Ukubilisha Kwaibela

PA MPELA ya kukumana kwa pa mwaka ukwa kabungwe ka Watch Tower Bible and Tract Society of Pennsylvania ukwaliko pa October 7, 2000, kwali ukubilisha kwaibela ukwabilishiwe na ceyamani, John E. Barr uwa mwi Bumba Litungulula. Uku kubilisha kwaliko pa numa ya malyashi yalandilwe na Theodore Jaracz na Daniel Sydlik mu kubangilila kwa bulya bwine bushiku.—Moneni amabula 12-16 na 28-31 muli uno wine magazini.

Pa kufika pa cishinka cikalamba, Munyina Barr atile: “‘Umusha wa cishinka kabili uwashilimuka’ ne Bumba lyakwe Ilitungulula baliseekeshiwa ukusakamana ifingi nga nshi ukucila ifya mu tubungwe twe funde. Ifyatantikwa mu fyo utu tubungwe twaimininapo milandu fye iya kupenda. Lelo, Shikulwifwe, Yesu Kristu, alilaasa ibumba lya musha wa cishinka pali fyonse ifyo ‘akwata,’ nelyo fyonse ifyakuma ku Bufumu pano isonde.”—Mateo 24:45-47.

Ukulanda pa lwa kabungwe ka ku Pennsylvania, Munyina Barr alundilepo ukuti: “Ukutula fye apo kapangilwe mu 1884, akabungwe ka Watch Tower Bible and Tract Society of Pennsylvania kalibomba umulimo ukalamba mu fyatucitikila ku numa uku na muli shino nshiku. Nalyo line, aka kabungwe cibombelo fye ca mwi funde ico ‘umusha wa cishinka kabili uwashilimuka’ abomfya ilyo cakabilwa.”

Mu malyashi yabo, Munyina Sydlik na Munyina Jaracz balondolwele ukuti ifi “umusha wa cishinka kabili uwashilimuka” aseekeshiwa ifya pe sonde fya kwa Shikulu fyonse te kutila ninshi ili bumba lya musha teti lisuminishe abaume bafikapo ukufuma mwi bumba lya “mpanga shimbi” ku kubombela pa milimo imo iya fya mitungulwile ya lyonse. (Yohane 10:16) Kabili takwaba umulandu wa mu Malembo uutila bonse nelyo ukuti membala onse uwa kabungwe ka mwi funde akabomfiwa ne Nte sha kwa Yehova afwile ukuba Umwina Kristu wasubwa.

Munyina Barr aebele ibumba ukuti pali ndakai bamo ababa mwi Bumba Litungulula ilya Nte sha kwa Yehova abaali ba membala kabili intungulushi isha tubungwe tonse utubomfiwa no “musha wa cishinka kabili uwashilimuka” mu calo ca United States baliifuminamo abene muli ifi fifulo. Bamunyina bacetekelwa aba mwi bumba lya mpanga shimbi balisalilwe ukupyana pe punda lya aba.

Uku kupingulapo kuli bwino icine cine. Kulelenga ababa mwi Bumba Litungulula ukupoosa inshita ikalamba mu kupekanya ica kulya ca ku mupashi pa kuti bengasakamana ukukabila kwa ku mupashi ukwa bamunyina ba mwi sonde lyonse.

Mu kusondwelela, ceyamani aebele ibumba lyacankwa ukuti: “Nangu line iyi milimo ya fya mwi funde ne ya fya butungulushi yapeelwa kuli bakangalila babelesha, . . . aba bonse bakulakonka ubutungulushi bwa ku mupashi ubwe Bumba Litungulula. . . . Ifwe bonse tulepepela fye ipaalo lya kwa Yehova ukuba pa mibombele yesu iyo tubombela pamo mu kwikatana ilyo tulecita ukufwaya kwakwe, ku kucindika no kukatamika ishina lyakwe ilikulu.”