Icebo ca kwa Yehova ca Mweo
Ifyo Twingafwaisha Ukwishiba mu Makalata ya kwa Yohane ne ya kwa Yuda
AMAKALATA yatatu aya mutumwa Yohane yaba pa mabuuku ya kulekeleshako ayaba mu Malembo ya mushilo. Yafwile yalembelwe mu 98 C.E. ku Efese. Amakalata ya kubalilapo yabili yakoselesha Abena Kristu ukulaenda mu lubuuto no kulalwisha ubusangu. Muli kalata ya butatu, Yohane talandile fye pa kulaenda mu cine lelo akoseleshe na Bena Kristu ukulaikatana.
Muli kalata iyo alembeele ku Palestine, nalimo muli ba 65 C.E., munyina wa kwa Yesu Yuda asokele Abena Kristu banankwe pa lwa bantu babi abasokeleele mu cilonganino, abapandile na mano pa fya kulwisha ukusonga kwa bantu babipa. Ukubika sana amano ku makalata yatatu aya kwa Yohane na kuli kalata ya kwa Yuda kuti kwatwafwa ukuba abakosa mu citetekelo nangu kube amafya.—Heb. 4:12.
MULE-ENDA MU LUBUUTO NA MU KUTEMWA E LYO NA MU CITETEKELO
Muli kalata ya kwa Yohane iya kubalilapo umwaba ifyebo ifyo alembeele ku ba mu lukuta bonse ulwa muli Kristu, mwaliba ukufunda ukwa kwafwa Abena Kristu ukulwisha ubusangu no kuba abakosa mu kutungilila icine no bulungami. Abakonkomeshe ukulaenda mu lubuuto, mu kutemwa e lyo na mu citetekelo.
Yohane alembele ati: “Nga tule-enda mu lubuuto nga filya [Lesa] na o aba mu lubuuto, ninshi tulomfwana na banensu.” Apo Lesa e Ntulo ya kutemwa, umutumwa atile: “Natuletemwana.” “Ukutemwa Lesa” e kulenga “tulekonka amafunde yakwe,” lelo tucimfya icalo pa mulandu wa “citetekelo cesu” muli Yehova Lesa, mu Cebo cakwe, e lyo na mu Mwana wakwe.—1 Yoh. 1:7; 4:7; 5:3, 4.
Amasuko ku Mepusho ya mu Baibolo:
2:2; 4:10—Ni mu nshila nshi Yesu abela “ilambo lya kufuta”? Ukufuta calola mu kuti “ukunakilisha,” nangu “ukutontolola.” Yesu atuulile ubumi bwakwe pamo nga ilambo pa mulandu wa kuti ilyo acitile ifi, alinakilishe, nangu ukukumanisha ifyalefwaikwa pa kuti pabe umulinganya wafikapo. Pa mulandu wa ili ilambo, Lesa kuti abelela uluse, kabili kuti aeleela imembu sha batetekela muli Yesu.—Yoh. 3:16; Rom. 6:23.
2:7, 8—Lifunde nshi Yohane alelandapo ilyo atile ilya “kale” ne “lipya”? Yohane alelanda pe funde lya kutemwa aba bwananyina ukwa kuipeelesha (Yoh. 13:34) Alitile ukuti ifunde lya “kale” pantu ukutula apo Yesu abapeleele ili funde palipitile imyaka ukucila pali 60 e lyo Yohane atendeke ukulemba kalata yakwe iya kubalilapo iyapuutwamo. E ico kanshi, abasumine muli Kristu balikwete ili funde “ukufuma ku kutendeka,” ilyo baali Abena Kristu. Ili funde na kabili “lipya” pantu lyena talyapepela fye pa kutila “uletemwa umunobe nge fyo waitemwa we mwine,” lelo lifwaya ukutemwa kwa kuipeelesha.—Lebi 19:18; Yoh. 15:12, 13.
3:2—Finshi ifyo Abena Kristu basubwa ‘bashilaishiba’ kabili nani uo bakamona “ifyo aba”? Ifyo bashilaishiba, fintu bakaba nga babuushiwa ukuya ku muulu mu mibili ya mupashi. (Fil. 3:20, 21) Lelo ico baishiba ca kuti, “ilyo [Lesa] akamoneka [bakaba] nga ena, pantu [bakamunona] ifyo aba,” e kutila, “Umupashi.”—2 Kor. 3:17, 18.
5:5-8—Bushe amenshi, umulopa, e lyo no mupashi fyacitiile shani ubunte bwa kuti “Yesu Mwana wa kwa Lesa”? Amenshi yalicitiile ubunte pantu ilyo Yesu abatishiwe mu menshi, Yehova umwine alilandile ukuti Yesu Mwana Wakwe. (Mat. 3:17) Umulopa wa kwa Yesu, nangu ubumi, ubwapeelwe ukuba “icilubula icalinganako pa mulandu wa bonse,” na o walangilile ukuti Yesu Mwana wa kwa Lesa. (1 Tim. 2:5, 6) E lyo umupashi wa mushilo na o walicitiile ubunte ukuti Yesu Mwana wa kwa Lesa ilyo waikiile pali ena pa kubatishiwa, wamupeele amaka ya kuya “monse alecita icisuma no kuposha bonse abatitikishiwe na Satana Kaseebanya.”—Yoh. 1:29-34; Imil. 10:38.
Ifyo Twingasambililako:
2:9-11; 3:15. Nga ca kuti Umwina Kristu aleka icintu icili conse camulenga ukuleka ukutemwa aba bwananyina, ninshi ale-enda mu mfimfi ya ku mupashi, kabili ninshi teshibe no ko aleya.
LYONSE ‘MULE-ENDA MU CINE’
Pa kutampa ukulemba kalata yakwe iyalenga bubili Yohane atile: “Ine ne mukalamba nalembela nakulubantu uwasalwa na bana bakwe.” Alitemenwe pa kusanga “abana [ba kwa nakulubantu] bamo bale-enda mu cine.”—2 Yoh. 1, 4.
Pa numa ya kubakoselesha ukuti baletemwana, Yohane alembele ati: “Ukutemwa kwalola mu kuti tulecita ifintu ukulingana na mafunde yakwe.” Na kabili Yohane abasokele pali “kabepa kabili e mukaanya Kristu.”—2 Yoh. 5-7.
Amasuko ku Mepusho ya mu Baibolo:
1, 13—Bushe “nakulubantu uwasalwa nani”? Nalimo Yohane alelanda pa mwanakashi umo fye uo baletila Kyria, icalola mu kuti “nakulubantu” mu ciGriki. E lyo limbi kuti alandiile fye mu nsoselo pa kulanda pa cilonganino cimo pa kuti engafulunganya abalecusha Abena Kristu. Nga ca kuti alelanda pa cilonganino cimo, ninshi abana bakwe balingile ukuba bantu ba mu cilonganino e lyo “abana ba kwa nkashi [mbiye]” kuti baba bantu ba mu cilonganino na cimbi.
7—Bushe ‘bakabepa’ bakaana shani ukuti Yesu alishile? Aba bakabepa tabasumina ukuti alishile mu buntu. Nalimo balakaana fye no kuti alikeelepo pano calo no kuti alisubilwe no mupashi wa mushilo.
Ifyo Twingasambililako:
2, 4. Ukwishiba “icine”—e kutila, amasambililo ya Bwina Kristu yonse ayaba mu Baibolo —e lyo no kulayakonka kwalicindama nga tulefwaya ukupusuka.—3 Yoh. 3, 4.
8-11. Nga tulefwaya “icikuuku, uluse no mutende ukufuma kuli Lesa Shifwe na kuli Yesu Kristu,” e lyo no kwampana kusuma ukwa ba bwananyina, tufwile ‘ukucenjela’ pa kuti tutwalilile mwi sambilisho lya kwa Kristu no kukaana bonse “abapula mwi sambilisho lya kwa Kristu.”—2 Yoh. 3.
TULEBOMBELA PAMO MU CINE
Kalata yalenga butatu iyo Yohane alembele, alungatike ku munankwe Gai. Atile: “Takuli icintu nangu cimo icinsansamusha nga nshi ukucila pa kumfwa ukuti abana bandi bale-enda mu cine.”—3 Yoh. 4.
Yohane atasha Gai pa mulandu wa kuba ‘uwa cishinka mu fyo abombela’ aba bwananyina abeni. Umutumwa atile,“Tufwile ukupokelela bwino aba musango yu, pa kuti tube ababomfi banabo mu cine.”—3 Yoh. 5-8.
Amasuko ku Mepusho ya mu Baibolo:
11—Mulandu nshi bamo bacitila ifyabipa? Icilenga ca kuti, tababa abakosa mu kupepa, bamo tabamona Lesa na menso yabo aya mampalanya. Apo te kuti bamumone na menso yabo fye aya yene, bacita ifintu kwati nalimo Lesa tabamona.—Esek. 9:9.
14—Ni “bacibusa” nshi abalandwapo? Insoselo ya kuti “bacibusa” muli lino ilyashi tailanda fye ku fibusa ifyatemwana sana. Yohane aloseshe ku ba bwananyina bonse fye.
Ifyo Twingasambililako:
4. Abantu abakosoka mu cilonganino balatemwa sana nga bamona abaice mu cilonganino “bale-enda mu cine.” Abafyashi na bo balakwata insansa ishishaifulila nga bamona ukuti nabaafwa abana babo ukuba ababomfi ba kwa Yehova!
5-8. Pa babombesha sana mu kubombela bamunyinabo pa mulandu wa kubatemwa no kutemwa Yehova, paba bakangalila benda, bamishonari, ababomba mu mayanda ya pa Bethel nangu pa maofeshi ya Nte sha kwa Yehova e lyo na bapainiya. Calilinga ukupashanya icitetekelo cabo, kabili twalinga ukulabafwilisha.
9-12. Tulingile ukupashanya Demetri uwali uwa cishinka, lelo tatulingile ukupashanya Diotrefe, uwalelanda amashiwi yabipa, kabili uwali uwa bufi.
“IKALILILENI MU KUTEMWA KWA KWA LESA”
Yuda alondolwele abalesokelela mu cilonganino ukuti bantu “abailishanya, balailishanya pa mikalile yabo, abenda ukulingana ne fya lunkumbwa fyabo.” ‘Balanda ifya matutumuko, ilyo balecindika abantu bamo pa kuti bamwenemo.’—Yuda 4, 16.
Bushe Abena Kristu kuti bacita shani pa kuti bakaane ukusonga kwa bantu babipa? Yuda alembele ati: “Mwe batemwikwa, ibukisheni amashiwi ayo abatumwa ba kwa Shikulwifwe Yesu Kristu balandile.” Alundilepo no kuti: “Ikalilileni mu kutemwa kwa kwa Lesa.”—Yuda 17-21.
Amasuko ku Mepusho ya mu Baibolo:
3, 4—Cinshi calengele ukuti Yuda akonkomeshe Abena Kristu “ukulwila icitetekelo”? Pantu ‘abantu abashalepepa balisokeleele mu cilonganino.’ Aba bantu ‘balesangula icikuuku ca kwa Lesa ukuba akabepekesho ka kucitilamo ifya nsoni.’
20, 21—Kuti twacita shani pa kuti ‘twikalilile mu kutemwa kwa kwa Lesa’? Kuti twacita ifi mu nshila shitatu: (1) ukuikosha fwe bene mu ‘citetekelo ca mushilo sana’ ukupitila mu kulasambilila sana Icebo ca kwa Lesa no kulabombako sana umulimo wa kubila imbila nsuma; (2) ukulapepela “mu mupashi wa mushilo,” nangu ukulingana ne fyo ubomba; e lyo na (3) ukuba ne citetekelo mu cingalenga mube no mweo wa muyayaya, ne ci, lilambo lya cilubula ilya kwa Yesu Kristu.—Yoh. 3:16, 36.
Ifyo Twingasambililako:
5-7. Bushe abantu babipa kuti bapusuka ubupingushi bwa kwa Yehova? Ukulingana ne fya kumwenako fitatu ifyalembele Yuda, te kuti bapusuke nakalya.
8-10. Tulingile ukupashanya Mikaele malaika mukalamba no kukwata umucinshi ku bo Yehova apeela amaka.
12. Abasangu abaifungushanya bamoneka kwati balitutemwa, kuti baonaula icitetekelo cesu filya fine amabwe ayabelama mu menshi yengonaula ingalaba nangu ukucena abaleowa inshiki. Bakafundisha wa bufi kuti bamoneka kwati ni bakapekape, lelo baba fye nga makumbi umwabula amenshi pa mulandu wa kuti tabaishiba Icebo ca kwa Lesa nangu panono. Aba bantu, te bantu bene bene, baba fye nge miti yabule fisabo iya pa mwela. Bakonaulwa nga filya ciba ku miti iyo bashula. Tufwile ukutaluka abasangu.
22, 23. Abena Kristu ba cine balipata ifyabipa. Pa kwesha ukupusushako “bamo abatwishika” ku mulilo wa bonaushi bwa muyayaya, abakosoka mu cilonganino—maka maka bakangalila—balabafwilisha lwa ku mupashi.
[Ifikope pe bula 28]
Amenshi, umupashi, no mulopa fyacitiile ubunte ukuti “Yesu Mwana wa kwa Lesa”