Ukukumana kwa ka Mwaka October 3, 1998

UKUKUMANA KWA PA MWAKA ukwa filundwa fya Watch Tower Bible and Tract Society of Pennsylvania kukabako pa October 3, 1998, pa Ng’anda ya Kulongana Kukalamba iya Nte sha kwa Yehova, 2932 Kennedy Boulevard, Jersey City, New Jersey. Ukukumana kwa kubalilapo ukwa filundwa fyeka kukabako pa 9:15 hrs, ukukonkwapo no kwa pa mwaka ukwa cinkumbawile pa 10:00 hrs.

Ifilundwa fya Kuteyanya balingile ukwishibisha iofesi lya kwa Kalemba nomba pa lwa kwaluka ukuli konse ukwa keyala kabo aka makalata mu kati ka mwaka wapita pa kuti amakalata ya lyonse aya cishibisho ne fyalembwa fya kwimininwako fingafika kuli bene mu July.

Ifyalembwa fya kwimininwako, ifikatumwa ku filundwa fyonse pamo pene ne cishibisho ca kukumana kwa pa mwaka, fili no kubweshiwa pa kuti fingafika kwi Ofesi lya kwa Kalemba wa Sosaite te kucila pa August 1. Icilundwa cimo cimo cilingile ukwisushisha no kubwesha icalembwa cakwe ica kwimininwako mu kwangufyanya, ukulondolola nampo nga akabapo pa kukumana pa lwakwe nelyo iyo. Ifyebo ifikapeelwa pa calembwa ca kwimininwako cimo na cimo filingile ukulondolola mu kulungatika pali ci cishinka, apantu fikashintililwapo pa kwishibila kabela abo mu cine cine bakabapo pa lwabo.

Cileenekelwa ukuti ukukumana konse, ukusanshako ukukumana kwa mwi funde na malipoti, fikasondwelela ukufika pa 13:00 hrs nelyo mu kwipipa pa numa. Takwakabe kukumana kwa cungulo. Pa mulandu wa ncende yapelela, abakalasuminishiwa ukusangwako bakaba bamatikiti epela. Takwakabe ukutantika kwa kulundinkanya ukukumana kwa pa mwaka ku nsale sha telefoni ku fifulo ifili fyonse fimbi.