kucelwako ubushiku ku kupayanya ifya kulya ne fya kufwala ku mwine na ku bana bakwe mutanda. Alondolola ukuti: “Abantu abengi basosa ukuti te kuti cicitikeko ukwikala ubumi bwa bufumacumi, lelo nalishiba ukuti ici te ca cine. Inshita shimo shimo ndakwata impika kabili nshishiba ifyo shili no kupikululwa. Lelo nalishiba ukuti nga ca kuti naikala ubumi bwa bufumacumi, icintu icili conse cikaba fye bwino kuli ine. E co ndesha na maka ukukanafulwisha Yehova.”

Kalemba umo asosele ukuti: “Umuntu umupiina uushikwete icili conse mwi fumo lyakwe akabila isubilo . . . ukucila pa mukate.” Ee, ukubulwe subilo, ukupelelwa, no kubulwe nsansa ukwa mutatakuya fyaba macushi ayo ayengaba ayacilapo kukalipa ukucila pa nsala. Lelo umo uwisa mu kwishiba no kutetekela Lesa akabila ukukananakila ku kupelelwa. “Ndabombesha nomba,” e filundapo Rosaline, “lelo nalikwata ubuseko pa mulandu wa kuti nalishiba ukuti inshita ileisa lintu nshakaleshomboka muli iyi nshila. Nomba ndabomba pa kukwata ifya kulya ne mwine no lupwa lwandi, lelo mu calo cipya ica kwa Yehova, mukabe fingi ifya kulya. E co nomba nalikwata isubilo no buseko ubo nshatalile nkwata intanshi nshilaishiba Yehova.”—Linganyeniko Esaya 25:6; Ukusokolola 21:3, 4.

Ca cine, abo abatetekela muli Lesa nalyo line kuti bakumanya ukutitikisha kwa fya bunonshi, nge fyacitile umutumwa Paulo. Lelo tabesha ukukabila kwa kwalukila ku kutoba amafunde ya kwa Lesa pa kuti bapusunsuke mu fya bunonshi. E fyasosele kemba wa malumbo Davidi ukuti: “Nali umwaice, nomba ninkota; lelo nshamona uwalungama nalekeleshiwa, nangu bufyashi bwakwe bulepule cilyo.” (Ilumbo 37:25) Ee, Lesa asakamana no kupaala abo ababika amabuseko yakwe pa ntanshi mu bumi bwabo.—Mateo 6:25-33.

E co nga ca kuti muli bapiina, “mwinenuka mu kucite cisuma.” (2 Abena Tesalonika 3:13) Te kwesha ukwalukila ku kususuula imibele isuma. Kuulilileni ukwampana na Lesa no kushintilila pali wene ku kwaafwa ukubomba ne mpika sha bumi na mafya. Abo ababombela Yehova no kutetekela na maka muli wene bacincishiwa ukuti: “Ipetamikeni mwi samba lya kuboko kwa maka kwa kwa Lesa, ukuti amusansabike mu nshita iyene; amasakamika yenu yonse bikeni pali wene, pa kuti asakamana imwe.”—1 Petro 5:6, 7.

[Amashiwi pe bula 6]

“Umuntu umupiina uushikwete icili conse mwi fumo lyakwe akabila isubilo . . . ukucila pa mukate”

[Icikope pe bula 7]

Inte sha kwa Yehova baafwa abantu ukubika ukutetekela kwabo muli Lesa