Baibolo Kuti Yamwafwa Ukusanga Insansa

NANGU ca kutila Baibolo te citabo ca kusambililamo ifya miti, ilalanda pa fingacitikila amatontonkanyo no bumi bwa muntu pa mulandu wa fintu aimona, nampo nga alaimona bwino atemwa iyo. Baibolo itila: “Umutima wa nsansa muti usuma, lelo umutima uwafunshika uumye fupa.” Na kabili tubelengo kuti: “Nga watompoka mu bushiku bwa kumanama, ninshi amaka yobe yanono.” (Amapinda 17:22; 24:10) Ukufuupulwa kulapwisha maka, kuti kwatunasha kabili kuti kwatulenga fye no kukanafwaya ukwaluka nelyo ukwafwiwa.

Ukufuupulwa kuti kwaonaula na bucibusa ubo umuntu akwata na Lesa. Abaimona abashacindama ilingi bamona kwati Lesa te kuti abe cibusa wabo uwa pa mutima kabili bamona no kutila te kuti abatemwe. BaSimone, abo twacilandapo mu cipande cifumineko, balemona ukutila “Lesa te kuti abatemwe.” Lelo, nga twabelenga Icebo ca kwa Lesa Baibolo, tusangamo ukuti Lesa alasenamina abeshaesha ukucita ico afwaya.

Lesa Alasakamana Icine Cine

Baibolo itila: “Yehova aba mupepi na ku baputuke misana, kabili abafunshike mitima alabapususha.” Yehova tasuula “umutima uwalopota, uwafunshika,” lelo alayo “kupuupuutule myeo ya basokopala, no kupuupuutule mitima ya bafunshika.”—Amalumbo 34:18; 51:17; Esaya 57:15.

Inshita imo, Yesu, Umwana wa kwa Lesa, amwene ukuti calicindeme ukulondolwela abasambi bakwe icishinka ca kuti Lesa alamona ubusuma mu babomfi Bakwe. Mu cilangililo, alondolwele ukuti Lesa aleshiba ilyo uluseba lwapona pa nshi—ulo abantu abengi bashimona no kuti lwalicindama. Alondolwele no kuti Lesa alishiba tonse fye pa bantu, alishiba ne mpendwa ya mishishi ya ku mitwe yabo. Yesu asondwelele icilangililo ukuti: “E ico mwilatiina: Mwalicindama ukucila inseba ishingi.” (Mateo 10:29-31)a Yesu pano afundile ukuti nangu umuntu aimone shani kwati tacindama, abakwate citetekelo balicindama kuli Lesa. Na kuba, umutumwa Petro atucinkulako ukuti “Lesa taba na kapaatulula, lelo mu luko lonse umuntu uumutiina no kubomba ubulungami alapokelelwa kuli wene.”—Imilimo 10:34, 35.

Ishibeni Bwino Bwino Ifyo Mufwile Ukuimona

Icebo ca kwa Lesa citukoselesha ukwishiba bwino bwino ifyo tufwile ukuimona. Ilyo apuutilwemo no mupashi, umutumwa Paulo alembele ati: “Mu cikuuku ca bupe fye ico napeelwe ndeeba onse muli imwe ukuti eitontonkanishisha ukucila ifyo alingile ukutontonkanya; lelo atontonkanye pa kuti engaba na mano ayatuntulu, umo na umo ifyo Lesa amupeela umulingo wa citetekelo.”—Abena Roma 12:3.

Ukwabula no kutwishika, te kuti ciwame nga twaitontonkanishisha ukucila ifyo tufwile ukutontonkanya ica kuti twaba aba cilumba; lelo na kabili te kuti ciwame ukutontonkanya ukuti tuli ba cabe cabe. Kanshi, tufwile ukwishiba fye bwino bwino ifyo tufwile ukuimona. Tufwile ukwishiba ukuti twalipelebela muli fimo, lelo kwaliba na fimo ifyo tucita bwino. Umwina Kristu umo umwanakashi atile: “Nshili mubi; kabili nshacila bambi. Nga filya fine abantu bonse baba, fimo ndacita bwino e lyo fimbi na fyo nshicita bwino.”

Kwena, calyafya ukwishiba bwino bwino ifyo tufwile ukuimona, sana sana nga ca kuti pa myaka iingi twaleimona abashacindama. Tufwile ukubombesha pa kuti tuleke ukutontonkanye fyo. Lelo, Lesa kuti atwafwa ukwalula ubuntu bwesu ne fyo tuimona. Na kuba, e fyo Icebo ca kwa Lesa citukoselesha ukucita. Baibolo itila: “E ico mufuule ubuntu bwa kale umwabela imyendele yenu iya ntanshi iileonaika umwabelo lunkumbwa lwakwe ulwa bucenjeshi; lelo . . . mulengwe abapya mu maka ayacincisha ukutontonkanya kwenu, kabili mufwale ubuntu bupya ubwalengelwe umwabela ukufwaya kwa kwa Lesa mu bulungami bwa cine na bucishinka.”—Abena Efese 4:22-24.

Nga twabombesha ‘ukulengwa abapya mu maka ayacincisha ukutontonkanya kwesu,’ e kutila, ico tutontonkanyapo sana, kuti twayalula ubuntu bwesu ubwa kuimona abashacindama no kutendeka ukuimona abacindama. BaLena, abo twacilandapo mu cipande cifumineko, basangile ukuti ukuleka ukutontonkanya ukuti tapali nangu umo uwingabatemwa no kubafwa, e kwabafwile ukutendeka ukuimona abacindama. Kufunda nshi ukubomba ukwa mu Baibolo ukwayafwile baLena, baSimone pamo na bambi ukwishiba ukuti balicindama?

Ifishinte fya mu Baibolo Ifingamwafwa Ukusanga Insansa

“Poosa pali Yehova icisendo cobe icafina, wene alekulama.” (Amalumbo 55:22) Ica kubalilapo fye, ipepo kuti lyatwafwa ukuba ne nsansa sha cine. BaSimone batila: “Lyonse nga nafuupulwa, ndapepa kuli Yehova ukuti angafwe. Lyonse fye alampeela amaka no butungulushi.” Ilyo kemba wa malumbo aletukoselesha ukupoosa pali Yehova icisendo cesu icafina, aletucinkulako fye ukuti Yehova alatusakamana kabili atumona abalinga ukwafwiwa no kutungililwa. Pa bushiku bwa ca Kucilila mu 33 C.E., abasambi ba kwa Yesu balyumfwile ubulanda ilyo abebele ukuti ukuya kwakwe nakupalama. Yesu abakoseleshe ukupepa kuli Wishi, kabili abebele no kuti: “Lombeni kabili mukapokelela, ukuti ukusekelela kwenu kufishiwepo.”—Yohane 16:23, 24.

“Mwaba insansa ishingi mu kupeela ukucila ishaba mu kupokelela.” (Imilimo 20:35) Nge fyo Yesu asambilishe, ukupeela kulalenga umuntu aba ne nsansa sha cine cine. Ukucita ifyalandwa muli ici cishinte ca mu Baibolo, kutulenga ukupoosa amano ku kukabila kwa bantu bambi ukucila ukupoosa fye amano ku fyo tufilwa ukucita. Ilyo twayafwa bambi kabili twamona ne fyo batemwa pa fyo twabafwa, tulomfwa bwino ukuti natubombako fimo. BaLena balishininkisha ukuti ukulanda na bantu lyonse pa mbila nsuma ya mu Baibolo kulabafwa mu fintu fibili. Batila: “Ica kubalilapo, ndomfwa bwino kabili ukushimikila kulandetela ne nsansa isho Yesu alandilepo. Ica bubili, abantu balatemwa ilyo ndelanda na bo, ne co cilandetela insansa.” Nga twaipeelesha ukwafwa bambi, tukasanga ukuti na kuli ifwe bene cikaba nga filya Amapinda 11:25 yalanda, ayati: ‘Uunwensha akanwenshiwa umwine.’

“Inshiku shonse sha mulanda shibi, lelo isha wasansamuko mutima mutebeto wa pe.” (Amapinda 15:15) Bonse fye kuti twacitapo cimo pa fyo twingaimona ne fyo twingamona ifintu. Nga tuleimona ukuti tapali icisuma nangu cimo ico twingacita, lyonse tukaba fye aba bulanda, nomba nga tuletontonkanya pa fisuma no ‘kusansamuka umutima,’ lyonse tukaba abasamwa kwati tuli pa mutebeto. BaSimone batila: “Ndesha lyonse ukutontonkanya pa fisuma. Lyonse ndasambilila ifya mu Baibolo pa lwandi no kubombako umulimo wa kushimikila, na kabili naliba no mute wa kupepa. Cimbi na co, ndesha sana ukuba pamo na bantu abatontonkanya pa fisuma, kabili mfwaya ukukoselesha bambi no kubafwa.” Umuntu uwaba no mutima wa musango yo alaba ne nsansa sha cine cine, nge fyo na Baibolo itukoselesha ukuti: “Samweni muli Yehova, no kwanga, mwe balungama; kabili auleni, mwe batambalalo mutima bonse.”—Amalumbo 32:11.

“Icibusa citemwa mu nshita yonse, kabili munyina afyalilwo kumanama.” (Amapinda 17:17) Ukulanda ifili ku mutima wesu ku munensu nelyo ku mpanda mano twacetekela, kuti kwatwafwa ukuleka ukuimona abashacindama, pantu nga tatucitile fyo, ukutontonkanya kwa musango yo kuti kwatupwisha maka. Ukwebako bambi kuti kwatwafwa ukutendeka ukuimona abacindama. BaSimone batila: “Ukwebako bambi ifyo ndeumfwa kulangafwa sana. Ufwile ukwebako bambi ifyo uleumfwa. Ilingi line, ukulanda ifili ku mukoshi e cifwaikwa fye.” Nga mwacite co, mukamona ukuti ipinda lya mu Baibolo lya cine, ilitila: “Ukusakamana kwa mu mutima wa muntu kulaukontamika; lelo icebo cisuma ciulengo kusamwa.”—Amapinda 12:25.

Ico Mwingacita

Twalanda fye pa fishinte fibomba ifya mu Baibolo ifinono ifingatwafwa ukuti tuleke ukuimona abashacindama ne fyo twingasanga insansa sha cine. Nga ca kuti na imwe muimona abashacindama, tulemukoselesha ukusambilila bwino bwino Icebo ca kwa Lesa, Baibolo. Sambilileni ifya kuimona ukuti mwalicindama no kwishiba ukuti bucibusa bwenu na Lesa bwalicindama. Tule-enekela ukuti nga mwatungululwa ne Cebo ca kwa Lesa, na imwe mukasanga insansa sha cine muli fyonse ifyo mucita.

[Futunoti]

[Icikope pe bula 7]

Ukumfwila ifishinte fya mu Baibolo kulaleta insansa