Ifipusho Ukufuma ku Babelenga

“Ulupungu lwa kwa Kalinda” ulwa August 15, 1996, lwatile: “Mu lubali lwa kupelelekesha ulwa bucushi, ‘abantunse’ abakafulumukila ku lubali lwa kwa Yehova bakapusuka.” Bushe ico ciletubululo kuti pa numa ya lubali lwa kubalilapo ulwa bucushi bukalamba, abapya abengi bakesa ku lubali lwa kwa Lesa?

Ico tacali e cishinka calelangililwa.

Amashiwi ya kwa Yesu ayasangwa pali Mateo 24:22 yakafikilishiwa maka maka ku ntanshi pa kupusuka ukupula mu lubali lwa kubalilapo ulwa bucushi bukalamba ubuleisa, ukusanswa kwa mipepele. Cilya cipande calandile ukuti: “Ibukisheni ukuti ‘abantunse,’ abashalapo basubwa na be ‘bumba likalamba,’ kale kale bakaba nabapusuka lintu Babele Mukalamba aonaulwa mu kashita nyunsu kabili umupwilapo mu lubali lwa kubalilapo ulwa bucushi.”

Aba busumino aba musango yo tabakabe mu busanso lintu Yesu ne milalo yakwe iya mu muulu baonaula ababifi mu lubali lwa kulekelesha ulwa bucushi. Lelo ni bani bakapusunsuka ulo lubali lwa bucushi muli iyo nshila? Ukusokolola 7:9, 14 kulanga ukuti ibumba likalamba ababa ne subilo lya pe sonde bakapusunsuka. Ni shani pa lwa Bena Kristu basubwa no mupashi wa mushilo? “Ifipusho Ukufuma ku Babelenga” mu Ulupungu lwa kwa Kalinda ulwa August 15, 1990, mwali ukulandapo pa mulandu tushingapampamikila inshita lintu abashalapo ba mu basubwa bakasendwa ukuya ku muulu. E co ici cipande ca nomba line (August 15, 1996) cashile umulandu ukwabulo kusondwelelwa, ukulandapo fye mu cinkumbawile ukuti: “Mu musango umo wine, mu lubali lwa kupelelekesha ulwa bucushi, ‘abantunse’ abakafulumukila ku lubali lwa kwa Yehova bakapusuka.”

Ukulanda pali nampo nga abapya abali bonse kuti basambilile cine no kwisa ku lubali lwa kwa Lesa pa numa ubucushi bukalamba bube nabutendeka, moneni amashiwi ya kwa Yesu ayalembwa pali Mateo 24:29-31. Pa numa ubucushi bube nabutendeka, icishibilo ca Mwana wa muntu cikamoneka. Yesu atile imikowa yonse iya pe sonde ikapumapo imisowa. Talandilepo nangu cimo pa lwa kuti abantu bakeluka imibele ya busanso, ukulapila, ukwalukila ku lubali lwa kwa Lesa, no kusanguka abasambi ba cine.

Mu nshila yapalako, mu mulumbe wa mpaanga ne mbushi, Umwana wa muntu aamoneka kabili mu nshila ya kupingula aapaatukanya bantu ukushintilila pa fintu baacitile nelyo fintu bashacitile ku numa. Yesu talandilepo nangu cimo pa lwa bantu abo pa nshita yalepa balangishe imibele ya mutima iya mbushi mu kupumikisha ukwaluka no kuba nge mpaanga. Akesa ku kupingula ukushintilila pa cintu abantu baali nabaishininkisha kale ukuti e fyo baali.—Mateo 25:31-46.

Na kabili, nangu ni fyo, takuli umulandu wa kuti tupampamikepo cimo pali ici cishinka. Abantu ba kwa Lesa, abasubwa na ba mwi bumba likalamba, balishiba cintu bali no kulacita nomba—ukushimikila no kupanga abasambi. (Mateo 28:19, 20; Marko 13:10) Nomba ili e nshita ya kupoosa amano ku kukonkomesha kwa kuti: “Awe pa kuba ababombela pamo na Lesa, no kupaapaata tulamupaapaata, atuti, mwipokelela ibusha ukusenamina kwa kwa Lesa. Pantu atila, Mu nshita ya kupokelelwamo nalikuumfwile, na mu bushiku bwe pusukilo nalikwafwile. Moneni, nomba e nshita ya kupokelelwamo; nomba e bushiku bwe pusukilo.”—2 Abena Korinti 6:1, 2.