Ukubombela Yehova Ngo Lupwa Lwaikatana

NGA FINTU CASHIMIKWA NA ANTONIO SANTOLERI

Tata aali ne myaka 17 lintu afumine mu Italy mu 1919. Akuukiile ku Brazil mu kufwaya imikalile yawamako. Mu kupita kwa nshita, aishilekwata ishopo lya kubeyelamo mwi tauni linono mu kati na nkati ka citungu ca São Paulo.

KASUBA kamo mu 1938, lintu nali ne myaka 7, Tata alishitileko ubupilibulo bwa Baibolo ubwa Brasileira ku mwaume uwapitile pe shopo lyakwe. Imyaka ibili pa numa Mayo alilwele ubulwele bwabipisha kabili aali fye uwalwalilila ukufikila na lintu afwile. Tata na o alilwele, kanshi ifwe bonse— Ine wine, Mayo na Tata, na nkashi yandi Ana—twaileikala na balupwa mu musumba wa São Paulo.

Ilyo nalesambilila isukulu mu São Paulo, nasangwike kabelenga waswatuka, maka maka uwa fitabo fya lyashi lya kale. Nalipapile ukuti Baibolo mu tushita mu tushita yalelumbulwa muli fyo fitabo. Icitabo ca malyashi ya kwelenganya, ico nayashime ku laibrare wa cintubwingi uwa mu São Paulo, calumbwile Ilyashi lya pa Lupili imiku yafulilako. Ilyo e lintu napingwilepo ukufwaya Baibolo pa kuti ningaibelengela lilya lyashi ne mwine. Nafwailishe ulya Baibolo untu Tata akwete imyaka yafumineko nasukile naisanga pa nshi ye talanka, apo yabikilwe pa myaka 7.

Ulupwa lwesu lwali lwa ciKatolika, e co nshatalile nkoseleshiwapo ukubelenga Baibolo. Nomba, pa lwandi fye ne mwine, nalisambilile ifya kufwaya ifipandwa ne fikomo. Nabelengele no buseko bukalamba te Lyashi lya pa Lupili fye lyeka lelo ibuuku lyonse ilya kwa Mateo pamo pene na mabuuku yambi aya Baibolo. Icanjebekeshe apakalamba cali ni fintu icine caleumfwika mu kusambilisha kwa kwa Yesu ne fipesha amano fyakwe.

Ukwishiba ifyo imipepele ya ciKatolika yapusene na cintu nabelengele muli Baibolo, natendeke ukulasangwa kwi Calici lya Presbyterian, kabili Ana aliilundile kuli ine. Nalyo line, nayumfwile ukuti mwalimo cimo icabuliile mu mutima wandi. Pa myaka mu kucincila naali ndefwayafwaya Lesa. (Imilimo 17:27) Bushiku bumo ilyo kwafulishe ntanda mu muulu, ilyo naleetetula, naletontonkanyo kuti, ‘Mulandu nshi nabelako? Cinshi caba e mifwaile ya bumi?’ Nafwaile incende yaliko akatalamukila ku lukungu lwa ŋanda, nalifukeme, kabili napepele nati, ‘Mwe Shikulu Lesa! Ni mwe bani? Ni shani fintu ningafika ku kumwishiba?’ Icasuko caishile mu kwangufyanya nga nshi pa numa ya kupepa.

Ukusambilila Icine ca Baibolo

Kasuba kamo mu 1949, umukashana umo atununwike Tata ilyo aikile fye mu kalishitima kaaleshinguluka umusumba. Atambike tata bamagazini ba Ulupungu lwa kwa Kalinda na Loleni! Tata alilembeshe Ulupungu lwa kwa Kalinda no kumulomba ukuti akatutandalile pa ŋanda, no kumwebo kuti alikwete abana babili abalesangwa kwi Calici lya Presbyterian. Lintu uyo mwanakashi atandele, ashiliile Ana icitabo caleti Children no kutendeka ukusambilila na wene. Pa numa na ine naliilundileko kwi sambililo.

Mu November 1950 twasangilwe kwi bungano lyesu ilya kubalilapo ilya Nte sha kwa Yehova. Kulya icitabo ca kuti “Lekeni Lesa Abe Uwa Cine” califumine, kabili twatwalilile isambililo lyesu ilya Baibolo ukubomfya cilya citabo nge ca kututungulula. Mu kwangufyanya pa numa twailwike ukuti twalisangile icine, kanshi mu April 1951 twalibatishiwe mu kulangisho kuipeela kwesu kuli Yehova. Tata aipeele imyaka inono pa numa kabili afwile uwa busumino kuli Lesa mu 1982.

Uwa Nsansa mu Mulimo wa Nshita Yonse

Mu January 1954, ninshi ncili fye ne myaka 22, balimpokelele ku mulimo wa pe ofesi lya musambo ilya Nte sha kwa Yehova, ilitwa Bethel. Ilyo nafikile kulya, nalipapile ukusanga umwaume uwancilileko fye imyaka ibili, Richard Mucha, e wali kangalila wa musambo. Mu 1955, lintu kwaliko ukukabila kwa babomfi ba miputule, nga fintu bakangalila benda baleitwa pali ilya nshita, nali pa kati ka baume basano abalaalikwe ukubombako muli uyu mulimo.

Ukupeelwa kwandi ulubali lwa mulimo kwali mu citungu ca Rio Grande do Sul. Kwaliko fye ifilonganino 8 ifya Nte sha kwa Yehova lintu natendeke, lelo mu kati ka myeshi 18 ifilonganino fibili ifipya na mabumba yaba yeka 20 fyalimikwe. Ilelo muli iyi ncende, mulimo imiputule 15 iya Nte sha kwa Yehova, umo umo mupepi ne filonganino 20! Pa mpela ya mwaka wa 1956, naebelwe ukuti umuputule wandi walyakanishiwe mu fiputulwa finono finono fine ifyali no kulabombelwamo na babomfi ba miputule bane. Pali ilya nshita naebelwe ukuti mbwelele ku Bethel ku kuyapeelwa umulimo upya.

Ico nshaenekele kabili icampeele ukucankwa ca kuti, napeelwe umulimo ku kapinda ka kuso aka Brazil ngo mubomfi wa citungu, umutumikishi wenda uubombela imiputule yafulilako. Brazil pali iyo nshita akwete abatumikishi Inte sha kwa Yehova 12,000, kabili cilya calo cakwete ifitungu fibili. Richard Wuttke alebombela ku kapinda ka kulyo, e lyo ine nakwete icitungu ca ku kapinda ka kuso. Pa Bethel twalisambilishiwe ifya kubomba na projekita uwa kutambishishako amafilimu ayapangilwe ne Nte sha kwa Yehova ayaleti, The New World Society in Action na The Happiness of the New World Society.

Muli isho nshiku imyendele yali iyapusanako nga nshi. Takwali nangu umo Nte uwakwete motoka, e co naleenda mu bwato bwa kubasa, mu bwato bwa kooba, mu cikocikala, pali kabalwe, mu cikuliko, mu cimbayambaya, e lyo limo na mu ndeke. Calecincimusha ukupupuka mu ndeke pa muulu wa mitengo ya Amazon ukuyawa mu Santarém, umusumba uwaba pa kati ka Belém pa ciito ca mumana wa Amazon e lyo na Manaus, umusumba ukalamba uwa Citungu ca Amazonas. Ababomfi ba fitungu pali iyo nshita balekwata fye ukulongana kwa miputule ukunono uko balebombela, kanshi nalepoosa inshita yandi iikalamba ukutambisha amafilimu ya Sosaite. Mu misumba iikalambako, kwalesangwa imyanda ya bantu.

Icampapwishe sana ku kapinda ka kuso aka Brazil cali citungu ca Amazon. Lintu nalebombela kulya mu April 1957, umumana wa Amazon no tumilonga twa uko fyalipoosele. Nakwete ishuko lya kulangisha limo ilya mafilimu mu mpanga, ukutanika ica kutambishishapo pa kati ka miti ibili. Amalaiti ya kubomfya kuli projekita yalefuma ku bwato bwakwete mashini ubwaimikwe pa mumana wapalamineko. Lyali e filimu lya kubalilapo ilyo ubukulu bwe bumba lyonse bamweneko.

Mu kwangufyanya pa numa ya ico nabweleele ku mulimo wa pa Bethel, kabili umwaka wakonkelepo, mu 1958, nakwete ishuko lya kusangwa ku Kulongana kwa pa Kati ka Nko ukwa Nte sha kwa Yehova ukwalumbuka, ukwa “Ukufwaya kwa Bulesa,” mu New York City. Amakombe ukufuma mu fyalo 123 baali pa kati ka bantu 253,922 abaiswishe ifibansa fya Yankee Stadium na Polo Grounds pa bushiku bwa kusondwelela ubwa lilye bungano lya nshiku 8.

Ukuipakisha Ukwaluka mu Bumi Bwandi

Bwangu bwangu fye pa numa ya kubwelela ku Bethel, naishileishibana na Clara Berndt, kabili mu March 1959 twalyupene. Twapeelwe ukubomba umulimo wa muputule mu citungu ca Bahia, uko twabombele mupepi no mwaka umo. Ine na Clara tucili tulebukisha no buseko ukuicefya, icileela, ukupimpa, no kutemwa ifya bamunyina ba kulya kuntu; baali abapiina mu fikwatwa lelo abakankaala mu fisabo fya Bufumu. Lyene batuseseeshe ku Citungu ca São Paulo. Kulya e ko, mu 1960, umukashi wandi abelele pa bukulu, kabili twali no kufuma mu butumikishi bwa nshita yonse.

Twapingwilepo ukukuukila ku cifulo cimo mu Santa Catarina, uko umukashi wandi afyalilwe. Umwana wesu umwaume, Gerson, e beli pa bana besu basano. Pakonkele na Gilson mu 1962, Talita mu 1965, Tárcio mu 1969, e lyo Janice mu 1974. Pa mulandu wa kufunda kwa kwa Yehova ukushaiwamina kuntu apeela, twali na maka ya kulolenkana no kusonsomba kwa kubakusha mu “kufunda no kukonkomesha kwa kwa Shikulu.”—Abena Efese 6:4.

Umo umo uwa bana besu tumulanguluka ukuba uwa mutengo. Kemba wa malumbo e walumbulwile bwino fintu tuyumfwa ati: “Moneni, abana baume cikwatwa icafuma kuli Yehova.” (Ilumbo 127:3) Te mulandu na mafya, twalisakamana abana besu mu nshila imo ine iyo twali no kusakamaninamo “icikwatwa” icili conse “icafuma kuli Yehova,” ukwibukisho kufunda ukusangwa mu Cebo cakwe. Ifilambu fyalibe fingi. Calitupeele ubuseko bushingalandwa lintu bonse bene basano mu kukonkapo, mu kulekanina, kabili mu kuitemenwa fye abene balumbulwile ukufwaisha kwa kubatishiwa mu kulango kuipeela kwabo kuli Yehova.—Lukala Milandu 12:1.

Ifyo Abana Besu Baasalilepo

Twalilengelwe ukusamwa lintu Gerson, pa numa fye ya kupwisha kosi wa kubomba na maprogramu ya kompyuta, atile aalefwaya ukubombela pa Bethel, muli fyo ukusala ubutumikishi bwa nshita yonse mu cifulo ca ncito iyo asambilile ngo mulimo wakwe. Lelo ubumi bwa pa Bethel pa kutendeka tabwayangukiile Gerson. Pa numa ya kumutandalila ninshi ali fye ne myeshi ine pa Bethel, nalipapushiwe no bulanda ubwamoneke pa cinso cakwe ilyo twalefumako. Mu cilola ica mu motoka wesu ica kumwenako ifili ku numa, namumwene aletutamba ukufikila na lintu twapitile pa cinshoko ca kubalilapo. Amenso yandi yalyengelele ifilamba ica kuti nalitalile naimininako pa mbali ya musebo ilyo nshilatwalilila ukuya pa lwendo lwa kubwelelamo ku mwesu ulwa bakilomita 700.

Gerson aishiletendeka ukuipakisha Bethel. Pa numa ya kuba palya mupepi ne myaka 6, aupile Heidi Besser, kabili babombele capamo mu Bethel imyaka na imbi ibili. Heidi lyene aishileba pa bukulu, e pa kufumapo. Umwana wabo umwanakashi Cintia, nomba uuli ne myaka ya bukulu 6, alenda na bo mu mibombele ya Bufumu.

Tapaalepele sana pa numa ya kutandalila Gerson pa Bethel, Gilson, ninshi e lyo apwishishe umwaka wa kubalilapo mu masambililo ya kutungulula ubukwebo, na o atile aalefwaya ukubomba pa Bethel. Amapange yakwe yali ya kwisatwalilila kosi wakwe uwa masambililo ya fya bukwebo pa numa ya kubomba pa Bethel umwaka umo. Lelo amapange yakwe yalyalwike, kabili alitwalilile mu mulimo wa pa Bethel. Mu 1988 aupile Vivian Gonçalves, painiya, nga fintu abatumikishi ba nshita yonse betwa. Ukutula fye lyo line balibombela capamo pa Bethel.

Ubuseko bwesu bwalitwalilile lintu umwana wesu uwa citatu, Talita, asalilepo ukwingila mu mulimo wa bupainiya mu 1986 pa numa ya kupwisha kosi wa kushila amaplani ya makuule. Imyaka itatu pa numa na o wine balimwitile ku Bethel. Mu 1991 aupilwe kuli José Cozzi, uwali naabomba pa Bethel pa myaka 10. Baletwalilila palya pamo nga abaupana.

Ine no mukashi wandi na kabili twali abacankwa lintu Tárcio, uwakonkelepo mu kufyalwa, alandile cimo cine cintu twali natumfwa imiku itatu kale ica kuti, “Tata, ndefwayo kuya ku Bethel.” Ukwipusha kwakwe kwalisuminishiwe, kabili mu 1991 na o wine alitendeke umulimo wa pa Bethel, apo aikele ukufika mu 1995. Tuli aba nsansa ukuti abomfeshe ubulamba bwakwe ubwa ku bwaice ku kutwala pa ntanshi amabuseko ya Bufumu bwa kwa Yehova muli iyi nshila ukucila pa myaka itatu.

Kasuli wesu, Janice, alipingwilepo ukubombela Yehova kabili abatishiwe pa mushinku wa myaka 13. Lintu aali pa sukulu, alibombeleko umwaka uutuntulu nga painiya wa kwafwilisha. Lyene, pa September 1, 1993, atendeke nga painiya wa nshita yonse mu cilonganino cesu muno mu musumba wa Gaspar.

Inshila ya ku Kutunguluka

Cinshi caba e nkaama ku kusungilila ulupwa ulwaikatana mu kupepa Yehova? Ine nshasumina mu kuti kwalibako muti wa cipesha amano. Yehova alipayanishisha abafyashi ba Bwina Kristu ukufunda mu Cebo cakwe uko bali no kukonka, e co ukutasha konse kulingile ukuya kuli wene ku fya kufumamo fishaiwamina fintu twaipakisha. Twaeseshe fye ukukonka ukutungulula kwakwe. (Amapinda 22:6) Abana besu bonse bapyene inkuntu mutima iyaseeka mu Latin America ukufuma kuli ine e lyo no mupashi wa kubombela pa fintu uwa bwina Germany ukufuma kuli nyinabo. Lelo icacilapo kucindama cintu baapokelele kuli ifwe cali bupyani bwa ku mupashi.

Ubumi bwesu ubwa pa ŋanda bwaleshunda fye pa mabuseko ya Bufumu. Ukusungilila aya mabuseko pa ntanshi tacali icayanguka. Ku ca kumwenako, twalecisange cakosa lyonse ukusungilila isambililo lya Baibolo ilya lyonse, lelo tatwatalile atuleka. Ukufuma fye ku nshiku shabo isha kubangilila isha bumi, umwana umo na umo aleletwa ku kulongana kwa Bwina Kristu pamo na ku kulongana kukalamba na ku mabungano. Kulwala fye kweka nelyo ifya kuponako fimbi ifya mu kampampa e fyaletulenga ukukanasangwa ku kulongana. Mu kulundapo, pa mushinku wacaice, abana baaletushindika mu butumikishi bwa Bwina Kristu.

Abana lintu baali pa mushinku wa myaka 10, batendeke ukulapeela amalyashi mwi Isukulu lya Butumikishi bwa Teokrasi. Twalibaafwileko ukupekanya amalyashi yabo aya kubalilapo, ukubakoselesha ukubomfya autulaini umwipi mu cifulo ca kulemba fyonse ifyo bakaya mu kulanda. Pa numa, umo umo aleipekanishisha ilyashi lyakwe umwine. Na kabili, lintu baali pa mushinku wa pa kati ka myaka 10 na 12, batendeke umo umo ukubombako ubutumikishi lyonse. Iyi yali e nshila ya bumi fye yeka intu baishibe.

Umukashi wandi, Clara, alibombele ulubali lwakatama nga nshi mu kukusha abana besu. Lyonse fye ubushiku, lintu baali abaice sana—inshita lintu umwana onka fyonse fintu asambilishiwa ukupalo mwepu—Clara alebabelengela ilyashi lya mu Baibolo no kupepa na umo umo uwa bene. Alibomfeshe bwino ifitabo fya Ukufuma Kuli Paradise Waluba Ukuya Kuli Paradise Wanonkwa, Ukukutika kuli Kasambilisha Mukalamba, na Icitabo Candi ca Malyashi ya mu Baibolo.a Na kabili twalebomfya amakaseti na mavideo ifyapayanishiwa ne Nte sha kwa Yehova lintu fyaishilebako.

Ico twapitamo nga abafyashi ba Bwina Kristu cikoshe cishinka ca kuti abana balakabila ukubasakamana cila bushiku. Ukutemwa kwabilima, ukusango buseko mu muntu umo, ne nshita iikalamba e fyaba pa fifwaikwa sana ku bacaice. Tatwacimwene fye ngo kushingamwa kwa bufyashi ukwikusha uko kukabila ukufika apengapela amaka yesu lelo twalilobolwele insansa pa kubomba muli yo nshila.

Mu cine cine, cilaleto buseko abafyashi ukumona ukufikilishiwa kwa mashiwi ya pa Ilumbo 127:3-5 aya kuti: “Moneni, abana baume cikwatwa icafuma kuli Yehova; ubufyashi bwa mwi fumo e cilambu apeela. Nge mifwi mu minwe ya mpalume, e fyaba abana baume aba ku bulumendo; alishuko muntu uwaisushako umucenje wakwe.” Ukubombela Yehova ngo lupwa lwaikatana mu cituntulu kwalitulenga ukusekelela!

[Futunoti]

[Icikope pe bula 26]

Antonio Santoleri no lupwa lwakwe ulwapalamisha