Mwileka Icili Conse Cimupumbule Muli Buno “Bushiku bwa Mbila Nsuma”

ABANTU bane abalwele ifibashi ba-ambile ukutontonkanya pa fyo bali no kucita. Takwali nangu umo uwalebakumbusukako ilyo baleikala pa mpongolo ya musumba. Mu musumba wa Samaria mwali icipowe pantu abena Siria abaushingile balileseshe abantu ukulaingishamo ifya kulya. Kanshi tapali ne co abantu baali no kwingilila mu musumba pantu umutengo wa fya kulya walikulile icine cine. Kabili pali iyi inshita ninshi abantu balitendeka kale ukulya abantu banabo.—2 Isha. 6:24-29.

Aba fibashi bayipwishe ukuti ‘bushe te kuti ciwame twaya ku nkambi ya bena Siria? Tapali icingabipa nga twaile ku nkambi yabo.’ Ilyo bwailile, baliile. Ilyo bafikile pa nkambi, basangile patalele na tondolo. Tapali nangu bamo abalelonda inkambi. Bakabalwe ne mpunda fyonse fyalikakilwe, nomba tapali abashilika. Aba fibashi bane balengeele mwi tenti. Tamwali nangu umo, lelo mwali ifya kulya ne fya kunwa ifingi nga nshi. Ba-ambile ukulya no kunwa. Aba fibashi bamwene na golde, silfere, ifya kufwala, ne fintu na fimbi ifya mutengo. Balifisendele no kuyafifisa, kabili balibweleelemo no kuyasenda na fimbi. Bonse fye balifulumwikepo pa nkambi. Yehova mu cipesha amano alengele abena Siria ukumfwa kwati kwali abashilika ba nkondo abaleisa mu kubasansa. Ne ci calengele bafulumuke. Fyonse ifyo bashile, umuntu fye uuli onse uwafisanga ali no kusenda!

Aba fibashi balesenda no kufisa ifipe fya mutengo. Nomba ilyo batontonkenye pa bali mu Samaria abali ne cipowe, ba-ambile ukucushiwa no mutima. Batile: “Taciweme ico tulecita. Buno bushiku bwa mbila nsuma!” Aba fibashi babweleele ku Samaria ulubilo no kweba abantu ilyashi lisuma pa fyo basangile.—2 Isha. 7:1-11.

Na ifwe bene kuti twatila tuleikala mu nshita iyo twingeta ukuti “ubushiku bwa mbila nsuma.” Ilyo Yesu alelanda pa ‘ca kwishibilako ukuti impela ya calo ili mupepi,’ atile: “Ne mbila nsuma iyi iya bufumu ikabilwa ku bantu bonse aba pe sonde ku kuba ubunte ku nko shonse; e lyo impela ikesa.” (Mat. 24:3, 14) Bushe ukwishiba ifi kufwile ukutulenga ukucita cinshi?

Ukufwaisha Ifintu Kuti Kwalenga Twafinininwa

Aba fibashi balitemenwe sana ilyo basangile ifintu, ica kuti pa kubala balilabile na ku Samaria. Baletontonkanya fye pa fintu bali no kukwata. Bushe ica musango yu kuti catucitikila na ifwe? “Ifipowe” fyaba pa fintu ifilanga ukuti tuli ku mpela ya calo. (Luka 21:7, 11) Yesu asokele abasambi bakwe ukuti: “Mucenjele epali imitima yenu yafinininwa ku buliili na kuli bucakolwa na ku masakamika ya mikalile.” (Luka 21:34) Kanshi fwe Bena Kristu, tufwile ukucenjela ukukanalenga ifintu ifyo tufwaisha ukutulenga ukulaba ukuti tuleikala mu “bushiku bwa mbila nsuma.”

Ba Blessing, tabalekele ifyo balefwaisha ukubabwesesha inuma. Balebomba bupainiya bwa nshita yonse. Ilyo bapwile isukulu baishileupwa ku uubomba pa Musambo mu calo ca Benin, kabili na bo balibasuminishe ukulabombela pa musambo pene. Batile: “Momba umulimo wa kuwamya imiputule umwikala abantu, kabili nalitemwa ukubomba uyu mulimo.” Pali ino nshita, ba Blessing nababomba imyaka 12 pa musambo kabili baliba ne nsansa ifi bapoosa amano kuli ubu “bushiku bwa mbila nsuma” ubo tulimo.

Mulecenjela ne Fintu Ifyonaula Inshita

Ilyo Yesu atumine abasambi 70, abebele ukuti: “Cine cine, ukulobolola kukalamba, lelo ababomfi bena nabacepa. E ico lombeni Umwine wa kulobolola ukuti atume ababomfi mu kulobolola kwakwe.” (Luka 10:2) Filya fine ifilyo fingonaika nga tabasombwele bwangu, e fyo no kulekelesha umulimo wa kushimikila abantu Icebo ca kwa Lesa kwingalenga imyeo yabo ukuloba. E co Yesu asoseele no kuti: “Mwiposha umuntu nangu umo mu nshila.” (Luka 10:4) Ukulingana no lulimi lwa ciGriki, ishiwi lya kuti “ukuposha” talipilibula fye ukwipusha umuntu ukuti “uli shani?” Lelo kuti kwaba no kumukumbatila, e lyo no kulanda nankwe ilyashi ilitali nga filya ciba umuntu nga akumanya umunankwe. Kanshi ico Yesu ale-eba abasambi bakwe, kubomfya bwino inshita no kukanaipoosa ku fintu ifishicindamishe. Imbila balebila yalingile ukubilwa bwangu.

Nomba lekeni tulande pa fitonawila inshita. Pa myaka iingi, TV e yaishibikwa ukuti e yonawila sana abantu inshita mu ncende ishingi. Inga amafoni ya kwenda na yo e lyo na makompyuta? Ifyo bafwailishe mu Britain filanga ukuti cila bushiku, abantu 1,000 muli ici calo “bapoosa amamineti 88 pa mafoni ya nsale, amamineti na yambi 62 pa mafoni ya kwenda na yo, amamineti 53 pali kompyuta e lyo na yambi 22 pa kutuma ifyebo ukubomfya foni.” Nga kubika aya mamineti yonse pamo, kuti yacilapo imiku ibili pa ma-awala ayo painiya wa kwafwilisha abomba cila bushiku! Bushe mamineti yanga mupoosa pa kulanda pa foni, pa kompyuta, na pa kutumina abantu ifyebo?

Ba Ernst na ba Hildegard Seliger tabaleonaula inshita. Bonse pamo baikele imyaka 40 mu fifungo fya ba Nazi ne fya ba Komyunisti. Ilyo babafumishe, batendeke ukubomba bupainiya bwa nshita yonse ukufikila lintu bafwile no kuya ku muulu.

Abantu abengi balefwaya ukulalembeshanya na ba Ernst Seliger na bena mwabo. Kanshi nga balepoosa inshita ikalamba mu kubelenga amakalata bali no kulabalembela e lyo na bo nga balelemba. Lelo ico bapooseleko sana amano, mulimo wa kubombela Lesa.

Bonse fye twalitemwa ukulembeshanya na banensu nangu ukulanshanya na bo, kabili ici tacabipa nakalya, cikulu fye natutantika bwino inshita. Lelo tufwile ukucenjela pa kuti ifitupumbula tafitonawilile inshita muli buno bushiku bwa kushimikilamo imbila nsuma.

Shimikileni Sana Imbila Nsuma

Twalipaalwa sana pa kuba mu “bushiku bwa mbila nsuma.” Kanshi twilalabikilwa ku fintu nga filya cali pa kubala kuli balya aba fibashi bane. Mwilaba ukuti baishileiluka ukuti: “Taciweme ico tulecita.” Na ifwe bene te kuti ciwame nga twalekele ifintu fya pa lwesu nelyo ifya kutupumbula ukutuliila inshita ica kuti twafilwa no kulashimikila sana.

Twalikwata ica kumwenako icisuma ico tulingile ukupashanya. Ilyo umutumwa Paulo aibukishe ifyo abombele mu myaka 20 iya kubalilapo ukushimikila, alembele ukuti: “Nalishimikila sana imbila nsuma pali Kristu.” (Rom. 15:19) Paulo talefwaya icili conse ukumubwesesha pa numa. Na ifwe natube abacincila nga filya fine aali ilyo tuleshimikila pa Bufumu muli buno “bushiku bwa mbila nsuma.”

[Icikope pe bula 28]

Ba Blessing tabalefwaya ifintu fya pa lwabo ukupumfyanya umulimo wabo uwa nshita yonse

[Icikope pe bula 29]

Ba Ernst na ba Hildegard Seliger balebomfya bwino inshita