Yehova Ni Lesa Uushishimisha

“Yehova, Lesa wa nkumbu kabili uusenamina, uukokolo kukalipa, kabili uwafulisho luse.”—UKUFUMA 34:6.

1, 2. (a) Ni bani kale banonkelemo mu kushishimisha kwa kwa Yehova? (b) “Ukushishimisha” kupilibula nshi?

ABANTU ba mu nshiku sha kwa Noa, abena Israele baleenda mu matololo na Mose, abaYuda abaliko ilyo Yesu ali pe sonde—bonse bali mu mibele yalekanalekana. Lelo bonse balinonkelemo mu mibele isuma iya kwa Yehova iya kushishimisha. Kuli bamo, ukushishimisha kwakwe kwalibapuswishe. Kabili ukushishimisha kwa kwa Yehova kuti kwatupususha na ifwe bene.

² Bushe ukushishimisha cinshi? Ni lilali Yehova alanga ukushishimisha, kabili mulandu nshi? “Ukushishimisha kwalondololwa ukuti “kukokola ukukalipa, pamo no kutwalilila ukuba ne subilo te mulandu ne fyo ifintu fyabipa.” E co iyi mibele yalikwata ubufwayo. Itonta pa fingawamina uulufyenye. Lelo ukushishimisha takupilibula ukuti kutekelesha icalubana. Nga ca kuti ubufwayo bwa kushishimisha bwapwishishiwa nelyo nga ca kuti tapali umulandu wa kutwalilila ukushishimisha, uku kushishimisha kulapwa.

 3. Mulandu nshi Yehova ashishimishisha, kabili ukushishimisha kwakwe kufika pi?

³ Nangu ca kuti abantunse kuti bashishimisha, Yehova e ca kumwenako capulamo ica iyi mibele. Ukutula apo ulubembu lwaonawile bucibusa bwali pali Yehova na bantu abumbile, Kalenga wesu alilanga ukutekanya kabili alitantika inshila ya kuti abantunse abalapila bengawamishamo bucibusa na wene. (2 Petro 3:9; 1 Yohane 4:10) Lelo lintu ukushishimisha kwakwe kwabomba umulimo alefwaya, Lesa ali no kucitapo cimo pa ncitatubi sha ku mufulo, no kupesha buno bwikashi bubifi.—2 Petro 3:7.

Kumfwana ne Mibele ya kwa Lesa Iikalamba

 4. (a) Ishiwi lya kushishimisha lyalondololwa shani mu Malembo ya ciHebere? (Moneni no tulembo twa pe samba.) (b) Kasesema Nahumu alondolola shani Yehova, kabili ici cisokolola finshi pa kushishimisha kwa kwa Yehova?

⁴ Mu Malembo ya ciHebere, ishiwi ukushishimisha lilondololwa ku mashiwi ya ciHebere yabili ayapilibula “ubutali bwa myona” kabili yapilibulwa “ukukokola ukukalipa” muli Baibolo wa Cibemba.a Ilyo alelanda pa kushishimisha kwa kwa Lesa, kasesema Nahumu atile: “Yehova akokolo kukalipa, kabili mukulu ku maka, lelo ababifi te kuti atile ba kaele nakalya.” (Nahumu 1:3) E co ukushishimisha kwa kwa Yehova takupilibula ukuti alikwata ubunake kabili ukushishimisha kwakwe takutwalilila. Icishinka ca kuti Lesa wa maka yonse alakokola ukukalipa kabili mukulu ku maka cilanga ukuti ukushishimisha kwakwe kwaba no bufwayo. Alikwata amaka ya kukanda, lelo alasalapo ukukanakanda ilyo line pa kuti alenge ncitatubi ukuba ne shuko lya kwaluka. (Esekiele 18:31, 32) E co ukushishimisha kwa kwa Yehova kulanga ukuti aba no kutemwa, kabili kulanga na mano akwata mu fyo abomfya amaka yakwe.

 5. Ni mu nshila nshi ukushishimisha kwa kwa Yehova kumfwana no bulungi bwakwe?

⁵ Na kabili ukushishimisha kwa kwa Yehova kumfwana no bulungi bwakwe pamo no bulungami. Aisokolwele kuli Mose ukuti ni “Lesa wa nkumbu kabili uusenamina, uukokolo kukalipa [“uushishimisha,” King James Version] kabili uwafulisho luse ne cishinka.” (Ukufuma 34:6) Ilyo papitile imyaka, Mose alumbenye Yehova mu lwimbo ukuti: “Imibele yakwe yonse bupingushi: Lesa wa cishinka kabili uwabulo bupondamishi, uwalungama kabili uwatambalala.” (Amalango 32:4) Cine cine, inkumbu sha kwa Yehova, ukushishimisha, ubulungi, no bulungami fyonse fipwishishisha ifisuma.

Ukushishimisha kwa kwa Yehova Ilyo Ashilaleta Ilyeshi

 6. Bushinino nshi ubwa kusungusha ubwa kushishimisha Yehova alanga ku bufyashi bwa kwa Adamu na Efa?

⁶ Bucipondoka bwa kwa Adamu na Efa mu Edene bwaonawile umupwilapo bucibusa bwabo ubwacindama na Kalenga wabo uwa kutemwa Yehova. (Ukutendeka 3:8-13, 23, 24) Ukutaluka kuli Yehova kwakumine ubufyashi bwabo, ubwapyene ulubembu, ukukanapwililika, ne mfwa. (Abena Roma 5:17-19) Nangu ca kuti abantunse babili ababalilepo ukuupana babembukile ku mufulo, Yehova alibasuminishe ukufyala abana. Ilyo inshita yapitile, mu kutemwa apeele inshila ya kuti wene no bufyashi bwa kwa Adamu na Efa bawikishanye. (Yohane 3:16, 36) Umutumwa Paulo alondolwele ukuti: “Lesa asokololo kututemwa kwakwe kwine, pa kuti ilyo twali tucili ababembu Kristu alitufwilile. E ico, apo twalungamikilwa nomba ku mulopa wakwe, pali bufi tukapusukila muli wene ku bukali. Pantu nga twaba abawikishishiwa kuli Lesa pa mulandu wa mfwa ya Mwana wakwe ilyo twali abalwani, pali bufi apo twawikishiwa tukapusukila mu mweo wakwe.”—Abena Roma 5:8-10.

 7. Yehova alangile shani ukushishimisha ilyo ashilaleta Ilyeshi, kabili mulandu nshi twingasosela ukuti cali icalinga ukuti ilya nkulo ya pa ntanshi ya Lyeshi yonaulwe?

⁷ Ukushishimisha kwa kwa Yehova kwalimoneke mu nshiku sha kwa Noa. Imyaka ukucila pali 100 pa ntanshi ya Lyeshi, “Lesa aloleshe pano isonde, kabili, moneni, naponaika; ico abantunse bonse nabonaule mibele yabo pano isonde.” (Ukutendeka 6:12) Lelo, Yehova alangile ukushishimisha ku bantunse pa nshita. Atile: “Umupashi wandi te kuti wikalilile mu bantu mu kuluba kwabo; bena bantunse fye; inshiku shabo shikabe myaka umwanda umo na makumi yabili.” (Ukutendeka 6:3) Ilya myaka 120 yalengele Noa wa bucishinka ukukwata ulupwa—kabili lintu aebelwe pa lwa cipope ca kwa Lesa—ukukuula icibwato no kusoka abantu ba mu nshiku shakwe pa lwa Lyeshi lyali no kwisa. Umutumwa Petro alembele ukuti: “Ukutekanya [imibele yapalana no kushishimisha] kwa kwa Lesa kwalelolela mu nshiku sha kwa Noa pa kupekaniwa kwa cibwato, kuli ico aba mweo banono, e kutila cinekonsekonse, bapuswike ku menshi.” (1 Petro 3:20) Ca cine, abashali mu ba ng’anda ya kwa Noa “tabapoosele mano” ku fyo aleshimikila. (Mateo 24:38, 39, NW) Lelo ilyo alekele Noa ukukuula icibwato no kubomba napamo pa myaka iingi nga “kabila wa bulungami,” Yehova apeele abantu ba mu nshiku sha kwa Noa inshita ikalamba iya kulapila ku nshila shabo ishabipa no kutendeka Ukumubombela. (2 Petro 2:5; AbaHebere 11:7) E co cali icalinga lintu ilya nkulo ibifi yasukile yaonaulwa.

Ica Kumwenako ca Kushishimisha ku Bena Israele

 8. Yehova alangile shani ukushishimisha ku luko lwa Israele?

⁸ Yehova ashishimishe ku bena Israele imyaka ukucila pali 120. Mu myaka ukucila pali 1,500 iya bantu ba kwa Lesa abasalwa, ilingi abena Israele baleesha ukushishimisha kwa kwa Lesa. Ilyo papitile fye imilungu ukutula apo balubwililwe mu cipesha mano mu Egupti, batendeke ukupepo tulubi, ukulanga ukuti tabacindike nangu panono Umupusushi wabo. (Ukufuma 32:4; Amalumbo 106:21) Mu myaka yakonkelepo, abena Israele batendeke ukuilishanya pa lwa filyo Yehova alebapeela mu cipesha mano mu ciswebebe, bang’wintile Mose na Aarone, balelanda ifyabipa pali Yehova, kabili bacitile ubulalelale na basenshi, no kupepa Baali. (Impendwa 11:4-6; 14:2-4; 21:5; 25:1-3; 1 Abena Korinti 10:6-11) Yehova alikwete insambu sha konaula abantu bakwe, lelo alishishimishe.—Impendwa 14:11-21.

 9. Yehova alangile shani ukuti ni Lesa uushishimisha pa nshita lintu kwali Abapingushi na pa nshita lintu kwali ishamfumu?

⁹ Mu nshiku sha Bapingushi, abena Israele libili libili balewila mu kupepo tulubi. Ilyo bacitile co, Yehova talebacingilila ku balwani. Lelo lintu balapila no kulomba ukuti abafwe, aleshishimisha no kwimya abapingushi aba kubapususha. (Abapingushi 2:17, 18) Muli ilya myaka iingi lintu kwali ishamfumu, ishinono e shali ishaipeelesha kuli Yehova. Nangu lintu ishamfumu sha bucishinka shaleteka, abantu ilingi baletobekanya ukupepa kwa cine no kwa bufi. Lintu Yehova aimya bakasesema aba kusoka pa lwa kubulwa bucishinka, abantu ilingi balesalapo ukumfwa kuli bashimapepo ba mibele yabipa na bakasesema wa bufi. (Yeremia 5:31; 25:4-7) Na kuba, abena Israele bapakese bakasesema ba cishinka aba kwa Yehova no kwipayapo bamo. (2 Imilandu 24:20, 21; Imilimo 7:51, 52) Nalyo line, Yehova atwalilile ukushishimisha.—2 Imilandu 36:15.

Yehova Talekele Ukushishimisha

10. Ni lilali ukushishimisha kwa kwa Yehova kwafikile ku mpela?

¹⁰ Lelo ilyashi lya kale lilanga ukuti ukushishimisha kwa kwa Lesa kulapwa. Mu 740 B.C.E., alekele abena Ashuri ukutaasha ubufumu bwa mikowa ikumi ubwa bena Israele no kusenda abekashi ba buko bunkole. (2 Ishamfumu 17:5, 6) Kabili pa mpela ya mwanda wa myaka uwakonkelepo, alekele abena Babele ukwingilila ubufumu bwa mikowa ibili ubwa baYuda no konaula Yerusalemu ne tempele lya uko.—2 Imilandu 36:16-19.

11. Yehova ashishimishe shani na lintu alepingula?

¹¹ Nangu cibe fyo, na lintu alepingula Israele na Yuda, Yehova atwalilile ukushishimisha. Ukupitila muli kasesema wakwe Yeremia, Yehova asobele ulwa kubwesha abantu bakwe abasalwa. Atile: “Ilyo ikapwa ku Babele imyaka amakumi cinelubali, nkapempula imwe, ne cebo candi cisuma nkacifisha kuli imwe, ku kumubwesesha kuno kuntu. nkamoneka kuli imwe, . . . Kabili nkabwesha bunkole bwenu, nkamulonganya ukumufumya na mu nko shonse ne cifulo conse umo namutamfiishe.”—Yeremia 29:10, 14.

12. Ukubwela ku Yuda ukwa baYuda bashelepo kwawamine shani ukwisa kwa kwa Mesia?

¹² Abashelepo pa baYuda basendelwe bunkole balibwelele ku Yuda no kutendeka cipya cipya ukupepa Yehova mwi tempele lyakuulilwe na kabili mu Yerusalemu. Ilyo ubufwayo bwa kwa Yehova bwalefishiwapo, aba bashelepo bali no kuba ngo “mume uufuma kuli Yehova,” uuleta ukupembesula no lubanda. Na kabili bali no kushipa no kukwata amaka “nge nkalamo mu nama sha mu mutengo.” (Mika 5:7, 8) Aya mashiwi ya kulekelesha napamo yafishiwepo mu nshita ya baMakabe ilyo abaYuda baletekwa ku lupwa lwa baMakabe batamfishe abalwani babo mu Calo Calaiwe no kupeela itempele cipya cipya kuli Lesa, ilyo lyali ilya koweshiwa. E co icalo ne tempele fyalisungilwe pa kuti abashalapo bambi bengapokelela Umwana wa kwa Lesa lintu aba Mesia.—Daniele 9:25; Luka 1:13-17, 67-79; 3:15, 21, 22.

13. Nangu ni lintu abaYuda baipeye Umwana wakwe, Yehova atwalilile shani ukushishimisha?

¹³ Na lintu abaYuda baipeye Umwana wakwe, Yehova atwalilile ukushishimisha kuli bene pa myaka itatu na hafu, ukubapeela ishuko lyaibela ilya kuba ulubali lwa lubuto lwa ku mupashi ulwa kwa Abrahamu. (Daniele 9:27)b Ilyo umwaka wa 36 C.E., wali taulafika kabili nelyo wafikile, abaYuda bamo bapokelele ubu bwite, e co, nga fintu Paulo asosele, “kwaba abashalapo umwabelo kusala kwa kusenamina.”—Abena Roma 11:5.

14. (a) Mu 36 C.E., ni bani bapeelwe ishuko lya kuba ulubali lwa lubuto lwa kwa Abrahamu ulwa ku mupashi? (b) Paulo asosele shani pa fyo aleyumfwa pa nshila Yehova asalilemo aba muli Israele wa ku mupashi?

¹⁴ Mu 36 C.E., ishuko lya kuba ulubali lwa lubuto lwa kwa Abrahamu ulwa ku mupashi lyatambikwe ku bashali abaYuda nelyo insangu. Bonse abaleyankulako balepokelela icikuuku ca kwa Yehova no kushishimisha. (Abena Galatia 3:26-29; Abena Efese 2:4-7) Ilyo aletasha nga nshi pa mano no bufwayo ifilenga Yehova ukushishimisha no kuba uwa cikuuku, mwafuma impendwa yonse iya Israele wa ku mupashi, Paulo atile: “Iye, kushika kwa bucindami kabili ukwa mano kabili ukwa kwishiba ifya kwa Lesa! Ifya bupingushi fyakwe, ifyo fyabulo kupenengwamo! Ne mibombele yakwe, ifyo yabulo kulondololwa!”—Abena Roma 11:25, 26, 33; Abena Galatia 6:15, 16.

Ukushishimisha pa Mulandu we Shina Lyakwe

15. Mulandu nshi uukalamba Lesa ashishimishisha, kabili mulandu nshi walekabila ukukalululwa?

¹⁵ Mulandu nshi Yehova ashishimishisha? Umulandu ukalamba wa kulenga ishina lyakwe ilyashila ukulumbuka no kwebela bumulopwe bwakwe. (1 Samwele 12:20-22) Umulandu Satana aimishe uwakuma inshila Yehova abomfeshamo bumulopwe Bwakwe walekabila inshita pa kuti ukalululwe bwino pa cinso ca fibumbwa fyonse. (Yobo 1:9-11; 42:2, 5, 6) E co lintu abantu bakwe balecushiwa mu Egupti, Yehova aebele Farao ukuti: “Ni pali ici nakwimikila, pa kuti umone amaka yandi, kabili ku kulenge shina lyandi ukulumbulwa mu calo conse.”—Ukufuma 9:16.

16. (a) Ukushishimisha kwa kwa Yehova kwalengele shani abuulilamo ishina lyakwe abantu? (b) Ishina lya kwa Yehova likashishiwa shani kabili bumulopwe bwakwe bukebelwa shani?

¹⁶ Amashiwi Yehova aebele Farao yayambwilwe lintu umutumwa Paulo alondolwele ifyo ukushishimisha kwa kwa Lesa kubomba mu kucindikisha ishina Lyakwe ilyashila. Kabili Paulo alembele ukuti: “Lelo ni shani nga Lesa, pa kufwayo kulango bukali no kusokolola amaka yakwe, ashipikisha no [kushishimisha, NW] ukwingi ku fipe fya bukali ifyapekaniwa ku kulola ku boni? Kabili ni shani nga acite fi ukuti asokolole ubucindami bwa bukata bwakwe pa fipe fya luse ifyapekanishiwe libela ku kumono bukata, e kutila pali ifwe fwe bo aitile, te mu baYuda beka iyo, lelo na mu Bena fyalo pamo? Filya atila na muli Hosea, Abashali bantu bandi, nkabeta Abantu bandi.” (Abena Roma 9:17, 22-25) Pa mulandu wa kuti Yehova alishishimishe, abuulilemo “ishina lyakwe uluko lwa bantu.” (Imilimo 15:14) Pa kutungululwa no Mutwe wabo, Yesu Kristu, aba “abashila” baba ni mpyani sha Bufumu Yehova akabomfya ukushisha ishina Lyakwe ilikalamba no kwebela bumulopwe Bwakwe.—Daniele 2:44; 7:13, 14, 27; Ukusokolola 4:9-11; 5:9, 10.

Ukushishimisha kwa kwa Yehova kuleta Ipusukilo

17, 18. (a) Ni pa kucita cinshi twingalengulula Yehova pa kushishimisha kwakwe ukwabula ukwishiba? (b) Twakoseleshiwa ukumona shani ukushishimisha kwa kwa Yehova?

¹⁷ Ukutula apo umuntu awilile mu lubembu ukufika na lelo, Yehova alilanga ukuti ni Lesa uushishimisha. Ukushishimisha kwakwe ilyo Ilyeshi lishilaisa kwalengele kwaba inshita ya kusoka ne cibwato ca kupusukilamo ukukuulwa. Lelo ukushishimisha kwakwe kwafikile ku mpela, ne Lyeshi lyalishile. Cimo cine na lelo, Yehova alelanga ukushishimisha kukalamba, kabili nakucila na pa fyo bamo baleenekela. Lelo, uyu te mulandu wa kubela ababulwe subilo. Nga twabulwe subilo cimo no kulengulula Lesa pa kuba uushishimisha. Paulo aipwishe ati: “Ubucindami bwa congwe cakwe no kulafya kwakwe no kutekanya kwakwe, ulefisuula mwa? Bushe tawaishibo kuti icongwe ca kwa Lesa ca kukutwala ku kulapila?”—Abena Roma 2:4.

¹⁸ Tapali nangu umo pali ifwe uwingeshiba icipimo ca kushishimisha kwa kwa Lesa tukabila pa kuti tukabe abawaminwa ipusukilo. Paulo atufunda ‘ukubombela ipusukilo lyesu no mwenso no kututuma.’ (Abena Filipi 2:12) Umutumwa Petro alembeele Abena Kristu banankwe ukuti: “Shikulu talafyalafya ku kufishe co alaile, filya bamo batungo kulafyalafya; lelo atekanya kuli imwe pa kukanafwayo muntu ukonaika, lelo onse ukulola ku kulapila.”—2 Petro 3:9.

19. Ni nshila nshi twingabomfeshamo bwino ukushishimisha kwa kwa Yehova?

¹⁹ E co, twiba abashatekanya ku fyo Yehova abombela pa fintu. Lelo, natukonke ukufunda kwa kwa Petro na kumbi no ‘kutunga ukutekanya kwa kwa Shikulwifwe ukuti lipusukilo.’ Ipusukilo lya bani? Lyesu ne lya minshipendwa ya bantu abacili balekabila ukumfwa ku “mbila nsuma iyi ya bufumu.” (2 Petro 3:15; Mateo 24:14) Ici cikatwafwa ukutesha bwino ifyo Yehova ashishimisha nga nshi kuli ifwe no kutulenga ukushishimisha ilyo tulebomba na bambi.

[Amafutunoti]

Bushe Kuti Mwalondolola?

• Mu Baibolo “ukushishimisha” e kuti shani?

• Yehova ashishimishe shani ilyo Ilyeshi lishilaisa, pa numa ya bena Babele ukusenda abaYuda muli bunkole, na mu mwanda wa myaka uwa kubalilapo C.E.?

• Milandu nshi yacindama iyo Yehova alangila ukushishimisha?

• Tufwile ukumona shani ukushishimisha kwa kwa Yehova?

[Icikope pe bula 9]

Ukushishimisha kwa kwa Yehova ilyo Ilyeshi lishilaisa kwapeele abantu inshita ikalamba iya kulapila

[Icikope pe bula 10]

Ilyo Babele awile, abaYuda balinonkelemo mu kushishimisha kwa kwa Yehova

[Icikope pe bula 11]

Mu mwanda wa myaka uwa kubalilapo, abaYuda na bashali abaYuda balinonkelemo mu kushishimisha kwa kwa Yehova

[Ifikope pe bula 12]

Abena Kristu lelo balabomfya bwino ukushishimisha kwa kwa Yehova