Ubukombe Tufwile Ukubila

KALE sana ilyo inshita ya buKristu ishilaisa, Yehova aebele Abrahamu wa busumino pa lwa kupekanya kwa kuti “inko shonse isha pano isonde” shikafwaye ukupaalilwamo. (Ukute. 22:18) Kabili apuutilemo Solomone ukulemba pa ca kutendekelako ico abantunse bonse bafwile ukucita ati: “Bela Lesa [wa cine, NW] akatiina, baka amafunde yakwe; pantu ici e ca buntunse bonse.” (Luk. Mil. 12:13) Lelo ni shani fintu abantu ba mu nko shonse bali no kusambilila ulwa ifi fintu?

Nangula lyonse kwaliba abantu abatetekela icebo ca kwa Lesa, Baibolo ilangilila ukuti lulu wa kushimikila mwi sonde lyonse uwa kulenga aba nko shonse ukumfwako imbila nsuma aali no kubako mu “bushiku bwa kwa Shikulu.” Ubu bwatendeke mu 1914. (Ukus. 1:10) Ukusokolola 14:6, 7 kwasobele pa lwa iyi nshita ati kwali no kuba ukubilisha kwa lulumbi “ku luko lonse no mukowa no lulimi na bantu” ukwali no kutungululwa na bamalaika. Bali no kucincisha ati: “Tiineni Lesa, no kumupeelo mucinshi, pa kuti naiise nshita ya bupingushi bwakwe; pepeni uwacitile umuulu ne calo na bemba no tumfukumfuku twa menshi.” Ukufwaya kwa kwa Lesa kwa kuti ubukombe bwakwe bushimikilwe. Twalikwata ishuko lya kubombako uyo mulimo.

“Lesa wa Cine.” Lintu Yehova atile “Imwe muli nte shandi,” ifikansa fyali pali buLesa. (Esa. 43:10) Ubukombe bufwile ukubilishiwa te bwa kuti fye abantu bafwile ukukwata ukwa kupepa nelyo ukutetekela lesa uuli onse. Lelo, bafwile ukupeelwa ishuko lya kwishiba ukuti Kabumba wa muulu ne calo e Lesa wine wine eka. (Esa. 45:5, 18, 21, 22; Yoh. 17:3) Ni Lesa wa cine eka e wingasobela ifya cine pa fya ku ntanshi. Caba lishuko lyesu ukulondolola ukuti ukufishiwapo kwa cebo ca kwa Yehova ku kale caba bushininkisho bwine bwine ubwa kulenga tucetekele ukuti fyonse ifyo alaya ku ntanshi fikacitika.—Yosh. 23:14; Esa. 55:10, 11.

Kwena, abengi tushimikilako balapepa balesa bapusanapusana, e lyo bambi baitunga ukuti tabapepa lesa nangu umo. Pa kuti bakutike, napamo pa kubala kuti twalanda pa cintu cimo ico na bo bayangwako. Kuti twasambililako ku ca kumwenako calembwa pa Imilimo 17:22-31. Moneni ukuti nangula umutumwa Paulo abomfeshe ukucenjela, alondolwele bwino bwino ukuti abantu bonse bali no kulubulula kuli Lesa Uwabumbile umuulu ne sonde.

Ukwishibisha Ishina lya kwa Lesa. Mwilafilwa ukwishibisha Lesa wa cine ukulumbula ishina lyakwe. Yehova alitemwa ishina lyakwe. (Ukufu. 3:15; Esa. 42:8) Afwaya abantu beshibe ilyo ishina. Alengele ukuti ishina lyakwe ilya lulumbi lilembwe muli Baibolo ukucila pa miku 7,000. Mulimo wesu ukwishibisha ili shina ku bantu.—Amala. 4:35.

Isubilo lya bumi bwa bantunse bonse ilya ku ntanshi lyashintilila pa kwishiba Yehova no kulilila kwi shina lyakwe mu busumino. (Yoele 2:32; Mal. 3:16; 2 Tes. 1:8) Lelo, abengi tabaishiba Yehova. Pali aba paba na bengi abaitunga ukupepa Lesa wa mu Baibolo. Nelyo balikwata Baibolo kabili balaibelenga, nalimo teti beshibe ishina line line ilya kwa Lesa pantu mu maBaibolo ayapilibulwa muno nshiku ayengi balifumyamo ilyo ishina. Uko abengi bomfwa fye ishina Yehova ni kuli bashimapepo babo ilyo balebeba ati tabafwile na kulilumbula.

Kuti twaishibisha shani abantu ishina lya kwa Lesa? Icibomba bwino sana caba kubalanga ukufuma muli Baibolo—maka maka mu yabo nga balikwata. Mu maBaibolo yamo, ilyo ishina emo lyaba imiku iingi sana. Muli yambi, kuti lyaba fye pa Amalumbo 83:18; Ukufuma 6:3-6, nelyo mu tulembo twa pe samba pa Ukufuma 3:14, 15 nelyo Ukuf 6:3. Mu maBaibolo ayengi, apaali ishina lya kwa Lesa mu lulimi Baibolo yalembelwemo, bapyanikapo amashiwi pamo nga “Shikulu,” na “Lesa,” mu milembele yaibela. Mu maBaibolo umo bakapilibula ba ino nshita bafumya ishina lya kwa Lesa monse, kuti mwabomfya amaBaibolo ya kale muli ulo lwine lulimi ku kulanga abantu icacitwa. Mu fyalo fimo kuti mwabalondolwela ishina lya kwa Lesa ilyaba mu nyimbo shimo isha ku macalici nelyo pa fyalembwa pa fikuulwa.

Nelyo fye ni kuli balya bapepa balesa bambi, ilembo lya kwa Yeremia 10:10-13 kuti lyabomfiwa bwino sana. Talilanda fye pe shina lya kwa Lesa lelo lilalondolola bwino bwino untu aba.

Mwifisa ishina lya kwa Yehova no kulamwita fye ati “Lesa” nelyo ati “Shikulu” nge ficita aba mu Kristendomu. Ici tacilolele mu kuti conse ico mulefwaya ukulanda mufwile mwatampa ne lyo ishina. Pa mulandu wa mpatila, abantu bamo kuti baputula no kulanshanya apo pene. Lelo pa numa ya kwishibisha ifyo mwalalandapo, mwishimba ukulumbula ishina lya kwa Lesa.

Icintu cimo ca kuti mu Baibolo, ishina lya kwa Lesa lyabamo imiku iingi ukucila imiku yonse iyo amashiwi ya kuti “Shikulu” na “Lesa” yamoneka. Nangu ni fyo, bakalemba ba Baibolo tabaleesha ukubika ishina lya kwa Lesa muli sentensi iili yonse. Tabalelemba icilembelembe, lelo balelemba apo bamona apalinga, kabili mu mucinshi. Ico cintu cisuma ukupashanya.

Umuntu Uo Ili Shina Lishibisha. Nangula ukwishiba ukuti Lesa alikwata ishina caba cishinka cacindama, caba fye ni ntendekelo.

Pa kuti abantu batemwe Yehova no kulilila kuli wene mu citetekelo, bakabila ukwishiba ifyo uyu wine Lesa aba. Ilyo Yehova aishibishe ishina lyakwe kuli Mose pa Lupili lwa Sinai, tashimbwile fye ishina “Yehova.” Alandile na pa mibele Yakwe imo iyapulamo. (Ukufu. 34:6, 7) Ico cintu twingapashanya.

Nampo nga muleshimiko bunte ku muntu mwakumanya uulefwaya ukumfwa nelyo mulelanda ilyashi mu cilonganino, ilyo mwalanda pa mapaalo ya Bufumu, londololeni fintu aya mapaalo yalangilila pa lwa kwa Lesa walaya ifyo. Ilyo mulelanda pa mafunde yakwe, komaileni pa fyo yaba aya mano kabili aya kutemwa. Londololeni bwino ukuti ifyo Lesa afwaya te fisendo, lelo fyabelako ku kutunonsha. (Esa. 48:17, 18; Mika 6:8) Londololeni ifyo inshila imo na imo iyo Yehova abomfeshamo amaka ilanga pa lwa mibele yakwe, ifipimo fyakwe, no bufwayo bwakwe. Landeni pa fintu Yehova aba no mulinganya mu kulanga imibele yakwe. Lekeni abantu bomfwe uko muleilandila ifyo mumfwa ku mutima pa lwa kwa Yehova. Ukutemwa mwatemwa Yehova kuti kwalenga na bambi bamutemwa ifyo fine.

Ubukombe bwa mu kampampa ubwa muno nshiku bucincisha abantu bonse ukutiina Lesa. Ifyo tusosa fifwile ukucincimuna ako katiina mu bantu. Aka, katiina kene kene, ukututuma Yehova. (Amalu. 89:7) Kasanshamo ukwibukila ukuti Yehova e Kapingula wapulamo kabili isubilo lya mweo ku ntanshi lyashintilila pa kusenaminwa na wene. (Luka 12:5; Rom. 14:12) Akatiina ka musango yo kanshi kendela pamo no kumutemwa sana, ne co citwala ku kufwaisha ukumutemuna. (Amala. 10:12, 13) Akatiina ka kuli Lesa katulenga no kupata icabipa, ukumfwila amafunde ya kwa Lesa, no kumupepa no mutima wa cishinka. (Amala. 5:29; 1 Imila. 28:9; Amapi. 8:13) Kalatucingilila ica kuti teti tulebombela Lesa lubali lumo e lyo lubali lumbi tutememwe ifya pano isonde.—1 Yoh. 2:15-17.

Ishina lya kwa Lesa—“Lupungu Ulwakosa.” Abantu abeshiba Yehova icine cine, balacingililwa nga nshi. Te pa kutila fye pantu balalumbula ishina lyakwe nelyo ukulumbula imibele yakwe imo imo. Ni pa mulandu wa kuti batetekela Yehova umwine. Pa lwa abo, Amapinda 18:10 yatila: “Ishina lya kwa Yehova lupungu ulwakosa, e mo abutukilo mulungami no kuba fye.”

Bomfyeni bwino amashuko ya kucincisha bambi ukutetekela Yehova. (Amalu. 37:3; Amapi. 3:5, 6) Ukutetekela kwa musango yo kulanga ukuti twaliba ne citetekelo muli Yehova na mu fyo alaya. (Heb. 11:6) Nga ca kuti abantu ‘balilila kwi shina lya kwa Yehova’ pantu baishiba ukuti ni Mulopwe wa Kubumbwa konse, batemwa imibele yakwe, no kutetekela ukuti ipusukilo lya cine cine kuti lyafuma fye kuli wene, Icebo ca kwa Lesa citulaya ukuti, lyene bakapusuka. (Rom. 10:13, 14) Ilyo mulesambilisha bambi, bafweni ukukuula uyo musango wa citetekelo ukukuma kuli fyonse bacita mu mikalile yabo.

Abantu abengi balaba na mafya yakakala. Teti beshibe ne fya kuyapwisha. Bacincisheni ukusambilila imibele ya kwa Yehova, ukumutetekela, no kubomfya ifyo basambilila. (Amalu. 25:5) Bakoselesheni ukupepa no mukoosha ukuti Lesa abaafwe no kumutasha pa mapaalo abapa. (Fil. 4:6, 7) Ilyo baishiba Yehova, te pa kubelenga fye ifyebo fimo mu Baibolo lelo no kuimwena uko alebacitila fintu alaya, bakatampa ukuba no mutelelwe waba mu kumfwikisha cintu ishina lya kwa Yehova limininako.—Amalu. 34:8; Yer. 17:7, 8.

Bomfyeni bwino inshita iili yonse mwashukila ku kwafwa abantu ukumfwikisha ukuti ca mano ukutiina Lesa wa cine, Yehova, no kubaka amafunde yakwe.

ILYO Yesu Kristu abuushiwe lelo ilyo ashilabwelela ku muulu, aebele abasambi bakwe ifya kucita. Atile: “Mukabe nte shandi . . . ukufika ku mpela ya pano nse.” (Imil. 1:8) Ababomfi ba cishinka aba kwa Lesa muno nshiku calondololwa ukuti ‘bakwato bunte bwa kwa Yesu.’ (Ukus. 12:17) Bushe mwapimpa shani ukukuma ku kushimika ubo bunte?

Abengi abasosa mu bufumacumi ukuti balitetekela Yesu tabaishiba nangu kamo pa lwa bumi bwakwe ilyo ashilaba umuntunse. Tabaishiba ukuti ilyo aali pe sonde aali muntunse wa cine cine. Tabaishiba ifyo cipilibula nga casoswa ukuti Mwana wa kwa Lesa. Tapali ifyo baishiba pa lwa mulimo wakwe mu kufishiwapo kwa bufwayo bwa kwa Lesa. Tabaishiba ifyo alecita nomba, kabili tabaishiba ifyo imikalile yabo ikakumwako ku fyo akacita ku ntanshi. Kuti baletontonkanya fye no kuti Inte sha kwa Yehova tashatetekela Yesu. Lishuko lyesu ukwesha ukubilisha ifishinka pa lwa ifi fintu.

Kwaba na bashashininkisha ukuti Yesu uwalondololwa mu Baibolo cine cine e ko aali. Bamo bamona fye Yesu nge mpalume. Abengi balakaana abati te Mwana wa kwa Lesa. Pa “kukwato [kushimika, NW] bunte bwa kwa Yesu” pa bantu ba musango yo kano wabombesha, watekanya, kabili waba uwacenjela.

Te mulandu ne fitontonkanya abo mulelandako, balekabila ukusambilila Yesu Kristu nga balefwaya ukunonkelamo mu kupekanya kwa kwa Lesa ukwa kupeela umweo wa muyayaya. (Yoh. 17:3) Ukufwaya kwa kwa Lesa ukwalondololwa bwino bwino kwa kuti bonse aba mweo bafwile “[ukusosa], ukuti, Yesu Kristu e Shikulu” kabili bafwile ukunakila ku kutungulula kwakwe. (Fil. 2:9-11) Kanshi, te kuti tusuuleko fye ilyo twasanga abantu abakoselela pali fimo lelo ifyalubana nelyo abakwata fye impatila. Nangula limo kuti twalanda pa lwa kwa Yesu Kristu ukwabula no bwafya—nelyo fye ni pa kutandala kwa kubalilapo—limbi, kuti twakabila ukucenjela pa kulanda fimo ifingaafwa bakomfwa wesu ukutampa ukutontonkanya bwino pa lwa wene. Kuti twafwaya no kutontonkanya pa lwa fintu twingaletamo na fimbi pa lwa uyu mulandu ilyo tukatandala na kabili. Lelo, napamo te kuti tulande pali fyonse ifyabimbwamo mpaka ilyo tukatampa isambililo lya Baibolo ilya mu ng’anda no yo muntu.—1 Tim. 2:3-7.

Umulimo Wacindama Uwa kwa Yesu mu Bufwayo bwa kwa Lesa. Tulingile ukwafwa abantu ukumfwikisha ukuti apo Yesu e “nshila” kabili ‘takuli uya kuli Wishi kano apitila muli wene,’ tapali uwingaba na bucibusa bwasenaminwa na Lesa ukwabula ukutetekela Yesu Kristu. (Yoh. 14:6) Umuntu nga tomfwikishe umulimo wacindama untu Yehova apeela Umwana wakwe ibeli, te kuti omfwikishe Baibolo. Mulandu nshi? Pantu Yehova alenga Umwana wakwe ukuba e mpanda mu kufishiwapo kwa bufwayo Bwakwe bonse. (Kol. 1:17-20) E po ukusesema kwa mu Baibolo kwashintilila. (Ukus. 19:10) Muli Yesu Kristu emo amafya yonse ayaletwa no kupondoka kwa kwa Satana no lubembu lwa kwa Adamu yakapikulwilwa.—Heb. 2:5-9, 14, 15.

Pa kuti umuntu omfwikishe umulimo wa kwa Kristu, afwile ukwiluka ukuti abantunse baba mu mibele ya bulanda kabili teti bailubule abene. Ifwe bonse twafyalilwe mu lubembu. Ici kuti catukuma mu nshila shapusanapusana mu bumi bwesu. Lelo inshita imo, tulafwa. (Rom. 3:23; 5:12) Pelulushanyeni pali co cishinka na bo muleshimikilako. Lyene londololeni ukuti Yehova mu kutemwa alipekanya ukuti mwi lambo lya cilubula ilya kwa Yesu Kristu, abatetekela ici cilubula bakalubuka ku lubembu ne mfwa. (Marko 10:45; Heb. 2:9) Ici kuti calenga baisakwata umweo wa muyayaya mu kupwililika. (Yoh. 3:16, 36) Takwaba inshila imbi iyo ici cingacitikilamo. (Imil. 4:12) Imwe pamo nga kasambilisha, nampo nga mulefunda umuntu eka atemwa mu cilonganino, mwipelela fye pa kulanda ifi fishinka. Mu cikuuku kabili mu kutekanya afweni bakomfwa wenu ukuti baletasha pa mulimo Kristu abomba pamo nga Kalubula wesu. Ukutasha pali ubu bupe kuti kwayambukila sana imibele ya muntu, imyendele yakwe, ne fyo atinamina mu bumi.—2 Kor. 5:14, 15.

Kwena, Yesu atuulile umweo wakwe nge lambo umuku fye umo. (Heb. 9:28) Lelo pali ino nshita, ni Shimapepo Mukalamba. Afweni bambi ukumfwikisha umo ico calola. Bushe balekalifiwa, napamo ifyo baleenekela tafilecitika, bushe balecula, nelyo bali na mafya pa mulandu wa bunkalwe bwa bantu? Ilyo Yesu ali umuntunse, ifi fyonse fyalimucitikilepo. Alishiba ifyo tumfwa. Bushe tumfwa ukuti tukabila Lesa ukutubelela inkumbu pa mulandu wa kukanapwililika? Nga twapepa kuli Lesa ukuti atulekeleleko pa mulandu we lambo lya kwa Yesu, Yesu aba e “Bukota kuli Shifwe.” Mu cililishi, ‘alatupaapaatilako.’ (1 Yoh. 2:1, 2; Rom. 8:34) Ku mulandu we lambo lya kwa Yesu no kupitila mu milimo abomba nga Shimapepo Mukalamba, tulapalama “ku cipuna ca bufumu ica kusenamina” ica kwa Yehova ku kutwafwa pa nshita iyene. (Heb. 4:15, 16) Nelyo tatwapwililika, ukwafwa kwa kwa Yesu nga Shimapepo Mukalamba kutulenga ukubombela Lesa na kampingu wasanguluka.—Heb. 9:13, 14.

Ukulunda pali fyo, Yesu alikwata amaka ayengi pantu alilaaswa na Lesa ukuba Umutwe wa cilonganino ca Bwina Kristu. (Mat. 28:18; Efes. 1:22, 23) Ico cilenga aletungulula ukulingana ne fifwaya Lesa. Ilyo mulesambilisha bambi, bafweni ukumfwikisha ukuti Yesu Kristu e Mutwe wa cilonganino, te muntunse iyo. (Mat. 23:10) Pa muku fye wa kubalilapo mwalanda na balefwaya ukwishibe cine, balaalikeni ku kulongana ku cilonganino ca ku mwenu, uko tusambilila Baibolo ukubomfya impapulo shipekanishiwa no “musha wa cishinka kabili uwashilimuka.” Balondolweleni beshibe uyu “musha” e lyo na Shikulu pa kuti beshibe bumutwe bwa kwa Yesu. (Mat. 24:45-47) Balangeni kuli baeluda, no kulondolola imilingo ya mu Malembo aba bafwile ukukumanisha. (1 Tim. 3:1-7; Tito 1:5-9) Balondolweleni ukuti icilonganino te ca baeluda iyo lelo batwafwa fye ukuti tulekonka mu makasa ya kwa Yesu Kristu. (Imil. 20:28; Efes. 4:16; 1 Pet. 5:2, 3) Afweni aba abalefwaya ukwishibe cine ukumona ukuti kwaba ukuteyanya kubomba busaka busaka, ukwa mwi sonde lyonse ukutungululwa na Kristu.

Mu Malandwe, tusambililamo ukuti ilyo Yesu aingile mu Yerusalemu ilyo kwashele inshiku shinono ukuti afwe, abasambi bakwe balimwawilile abati “Imfumu iileishila mwi shina lya kwa Shikulu.” (Luka 19:38) Ilyo abantu baleya pa ntanshi mu kusambilila Baibolo, e lyo beshiba ukuti Yehova nomba alipeela Yesu amaka ya kuteka ayakuma abantu ba mu fyalo fyonse. (Dan. 7:13, 14) Ilyo mulelanda amalyashi mu cilonganino nelyo ukutungulula amasambililo, afweni abantu ukutesekesha no kutasha pa fintu ukuteka kwa kwa Yesu kufwile ukutukuma ifwe bonse.

Komailenipo ukuti imikalile yesu ilalanga nampo nga cine cine twalitetekela ukuti Yesu Kristu e Mfumu kabili ilalanga nampo nga tulaitemenwa ukunakila ku kuteka kwakwe. Komaileni pa mulimo untu Yesu atumine abakonshi bakwe ukubomba pa numa asubilwe ukuba Imfumu. (Mat. 24:14; 28:18-20) Londololeni na fintu Yesu, Kabilo wa Cipesha Amano, alandile ukukuma ku filingile ukukatamikwa mu mikalile yesu. (Esa. 9:6, 7; Mat. 6:19-34) Landeni pa mibele intu Cilolo wa Mutende atile e yo abakonshi bakwe bali no kuba na yo. (Mat. 20:25-27; Yoh. 13:35) Lelo sakamaneni, mwiipeela umulimo wa kulapingula nampo nga bambi balecita apapela amaka yabo nelyo iyo, lelo bakoselesheni ukutontonkanya pa lwa fyo bacita nga filangilila ukuti balanakila ku kuteka kwa kwa Kristu. Ilyo mulecite fyo, langeni ukuti na imwe mufwile ukucita ifyo fine.

Ukubika Kristu nge ca Kukuulapo. Baibolo ipashanya umulimo wa kupanga abasambi ba Bwina Kristu ku kukuula icikuulwa pali Yesu Kristu nge ca kukuulapo. (1 Kor. 3:10-15) Pa kucite fi, afweni abantu ukwishiba Yesu nga fintu alondololwa muli Baibolo. Cenjeleni, epali balamona kwati bafwile ukuba abakonshi benu. (1 Kor. 3:4-7) Batungululeni kuli Yesu Kristu.

Nga ca kutila ica kukuulapo cabikwa bwino, abasambi bakomfwikisha ukuti Kristu atushilile ca kumwenako ukuti ‘tukonke mu makasa yakwe.’ (1 Pet. 2:21) Pa kukuula pali co, koselesheni abasambi ukubelenga Amalandwe no kufwaya ukukonka ifyabamo, te kuyabelenga fye nge lyashi lya kale ilya cine. Bafweni ukwibukisha no kwangwako sana ku mibele yali na Yesu. Bakoselesheni ukumwensekesha ifyo Yesu aleumfwa pali Wishi, ifyo ashipikishe amatunko na mesho, ifyo alangile ukuti alenakila Lesa, na fintu alecita ku bantunse mu mibele yapusanapusana. Komaileni pa mulimo Yesu aobelwe na o ilyo ali umuntu. Lyene, umusambi nga alolenkana ne fya kupingula na mesho mu bumi bwakwe, akaipusha ati: ‘Bushe Yesu kuti acita shani nga e walolenkana ne fi ndolenkene na fyo? Bushe ifyo ndi no kucita fikalanga ukuti ndatasha pa fintu ancitila?’

Ilyo mulelanda pa ntanshi ya cilonganino, mwitila apo bamunyinenwe balitetekela kale Yesu, tamufwile ukumulandapo sana. Ifyo musosa fikaba na maka nga mwakuula pali co citetekelo. Ilyo mulelanda pa lwa kulongana, suntikanyeni ici ku mulimo wa kwa Yesu ngo Mutwe wa cilonganino. Ilyo mulelanda pa butumikishi bwa mwi bala, landeni pa mibele ya kwa Yesu ilyo alebomba ubutumikishi bwakwe, kabili landeni na pa fyo Yesu nge Mfumu alecita ku kulonganika abantu ukuti bakapusuke ukwingila mu calo cipya.

Camoneka kanshi ukuti fingi fikabilwa, te kusambilila fye ifishinka finono pa lwa kwa Yesu. Pa kuti abantu babe Abena Kristu bene bene, bafwile ukutetekela Yesu no kumutemwa icine cine. Ukutemwa kwa musango yo e kucincisha abantu ukuba ne cumfwila ca cishinka. (Yoh. 14:15, 21) Kulenga abantu ukuba abashangila mu citetekelo nangu balecula, kulenga batwalilile ukukonka mu makasa ya kwa Kristu inshiku shonse isha myeo yabo, no kuba Abena Kristu bakosoka “abalimbwa kabili abakuulwa [pa ca kukuulapo, NW ].” (Efes. 3:17) Imicitile ya musango yo ilenga ubukata buye kuli Yehova, Lesa kabili Wishi wa kwa Yesu Kristu.

LINTU Yesu alekolobonda mu cishibilo ca kubapo kwakwe ne ca kupwa kwa buno bwikashi, asobele ati: “Imbila nsuma iyi ya bufumu ikabilwa ku fyalo fyonse ku kubo bunte ku nko shonse; e lyo impela ikesa.”—Mat. 24:14.

Bukombe nshi ubu bwine buli no kusabankanishiwa ukufika ukwalepeshe fyo? Bwa pa Bufumu bulya Yesu atusambilishe ukupepela kuli Lesa ati: “Ubufumu bwenu bwise.” (Mat. 6:10) Ilembo lya Ukusokolola 11:15 lilondolola ubu bufumu ati “bufumu . . . bwa kwa Shikulwifwe [Yehova], no bwa kwa Kristu wakwe” pantu amaka ya kuteka yafuma kuli Yehova kabili yapeelwa kuli Kristu ukuba Imfumu. Lelo, moneni ukuti ubukombe ubo Yesu atile bwali no kubilishiwa mu nshiku shesu bwali no kufika ukwalepesha ukucila ukwafikile abakonshi bakwe mu mwanda wa myaka uwa kubalilapo. Baebele abantu ati: “Ubufumu bwa kwa Lesa nabupalama kuli imwe.” (Luka 10:9) Yesu, uwasubilwe ukuba Imfumu aali pa kati kabo ilya nshita. Lelo nga fintu calembwa pali Mateo 24:14, Yesu asobele ukubilishiwa kwa mwi sonde lyonse ukwa cintu cacindama na cimbi mu kufishiwapo kwa bufwayo bwa kwa Lesa.

Kasesema Daniele apeelwe icimonwa ica ici cintu cacitike. Amwene “umo uwaba ngo mwana wa muntu,” Yesu Kristu, aya ku “Mukote wa nshiku ne nshiku,” Yehova Lesa, ku kupoka “ukuteka, no bukata, no bufumu, ukuti abantu na bantu bonse, na bantu ba nko, ne ndimi, bamupyungile.” (Dan. 7:13, 14) Ici cintu icacindama mu kubumbwa konse cacitike mu muulu mu mwaka wa 1914. Pa numa ya ico, Kaseebanya ne fibanda fyakwe balipooselwe pe sonde. (Ukus. 12:7-10) Ubwikashi bukote bwaingile mu nshiku sha buko isha kulekelesha. Lelo ilyo tabulafumishiwapo umupwilapo, kuli ukubilisha kwa mwi sonde lyonse ukwa kuti Mesia Imfumu ya kwa Yehova nomba aleteka pa cipuna cakwe ica bufumu mu muulu. Abantu konse konse baleishibishiwa ulwa ici. Ifyo bankulako e filanga ifyo batontonkanya pa Wapulamo Uteeka “mu bufumu bwa bantu.”—Dan. 4:32.

Ca cine, kucili ifingi ku ntanshi—ifingi nga nshi! Tucili tulapepa atuti, “Ubufumu bwenu bwise,” lelo te kutila ukutendeka kwa Bufumu bwa kwa Lesa kucili ku ntanshi. Lelo ni mu kutila Ubufumu bwa mu muulu bukacitepo cimo ku kufikilisha ukusesema pamo ngo kwa pali Daniele 2:44 na pa Ukusokolola 21:2-4. Bukasangula isonde ukuba paradise waisulamo abantu abatemwa Lesa na banabo. Ilyo tuleshimikila “imbila nsuma iyi ya bufumu,” tulanda pali fyo fili no kucitika ku ntanshi. Lelo na kabili ukwabula no kutwishika twishibisha abantu ukuti Yehova alipeela kale amaka ya kuteka ku Mwana wakwe. Bushe mulakomaila pali iyi mbila nsuma ilyo muleshimiko bunte pa lwa Bufumu?

Ukulondolola Ubufumu. Kuti twafishapo shani umulimo wesu uwa kubilisha Ubufumu bwa kwa Lesa? Pa kuti abantu bafwaye ukumfwa, pa kutampa kuti twalanda pa fintu fyalekanalekana, lelo mu kwangufyanya cifwile ukwishibikwa ukuti tuleshimikila ubukombe pa Bufumu bwa kwa Lesa.

Ulubali lwacindama ulwa uyu mulimo lusanshamo ukubelenga no kwambula amalembo yalanda pa Bufumu. Ilyo mwalanda pa Bufumu, shininkisheni ukuti abo mulelandako baumfwa ico bwaba. Kuti mwakabila ukulanda ifingi ukucila pa kulanda fye ukuti Ubufumu bwa kwa Lesa buteko. Bamo nga mwalanda pa bufumu ubushimoneka ukuti buteko kuti cabakosela ukumfwa. Kuti mwapelulushanya na bo mu nshila shapusanapusana. Ku ca kumwenako, amaka yatinta tayamoneka, lelo yalakuma sana imikalile yesu. Teti tumone Uwapangile amaka yatinta, lelo cintu cayeba ukuti alikwata amaka ayengi. Baibolo ilanda pali wene ukuti ni “Mfumu ya muyayaya.” (1 Tim. 1:17) Nelyo kuti mwasosa amuti mu calo cikalamba, abengi tabatala abaya ku musumba ukwikala kateka no kumumona tabamumonapo. Beshiba ukuti ifi fintu e ko fyaba ukupitila fye mu malipoti. E fyo caba na kuli Baibolo, yaba mu ndimi ukucila pali 2,200, kabili ishimika ulwa Bufumu bwa kwa Lesa; itwishibisha uwapeelwa amaka na cintu Ubufumu bulecita. Ulupungu lwa kwa Kalinda, ulufuma mu ndimi ishingi ukucila magazini ili yonse pano calo, “Lusabankanya Ubufumu bwa kwa Yehova,” nga fintu calondololwa na pa nkupo ya pa ntanshi.

Pa kwafwa abantu ukumfwikisha cintu Ubufumu bwaba, kuti mwalanda pali fimo ifyo bafwaya ubuteko ukubacitila: mu fya ndalama, umutende, ubuntungwa ukufuma ku misoka, ukufumyapo akapaatulula ka mitundu, amasomo, no bumi busuma. Londololeni ukuti Bufumu bwa kwa Lesa bweka fye e bukacita ifi fintu pamo ne fisuma fimbi ifyo abantunse bonse bafwaya.—Amalu. 145:16.

Esheni ukucincimuna abantu ukuti bafwaishe ukuba abatekwa ba Bufumu, ubo Imfumu ya buko ni Yesu Kristu. Landeni pa fipesha amano acitile ukuti filangilila ifyo akacita apo ni Mfumu ya ku muulu. Mulelanda ilingi line pa mibele isuma ali na yo. (Mat. 8:2, 3; 11:28-30) Londololeni ukuti atuuliile ifwe umweo wakwe no kuti pa numa, Lesa alimubuushishe no kumupeela umweo wa bumunshifwa mu muulu. Ni kulya e ko aba pa Bufumu.—Imil. 2:29-35.

Komailenipo ukuti Ubufumu bwa kwa Lesa nomba buletekela mu myulu. Lelo, ishibeni ukuti abengi tabamona ifintu ifyo batila e filingile ukulanga ukuti Ubufumu buleteka. Suminisheni ico, kabili bepusheni nga balishiba ico Yesu Kristu atile e cali no kushininkisha ukuti buleteka. Londololeni fimo fimo ifyaba mu cishibilo cabamo ifingi ica pali Mateo icipandwa 24, Marko icipandwa 13, nelyo Luka icipandwa 21. Lyene ipusheni umulandu ukutendeka ukuteka ukwa kwa Kristu mu muulu kwingaletela ifintu fya musango yo pe sonde. Kabiyeni kwi lembo lya Ukusokolola 12:7-10, 12.

Pa kusanga ubushininkisho bwine bwine ubwa fintu Ubufumu bwa kwa Lesa bulecita, belengeni Mateo 24:14, no kulondolola umulimo wa kusambilisha Baibolo uulebombwa mu calo conse ino ine nshita. (Esa. 54:13) Shimikileniko abantu pa lwa masukulu yapusanapusana ayo Inte sha kwa Yehova shisambilishiwako—yonse yene ayashimpwa pa fya mu Baibolo, yonse yene tabalipilisha. Londololeni ukuti ukulunda ku butumikishi bwesu ubwa ku ng’anda ne ng’anda, tulaitemenwa ukusambilisha abantu ne ndupwa Baibolo mu myabo ukwabula ukulipilisha mu fyalo ukucila pali 230. Buteko nshi ubwa bantu ubwingakwata programu wa kusambilisha uwakule fyo ukusambilisha abatekwa ba buko e lyo na bantu fye isonde lyonse? Laalikeniko abantu ku Ng’anda ya Bufumu, ku kulongana kukalamba na ku mabungano ya Nte sha kwa Yehova, ku kuimwena ifyo amasambililo ya musango yo yalealula imikalile ya bantu.—Esa. 2:2-4; 32:1, 17; Yoh. 13:35.

Lelo bushe mwine ng’anda ali no kwiluka ifyo imikalile yakwe ikuminweko? Mu kucenjela kuti mwalondolola ubufwayo bwa kutandala kwenu ukuti bwa kulanshanya pe shuko abantu bonse bakwata ilya kusala ubumi nga batekwa ba Bufumu bwa kwa Lesa. Kuti bacita shani fyo? Kuti bacite fyo nga basambilila ifyo Lesa afwaya no kwikala ukulingana no ko kufwaya kwa kwa Lesa ino ine nshita.—Amala. 30:19, 20; Ukus. 22:17.

Ukwafwa Bambi Ukufwaya Ubufumu Intanshi. Nelyo fye lintu umuntu asumina ubukombe bwa Bufumu, kwaba ifintu afwile ukupingulapo. Bushe mu mikalile yakwe acindamika shani Ubufumu bwa kwa Lesa? Yesu acincishe abasambi bakwe ati “mubale mufwaye ubufumu.” (Mat. 6:33) Kuti twayafwa shani Abena Kristu banensu ukucite fyo? Nga ca kuti fwe bene tulecite fyo no kulanda pa mashuko yabako aya kucite fyo. Inshita shimo, kuti twacite fyo pa kwipusha umuntu nga alitontonkanya pa fyo engacita nelyo ukumushimikilako ifyo bambi bacita. Kuti twalanda pa fyalembwa mu Baibolo mu nshila ya kuti fyamwafwa ukutemwa sana Yehova. Kuti twakomaila pa fyo Ubufumu bwaba ubwa cine cine. Kuti twakomaila pa fyo umulimo wa kubilisha Ubufumu wacindama nga nshi. Icibomba bwino sana, te kweba fye abantu ifyo bafwile ukucita, lelo ukubacincisha ica kuti balafwaya ukucite ifyo bafwile ukucita.

Ukwabula no kutwishika, ubukombe bwacindama ubo ifwe bonse tufwile ukubilisha bwaba maka maka pali Yehova Lesa, Yesu Kristu, no Bufumu. Ifishinka fyacindama ukukuma kuli Lesa, na Kristu, no Bufumu fifwile ukukomailwapo mu bunte bwesu ubwa ku cintubwingi, mu kulongana kwesu, na mu mikalile yesu. Nga tulecite fyo, tulanga ukuti tulenonkelamo mu masambililo ye Sukulu lya Butumikishi Ilya Bulesa.