Fundeni Abana Benu

Bushe Umona Kwati Limo Abantu Balakukankamba?

UMUNTU nga balemukankamba ninshi tabalemufwaya ku banankwe. Nalimo kuti afuma ku calo cimbi nelyo alipusanako inkanda, nelyo ifyo alanda ne fyo acita fyalipusanako na bambi. Bushe umona kwati limo abantu balakukankamba?—a

Leka tulande pa muntu uwalemona kwati balemukankamba. Ishina lyakwe ni Mefiboshete. Bushe uyu muntu ali nani, kabili mulandu nshi alemwena kwati abantu balemukankamba? Nga ca kutila na iwe limo umona kwati abantu balakukankamba, kuti wasambilila ifingi kuli Mefiboshete.

Mefiboshete ali ni mwana Yonatani, uwali umunankwe sana uwa kwa Davidi. Ilyo Yonatani tabalamwipaya mu nkondo, aebele Davidi ukuti: ‘Ukabe ne cikuuku ku bana bandi.’ Davidi aishileba imfumu. Ilyo papitile imyaka, aibukishe amashiwi ya kwa Yonatani kabili pali iyi nshita ninshi Mefiboshete ali uwa mweo. Ilyo ali umwaice, aliponene ica kutila alilemene ububi. Bushe wamona icalengele aletontonkanya ukuti abantu balemukankamba?—

Davidi alefwaya ukuba ne cikuuku ku mwana wa kwa Yonatani. E ico, apekenye ukuti Mefiboshete aleikala mupepi no ko aleikala mu Yerusalemu, kabili alelya ifya kulya pe tebulo lya kwa Davidi. Kabili aebele Siba, abana bakwe abaume, na basha bakwe ukuba ababomfi ba kwa Mefiboshete. Cine cine Davidi alicindike umwana wa kwa Yonatani! Bushe walishiba icacitike pa numa?—

Davidi aishilekwata amafya mu ng’anda yakwe. Abishalomu, umwana wakwe alimupondokele kabili alefwaya ukumupoka ubufumu. Davidi alibutwike pa kuti bemwipaya. Ilyo Davidi abutwike, Mefiboshete alefwaya ukuya nankwe pamo na bantu bambi abengi. Aba bantu balishibe ukuti Davidi e walingile ukuba imfumu. Lelo Mefiboshete takonkele Davidi pantu alilemene.

Lyena Siba aebele Davidi ukuti icalengele ukuti Mefiboshete ekonka Davidi ni co alefwaisha ukuba imfumu. Davidi alyumfwilile ubufi bamubepele! E ico apeele Siba fyonse ifyo Mefiboshete akwete. Tapakokwele, Davidi alicimfishe Abishalomu kabili alibwelele mu Yerusalemu. Lelo pa numa, Davidi alikutike na kuli Mefiboshete, kabili apingwile ukuti Mefiboshete na Siba bakane ifikwatwa. Bushe uletontonkanya ukuti Mefiboshete acitilepo shani?—

Mefiboshete tailishenye ukuti ifyo Davidi apingwile tafyali bwino. Alishibe ukuti iyi nshita imfumu yalingile ukwikala ku matwi tondolo pa kuti ileteka bwino. E co alandile ukuti Siba asende ifikwatwa fyonse. Icacindeme sana kuli Mefiboshete ca kuti Davidi umubomfi wa kwa Yehova alibwelele mu Yerusalemu no kutwalilila ukuteka.

Mefiboshete aliculile nga nshi. Ilingi alemona kwati balemukankamba. Lelo Yehova alimutemenwe kabili alemusakamana. Cinshi twingasambilila kuli ili lyashi?— Ca kutila nangu tulecita icalungama, bamo kuti batubepesha. Yesu atile: “Aba muli ici calo nga bamupata, mwishibe ukuti babalilepo ukupata ine ilyo bashilamupata.” Abantu balipeye fye na Yesu! Nga tulecita icalungama, ukwabula no kutwishika Lesa wa cine Yehova no Mwana wakwe Yesu bakatutemwa.

Belenga muli baibolo Yobe

1 Samwele 20:15-17, 41, 42

2 Samwele 4:4; 9:1-10; 19:24-30

Yohane 15:18

[Futunoti]