Mulebombako Umulimo wa Kulenga Abantu Baba Abasambi

 1. Finshi Yehova amucitila?

CALI shani pa kuti mube Inte ya kwa Yehova? Nalimo mwabalilepo ukumfwa “imbila nsuma” ku bafyashi benu, kubo mwalebomba nabo, ku bana besukulu banenu, nelyo ku baishile balebila imbila nsuma ku ng’anda ne ng’anda. (Marko 13:10) Lyena kwali abaipeeleshe ukubomfya inshita yabo pa kuti balemusambilisha Baibolo. Ilyo mwalesambilila, mwalitendeke ukutemwa Yehova kabili mwaishileishiba ukuti alimutemwa. Yehova alimukuliile mu cine, kabili apo nomba muli basambi ba kwa Yesu Kristu, mwalikwata ishuko lya kwisaikala umuyayaya. (Yoh. 6:44) Ukwabula no kutwishika mulatasha Yehova pa fyo abomfeshe abamusambilishe Baibolo pa kuti mwishibe icine, e lyo na pa fyo alenga mwaba umubomfi wakwe.

 2. Finshi twalasambilila muli cino cipande?

² Apo nomba twalishiba icine, twalikwata ishuko lya kulenga abantu bambi nabo batendeka ukwenda mu musebo uwaya ku bumi. Nalimo cilatwangukila ukubila imbila nsuma ku ng’anda ne ng’anda, lelo nalimo cilatukosela ukutendeka isambililo lya Baibolo. Ifi nga e fyo caba, ifyo twalasambilila muli cino cipande nalimo kuti fyamwafwa. Twalasambilila ifingatwafwa ukulenga abantu baba abasambi. Lyena twalasambilila na pa fyo twingacimfya amafya ayengalenga twalashimunuka nelyo twafilwa ukulatungulula amasambililo ya Baibolo. Natubalilepo ukulanda pa co tulingile ukusambilishisha bantu, ukucila ukupelela fye pa kubila imbila nsuma.

 3. Cinshi tubilila imbila nsuma?

³ Iyo Yesu ali pano isonde alipeele abasambi bakwe umulimo. Pa kubomba uyu mulimo bali no kulacita ifintu fibili. Ica kubalilapo, alibebele ukubila imbila nsuma ya Bufumu, kabili alibalangile ne fya kubila. (Mat. 10:7; Luka 8:1) Pa fyo Yesu aebele abasambi bakwe pali ne fyo bali no kucita nga ca kuti abantu bakaana ukukutika ku mbila ya Bufumu, e lyo ne fyo bali no kucita abantu nga bakutika. (Luka 9:2-5) Alilandile no kuti abasambi bakwe bali no kubila imbila nsuma ku bantu abengi mu ncende ishingi, ilyo atile bali no kubila imbila nsuma “ku nko shonse.” (Mat. 24:14; Imil. 1:8) Kanshi nampo nga abantu bakutika imbila nsuma nelyo iyo, Yesu aebele abasambi bakwe ukuti balingile ukutwalilila ukweba abantu pa Bufumu bwa kwa Lesa na pa fyo bukacita.

 4. Apo tulabila imbila nsuma, finshi fimbi tulingile ukucita ukulingana ne fyaba pali Mateo 28:18-20?

⁴ Ni cinshi icalenga bubili ico Yesu aebele abasambi bakwe ukulacita? Abebele ukulasambilisha abantu ukulakonka fyonse ifyo abebele. Nomba bushe abali no kubomba fye uyu mulimo Bena Kristu ba mu nshiku sha batumwa nga fintu abantu bamo balanda? Awe. Yesu alandile ukuti abasambi bakwe bali no kubomba uyu mulimo wacindama ukufika na muno nshiku, kabili bali no ku-ubomba “mpaka na ku mpela ya calo.” (Belengeni Mateo 28:18-20.) Ilyo Yesu amoneke ku basambi bakwe abacilile 500, nalimo e lyo abapeele uyu mulimo. (1 Kor. 15:6) Na kabili mu cimonwa Yohane amwene, Yesu alimulangile ukuti afwaya abasambi bakwe bonse balesambilisha abantu pali Yehova.—Ukus. 22:17.

 5. Ukulingana na 1 Abena Korinti 3:6-9, bushe Paulo alangilile shani ifyo umulimo wa kubila imbila nsuma wa-ampana no mulimo wa kusambilisha?

⁵ Umutumwa Paulo alingenye umulimo wa kulenga abantu baba abasambi ku kulima ifilimwa. Ici cilolele mu kuti tatulingile ukupelela fye pa kubyala imbuto. Aebele abena Korinti ukuti: “Ine nalilimbile, Apolo alitapilile . . . imwe muli bala lya kwa Lesa ililelimwa.” (Belengeni 1 Abena Korinti 3:6-9.) Apo tuli babomfi mwi “bala lya kwa Lesa,” tatupelela fye pa kubyala imbuto, lelo tulatapilila kabili libili libili tulaya mu kumona ifyo imbuto twabyala shilekula. (Yoh. 4:35) Lelo twalishiba no kuti Lesa e ulenga ukuti imbuto shimene.

 6. Ilyo tulesambilisha abantu, tufwile ukubafwa ukucita finshi?

⁶ Tulafwaya bonse ababa no ‘mutima uusuma uufwaya umweo wa muyayaya batetekela.’ (Imil. 13:48) Pa kulenga ababa ne mitima iisuma ukuba abasambi, tufwile ukubafwa (1) ukumfwikisha ifyo balesambilila, (2) ukusumina ifyo balesambilila, na (3) ukulabomfya ifyo balesambilila mu Baibolo. (Yoh. 17:3; Kol. 2:6, 7; 1 Tes. 2:13) Bonse mu cilonganino kuti ba-afwa abasambi ba Baibolo nga ca kuti balebalanga ukuti balibatemwa, kabili nga balebapokelela bwino nga baisa mu kulongana. (Yoh. 13:35) Na kabili, uusambilisha umusambi Baibolo nalimo kuti apoosapo inshita iikalamba na maka pa kwafwa umusambi ukuleka ukukonka ifisambilisho nelyo intambi ifyaba nga “malinga ayakosa.” (2 Kor. 10:4, 5) Nalimo kuti papita imyeshi iingi pa kuti umusambi aluke no kufikapo ukubatishiwa. Lelo ukubombesha kwesu takwakaye fye nga mu menshi.

 7. Cinshi cilenga tulebila no kusambilisha abantu imbila nsuma?

⁷ Mulandu nshi tubilila imbila nsuma ku bantu no kubasambilisha pa kuti babe abasambi? Ica kubalilapo, ni co twalitemwa Yehova. Nga mule-esha na maka ukulakonka ifunde lya kubila imbila nsuma no kulenga abantu baba abasambi, ninshi mulelanga ukuti mwalitemwa Lesa. (1 Yoh. 5:3) Tontonkanyeni pali ici: Ukutemwa Yehova kwalilenga mulebila imbila nsuma ku ng’anda ne ng’anda. Bushe calimwangukile ukutendeka ukubila imbila nsuma ku ng’anda ne ng’anda? Nalimo tacamwangukile. Ilyo mwaile mu kubila imbila nsuma pa muku wa kubalilapo, bushe mwali no mwenso? Ukwabula no kutwishika mwali no mwenso! Lelo mwalishibe ukuti uyu e mulimo Yesu afwaya ukuti mulebomba, kabili mwalyumfwilile ili ifunde. Kabili mu kupita kwa nshita mwalilekele ukuba no mwenso wa kubila imbila nsuma. Nomba bushe mulomfwa umwenso ukutungulula isambililo lya Baibolo? Nalimo mulomfwa umwenso. Lelo nga mwapepa kuli Yehova ukuti amwafwe ukuba uwashipa no kusanga umuntu uwa kusambilisha Baibolo, akalenga mukalefwaisha ukulenga abantu baba abasambi.

 8. Nga fintu Baibolo ilanda pali Marko 6:34, cinshi cimbi icingalenga twalafwaisha ukusambilisha abantu?

⁸ Icalenga bubili icilenga tulesambilisha abantu icine ni co twalibatemwa. Ku ca kumwenako, pa nshita imo Yesu na basambi bakwe balinakile sana pa numa ya kubila imbila nsuma pa ma-awala ayengi. Balekabila icifulo ukwa kuti batuusheko, lelo ibumba lya bantu lyalibakonkele. Yesu alyumfwilile abantu uluse, ne ci calengele atendeke ukubasambilisha “ifintu ifingi.” (Belengeni Marko 6:34.) Alibombeshe nangu ca kuti alinakile. Cinshi calengele? Yesu alishibe ifyo abantu abali mwi bumba balekabila. Alimwene ukuti balecula kabili tabakwete isubilo, kabili alefwaya ukubafwa. Ifi fine e fyo abantu baba na muno nshiku. Nangu ca kuti abantu muno nshiku balamoneka ukuti baliba ne nsansa kabili balikwata ifyo bakabila, baliba na mafya kabili balakabila ukuba ne subilo. Baba nge mpaanga ishaluba, ishishakwata kacema uwa kushitungulula. Umutumwa Paulo atile abantu ba musango uyu tabaishiba Lesa kabili tabakwata isubilo. (Efes. 2:12) Baba mu “musebo uwaya ku bonaushi”! (Mat. 7:13) Nga twatontonkanya pa fyo abantu ababa mu cifulo tubilamo imbila nsuma bakabila ukwishiba Lesa, tulafwaya ukubafwa pantu tulabomfwila uluse kabili twalibatemwa. Kabili inshila iisuma iyo twingabafwilamo, kutendeka ukubasambilisha Baibolo.

 9. Ukulingana ne fyaba pa Abena Filipi 2:13, bushe Yehova kuti amwafwa shani?

⁹ Nalimo mulomfwa umwenso ukutendeka ukusambilisha umuntu Baibolo pa mulandu ne nshita iikabilwa pa kusambilisha umuntu. Nga ca kuti mulomfwa umwenso, mulepepa kuli Yehova no kumulomba ukuti alelenga mulefwaisha ukukwata uwa kusambilisha Baibolo. (Belengeni Abena Filipi 2:13.) Umutumwa Yohane alitweba ukuti Lesa akala-asuka amapepo yesu nga twapepa ukulingana no kufwaya kwakwe. (1 Yoh. 5:14, 15) Kanshi te kuti mutwishike no kutwishika ukuti Yehova akulamwafwa ukulafwaisha ukulenga abantu baba abasambi.

10-11. Finshi fingalenga twafilwa nelyo twalashimunuka ukutendeka ukutungulula isambililo lya Baibolo?

¹⁰ Twalishiba ukuti calicindama ukubomba umulimo wa kusambilisha no kulenga abantu baba abasambi, lelo nalimo cilatukosela ukubomba ukulingana ne fyo tufwaya. Natumone amafya yamo ayo twingakwata, e lyo ne fyo twingacita pa kuti tuyacimfye.

¹¹ Nalimo kuti catukosela ukubomba ukulingana ne fyo tulefwaya. Ku ca kumwenako, bakasabankanya bamo bakalamba, e lyo bamo balalwalilila. Bushe mwaba pali aba twalandapo? Tontonkanyeni pa fintu fimo ifyo tusambilile pa mulandu no bulwele bwa COVID-19. Natusambilila ukutila kuti twatungulula amasambililo ukubomfya foni, tabuleti, nelyo kompyuta! Kanshi kuti mwatungulula isambililo lya Baibolo ninshi muli fye pa ng’anda, kabili calyanguka ukucita ifi. Mwaliba ubusuma na bumbi mu kucita ifi twalandapo. Abantu bamo kuti batemwa ukusambilila Baibolo, nomba tabakwata inshita pa nshita tuba mu mulimo wa kubila imbila nsuma. Lelo nalimo kuti bakwata fye inshita ulucelo sana nelyo ubushiku. Bushe kuti mwaitemenwa ukusambilisha umuntu Baibolo pali ishi inshita? Yesu asambilishe Nikodemo mu nshita ya bushiku, pantu e nshita Nikodemo alefwaya ukumusambilisha.—Yoh. 3:1, 2.

12. Finshi ifingalenga twashininkisha ukutila kuti twaba bakasambilisha abasuma?

¹² Nalimo kuti twalamona kwati tatwaishiba bwino ifya kutungulula isambililo lya Baibolo. Nalimo kuti twalamona ukuti tufwile ukwishiba ifingi sana nelyo ukwishiba bwino ifya kusambilisha ilyo tushilakwata uwa kusambilisha. Nga ca kuti ifi e fyo mumona, moneni ifintu fitatu ifingamwafwa. Ica kubalilapo, Yehova amumona ukuti mwalifikapo ukusambilisha abantu. (2 Kor. 3:5) Icalenga bubili, Yesu uo bapeela “amaka yonse mu muulu na pano isonde,” alimweba ukulasambilisha abantu. (Mat. 28:18) Ne calenga butatu, muleishiba ukuti bamunyinefwe na bankashi kuti bamwafwa. Ilyo Yesu alesambilisha alebomfya ifyo Wishi amusambilishe, ifi fine e fyo na imwe mwingacita. (Yoh. 8:28; 12:49) Na kabili kuti mwaipushako kangalila we bumba lyenu ilya mulimo, painiya, nelyo kasabankanya uwaishiba bwino ukusambilisha pa kuti amwafwe ukutendeka no kutungulula isambililo lya Baibolo. Cimo ico mwingacita pa kuti mulesambilisha bwino, kulaya na ba aba bwananyina ilyo baletungulula amasambililo yabo aya Baibolo.

13. Mulandu nshi tulingile ukuitemenwa ukusambilisha abantu mu nshila ishalekanalekana?

¹³ Nalimo kuti calatukosela ukulabomfya inshila ishipya e lyo ne fintu ifipya ifyo tubomfya pa kubila imbila nsuma. Inshila tubomfya pa kutungulula amasambililo ya Baibolo nayaluka. Ifyo tupekanya ne fyo tutungulula amasambililo mu citabo citila Kuti Mwaba ne Nsansa Umuyayaya!, fyalipusanako ne fyo twalecita kale. Amaparagrafu tubelenga yanono fye. Lelo tupoosa inshita iikalamba ku kulanshanya no musambi. Ilyo tulesambilisha umusambi tulabomfya sana amavidio, ifyaba pa webusaiti yesu, e lyo ne fyaba mu JW Library^®. Nga tamwaishiba ifya kubomfya ifi twalandapo, kuti mwaipushako uwa bwananyina uwingamwafwa ukwishiba ifya kufibomfya. Fwe bantunse cilatwangukila ukubomfya ifintu ifyo twabelesha. Kanshi cilatukosela ukusambilila ukubomfya ifintu ifipya. Lelo nga ca kuti Yehova na ba bwananyina batwafwa, tukamona ukuti calyanguka ukusambilila kabili tukalatemwa ukusambilila na bantu. Painiya umo atile, iyi inshila ya kusambililamo “isuma kuli bonse babili, e kutila kuli kasambilisha na ku musambi.”

14. Finshi tufwile ukulaibukisha nga ca kuti tubila imbila nsuma mu fifulo umo abantu bashifwaya ukukutika, kabili bushe ilembo lya 1 Abena Korinti 3:6, 7 kuti lyatukoselesha shani?

¹⁴ Nalimo tubila imbila nsuma mu cifulo umo ca-afya ukutendeka amasambililo ya Baibolo. Abantu bamo tabafwaya ukukutika ku mbila nsuma intu tubila. E lyo bambi nabo tabasumina ifyo tubasambilisha. Cinshi cingatwafwa ukutwalilila ukubila imbila nsuma mu fifulo fya musango yu? Muleibukisha ukuti ifintu muli cino calo filaluka, kabili abalekaana ukukutika imbila nsuma pa nshita imo nalimo kuti baisailuka ukuti balakabila Lesa ukubatungulula. (Mat. 5:3) Bamo abalekaana impapulo shesu, mu kupita kwa nshita balishiletendeka ukusambilila Baibolo. Na kabili twalishiba ukuti Yehova e mwine wa mulimo wa kulobolola. (Mat. 9:38) Afwaya twatwalilila ukubyala no kutapilila, lelo e umesha. (1 Kor. 3:6, 7) Nangu ca kuti tatwakwata isambililo lya Baibolo ilyo tutungulula pali ino nshita, tufwile ukwishiba ukuti Yehova akatulambula. Pantu takatulambule pa mulandu wa bantu abengi abo tupeela impapulo nelyo abo tusambilisha Baibolo, lelo akatulambula pa mulandu wa kuti tulabombesha ukwafwa abantu. Ukwishiba ifi kulatukoselesha!b

15. Bushe Yehova omfwa shani nga ca kuti umuntu asumina ukusambilila Baibolo kabili alebomfya ne fyo alesambilila?

¹⁵ Yehova alasekelela nga ca kuti umuntu asumina ukusambilila icine icaba mu Baibolo kabili ale-ebako na bantu bambi ifyo alesambilila. (Amapi. 23:15, 16) Yehova alasekelela nga nshi nga amona ifyo ababomfi bakwe baba abacincila mu mulimo wa kubila imbila nsuma no kusambilisha! Ku ca kumwenako, nangu ca kuti mu mwaka wa mulimo uwa 2020 kwali icikuko mwi sonde lyonse, twatungulwile amasambililo ya Baibolo 7,705,765, kabili abantu 241,994 bali-ipeele kuli Yehova no kubatishiwa. Aba abasambi nabo bakatendeka ukutungulula amasambililo no kulenga abantu abengi baba abasambi. (Luka 6:40) Ukwabula no kutwishika, tulalenga Yehova alasekelela ilyo tulebombako umulimo wa kulenga abantu baba abasambi.

16. Fisuma nshi ifyo twingapanga ukucita?

¹⁶ Pa kuti tulenge abantu babe abasambi tufwile ukubombesha, lelo Yehova nga atwafwa kuti twasambilisha abapya ukutemwa Shifwe wa ku muulu. Kuti twapanga ukutendeka ukutungululako isambililo nangu fye limo. Apo twamona ukuti nacilinga tuleipusha bonse abo twakumanya nga kuti batemwa ukusambilila Baibolo, nga tulecita ifi tukatemwa ifisuma ifikafumamo. Ukwabula no kutwishika Yehova akapaala ukubombesha kwesu.

17. Bushe tukomfwa shani nga twakwata uwa kusambilisha Baibolo?

¹⁷ Ala lishuko nga nshi ukubombako umulimo wa kubila imbila nsuma no kusambilisha abantu icine! Uyu umulimo ulalenga twaba ne nsansa nga nshi. Umutumwa Paulo uwa-afwile abena Tesalonika abengi ukuba abasambi, alandile ukuti: “Bushe imwe te imwe bene mwe subilo lyesu kabili insansa shesu kabili icilambu cesu ica kusansamukilapo ku cinso ca kwa Shikulwifwe Yesu pa kubapo kwakwe? Cine cine imwe muli bukata bwesu kabili insansa shesu.” (1 Tes. 2:19, 20; Imil. 17:1-4) Ifi fine e fyo na ba bwananyina abengi muno nshiku bomfwa. Nkashi Stéphanie no mwina mwakwe aba-afwa abantu abengi ukubatishiwa batile, “Takwaba icilenga twaba ne nsansa ukucila pa kwafwa abantu ukuipeela kuli Yehova.”