Beni ica Kumwenako mu Misosele na mu Mibele

¹ Umutumwa Paulo akonkomeshe Timote ukuba ica kumwenako mu misosele na mu mibele. (1 Tim. 4:12) Na ifwe bene tulingile ukukwata imisosele ne mibele ya ca kumwenako, ukucilisha lintu tulebombako ubutumikishi, pantu ukucita ifyo kuti kwapima nampo nga tulefika pa mutima wa abo tusanga nelyo iyo.

² Tulekabila ukulangisha imbali shonse isha mibele isuma, ukusanshako no mucinshi, ukulangulukila, icikuuku, ukunakilila, no kushilimuka. Ilyo twalangisha iyi mibele, tulanga ukuti twalibukila pa lwa fintu imicitile yesu yambukila ukuyumfwa kwa bambi. Imibele isuma mu butumikishi kuti yalinganishiwa ku fya kulunga mu fya kulya ku kufilenga ukucilapo ukununkila. Ukwabula ifi fya kulunga mu fya kulya, nangu fye fya kulya ifisuma kuti fyaumfwika ifyatalalila kabili te kuti fiwame. Ukufilwa ukulangisha imibele isuma ilyo tulebomba na bambi kuti kwakwata ica kufumamo cimo cine.—Kol. 4:6.

³ Beni ica Kumwenako mu Misosele: Ukumwentula kwa bucibusa no kuposha kwa cikabilila shaba ni mbali shakatama ku mulimo wesu uwa kushimikila imbila nsuma. Lintu mu mitendekele yesu twalungamo icikabilila no kufumaluka, tulenga mwine ŋanda ukwishiba ukuti tuli abasekelela muli wene mu cine cine. Lintu alanda, kutikeni mu kusakamanishisha no kulanga umucinshi walinga ku fintu alelanda. Lintu mwalanda, beni abacenjela kabili aba mutembo.—Linganyeniko Imilimo 6:8.

⁴ Mu tushita mu tushita kuti twakumanya umuntu uyo nakalimo ushingaba uwa bucibusa, nangu fye uwakaluka. Ni shani fintu tulingile ukwankulako? Petro atucincishe ukulanda mu nshila iyo ilangisha “ubufuuke na katiina.” (1 Pet. 3:15; Rom. 12:17, 18) Yesu atile nga ca kuti mwine ŋanda mu bunkalwe akaana ubukombe bwa Bufumu, tulingile fye ‘ukukunto lukungu ku makasa yesu.’ (Mat. 10:14) Lintu twalangisha imibele ya ca kumwenako mu fintu fya musango yo, mu kupelako kuti twanasha umutima wa kwa kakaanya.

⁵ Beni ica Kumwenako mu Mibele: Ukushimikila imbila nsuma mu misebo umo abantu baba abapamfiwa na mu fifulo fya cintubwingi kufwaya ukuti tube abalangulukilako, te kuba abapongomona ishiwi nelyo aba mupampamina, no kuti tatulecilika imyendele ya bapita nshila. Lintu tuli mu mayanda ya balesekelela, tufwile ukutwalilila ukuba ne mibele yalinga no kuisunga nga abeni ba mutembo, abatasha icileela cabo. Abana abali bonse abo twendele na bo balingile ukulangisha umucinshi kuli mwine ŋanda ne fipe fyakwe kabili balingile ukuba ne mibele isuma no kukutika lintu tulelanshanya. Nga ca kuti abana bali abapuuluka, tacakamoneke bwino.—Amapi. 29:15.

⁶ Imimonekele ya pa lwesu ilingile ukushinina bambi ukwabula ukutwishika ukuti tuli batumikishi ba Cebo ca kwa Lesa. Mu mifwalile yesu ne misakwile, tatulingile ukuba aba busanku nelyo aba mulekelesha atemwa ukufwala mu kucishamo. Imimonekele yesu ilingile lyonse ukuba iyawamine mbila nsuma. (Linganyeniko Abena Filipi 1:27.) Pa kuba abasakamanishisha mu mimonekele yesu ne fibombelo ifyo tulebomfya, tatwakabike ica kupunwisha nelyo ukulenga bukapyunga bwesu ukutungwa akabi. (2 Kor. 6:3, 4) Imisosele yesu ne mibele iya ca kumwenako ilalundako imibele ya kucebusha ku bukombe bwa Bufumu, ukuletela Yehova umucinshi.—1 Pet. 2:12.