Bushe Inkondo ya Armagedone Ikatendekela ku Israel?—Finshi Baibo Yalandapo?

Baibo ilondolola ukuti inkondo ya Armagedone tayakabe fye mu citungu cimo, lelo ikaba fye mwi sonde lyonse kabili amabuteko yonse aya bantunse eyakalalwala na Lesa.

• “Ifyebo ififuma ku fibanda. . . . Fyaile ku shamfumu sha ba pano isonde shonse, ku kushilonganika ku nkondo ya bushiku bukalamba ubwa kwa Lesa Wa Maka Yonse. . . . Fyashilonganike ku cifulo iciitwa mu ciHebere Armagedone.”—Ukusokolola 16:14, 16.

Ishiwi lya kuti “Armagedone” lyafuma kwi shiwi lya ciHebere Har Meghid·dohnʹ ilyalola mu kuti “Ulupili lwa Megido.” Megido wali musumba uwaliko mu Israele. Ici e calenga abantu baletontonkanya ukuti inkondo ya Armagedone ikabela mu calo ca Israel. Nomba ici icitungu ca Megido nelyo incende shimbi ishaba ku Middle East te shikalamba apo “ishamfumu sha ba pano isonde shonse” na bashilika bashiko bengalwila inkondo.

Ibuuku lya Ukusokolola balilemba ukubomfya “ifishibilo,” kabili ifi fishibilo fyalikwata ifyo fimininako. (Ukusokolola 1:1) Armagedone te cifulo ca cine cine, lelo ilosha ku fintu ifikalacitika mwi sonde lyonse ilyo amabuteko yakemina imitekele ya kwa Lesa pa muku wa kulekeleshako.—Ukusokolola 19:11-16, 19-21.