‘Fwaleni Ukushishimisha’
“Fwaleni umutima wa nkumbu . . . [no kushishimisha, NW].”—ABENA KOLOSE 3:12.
1. Shimikeni ica kumwenako cisuma ica kushishimisha.
RÉGIS, uwikala ku ncende yabela pa kati ka kapinda ka kulyo na masamba mu France, ali Inte yabatishiwa iya kwa Yehova mu 1952. Pa myaka iingi, umukashi wakwe acitile apo engapesha ku kumulesha ukubombela Yehova. Aletula amataela ya motoka pa kuti eya ku kulongana, kabili inshita imo alimukonkele ilyo aleshimikila ubukombe bwa mu Baibolo ku ng’anda ne ng’anda, ukulamupumya ilyo aleshimikila abene mayanda imbila nsuma iya Bufumu. Te mulandu no kumukaanya lyonse, Régis atwalilile ukushishimisha. E co, Régis ca kumwenako cisuma ku Bena Kristu bonse, apo Yehova akabila bonse abamupepa ukushishimisha ilyo balebomba na bambi.
2. Bushe ishiwi lya ciGriki ilya “kushishimisha” lipilibula nshi, kabili lyalola mwi?
2 Ishiwi lya ciGriki ilya “ukushishimisha” lipilibula “ukukokola ukukalipa.” Baibolo wa mu ciNgeleshi uwa New World Translation imiku 10 apilibula ili shiwi ukuti “ukushishimisha,” imiku itatu “ukutekanya,” no muku umo “ukuba no kutekanya.” Muli aya mashiwi yabili aya ciHebere ne ciGriki ayapilibulwa “ukushishimisha” mwaba no kutekanya, ukushipikisha, no kukokola ukukalipa.
3. Ifyo Abena Kristu balemona ukushishimisha fyapusene shani ne fyo abaGriki ba mu mwanda wa myaka uwa kubalilapo balemona?
3 AbaGriki ba mu mwanda wa myaka uwa kubalilapo tabalemona ukushishimisha ukuti mibele isuma. Ne shiwi line talyalebomfiwa ku ba mano ya buntunse aya ba Stoiki. Ukulingana na William Barclay uwasoma Baibolo, ukushishimisha “kwapusana ne mibele isuma iya baGriki,” iyo yasanshishemo pa fintu fimbi “ukukaana ukushishimisha ilyo umo asaalulwa nelyo ukucenwa.” Asosa ukuti: “Ku baGriki umuntu wacindama ali ni ulya uwalecita icilandushi. Ku Bena Kristu umuntu uwacindama ni ulya, uukaana ukucita icilandushi nangu nakwata amaka ya kucite co.” AbaGriki napamo balemona ukushishimisha ukuti bunake, lelo apa, nga fintu caba na mu fintu fimbi, “ubuwelewele bwa kwa Lesa bwa mano ukucila abantu, kabili ukunaka kwa kwa Lesa kwakosa ukucila abantu.”—1 Abena Korinti 1:25.
Ica Kumwenako ca kwa Kristu ica Kushishimisha
4, 5. Ca kumwenako nshi cishaiwamina ica kushishimisha Yesu apeele?
4 Kristu Yesu ali ica kumwenako cishaiwamina ica kushishimisha, kabili ico ca kumwenako e ca bubili ku ca kumwenako ca kwa Yehova. Ilyo aleshikitika, Yesu alangile ukuilama kwa kusungusha. Ulwa wene casesemwe ukuti: “Alecikilishiwa, alecushiwa, lelo taasamwine akanwa kakwe; atwelwe nge mpaanga ku kwipaiwa, filye mpaanga nkota iswima ku cinso ca baibeya, taasamwine akanwa kakwe.”—Esaya 53:7.
5 Mwandini ukushishimisha Yesu alangile mu butumikishi bwakwe pe sonde kwali kwa kusungusha! Ashipikishe ifipusho fya musaalula ifyo abalwani bakwe baleipusha kabili ashipikishe ne nsele sha balemukaanya. (Mateo 22:15-46; 1 Petro 2:23) Alitekenye ku basambi bakwe, nangu baletwalilila ukukansanina pa wali umukalamba. (Marko 9:33-37; 10:35-45; Luka 22:24-27) Kabili mwandi kwali kuilama kusuma Yesu alangile pa bushiku bwa kufutukwa lintu Petro na Yohane baponene mu tulo na pa numa ya kubeba “ukulola”!—Mateo 26:36-41.
6. Paulo anonkelemo shani mu kushishimisha kwa kwa Yesu, kabili cinshi tusambililako?
6 Pa numa ya mfwa yakwe no kubuushiwa, Yesu atwalilile ukushishimisha. Umutumwa Paulo ali uwaibukila ulwa ici, pantu inshita imo ali ni kapakasa wa Bena Kristu. Paulo alembele ukuti: “Ca cishinka, kabili cawamino kupokelelwa konse, icebo ca kutila Kristu Yesu aishile pano isonde ku kupususha ababembu, abo uwapulamo ni ne; lelo nabelelwe uluse pa mulandu wa ici, ukuti muli ine ne wapulamo Kristu Yesu alangilemo ukutekanya kwakwe ukutuntulu, ku kube cipasho ku bakulamutetekela ku kuba no mweo wa muyayaya.” (1 Timote 1:15, 16) Te mulandu ne fyo imikalile yesu yali kale, nga ca kuti twacetekela Yesu, akashishimisha kuli ifwe—ilyo kwena akalaenekela ifwe ‘ukucita ifiyene no kulapila.’ (Imilimo 26:20; Abena Roma 2:4) Ubukombe Kristu atumine ku filonganino 7 ifya mu Asia Minor bulanga ukuti ilyo aleshishimisha, enekela abantu ukuwamyako imibele yabo.—Ukusokolola, ifipandwa 2 na 3.
Icisabo ca Mupashi
7. Kwampana nshi kwaba pa kushishimisha no mupashi wa mushilo?
7 Mu cipandwa calenga 5 ica kalata wakwe ku bena Galatia, Paulo alekanya imilimo ya bumubili ne fisabo fya mupashi. (Abena Galatia 5:19-23) Apo ukushishimisha kwaba mibele ya kwa Yehova, iyi mibele yafuma kuli wene kabili yaba cisabo ca mupashi wakwe. (Ukufuma 34:6, 7) Cine cine, ukushishimisha e kwalenga bune mu bulondoloshi bwa kwa Paulo ubwa fisabo fya mupashi, pamo no “kutemwa, ukusekelela, umutende, . . . icongwe, ubusuma, icishinka, ukunakilila, ukuteko mutima.” (Abena Galatia 5:22, 23) E co, lintu ababomfi ba kwa Lesa balanga ukutekanya kwa bukapepa, nelyo ukushishimisha, bacite co pa mulandu wa maka ya mupashi wa mushilo.
8. Cinshi cikatulenga ukulundulula ifisabo fya mupashi ukusanshako no kushishimisha?
8 Lelo, ici tacilolele mu kuti Yehova alapatikisha umuntu ukutungululwa no mupashi wakwe. Tufwile ukuitemenwa ukutungululwa na wene. (2 Abena Korinti 3:17; Abena Efese 4:30) Tulenga umupashi ukubomba mu bumi bwesu ukupitila mu kulundulula ifisabo fya uko muli fyonse ifyo tucita. Pa numa ya kutantawila imilimo ya bumubili ne fisabo fya mupashi, kabinge Paulo atile: “Nga tuli aba mweo ku Mupashi, twendele mu Mupashi. Mwilufiwa; Lesa tasentekwa; pantu ico umuntu abyala, e co akalobolola. Uubyala ku mubili wakwe wine, ku mubili akalobololako ukubola; lelo uubyala ku Mupashi, ku Mupashi wine akalobololako umweo wa muyayaya.” (Abena Galatia 5:25; 6:7, 8) Nga ca kuti tuli no kutunguluka mu kulundulula ukushishimisha, tufwile no kulundulula ifisabo fimbi ifyo umupashi wa mushilo uleta mu Bena Kristu.
“Ukutemwa Kulashishimisha”
9. Mulandu nshi napamo Paulo aebele abena Korinti ukuti “ukutemwa kulashishimisha”?
9 Paulo alangile ukuti paba ukwampana kwaibela pa kutemwa no kushishimisha ilyo atile: “Ukutemwa kulashishimisha.” (1 Abena Korinti 13:4, NW) Umuntu umo uwasoma Baibolo, Albert Barnes, atubulula ukuti Paulo alekomaila pali ci pa mulandu wa kukansana kwali mu cilonganino ca Bena Kristu ica mu Korinti. (1 Abena Korinti 1:11, 12) Barnes asosa ukuti: “Ishiwi lyabomfiwa pano [ilya kushishimisha] lyapusana no kususwa: lyapusana ne nsoselo na matontonkanyo ya bukali, e lyo no kukalipa bwangu. Ili shiwi lilangilila umuntu UUKOKOLA UKUKALIPA ilyo balemucusha, na lintu akalifiwa.” Ukutemwa no kushishimisha ficili filafwa sana ukulenga mu cilonganino ca Bwina Kristu mwaba umutende.
10. (a) Ni mu nshila nshi ukutemwa kutwafwila ukushishimisha, kabili kufunda nshi Paulo apeela pali ci? (b) Finshi uwasoma Baibolo asosele pa lwa kushishimisha kwa kwa Lesa ne congwe? (Moneni utulembo twa pe samba.)
10 “Ukutemwa kulashishimisha, kucite congwe. Ukutemwa . . . takuifwaila ifya kuko, takufiishiwa ku mutima.” E co mu nshila ishingi, ukutemwa kutwafwa ukushishimisha.a (1 Abena Korinti 13:4, 5) Ukutemwa kutulenga ukushipikishanya mu kutekanya no kwibukisha ukuti ifwe bonse tatwapwililika kabili tulalufyanya. Kutwafwa ukulangulukilako bambi no kuba abelela. Umutumwa Paulo atukoselesha ukwenda “no bupete bonse no kunakilila, pamo no kutekanya, abashipikishanya mu kutemwa, abacincilo kubaka buumo bwa Mupashi mu cikakilo ca mutende.”—Abena Efese 4:1-3.
11. Mulandu nshi cacindamina maka maka ukuba abashishimisha mu mekashi ya Bwina Kristu?
11 Ukuba abashishimisha kulenga mu bwikashi bwa Bena Kristu mwaba umutende ne nsansa, nampo nga ni mu filonganino, mu mayanda ya Bethel, mu mayanda ya bamishonari, mu mabumba ya balekuula nelyo mu masukulu. Pa mulandu wa buntu bwapusanapusana, ukutemwa ukwalekanalekana, ukupusana mu fikulilo, ukupusana kwa fyo abantu bamona ati e mucinshi, no busaka, inshita shimo kuti fyalenga kwaba amesho. Ifi e fyo ciba na mu ndupwa. Ukukokola ukukalipa kwalicindama. (Amapinda 14:29; 15:18; 19:11) Ukushishimisha nelyo ukushipikisha, ukusubila ukuti ifintu fili no kuwama—kulakabilwa kuli bonse.—Abena Roma 15:1-6.
Ukushishimisha Kutwafwa Ukushipikisha
12. Mulandu nshi ukushishimisha kwacindamina ilyo tuleeshiwa?
12 Ukushishimisha kutwafwa ukushipikisha amesho ayalemoneka aya mutatakuya nelyo ayashingakalululwa bwangu. Ifi e fyo cali kuli Régis, ulya tulumbwile pa kubala. Pa myaka iingi, umukashi wakwe talefwaya ukuti alebombela Yehova. Lelo, bushiku bumo aishile kuli wene alelila no kusosa ukuti: “Nalishiba ici e cine. Ngafweni. Ndefwaya isambililo lya Baibolo.” Asukile abatishiwa no kuba Inte. Régis asosa ukuti: “Ici cashininkishe ukuti Yehova alipaalile ilya myaka ya kushomboka, ukutekanya, no kushipikisha.” Alilambwilwe pa kushishimisha kwakwe.
13. Cinshi cayafwile Paulo ukushipikisha, kabili ica kumwenako cakwe kuti catwafwa shani ukushipikisha?
13 Mu mwanda wa myaka uwa kubalilapo C.E., umutumwa Paulo ali ca kumwenako cishaiwamina ica kushishimisha. (2 Abena Korinti 6:3-10; 1 Timote 1:16) Ku mpela ya bumi bwakwe ilyo alefunda cibusa wakwe uwacaice Timote, Paulo amusokele ukuti Abena Kristu bonse balakwata amesho. Paulo alandile pa ca kumwenako cakwe no kusosa ukuti imibele ya Bwina Kristu iyacindama ilakabilwa pa kushipikisha. Alembele ukuti: “Iwe wakonke sambilisho lyandi, imibele yandi, ukupanga kwandi, icitetekelo candi, ukutekanya kwandi, ukutemwa kwandi, ukutwalilila kwandi, ukulamatwa kwandi, ukucula kwandi; ifintu ifyamponene mu Antioke, mu Ikonia, mu Lustra, ifya kulamata ifyo nashipikisheko; na muli fyonse Shikulu alimpokolwele. Awe na bonse abalefwayo kwikala umwabela bukapepa muli Kristu Yesu bakapakaswa.” (2 Timote 3:10-12; Imilimo 13:49-51; 14:19-22) Pa kuti tushipikishe, ifwe bonse tulakabila, icitetekelo, ukutemwa, no kushishimisha.
Fwaleni Ukushishimisha
14. Paulo apashenye kuli cinshi imibele ya bukapepa pamo nga ukushishimisha, kabili kufunda nshi apeele Abena Kristu ba ku Kolose?
14 Umutumwa Paulo apashenye ukushishimisha ne mibele imbi iya bukapepa ku fya kufwala ifyo Umwina Kristu alingile ukufwala pa numa ya kufuula imibele ya “buntu bwa kale.” (Abena Kolose 3:5-10) Alembele ukuti: “Nga basalwa ba kwa Lesa, abashila kabili abatemwikwa, fwaleni umutima wa nkumbu, icongwe, ubupete, ukunakilila, ukushishimisha; mube abashipikishanya, no kubelelano luse nga umo aba na kafiimbo ku mubiye; ifyo Shikulu amubelelo uluse, e fyo na imwe mubelele uluse. Awe pali fyonse ifi fwalilenipo no kutemwa, e kukakila fyonse pamo mu kwitabana.”—Abena Kolose 3:12-14.
15. Finshi ficitika lintu Abena Kristu ‘bafwala ukushishimisha’ ne mibele imbi iya bukapepa?
15 Lintu aba mu cilonganino ca Bwina Kristu ‘bafwala’ umutima wa nkumbu, icongwe, ubupete, ukunakilila, ukushishimisha, no kutemwa, kuti bakalulula amafya no kutwalilila ukubombela Yehova mu kwikatana. Bakangalila ba Bwina Kristu maka maka bafwile ukuba abashishimisha. Kuti kwaba inshita lintu bafwile ukwebaula Umwina Kristu umbi, lelo kwaba inshila shalekanalekana isha kucitilamo ico. Paulo alondolwele imibele yawamisha ilyo alembeele Timote ukuti: “Ebaula, kalipila, konkomesha, mu [kushishimisha, NW] konse na mu kusambilisha.” (2 Timote 4:2) Cine cine, impaanga sha kwa Yehova shifwile lyonse ukusungwa no kushishimisha, ukushicindika, no kunakilila kuli shene.—Mateo 7:12; 11:28; Imilimo 20:28, 29; Abena Roma 12:10.
‘Shishimisheni Kuli Bonse’
16. Cinshi cingacitika nga ‘tuleshishimisha kuli bonse’?
16 Ukushishimisha kwa kwa Yehova ku bantunse kutulenga ukuba no mulimo wa “kushishimisha kuli bonse.” (1 Abena Tesalonika 5:14, NW) Ici cipilibula ukutekanya kuli balupwa abashili Inte, abena mupalamano, abo tubomba na bo, na kubo tusambilila na bo. Abengi balileka ukuba ne mpatila kuli baNte, abo pa myaka iingi bashipikisha, imiponto, nelyo ukukaanya ku bantu balebomba na bo nelyo ku bo basambilila na bo. (Abena Kolose 4:5, 6) Umutumwa Petro alembele ukuti: “Mwende bwino mu Bena fyalo; ukuti, umo bamupontelela kwati muli ncitatubi, bacindike Lesa mu bushiku bwa cipempu pa kuloleshe milimo yenu isuma.”—1 Petro 2:12.
17. Kuti twapashanya shani ukutemwa kwa kwa Yehova no kushishimisha, kabili mulandu nshi tulingile ukucitile co?
17 Ukushishimisha kwa kwa Yehova kukapususha iminshipendwa. (2 Petro 3:9, 15) Nga twapashanya ukutemwa kwa kwa Yehova no kushishimisha, tukatekanya ilyo tuletwalilila ukushimikila imbila nsuma iya Bufumu bwa kwa Lesa no kusambilisha bambi ukunakila ukuteka kwa Bufumu bwa kwa Kristu. (Mateo 28:18-20; Marko 13:10) Nga ca kuti twaleka ukushimikila, kuti caba kwati tulefwaya ukupelesha ukushishimisha kwa kwa Yehova no kufilwa ukwiluka ubufwayo bwa kuko, ubwaba kutwala abantu ku kulapila.—Abena Roma 2:4.
18. Ni finshi Paulo apepeleko abena Kolose?
18 Muli kalata alembeele Abena Kristu ba ku Kolose, ku Asia Minor, Paulo alembele ukuti: “E ico na ifwe, ukufuma ku bushiku twaumfwile, tatwaleka kumupepela, no kulombo kuti mwisulemo ukwishibo kufwaya kwakwe mu mano yonse no mucetekanya ifya bumupashi, ku kuleka mwende umwawamina Shikulu ku kutemuna konse. Mu mulimo onse usuma mube abatwale fisabo, kabili abalekula mu kwishiba Lesa. Mube abakoshiwa ukukosa konse, umwabela amaka ya bukata bwakwe, ku kushipikisha konse no [kushishimisha, NW] pamo no kusekelela.”—Abena Kolose 1:9-11.
19, 20. (a) Kuti twataluka shani ku kumona ukushishimisha kwa kwa Yehova ngo bwesho? (b) Busuma nshi bukafumamo mu kushishimisha?
19 Ukushishimisha kwa kwa Yehova no kutekanya tafyakabe bwesho kuli ifwe nga ca kuti ‘twaisulamo ukwishibo kufwaya kwakwe,’ ukwa kuti ‘abantu bonse bakapusuke no kufika ku kwishibe cine.’ (1 Timote 2:4) Tukatwalilila ‘ukulatwala ifisabo mu mulimo onse usuma,’ maka maka uwa kushimikila “imbila nsuma iyi ya bufumu.” (Mateo 24:14) Nga ca kuti mu cishinka twatwalilila ukucite ci, Yehova akatulenga ‘twakoshiwa no kukosa konse,’ ukutulenga “ukushipikisha konse no kushishimisha pamo no kusekelela.” Nga tulecite fyo, ‘tukenda umwawamina Shikulu,’ kabili tukaba no mutende uwisa pa kwishiba ukuti ‘tulemutemuna monse.’
20 Natucetekele umupwilapo amano ya kwa Yehova ayaba mu kushishimisha kwakwe. Ukushishimisha kutuletela ipusukilo ne pusukilo lya bomfwa ku kushimikila kwesu no kusambilisha. (1 Timote 4:16) Nga twalundulula ifisabo fya mupashi pamo nga ukutemwa, icongwe, ubusuma, ukunakilila, ukuteko mutima tukalashishimisha no kusekelela. Tukekala na ba mu lupwa umutende pamo na bamunyinefwe ne nkashi aba mu cilonganino. Ukushishimisha kukatwafwa no kutekanya kubo tubomba na bo na bantu tusambilila na bo. Kabili ukushishimisha kwesu kukaba no bufwayo, ubwa kupususha ababifi no kulumbanya Lesa uushishimisha, Yehova.
[Futunoti]
a Ilyo alelanda pa fyebo Paulo asosele ifya kuti “ukutemwa kulashishimisha, kucite congwe,” Gordon D. Fee uwasoma Baibolo alembele ukuti: “Ukulingana ne cifundisho ca kwa Paulo [ukushishimisha ne congwe] fimininako imbali shibili isha mibele ya kwa Lesa ukulola ku bantu (cf. Rom. 2:4). Ukushipikisha kwa kutemwa ukwa kwa Lesa kulangwa pa kulama ubukali bwakwe kuli bacipondoka; lubali lumbi, icongwe cakwe cimoneka mu nshila ishingi isho alangilamo inkumbu. E co ubulondoloshi bwa kutemwa ubwa kwa Paulo butendeka ne fi fibili ifilondolola Lesa, uyo ukupitila muli Kristu alishipikisha no kuba ne congwe ku balingile ukupingulwa na wene.”
Bushe Kuti Mwalondolola?
• Ni mu nshila nshi Kristu abela ica kumwenako cishaiwamina ica kushishimisha?
• Cinshi cikatwafwa ukulundulula ukushishimisha?
• Ukushishimisha kwafwa shani indupwa, amabumba ya Bena Kristu, na baeluda?
• Bushe ukushishimisha kwesu kukatunonsha shani pamo na bambi?
[Icikope pe bula 15]
Nangu lintu atitikishiwe nga nshi, Yesu atekenye ku basambi bakwe
[Icikope pe bula 16]
Bakangalila ba Bwina Kristu bakonkomeshiwa ukuba ica kumwenako cisuma ica kushishimisha ilyo balebomba na bamunyinabo
[Icikope pe bula 17]
Nga twapashanya ukutemwa no kushishimisha kwa kwa Yehova, tukatwalilila ukushimikila imbila nsuma
[Icikope pe bula 18]
Paulo apepele ukuti Abena Kristu bafwile ‘ukushishimisha no kusekelela’