Bushe Abantu Bakabala Abekalapo Umutende Umwaka fye Onse?

“Kube ubukata kuli Lesa mu myulu iyasansama, na pe sonde pabe umutende mu bantu abo abekelwamo.”—Luka 2:14.

ABANTU abengi balishiba aya mashiwi bamalaika ba kwa Lesa balandile ilyo balebilisha ukufyalwa kwa kwa Yesu kuli bakacema abalelinda umukuni mu nshita ya bushiku. Abengi abatila Bena Kristu balawamyako imibele yabo pa bushiku ubo abaya ku macalici batila e bo Yesu afyelwepo. Pa nshita ya Krisimasi abantu balafwaisha ukuba ne mibele bamalaika babilishe mu bukombe bwabo pamo nga ukusekelela, umutende, no kubekwa.

Iyi mibele isuma ilateemuna na bantu abashimona Krisimasi ngo bushiku bwa mapepo. Balomfwa bwino ukumona ifyo abantu batemwana ilyo balesefya. Inshita ya Krisimasi abantu tabaya ku sukulu nelyo ku ncito, iba ni nshita ya mwikalwe, inshita abantu batuusha, ukuba pamo no lupwa ne fibusa, nelyo fye ukuya ku kwangala. Lelo, ku bantu abengi abafumacumi Krisimasi ni nshita ya kucindika Yesu Kristu.

Te mulandu ne fyo abantu baishiba pa fyo Krisimasi ipilibula, abengi balishiba ukuti imibele isuma iyo abantu bakwata pa Krisimasi ya pa nshita fye iinono. Pa numa fye ya kusefya, abantu batendeka ukucita imisango babelesha. Icipande calelanda pali Krisimasi ico ba Royal Bank of Canada basabankenye catile: “Bonse abatila Bena Kristu besha ukumoneka nga Bena Kristu pa milungu fye inono cila mwaka. Pa Krisimasi, abantu balacitila abanabo ifisuma ukufika fye na lintu basefya Umwaka Upya. Lelo, pa numa balakaluka, kabili tabika mano ku fyo abanabo balepitamo.” Ici cipande catwalilile ukuti, “icabipako fye” ca kuti imibele isuma abantu baba nayo pa Krisimasi tabaikwata ukupulinkana “umwaka fye onse.”

Nampo nga mulesuminisha ifyo ici cipande calandile nelyo iyo, icishinka ca kuti ificitika pa Krisimasi fyalenga kube ifipusho fyacindama. Bushe kukabako inshita ilyo abantu bakaba bakapekape no kuba bwino ku banabo inshita fye yonse? Bushe kwalibako isubilo lya kuti ifyebo bamalaika basosele pa bushiku Yesu afyelwe fikafikilishiwa? Nelyo bushe tulingile ukusubila ukuti umutende wa cine cine ukabako?