Lekeni “Icebo Cenu Conse Cibe . . . Icalungwamo Umucele”
1. Bushe cipilibula cinshi ‘ukulungamo umucele mu fyebo fyesu’?
1 “Icebo cenu conse cibe ica kusenamina, icalungwamo umucele, ukuti mwishibe ifyo mufwile ukwasuka umuntu onse.” (Kol. 4:6) Ukulungamo umucele mu fyebo fyesu cipilibula ukusala amashiwi ayasuma aya kulanda kabili ayengalenga abantu ukusumina ifyo tulelanda. Kanshi calicindama ukucite fyo ilyo tuli mu mulimo wa mwi bala.
2. Bushe Yesu acitile shani pa kuti ashimikile umwanakashi umwina Samaria?
2 Ica Kumwenako ca kwa Yesu: Ilyo Yesu aikele mupepi ne cishima aletuusha, atendeke ukulanda no mwanakashi umwina Samaria uwaishile ku kutapa amenshi. Ilyo balelanshanya na Yesu uyu mwanakashi alepindikapo amashiwi ya fyo abaYuda na bena Samaria bashaleumfwana pa nshita iitali. Na kabili uyu mwanakashi alelanda ifyo asumine ukuti abena Samaria batuntwike kuli Yakobo, nangu ca kutila abaYuda bena balelanda ukuti abena Samaria batuntwike ku bena fyalo. Ukucila ukulabikana ifikansa no mwanakashi, Yesu alelanda nankwe mu cikuuku. Ici calengele umwanakashi na bantu abali mu musumba ukunonkelamo mu fyo Yesu ashimikile.—Yoh. 4:7-15, 39.
3. Bushe kuti twacita shani ifyo Yesu acitile, ilyo tuli mu mulimo wa mwi bala?
3 Ilyo tuleshimikila tufwile ukulaibukisha umulandu ‘tubilila imbila nsuma iya fisuma.’ (Rom. 10:15) Tufwaya ukwebako abene ba ng’anda ifyebo ifisuma kabili ifingabakoselesha ukufuma mu Baibolo. Lelo ilyo tulelanda nabo tatufwile ukumoneka kwati tulelengulula ifyo basuminamo. Nga ca kutila ifyo balelanda fyapusana ne fyo Baibolo ilanda, tatufwile ukubasuka apo pene fye. Bushe mu fyebo balanda muli ifisuma ifyo mwingasuminishanya nabo nelyo ifyo mwingabatashishapo? Napamo kuti mwabelenga ilembo no kulanda ukuti, “Bushe ifi twabelenga pali ili lembo, muletontonkanya ukuti kuti fyacitika?”
4. Bushe kuti twacita shani nga ca kutila umwine wa ng’anda wa musaalula?
4 Kuti twacita shani nga ca kuti umwine wa ng’anda alelanda kuli ifwe ifya musaalula nelyo alefwaya fye ukuti tulekansana? Tufwile ukutwalilila fye ukuba abanakilila mu fyo tulecita ne fyo tulesosa. (2 Tim. 2:24, 25) Nga ca kuti umwine wa ng’anda tatemwa imbila ya Bufumu iyo tulemweba, kuti cawama mu mucenjelo twamusha.—Mat. 7:6; 10:11-14.
5. Ni shani fintu nkashi umo aimwenene ubusuma bwa kwasuka ukwafuuka?
5 Ifya Kufumamo Ifisuma: Ilyo nkashi afwaile ukushimikila ku mwina mupalamano wakwe, umwanakashi alikalipe no kulanda amashiwi ayabipa sana. Nkashi yesu ayaswike mu kunakilila ukuti: “Cabipa ukuti e fyo muleyumfwa. Mukwai shalenipo.” Pa numa ya milungu ibili, ulya mwanakashi akonkweshe pa ciibi ca kwa nkashi, no kulomba ubwelelo pa fyo acitile, kabili aebele nkashi ukuti nomba kuti afwaya ukukutika ku fyo alalanda. Ilingi line mulafuma ifisuma mu kwasuka ukwafuuka!—Amapi. 15:1; 25:15.
6. Mulandu nshi cacindamina ukulanda amashiwi ayasuma ayalungwamo umucele lintu tuli mu mulimo wa mwi bala?
6 Muleesha na maka ukulanda amashiwi ayasuma ayalungwamo umucele lintu mulebila imbila nsuma ku bantu. Nangu umwine wa ng’anda talefwaya ukukutika, nalimo ku ntanshi akafwaya sana ukwisakutika lintu Inte sha kwa Yehova bakamutandalila.