Icipandwa 19

“Amano ya kwa Lesa aya mu Nkama”

1, 2. Ni “nkama” nshi tulingile ukufwaya ukwishiba, kabili mulandu nshi?

INKAMA! Apo shilacincimuna umutima no kupesha amano, abantunse ilingi line balafilwa ukukaka inkama. Lelo Baibolo itila: “Ubukata bwa kwa Lesa kufise cebo.” (Amapinda 25:2) Cine cine, apo Yehova ni Kateka wa Bubumbo bonse kabili Kalenga, alikwata insambu sha kufisa fimo ku bantunse mpaka inshita yakwe iyalinga iya kufisokolwelapo.

² Lelo, kwaliba inkama imo iya kucincimuna iyo Yehova asokolola mu Cebo cakwe. Itwa “ica nkama ca kupanga [kwa kwa Lesa].” (Abena Efese 1:9) Nga mwasambililapo kuti mwaishiba iyo nkama no kwishibilapo na fimbi. Ukwishiba iyi nkama kuti kwaisamupususha kabili kuti kwalenga mwaishibako pa lwa mano ya kwa Yehova ayashingapimwa.

Yasokololwa Panono Panono

3, 4. Ni shani fintu ukusesema kwalembwa pa Ukutendeka 3:15 kwapeele isubilo, kabili ni “nkama” nshi yasanshiwemo?

³ Ilyo Adamu na Efa babembwike, camoneke kwati ubufwayo bwa kwa Yehova ubwa kuti muli paradise wa pe sonde mube abantunse bapwililika bwalifufiwe. Lelo, ilyo line fye Lesa abombeele pali ubo bwafya. Atile: “Ndebika no bulwani pa kati ka iwe [we nsoka] no mwanakashi, kabili pa kati ka bufyashi bobe no bufyashi bwakwe: bwene bwakulakulasa ku mutwe, nobe wakulabulasa ku citende.”—Ukutendeka 3:15.

⁴ Aya mashiwi yali ya kupesha amano, aya manshoko. Bushe uyu mwanakashi ali nani? Nani ali insoka? Nani wali “ubufyashi,” ubwali no kulasa insoka ku mutwe? Adamu na Efa baletunganya fye. Lelo, ifyebo fya kwa Lesa fyalimo isubilo ku bana abali bonse abali no kuba aba busumino abali no kufuma muli balya babili ababulilwe ubusumino. Ubulungami bwali no kucimfya. Ubufwayo bwa kwa Yehova bwali no kufishiwapo. Lelo cali no kuba shani? Eya, iyo yali ni nkama! Baibolo ita ici ati “mano ya kwa Lesa aya mu nkama, ayafiswa.”—1 Abena Korinti 2:7.

 5. Peeleni ica kumwenako umulandu Yehova alesokolwela inkama panono panono.

⁵ Apo Yehova e “Uusokolole fya nkama,” mu kuya kwa nshita ali no kusokolola ifishinka fyacindama ifyakuma ku kufishiwapo kwa iyi nkama. (Daniele 2:28) Lelo ali no kucite fyo panono panono. Ku ca kumwenako, kuti twatontonkanya pa fyo wishi aasuka nga ca kuti kalume amwipusha ati, “Tata, ni kwi nafumine?” Wishi wa mano eba fye umwana ifinono ifyo engomfwa pa mushinku afikile. Ilyo umwana alekulilako, wishi alamweba ifyafulilako. Na Yehova wine, alamona inshita abantu bakwe bengomfwikisha ukusokolola kwa bufwayo bwakwe.—Amapinda 4:18; Daniele 12:4.

 6. (a) Mulimo nshi icipingo, nelyo icipangano, cibomba? (b) Mulandu nshi cipapushisha ukuti Yehova kuti acita ifipingo na bantunse?

⁶ Bushe Yehova alesokolola shani ifyo fintu? Abomfeshe ifipingo fyafulilako, atemwa ifipangano, ku kusokolola ifingi. Napamo na imwe inshita imo mwalicitapo icipangano—nalimo ku kushita ing’anda nelyo ukukongwesha nangu ukukongola indalama. Ico cipangano ukulingana ne funde cali cilayo ca kuti ifyo mwasuminishanya fili no kucitwa. Lelo mulandu nshi Yehova engakabila ukupanga ifipingo, atemwa ifipangano, na bantunse? Icebo cakwe cine cine kuti caba cilayo ca kuti ifyo alaya nangu cibe shani fikacitika. Ca cine, lelo inshita shimo, ku cebo cakwe Lesa mu cikuuku alilundako ne fipangano umwabela amafunde. Ifi fipangano fyaikashiwa filenga fwe bantunse bashapwililika ukuba no bucetekelo bwakosa mu filayo fya kwa Yehova.—AbaHebere 6:16-18.

Icipingo na Abrahamu

7, 8. (a) Cipingo nshi Yehova apangile na Abrahamu, kabili cinshi casokolwele pa lwa nkama? (b) Ni shani fintu Yehova panono panono alangile bwino bwino umwali no kufuma Ubufyashi bwalaiwe?

⁷ Ilyo papitile imyaka ukucila pali 2,000 ukufuma apo umuntunse atamfiwe mu Paradise, Yehova aebele umubomfi wakwe uwa busumino Abrahamu ati: “Ukufusha nkafusho bufyashi bobe nge ntanda sha mu muulu . . . kabili mu bufyashi bobe e mo shikaifwailo kupaalwa inko shonse isha pano isonde; pa kuti nuumfwe shiwi lyandi.” (Ukutendeka 22:17, 18) Ici tacali cilayo fye; Yehova acipangile nge cipingo ca mwi funde kabili acitungilile no mulapo wakosa. (Ukutendeka 17:1, 2; AbaHebere 6:13-15) Cilapapusha sana ukuti Shikulu Mulopwe cine cine alicitile icipangano ca kuti akapaala abantunse!

⁸ Icipingo na Abrahamu casokolwele ukuti Ubufyashi bwalaiwe bwali no kwisa ngo muntunse, pantu bwali no kufuma mu bufyashi bwa kwa Abrahamu. Lelo bushe aali no kuba ani? Mu kuya kwa nshita, Yehova asokolwele ukuti pa bana ba kwa Abrahamu, Isaki e wali no kuba icikolwe ca ubu Bufyashi. Pa bana ba kwa Isaki babili, Yakobo e wasalilwe. (Ukutendeka 21:12; 28:13, 14) Pa numa, Yakobo aseseme pa lwa umo uwa mu bana bakwe 12 ati: “Umulumbu tawakafume kuli Yuda, nangu ni nkonto ya bumushika mu ceni cakwe, akasuke esa uo ubufumu bwakwe, kuli wene e kukabe cumfwila ca nko sha bantu.” (Ukutendeka 49:10) Nomba caishileishibikwa ukuti ubu Bufyashi aali no kuba ni mfumu, uwali no kufuma muli Yuda!

Icipingo na Israele

9, 10. (a) Cipingo nshi Yehova apangile no luko lwa bena Israele, kabili cali no bucingo nshi? (b) Ni shani fintu Amalango yalangile ukuti abantunse balakabila icilubula?

⁹ Mu 1513 B.C.E., Yehova atantike ifyali no kupekanishisha ukusokololwa na kumbi pa lwa iyi nkama. Acitile icipingo na bafumine muli Abrahamu, e kutila uluko lwa bena Israele. Nangula ca kuti ino nshita tacibomba, ici cipingo ca Malango ya kwa Mose calefwaikwa mu bufwayo bwa kwa Yehova ubwa kuleta Ubufyashi alaile. Cali shani ifyo? Tontonkanyeni pa nshila shitatu. Ica ntanshi, Amalango yali nge cibumba ca kucingilila. (Abena Efese 2:14) Ifipope fya yako ifyalungama fyali cicingo pa kati ka baYuda na Bena fyalo. Kanshi Amalango yalibombele ku kubakilila umutande wa Bufyashi bwalaiwe. Pa mulandu maka maka uwa bucingo bwa musango yo, lulya luko e ko lwali lintu inshita yalinga iya kwa Lesa yafikile iya kuti Mesia afyalilwe mu mukowa wa kwa Yuda.

¹⁰ Ica bubili ca kuti Amalango yalangilile ukwabula no kushako ukuti abantunse balakabila icilubula. Apo Amalango yali ayapwililika, yalengele cimoneke ukuti abantunse ababembu te kuti bakonke ifyabamo mu kukumanina. Kanshi yabeleleko “[ku kusokolola, NW] bumpulamafunde, lukasuke alwisa Ulubuto [Ubufyashi] ulwalailwe.” (Abena Galatia 3:19) Amalango yalengele kube ukufimba pa membu ukupitila mu malambo ya nama. Nomba, apo “umulopa wa ng’ombe shilume ne mbushi te kuti usende imembu,” nga fintu Paulo alembele, aya malambo yali fye cinshingwa ce lambo lya cilubula ilya kwa Kristu. (AbaHebere 10:1-4) Kanshi ku baYuda ba busumino, cilya cipingo caishileba ni “kafundisha . . . ukufika na kuli Kristu.”—Abena Galatia 3:24.

11. Cilolelo nshi cawamisha ico icipingo ca Malango capeele abena Israele, lelo mulandu nshi uluko lulya mu cinkumbawile lwapusumwinine ico cilolelo?

¹¹ Ica butatu, cilya cipingo calengele uluko lwa bena Israele ukuba ne cilolelo cawamisha. Yehova abebele ukuti nga bali no kutungilila cilya cipingo, bali no kuba “ubufumu bwa bashimapepo kabili uluko lwa mushilo.” (Ukufuma 19:5, 6) Muli balya bena Israele ba cifyalilwa, e mwafumine aba ntanshi aba mu bufumu bwa bashimapepo ubwa ku muulu. Lelo, abena Israele mu cinkumbawile balisangukile cilya cipingo ca Malango, balikeene Mesia uwali e Bufyashi, kabili balipusumwine cilya cilolelo. Ni bani lyene bali no kukumanisha impendwa ya ba mu bufumu bwa bashimapepo? Kabili bushe ulo luko lwapaalwa lwali no kwampana shani no Bufyashi bwalaiwe? Ifyo fintu ifya muli iyi nkama fyali no kusokololwa mu nshita yalinga iya kwa Lesa umwine.

Icipingo ca Bufumu ica kwa Davidi

12. Cipingo nshi Yehova acitile na Davidi, kabili finshi ici calundilepo pa lwa nkama ya kwa Lesa?

¹² Mu mwanda wa myaka uwalenga 11 B.C.E., Yehova alilundilepo na fimbi pa lwa nkama ilyo acitile icipingo na cimbi. Alaile Imfumu ya busumino Davidi ati: “Nkemiko mwana obe uukakukonkapo, . . . no kupampamiko bufumu bwakwe. . . . Nkapampamike cipuna ca bufumu bwakwe umuyayaya.” (2 Samwele 7:12, 13; Amalumbo 89:3) Umutande wali no kufumamo Ubufyashi bwalaiwe nomba waishilesonta ku muntu umo, e kutila ing’anda ya kwa Davidi. Lelo bushe umuntuuntu fye kuti ateka “umuyayaya”? (Amalumbo 89:20, 29, 34-36) Kabili bushe imfumu ya buntunse fye kuti yalubula abantunse ku lubembu ne mfwa?

13, 14. (a) Ukulingana na Amalumbo 110, bulayo nshi Yehova alaya Imfumu yakwe iyasubwa? (b) Kusokolola nshi na kumbi pa lwa Bufyashi bwaleisa ukwasoseelwe muli bakasesema ba kwa Yehova?

¹³ Ilyo apuutilwemo, Davidi alembele ati: “Icisemo ca kwa Yehova kuli shikulu: Ikala ku kwa kulyo kwandi, nkasuke ncita abalwani bobe icipuna ca makasa yobe. Yehova nalapa, kabili takatelule, ati, Iwe uli shimapepo umuyayaya, uwa pa musango wa kwa Melkisedeke.” (Amalumbo 110:1, 4) Amashiwi ya kwa Davidi yalelanda fye pa Bufyashi bwalaiwe, nelyo Mesia. (Imilimo 2:35, 36) Iyi Mfumu tayali no kuteka mu Yerusalemu, lelo ukufuma ku muulu, “ku kwa kulyo” kwa kwa Yehova. Ico cali no kupeela iyi mfumu amaka pa calo ca bena Israele e lyo na pe sonde lyonse. (Amalumbo 2:6-8) Pano na fimbi fyalisokolwelwe. Moneni ukuti Yehova alapile umulapo wakakala uwa kuti Mesia aali no kuba “shimapepo . . . uwa pa musango wa kwa Melkisedeke.” Nga filya fyali Melkisedeke, uwali imfumu kabili shimapepo mu nshiku sha kwa Abrahamu, Ubufyashi bwali no kwisa bwali no kusontwa kuli Lesa umwine ku kuba Imfumu kabili Shimapepo!—Ukutendeka 14:17-20.

¹⁴ Mu kupita kwa myaka, Yehova abomfeshe bakasesema bakwe ukusokolwelapo na fimbi pa lwa iyi nkama yakwe. Ku ca kumwenako, Esaya asokolwele ukuti Ubufyashi bwali no kufwa imfwa ya kupeela ilambo. (Esaya 53:3-12) Mika asobele uko Mesia aali no kufyalilwa. (Mika 5:2) Daniele asobele fye ne nshita ubu Bufyashi bwali no kwisa e lyo no kwipaiwa.—Daniele 9:24-27.

Inkama Yasokololwa!

15, 16. (a) Cali shani pa kuti Umwana wa kwa Yehova ‘afyalwe ku mwanakashi’? (b) Cinshi Yesu apyene ku bafyashi bakwe abantunse, kabili ni lilali afikile ngo Bufyashi bwalaiwe?

¹⁵ Ifyo uku kusesema kwali no kufishiwapo cali ni nkama mpaka ilyo Ubufyashi bwamoneke. Ilembo lya Abena Galatia 4:4 litila: “Ilyo yafikile inshita, Lesa atumine Umwana wakwe, uwafyelwe ku mwanakashi.” Mu mwaka wa 2 B.C.E., malaika aebele nacisungu umuYuda Maria ati: “Mona, ukemite fumo, no kufyalo mwana mwaume, ne shina lyakwe ukamwinike Yesu. Wene akabo mukalamba, no kwitwa Umwana wa Wapulamo, kabili Shikulu Lesa akamupeele cipuna ca bufumu ica kwa Davidi wishi . . . , Umupashi wa mushilo ukesa pali iwe, na maka ya Wapulamo yakakufimba; kabili e co icikafyalwa ciketilwa ica mushilo, Umwana wa kwa Lesa.”—Luka 1:31, 32, 35.

¹⁶ Pa numa, Yehova akuushishe ubumi bwa Mwana wakwe ukufuma mu muulu ukwisa mwi fumo lya kwa Maria, ica kuti afyelwe ku mwanakashi. Maria aali ushapwililika. Lelo, Yesu tapyeneko ukukanapwililika kwakwe, pantu aali “Mwana wa kwa Lesa.” Kabili abafyashi ba kwa Yesu abantunse bafumine muli Davidi, mu cifyalilwa kabili ukulingana ne funde Yesu alikwete nsambu sha kuba impyani ya kwa Davidi. (Imilimo 13:22, 23) Pa lubatisho lwa kwa Yesu mu 29 C.E., Yehova alimusubile no mupashi wa mushilo no kutila: “Uyu e mwana wandi uwatemwikwa, umo mbekelwa.” (Mateo 3:16, 17) Lilya, e lyo Ubufyashi bwafikile! (Abena Galatia 3:16) Yali ni nshita ya kusokolola na fimbi pa lwa iyi nkama.—2 Timote 1:10.

17. Bushe fimbi fyalundilwepo shani pa bupilibulo bwa Ukutendeka 3:15?

¹⁷ Mu butumikishi bwakwe, Yesu alondolwele ukuti insoka ya pa Ukutendeka 3:15 ni Satana no bufyashi bwa nsoka ni balya bakonka Satana. (Mateo 23:33; Yohane 8:44) Pa numa, calisokolwelwe ifyo bonse aba bali no kucimfiwa umuyayaya. (Ukusokolola 20:1-3, 10, 15) Kabili calondolwelwe ukuti umwanakashi ni “Yerusalemu wa mu muulu,” ukuteyanya kwa ku muulu ukwa kwa Yehova, ukwaba ngo mukashi wakwe ukwapangwa ne fibumbwa fya ku mupashi.a—Abena Galatia 4:26; Ukusokolola 12:1-6.

Icipingo Cipya

18. Cinshi caba ubufwayo bwa “cipingo cipya”?

¹⁸ Napamo ukusokolola kukalamba pali konse kwali pa bushiku ilyo Yesu ashilafwa, ilyo aebele abasambi bakwe aba busumino pa lwa “cipingo cipya.” (Luka 22:20) Ici cipingo cipya na co cali no kufumamo “ubufumu bwa bashimapepo” filya fine fyacitile icacitangilile, e kutila icipingo ca Malango ya kwa Mose. (Ukufuma 19:6; 1 Petro 2:9) Lelo, ici cipingo tacali no kupanga uluko lwa cifyalilwa, lelo ulwa ku mupashi, “Israele wa kwa Lesa,” uwapangwa na bakonshi basubwa aba busumino aba kwa Kristu epela. (Abena Galatia 6:16) Aba mu cipingo cipya bali no kubombela pamo na Yesu mu kupaala abantunse!

19. (a) Mulandu nshi icipingo cipya citungulukila mu kuletako “ubufumu bwa bashimapepo”? (b) Mulandu nshi Abena Kristu basubwa betilwa ‘ifibumbwa fipya,’ kabili ni banga bakabomba mu muulu na Kristu?

¹⁹ Lelo mulandu nshi icipingo cipya citungulukila mu kuletako “ubufumu bwa bashimapepo” ku kupaala bantunse? Pantu ukucila ukusenuka abasambi ba kwa Kristu ukuti babembu, cilenga ukuti imembu shabo shilekelelwe ukupitila mwi lambo lyakwe. (Yeremia 31:31-34) Ilyo baba abalungama pa ntanshi ya kwa Yehova, alababuula no kubabika mu lupwa lwakwe ulwa ku muulu no kubasuba no mupashi wa mushilo. (Abena Roma 8:15-17; 2 Abena Korinti 1:21) Kanshi balapita mu ‘kufyalwa libili ku kuba no kucetekela kwa mweo . . . ukwabakilwa [bene] mu muulu.’ (1 Petro 1:3, 4) Apo ukusumbulwa kwa musango yo kupya ku bantunse, aba Bena Kristu bafyalwa ku mupashi betwa ‘ifibumbwa fipya.’ (2 Abena Korinti 5:17) Baibolo isokololo kuti kuli pele pele abantu 144,000 e bakaba ku muulu ukuteka abantunse balubulwa.—Ukusokolola 5:9, 10; 14:1-4.

20. (a) Cinshi cimbi casokolwelwe pa lwa nkama mu 36 C.E.? (b) Ni bani bali no kukwata amapaalo yalaiwe kuli Abrahamu?

²⁰ Aba basubwa capamo na Yesu baba “imbuto sha kwa Abrahamu.”b (Abena Galatia 3:29) Abasalilwe intanshi ni balya bafyalilwe mu buYuda. Lelo mu 36 C.E., kwali ulubali na lumbi ulwa nkama ulwasokolwelwe: Abena fyalo, nelyo abashali baYuda, bali no kusanshiwamo mwi subilo lya ku muulu. (Abena Roma 9:6-8; 11:25, 26; Abena Efese 3:5, 6) Bushe Abena Kristu basubwa beka fye e bali no kukwata amapaalo yalaiwe kuli Abrahamu? Iyo, pantu ilambo lya kwa Yesu linonsha aba pano isonde bonse. (1 Yohane 2:2) Mu kuya kwa nshita, Yehova asokolwele ukuti “ibumba likalamba” ilishingapendwa baali no kupusuka impela ya bwikashi bwa kwa Satana. (Ukusokolola 7:9, 14) Imintapendwa ya bantu na bambi bali no kubuushiwa no kuba ne subilo lya kwikala muli Paradise umuyayaya!—Luka 23:43; Yohane 5:28, 29; Ukusokolola 20:11-15; 21:3, 4.

Amano ya kwa Lesa ne Nkama

21, 22. Ni shani fintu inkama ya kwa Yehova ilanga amano yakwe?

²¹ Iyi nkama yaba kulanga kwa cipesha amano ukwa “mano ya [misango misango, NW] aya kwa Lesa.” (Abena Efese 3:8-10) Mwandini mano yapulamo Yehova alangile pa kupanga iyi nkama, lyena na mu kusokolola yene panono panono! Mano mano alilangulukileko abantunse pa kupelebela kwabo, ukuleka balange ifyo imitima yabo yaba icine cine.—Amalumbo 103:14.

²² Yehova na kabili alangishe amano yashingalinganishiwako pa kusala Yesu ukuba Imfumu. Umwana wa kwa Yehova alicetekelwa sana ukucila icibumbwa icili conse mu bubumbo bonse. Ilyo ali umuntunse, Yesu alipitile mu macushi ayapusanapusana. Alishiba bwino bwino amafya ya bantunse. (AbaHebere 5:7-9) Nga ni shani pa lwa bakateka banankwe Yesu? Pa myaka iingi, abaume na banakashi—abasalwa ukufuma mu mishobo yonse, indimi, ne fikulilo fyapusanapusana—balisubwa. Pamo ngo muntu umo umo, aba balipita mu mafya yapusanapusana no kuyacimfya, takwaba ubwafya ubo bashapitamo no kucimfya. (Abena Efese 4:22-24) Cikaba ca nsansa ukutekwa ne shi shamfumu kabili bashimapepo ba nkumbu!

23. Lishuko nshi Abena Kristu bakwata ukukuma ku nkama ya kwa Yehova?

²³ Umutumwa Paulo alembele ati: “Ica nkama icafishilwe ku nshita na ku nkulo isha pe . . . nacilengwa ukumoneka ku bashila bakwe.” (Abena Kolose 1:26) Cine cine, abasubwa aba mushilo ba kwa Yehova balyumfwikisha ifingi pa lwa iyi nkama, kabili balyebako ne mintapendwa ya bantu bambi pa lwa fintu baishiba. Mwandi lishuko ifwe bonse twakwata! Yehova “[atulenga] twishibe ica nkama ca kupanga kwakwe.” (Abena Efese 1:9) Natwebeko bambi iyi nkama yawamisha, ukubafwa na bo ukupenenga mu mano yashingapimwa aya kwa Yehova Lesa!

[Amafutunoti]

Amepusho ya Kutontonkanyapo

Yohane 16:7-12 Bushe Yesu apashenye shani inshila ya kwa Wishi iya kusokolola icine panono panono?

1 Abena Korinti 2:6-16 Mulandu nshi abengi bafililwa ukumfwikisha inkama sha kwa Yehova, kabili kuti twacita shani ifwe pa kushumfwikisha?

Abena Efese 3:10 Lishuko nshi Abena Kristu ilelo bakwata ukukuma ku nkama ya kwa Lesa?

AbaHebere 11:8-10 Ni shani fintu iyi nkama yakoseshe icitetekelo ca bantu ba ku kale, nangula ifishinka fya iko tabafyumfwikishe?

[Icikope pe bula 190]

“Nkafusho bufyashi bobe nge ntanda sha mu muulu”